COVID-19 ရောဂါနဲ့ ပတ်သက်ပြီး ကူးစက်ခံရသူများကို စောင့်ရှောက်ပေးနေတဲ့ ကျန်းမာရေး ဝန်ထမ်းများ၊ ပရဟိတ လုပ်ကိုင်နေကြသူများကို ဂုဏ်ပြုတဲ့အနေနဲ့ “တန်ဖိုးရှိတဲ့ နှလုံးသားများ” သီချင်း သီဆိုဖြစ်ခဲ့တဲ့အကြောင်း ထွန်းအိန္ဒြာဗိုက အခုလိုပဲ ပြောပါတယ်။

“တန်ဖိုးရှိတဲ့ နှလုံးသားများ” သီချင်းကို ပုံဖော်ဖြစ်တာက ကပ်ရောဂါကာလမှာ လူတယောက်က ရောဂါရှိသည်ဖြစ်စေ၊ မရှိသည်ဖြစ်စေ မသိနိုင်တဲ့အခါမှာ ရောဂါကို ကူညီပြီး ကုပေးနေရတဲ့သူတွေကို ကြောက်ကြတဲ့အတွက် သူတို့အဆောင် ပြန်ငှားရင် ငှားမရတာတို့ ကျမ Facebook ပေါ်မှာ တွေ့တယ်။ ကျမ စိတ်မကောင်းလည်း ဖြစ်မိတယ်”

“တန်ဖိုးရှိတဲ့ နှလုံးသားများ” သီချင်း

“အဲ့အတွက် ကျန်းမာရေးပညာရှင်များ၊ ဝန်ထမ်းများ၊ INGO, NGO အဖွဲ့အစည်းများ၊ Volunteer များ၊ ပရဟိတအသင်းများ အားလုံးက အားကိုး ယုံကြည်ရတဲ့ သူတို့ကို ဂုဏ်ယူချင်တဲ့အနေနဲ့ ဆိုဖြစ်တာပါ။ ပရိသတ်တွေက ဒီသီချင်းလေးကို ကြိုက်ကြတယ်။ ဒီသီချင်းပေါက်တယ်လို့ ပျော်တာထက် ဝိုင်းဝန်း ဂုဏ်ပြုပေးကြတယ်လို့ မြင်ပါတယ်”လို့ ထွန်းအိန္ဒြာဗိုက ဧရာဝတီကို ပြောပါတယ်။

ကိုယ်တိုင်လည်း အိမ်မှာ နေတဲ့အချိန် အဆိုတော် တင်ဇာမော်နဲ့အတူ ဆိုထားတဲ့ သီချင်းတပုဒ်ကို အွန်လိုင်းကနေ ဖြန့်ချိဖို့ အစီအစဉ်ရှိတယ်လို့ ဆိုပါတယ်။

“Stay Home ကာလမှာ ပြီးခဲ့တဲ့ ရက်ပိုင်းထိတော့ အိမ်မှာပဲ နေဖြစ်ပါတယ်။ အခုရက်ပိုင်း Lockdown တွေလည်းပွင့်ပြီ ဆိုတော့ အလုပ်တွေ ပြန်လုပ် ဖို့စဉ်းစားနေတယ်။ အလုပ်ကတော့ လူစုလူဝေးနဲ့ လုပ်တဲ့ အလုပ်တော့ မဟုတ်ဘူးပေါ့။ ကျမနဲ့ တင်ဇာမော်နဲ့ အွန်လိုင်းက လွှင့်ဖို့ သီချင်း ရှိတယ်။ အဲ့ဒါလေး စီစဉ်နေပါတယ်”လို့ ဆိုပါတယ်။

COVID-19 ရောဂါကို ကာကွယ်ဖို့ အပြင်ထွက်ရင် မဖြစ်မနေ Mask တပ်ကြဖို့ လိုအပ်တယ်လို့လည်း ထွန်းအိန္ဒြာဗိုက ဆိုပါတယ်။

“Mask မတပ်ကြတာတွေ ရှိတယ်။ အဲ့လို မြင်ရတာ စိတ်မကောင်းဖြစ်ပါတယ်။ ဒီရောဂါပိုးကို မမြင်နိုင်လို့ မတပ်ကြဘူးဆိုတာတော့ ကျန်းမာရေး အသိနည်းတယ်လို့ပဲ ပြစ်တင်ရမလို ဖြစ်နေပါတယ်။ လိုအပ်တဲ့ စေခိုင်းတဲ့ ကိစ္စတွေ လိုက်နာရမှာပေါ့ရှင်”

“ကိုယ်တိုင် Mask တပ်ခြင်းဖြင့်၊ တဖက်က Mask တပ်ခြင်းဖြင့် ရောဂါကူးစက်ဖို့ကို တားဆီးနိုင်ပါတယ်။ ကျမတို့ အသက်ရှုပေါက်ကနေပဲ ရောဂါတွေက ဝင်တာဆိုတော့ ရောဂါ ဝင်နိုင်ထွက်နိုင်တဲ့ နေရာကို ပိတ်တာ အကောင်းဆုံးပါပဲ။ အပြင်ထွက်ရင် Mask တပ်ကို တပ်ရပါမယ်”လို့ ထွန်းအိန္ဒြာဗိုက ပြောပါတယ်။

မကြာခင် ဇာတ်ကားတွေ ပြန်ရိုက်ကူးဖို့ တောင်းဆိုနေကြသူတွေ ရှိတဲ့အပေါ်ကိုလည်း ထွန်းအိန္ဒြာဗိုက အခုလိုပဲ ဆိုပါတယ်။

“ဇာတ်ကားတွေ ပြန်လည် ရိုက်ကူးဖို့ဆိုတာ သေချာ စိတ်မချရဘဲတော့ ရိုက်ကူးခွင့်ပေးမယ် မထင်ပါဘူး။ ရိုက်ကူးခွင့် မပေးရင်တော့ ရိုက်ကြမယ် မထင်ပါဘူး။ မတော်တဆ ခိုးရိုက်ရင်တော့ ခိုးရိုက်သူများရဲ့ တာဝန်ပါပဲ။ ပရိသတ်တွေလည်း အန္တရာယ် အမျိုးမျိုးကနေ ကင်းဝေကြပါစေ။ ကျန်းမာချမ်းသာကြပါစေ”လို့ ထွန်းအိန္ဒြာဗိုက ပြောပါတယ်။

You may also like these stories:

၁ လတိတိ အချိုရည် မသောက်တဲ့ Challenge စတင်လိုက်တဲ့ ယွန်းယွန်း

ထိုင်းမှာ ကိုဗစ် ကာကွယ်ဆေးကို လာမယ့်နှစ် အဆင်သင့်ဖြစ်ဖို့ မျှော်လင့်

The post “တန်ဖိုးရှိတဲ့ နှလုံးသားများ” သီချင်းအကြောင်း ပြောပြတဲ့ ထွန်းအိန္ဒြာဗို appeared first on ဧရာဝတီ.

နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ဦးဆောင် ပြုလုပ်တဲ့ Mask ပြိုင်ပွဲမှာ ပြည်သူတွေနဲ့အတူ အနုပညာရှင်တွေ၊ ဒီဇိုင်နာတွေလည်း ဝင်ရောက် ယှဉ်ပြိုင်ခဲ့ကြပါတယ်။

ဒီပြိုင်ပွဲမှာ မန္တလေးမှ ဒီဇိုင်နာ မျိုးမင်းစိုးကလည်း သူကိုယ်တိုင် ဖန်တီးချုပ်ထားတဲ့ ကြာချည်မျှင်၊ သဘာဝ ဆိုးဆေးတို့နဲ့ ပြုလုပ်ထားတဲ့ Mask ဖြင့် ပါဝင်ယှဉ်ပြိုင်ခဲ့ပြီး ပြည်သူ အနှစ်သက်ဆုံး ဆု ၃ ဆုမှာ ဒုတိယဆုကို ရရှိခဲ့ပါတယ်။ Mask ပြိုင်ပွဲ ဝင်ပြိုင်ဖြစ်ပုံနဲ့ ပတ်သက်ပြီး ဒီဇိုင်နာ မျိုးမင်းစိုးက ဧရာဝတီကို အခုလိုပဲ ပြောပါတယ်။

“အမေစုရဲ့ Mask ပြိုင်ပွဲမှာ ပါဝင်ဖြစ်တာက ကျနော်က ဒီဇိုင်နာတယောက် ဖြစ်နေတာရယ်၊ ဒီလို အခြေအနေမျိုးမှာ ကိုယ်တတ်နိုင်သလောက် တတ်အားသရွေ့ ပါဝင်ချင်တာကြောင့် ဝင်ပြိုင်ဖြစ်တာပါ။ ကျနော်က ကြာချည်မျှင်နဲ့ လတ်တလောမှာ အလုပ်လုပ်နေတော့ ကြာချည်တွေ ရက်ထားတာ အဆင်သင့်ရှိတဲ့အတွက် ကြာချည်နဲ့ Mask လုပ်မယ်လို့ စိတ်ကူးလေး ရခဲ့တယ်”

“ကြာချည်အောက်မှာ ခံတာက ချည်သား၊ အဲ့ချည်ကလည်း သဘာဝဆိုးဆေးနဲ့ လုပ်ထားပါတယ်။ အလယ်မှာလည်း အမှုန်အမွှားကို မဝင်နိုင်အောင် ခံမယ့်အရာဆိုလည်း ကျနော့် သူငယ်ချင်း ဆရာဝန်တွေနဲ့ သေချာတိုင်ပင်ပြီး ကျန်းမာရေးနဲ့ ညီညွတ်အောင် ချုပ်ထားတာပါ”လို့ ဒီဇိုင်နာ မျိုးမင်းစိုးက ဧရာဝတီကို ပြောပါတယ်။

ဒီပြိုင်ပွဲကိုတော့ ဆုရချင်လို့ ဝင်ပြိုင်တာ မဟုတ်ဘဲ ကိုယ်တိုင်က ဒီဇိုင်နာတယောက် အနေနဲ့ အခုလိုပြိုင်ပွဲမှာ ဝင်ပြိုင်သင့်တယ် ထင်တာကြောင့် ပါဝင်ဖြစ်တာလို့ ဆိုပါတယ်။

“ဆုရချင်လို့ ဝင်ပြိုင်တာလည်း မဟုတ်ပါဘူး။ ဒီဇိုင်နာတယောက် ဖြစ်နေတော့ ချုပ်တတ်နေတဲ့ ဒီဇိုင်နာ တယောက်က ပါဝင်သင့်တာကြောင့် ကြာနဲ့ ချုပ်တယ်ဆိုတာကို ပြချင်တာကြောင့် ဝင်ပြိုင်တာပါ။ ဆုရဖို့ဆိုတဲ့ သက်သက်ကြီး မျှော်လင့်ချက်နဲ့ ပြိုင်တာ မဟုတ်ပါဘူး။ ဒီဇိုင်နာ ဝင်ပြိုင်တာကို ဝေဖန်နေကြတဲ့ အပေါ်မှာတော့ ဘာမှပြောစရာ မရှိပါဘူး”

“ဒီဇိုင်နာဆိုတာ ကျနော်တို့က ချုုပ်လုပ်နေကြသူဆိုတော့ အခုလို Mask အတွက် ကျနော်တို့တွေ ပါဝင်သင့်ပါတယ်။ ဒီဇိုင်နာတွေလည်း ပါဝင် ယှဉ်ပြိုင်ကြပါတယ်။ အခုလို ဆုရရှိအောင်လည်း Like တွေ ပေးကြတဲ့ တဦးတယောက်ချင်းစီကိုလည်း ရင်ထဲက လှိုက်လှိုက်လှဲလှဲ ကျေးဇူးတင်ပါတယ်”လို့ မျိုးမင်းစိုးက ပြောပါတယ်။

ပြိုင်ပွဲပြီးနောက် Mask တွေ ဈေးကျသွားတာ အရမ်းကောင်းမွန်တယ်လို့လည်း မျိုးမင်းစိုးက ပြောပါတယ်။

“အမေစုက ထူးချွန် ထက်မြက်တဲ့ မြန်မာအမျိုးသမီးတယောက်လို့ မြင်ပါတယ်။ အမေစု Mask ပြိုင်ပွဲပြီးတဲ့နောက်မှာ Mask တွေ ဈေးကျသွားတာ ပြည်သူထဲက ပြည်သူတယောက်အနေနဲ့ အရမ်းကောင်းမွန်တယ်လို့ ကျနော် မြင်ပါတယ်။ အရင်ကဆို ဈေးကြီးကြီးနဲ့ ပေးဝယ်ရတယ်”

“အဝတ်နဲ့ ချုပ်တာက လုံခြုံမှု မရှိဘူးဆိုလို့ မချုပ်ဖြစ်ပါဘူး။ အခုလို အမေစု ချုပ်ပြတော့ ကျနော်တို့ လိုက်ချုပ်ကြတယ်။ မတပ်တာထက်စာရင် တပ်တာက စိတ်ချရတယ်။ အဲ့အတွက် အခုလို ပြိုင်ပွဲလုပ်တာက အရမ်းကောင်းပါတယ်”လို့ မျိုးမင်းစိုးက ဆိုပါတယ်။

ဒီဇိုင်နာ မျိုးမင်းစိုးကတော့ မြန်မာနိုင်ငံက နာမည်ကြီး ဒီဇိုင်နာတဦးဖြစ်ပြီး ရွှေသားဝတ်စုံများ၊ ကျောက်မျက် ရတနာများနဲ့ ချုပ်လုပ်တဲ့ ဝတ်စုံများ ဖန်တီးရာမှာ ထင်ရှားသူတဦး ဖြစ်ပါတယ်။

You may also like these stories:

အနုပညာရှင်တွေ ဈေးရောင်းလို့ ဝေဖန်ခံရတဲ့အပေါ် မခံစားတော့တဲ့ နှိုင်းယှဉ်မြင့်မိုရ်

Mask ပြိုင်ပွဲ ဝင်ပြိုင်ခဲ့ပေမယ့် ဆုနဲ့လွဲချော်ခဲ့တဲ့ Mrs Universe ဟန်နီချို

ဒေါ်အောင်ဆန်းစုကြည်ရဲ့ Mask ပြိုင်ပွဲကို ဝင်ပြိုင်ထားတဲ့ ချောစုခင်

The post “ဆုရချင်လို့ ဝင်ပြိုင်ခဲ့တာ မဟုတ်ဘူး”လို့ ဒီဇိုင်နာ မျိုးမင်းစိုး ပြော appeared first on ဧရာဝတီ.

၂၀၀၈ ခုနှစ်ကနေ ၂၀၁၁ ခုနှစ်အထိ တွဲခဲ့ကြတဲ့ ချစ်သူနှစ်ဦးဖြစ်တဲ့ ကိုရီးယားမင်းသား ဟွန်ဘင်းနဲ့ မင်းသမီး ဆောင်းဟေဂိုတို့ ပြန်တွဲနေကြပြီလို့ ဆိုတဲ့ ကောလာဟလသတင်းတွေ ထွက်ပေါ်လာပါတယ်။ ပြီးခဲ့တဲ့နှစ်မှာ ခင်ပွန်းဟောင်း မင်းသား ဆောင်းဂျွန်ကီနဲ့ ကွာရှင်းခဲ့တဲ့ မင်းသမီး ဆောင်းရဲ့ အချစ်ရေးကို ပရိသတ်တွေက တော်တော်လေး စိတ်ဝင်စားနေခဲ့ကြပါတယ်။

ဇာတ်လမ်းတွဲတခုမှာ အတူတွဲသရုပ်ဆောင်ခဲ့ဖူးတဲ့ မင်းသားပတ်ဘိုဂွန်းနဲ့ အချစ်ရေး သတင်းကောလာလဟ ထွက်ခဲ့ပေမယ့် မင်းသားပတ်က အသက် ၃၈ နှစ် အရွယ် မင်းသမီး ဆောင်းနဲ့ ပတ်သက်မှု တစုံတရာ မရှိတဲ့အကြောင်း ငြင်းဆန်ခဲ့ပါတယ်။

မကြာသေးခင်တုန်းကတော့ အင်တာနက် အသုံးပြုသူတွေက မင်းသမီးဆောင်းဟာ “Crash Landing On You” ဒရာမာစတား မင်းသားဟွန်ဘင်းနဲ့ တိတ်တဆိတ်ပြန်တွဲနေတယ်လို့ဆိုပြီး သံသယရှိလာခဲ့ကြတာ ဖြစ်ပါတယ်။ ပြီးခဲ့တဲ့ ၂၀၀၈ ခုနှစ်မှာပြသခဲ့တဲ့ “The World They Live In” ဒရာမာမှာ အတူတူ သရုပ်ဆောင်ခဲ့ပြီးတဲ့နောက် ချစ်သူတွေ ဖြစ်နေကြပြီဆိုတဲ့ ကောလာဟလသတင်းတွေ ထွက်ပေါ်ခဲ့ပေမယ့် ၂၀၀၉ ခုနှစ်ရောက်မှသာ သူတို့ နှစ်ဦးရဲ့ အချစ်ရေးကို အတည်ပြုခဲ့တာဖြစ်ပါတယ်။

၂၀၁၁ ခုနှစ်မှာတော့ မင်းသမီး ဆောင်းနဲ့ မင်းသား ဟွန်ဘင်းတို့ဟာ မင်းသား စစ်မှု မထမ်းမီ အချိန်မှာပဲ လမ်းခွဲလိုက်ကြပြီလို့ ကြေညာခဲ့ပါတယ်။

အဲ့ဒီအချိန်တုန်းက သူတို့ရဲ့ အေဂျင်စီကတော့ နှစ်ဦးသားရဲ့ များပြားတဲ့ အချိန်ဇယားတွေနဲ့ ပရိသတ်တွေရဲ့ စိတ်ဝင်စားမှုကြောင့် ရရှိခဲ့တဲ့ ဖိစီးမှုတွေကြောင့် လမ်းခွဲလိုက်ရတာ ဖြစ်တယ်လို့ ရှင်းပြခဲ့ပါတယ်။ ပြဿနာ တစုံတရာ မရှိခဲ့ပေမယ့် လမ်းခွဲဖို့သာ ဆုံးဖြတ်ခဲ့ရတာဖြစ်တယ်လို့လည်း ဆိုပါတယ်။

မကြာသေးခင်တုန်းက မင်းသမီး ဆောင်းရဲ့ သူငယ်ချင်း မင်းသမီး ပတ်ဆောမီက “The World They Live In” ရဲ့ဇာတ်ဝင်တေးသီချင်း Screenshot တခုကို ဆိုရှယ်မီဒီယာမှာ တင်ခဲ့ရာကနေ အစပြုလို့ ကောလာဟလသတင်းတွေ ထွက်လာခဲ့ပါတယ်။

မင်းသမီးဆောင်းက “ညီမလေး ဟား ဟား ဟား” ဆိုပြီး မှတ်ချက်ပေးခဲ့ပါတယ်။ အင်တာနက် အသုံးပြုသူတွေက မင်းသမီးဆောင်းနဲ့ မင်းသား ဟွန်ဘင်းတို့ ပြန်တွဲနေကြပြီလားလို့ မေးမြန်းတဲ့အခါမှာတော့ သူဟာ မှတ်ချက်ပေးတဲ့ နေရာကို ချက်ချင်း ပိတ်ပစ်ခဲ့ပါတယ်။

အဲ့ဒီကနေစလို့ သံသယတွေ ထပ်မံကြီးထွားလာခဲ့ပါတယ်။ အခုလအစောပိုင်းမှာတော့ မင်းသမီးဆောင်းဟာ ကြော်ငြာရိုက်ကူးရေးအတွက် မင်းသား ဟွန်ဘင်း ရောက်ရှိနေတဲ့ နေရာနဲ့ ဆင်တူတဲ့ နေရာတခုရဲ့ ဓာတ်ပုံကို Instagram မှာ တင်ခဲ့ပါတယ်။

မင်းသမီးတင်ခဲ့တဲ့ တခြားဓာတ်ပုံတခုမှာတော့ သူငယ်ချင်းဖြစ်သူနဲ့အတူ Selfie ဓာတ်ပုံ ရိုက်နေခဲ့တဲ့ အနေအထားကို မြင်တွေ့ရပါတယ်။ အဲ့ဒီဓာတ်ပုံထဲမှာ မင်းသမီးဟာ အင်္ဂလိပ် အက္ခရာ S နဲ့ H ပါတဲ့ လည်ဆွဲတခုကို ဝတ်ဆင်ထားခဲ့ ပါတယ်။ S ဟာ မင်းသမီး ဆောင်းဟေဂိုရဲ့ မျိုးရိုးနာမည်ကို ကိုယ်စားပြုပြီး H ဟာ မင်းသား ဟွန်ဘင်းကို ဆိုလိုတယ်လို့ အင်တာနက်အသုံးပြုသူတွေက မှတ်ချက်ချခဲ့ပါတယ်။

Ref: todayonline

The post ဆောင်းဟေဂိုနဲ့ ဟွန်ဘင်း ပြန်တွဲနေတယ်လို့ ကောလာဟလ သတင်းထွက် appeared first on ဧရာဝတီ.

နာမည်ကျော် ဘောလိဝုဒ်မင်းသား ရှာရွတ်ခန်ဟာ သူ့ရဲ့ အနုပညာလုပ်ငန်းထဲမှာ အကျော်ကြားဆုံး ပုဂ္ဂိုလ်ဖြစ်ပြီး နာမည်ကျော်ကြားမှု အရှိန်အဟုန်ကို အချိန်အကြာဆုံး ထိန်းထားနိုင်သူတဦးလည်း ဖြစ်ပါတယ်။

မကြာသေးမီက ပြုလုပ်ခဲ့တဲ့ အင်တာဗျူးတခုမှာတော့ မင်းသားဟာ စူပါစတားဖြစ်ရတဲ့ဘဝအကြောင်း၊ မင်္ဂလာပွဲတွေမှာ သီဆို ဖျော်ဖြေမှုအကြောင်း၊ ရုပ်ရှင်တွေ ရွေးချယ်ရတဲ့ အကြောင်းနဲ့ တခြား အရေးအရာကိစ္စတွေကို ပြောဆိုခဲ့ပါတယ်။ သူ့ရဲ့ အင်တာဗျူး ဖြေဆိုချက်တွေထဲမှာ ထူးခြားမှုရှိတဲ့ အချက်လေးတွေကို ပြောပြပေးမှာ ဖြစ်ပါတယ်။

မင်းသား ခန်က သူဟာ မနက်ပိုင်းကို အိပ်ရာထရပြီး ဘယ်အလုပ်တွေ မပြီးစီးသေးဘူးဆိုတာကို စစ်ဆေး လုပ်ဆောင်ရတဲ့အတွက် စူပါစတား တယောက်ဖြစ်ရတာဟာ တော်တော်လေးကို ခက်ခဲတယ်လို့ ဆိုပါတယ်။ ထို့အတူ လက်ထပ်ခြင်းဟာ လွယ်ကူပေမယ့် အဲ့ဒီအရာကို ကြာရှည်ခံအောင် ထိန်းသိမ်းရတာဟာ ခက်ခဲတယ်လို့လည်း ပြောပါတယ်။

သားသမီးရရှိတာဟာ လွယ်ကူပြီး သူတို့တွေကို လူလားမြောက်အောင် ပျိုးထောင်ရတာက ခက်ခဲတယ်လို့လည်း ဆိုပါတယ်။ စူပါစတား တယောက်ဟာ ဖြစ်ချင်တဲ့ ဆန္ဒတွေ ကြီးမားရင် ကြီးမားလာသလောက် တနေ့ကို အချိန် ၈၉ နာရီလောက်ရဖို့ ကြိုးစားရတယ်လို့လည်း ဆိုပါတယ်။

မင်းသားဟာ လူတွေ စားသောက်နေတဲ့အချိန် စင်ပေါ်မှာ ကပြနေရတာမျိုးကို မကြိုက်တဲ့အတွက် မင်္ဂလာပွဲတွေမှာ ဖျော်ဖြေတာမျိုး မလုပ်ဘူးလို့လည်းဆိုပါတယ်။ ဒါပေမဲ့ ဘောလိဝုဒ်ရုပ်ရှင်တွေထဲမှာ သီချင်း တပုဒ် ရိုက်ကူးသလို အားကစားကွင်းထဲမှာ ဆိုရင်တော့ သီဆို ကပြဖြစ်မယ်လို့ ပြောပါတယ်။

သူ့ရဲ့ အနုပညာကြေး မြင့်ရတဲ့အကြောင်းအရင်းက သူ့ရဲ့ တန်ကြေးကြောင့် မဟုတ်ဘဲ သူတည်ဆောက်ခဲ့ရတဲ့ အနုပညာဝမ်းစာကြောင့်သာ ဖြစ်တယ်လို့ထုတ်ပြောပါတယ်။

ဘောလိဝုဒ် ဘုရင်လို့ တင်စားကြတဲ့ မင်းသား ရှာရွတ်ခန်ဟာ အသက် ၅၄ နှစ်ရှိပြီဖြစ်ပြီး ဘောလိဝုဒ် ရုပ်ရှင်ပေါင်း ၈၀ ကျော်မှာ ပါဝင်သရုပ်ဆောင်ထားသူဖြစ်ပါတယ်။

အမြင့်ဆုံးအနုပညာဆုဖြစ်တဲ့ Filmfare ဆုပေါင်း ၁၄ ခုအပါအဝင် ဆုပေါင်းများစွာကို ရရှိထားပြီး အိန္ဒိယအစိုးရနဲ့ ပြင်သစ်အစိုးရတို့ကနေ ချီးမြှင့်တဲ့ အမြင့်ဆုံးဆုတွေကိုလည်း ရရှိထားပါတယ်။ ဒီဇိုင်နာ Gauri Chibber နဲ့ ၁၉၉၁ ခုနှစ်မှာ လက်ထပ်ခဲ့ပြီး သားသမီး ၃ ဦး ထွန်းကားခဲ့ပါတယ်။

Ref: pinkvilla

You may also like these stories:

အိန္ဒိယအတွက် ကိုဗစ် ရန်ပုံငွေ ရှာဖွေမှုမှာ ရှာရွတ်ခန် ပါဝင်

ဘောလိဝုဒ်မင်းသား Irrfan Khan ကွယ်လွန်ပြီ

The post မင်္ဂလာပွဲတွေမှာ သီဆိုဖျော်ဖြေတာမျိုးလုပ်မှာ မဟုတ်ဘူးလို့ ရှာရွတ်ခန် ပြော appeared first on ဧရာဝတီ.

COVID-19 ကပ်ရောဂါ ဖြစ်ပွားနေချိန် ခက်ခဲတဲ့ အနုပညာရှင်တွေ တွေ့ရင် စိတ်မကောင်းဘူးလို့ ဇာတ်ပို့ ဇာတ်ရံ သရုပ်ဆောင် အိတုံက ဆိုပါတယ်။

“ရုပ်ရှင်အစည်းအရုံးက စားနပ်ရိက္ခာတွေ လှူဒါန်းပေးတော့ ကျေးဇူးတင်တာပေါ့။ အခုချိန်မှာ ကျမတို့ အတွက် အများကြီး အထောက်အကူပြုတယ်။ အဆင်မပြေတဲ့သူတွေအတွက် တပတ်စာ၊ ၁၅ ရက်စာ ရတော့ လှူတဲ့သူတယောက်ချင်းစီကို ကျေးဇူးတင်ပါတယ်”

“ကျမကတော့ အရမ်းမခက်ခဲဘူး။ ကျမ ယောကျာ်းကလည်း ဝန်ထမ်းဆိုတော့ ဝင်ငွေလေးရှိတော့ အရမ်းမခက်ခဲသွားဘူး။ ကိုယ့်ထက်ခက်ခဲတဲ့ အနုပညာရှင်တွေ တွေ့ရင် စိတ်မကောင်းဘူး။ ကျမတို့ အနုပညာရှင်တွေလည်း အားတင်းထားပါ။ ပြန်ကောင်းလာမှာပါ”အိတုံက ပြောပါတယ်။

အနုပညာသမားတွေ ဈေးရောင်းနေကြတာကို ဝေဖန်နေကြတဲ့အပေါ် သရုပ်ဆောင် အိတုံက အခုလိုပဲ ပြောပါတယ်။

“အနုပညာရှင်ဆိုတာလည်း လူထဲကလူပဲမို့ အနုပညာမှ မလုပ်ရင် မလုပ်တတ်ကြဘူး။ ကိုယ်တိုင်လည်း မလုပ်တတ်ပေမယ့် ရှေ့နည်းနည်းလေး စောပြီးလုပ်လိုက်သလို ဖြစ်တာကြောင့် မှန်သွားတယ်။ အနုပညာ မလုပ်ရရင် ဘာလုပ်ရမှန်း မသိဘူး။ အွန်လိုင်းခေတ်ဆိုတော့ အွန်လိုင်းကနေ ရောင်းရင် ရောင်းရမယ်ဆိုတာသိနေတော့ သူတို့အတွက် အဆင်ပြေမှာလေးတွေ ရောင်းကြတာပေါ့”

“သူတို့တွေလည်း အဆင်မပြေတဲ့ကာလမို့ လုပ်တာပါ။ အနုပညာသမားက အနုပညာနဲ့ စီးပွားရေး ဘယ်ဟာရွေးမလဲဆို အနုပညာကိုပဲ ရွေးကြမှာပါ။ အဲ့တော့ အားလုံးကို အပြစ်မမြင်စေချင်ပါဘူး။ အပြစ်မြင်တဲ့သူတွေကိုလည်း ဘာမှမပြောလိုပါဘူး”လို့ အိတုံက ပြောပါတယ်။

လက်ရှိမှာတော့ အိတုံဟာ သမီးလေး ၁ ဦးကို ပိုင်ဆိုင်ထားပြီး ဒုတိယမြောက် လွယ်ထားရတဲ့ ကိုယ်ဝန်ကိုတော့ သားလေး လိုချင်တယ်လို့ ဆိုပါတယ်။

“ကိုယ်ဝန်ကိုတော့ OG မပြရသေးဘူး။ OG မှာသွားပြတော့ ကိုယ်ဝန်ဆောင်တွေ အရမ်းများတော့ မပြရဲဘူး။ လိုအပ်တဲ့ အားဆေးတွေ အမျိုးသားက ဝယ်ပေးတယ်။ တခုခုဆို ပြောလို့ မရဘူး။ အခုချိန်မှာ ရောဂါတွေ ဖြစ်နေတာကြောင့် ကြောက်နေတာနဲ့ မပြရဲသေးဘူး။ ဘယ်နှစ်လမှန်းတော့ သေချာမသိသေးဘူး။ ခန့်မှန်း ၃၊ ၄ လလောက်တော့ ရှိပြီ”

“ကိုယ်ဝန်ရှိပြီ သိလိုက်တော့ ကြောက်တာပေါ့။ မွေးထားတဲ့ ကလေးတယောက်တောင် ဘယ်လို မွေးရဆိုပြီး မသိသေးဘူး။ နောက်တယောက် ရောက်လာမှာကို ကြောက်တာပေါ့။ အခုတော့ မကြောက်တော့ဘူး။ ကိုဗစ်ကာလမှာ အလုပ်လည်း အဆင်မပြေသေးချိန် ကိုယ်ဝန်ဆောင်တယ်ဆိုတာ မှန်တယ်လို့ပဲတွေးလိုက်တယ်။ ကျမက သားလေးလိုချင်တာ၊ သမီးနဲ့ အမျိုးသားကတော့ သမီးလေး ဖြစ်စေချင်ကြတယ်”လို့ အိတုံက ပြောပါတယ်။

သရုပ်ဆောင် အိတုံကတော့ ယခင်က ရုပ်ရှင်နဲ့ ဗီဒီယို ဇာတ်ကားပေါင်းများစွာမှာ ဇာတ်ပို့ ဇာတ်ရံ တဦးအနေနဲ့ ပါဝင် သရုပ်ဆောင်ခဲ့ပြီး လက်ရှိအချိန်မှာတော့ ဇာတ်ကားများ အရိုက်နည်းသွားချိန် အွန်လိုင်းမှာ Live လွှင့်ကာ ဈေးရောင်းနေသူလည်း ဖြစ်ပါတယ်။

The post “အနုပညာရှင်တွေ ဈေးရောင်းကြတာကို အပြစ်မမြင်စေချင်ဘူး” appeared first on ဧရာဝတီ.

ဇာတ်ပို့ သရုပ်ဆောင် အေးအေးခိုင်ကတော့ အမေရိကားမှာ ကျောင်းတက်နေတဲ့ သားကို စိတ်မပူရဘဲ သားဖြစ်သူက သူ့ကို ပြန်စိတ်ပူနေတယ်လို့ ဧရာဝတီကို ဆိုပါတယ်။

“သားသားက အမေရိကားမှာပါ။ သားသားက သူ့အစ်ကို နှစ်ယောက် ရှိတယ်။ ကျမရဲ့ အစ်မလည်း ရှိတယ်ဆိုတော့ စိတ်အေးရတယ်။ သားသားကို စိတ်ချရတယ်။ သူကတောင် ကျမကိုပြန်ပြီး စိတ်ပူနေတာ။ သူတို့ဆီမှာဖြစ်ပြီ ဆိုကတည်းက ကျမကို ဘာလုပ်ရမယ်ဆိုပြီး မှာနေတာ။ ကိုယ်ကတောင် ပြောစရာ မလိုဘူး။ သူတို့က သိတယ်။ သူက အခုလူကြီးလေးလို ဖြစ်သွားတော့ ကိုယ်က သူ့ မပူရဘူး”

“အကုန်လုံးက ပြန်လာလို့ မရဘူး။ သူတို့ဆီမှာအခုက နွေရာသီပေါ့။ သားနဲ့တော့ Video call ပဲ ပြောရတာပေါ့။ အဲ့ချိန်ကျရင် ကျမရဲ့ အစ်မရော တူလေးတွေရော ပြန်လာတတ်ကြတယ်။ ဒီနှစ်ကတော့ ကျမတို့ မိသားစုတွေ မဆုံရဘူးပေ့ါ”

“ဟိုမှာက နယူးယောက်မှာဖြစ်တာ သားသားတို့ နေတဲ့ နားမှာ သိပ်မဖြစ်ဘူး။ သားသားတို့နဲ့ ဝေးတယ်။ ကျမ အစ်မကလည်း သားကို အရမ်းဂရုစိုက်တယ်။ ဒီဇင်ဘာမှာ ကပ်ကြီးပြီးသွားရင်တော့ ဆုံမှာပေါ့။ မဟုတ်ရင်တော့ နောက်နှစ်မှပဲ ဆုံရမှာပေါ့ ”လို့ အေးအေးခိုင်က ဧရာဝတီကို ပြောပါတယ်။

လက်ရှိ COVID-19 ကာလမှာ အနုပညာရှင်တွေ ဈေးရောင်းနေကြတာကို ဝေဖန်နေကြတဲ့အပေါ်လည်း အေးအေးခိုင်က အခုလိုပဲ ဆိုပါတယ်။

“အနုပညာသမားတွေ ဈေးရောင်းနေတာကို ဝေဖန်နေတာ တွေ့တယ်။ ဘယ်သူ့မှလည်း အပြစ်မပြောချင်ပါဘူး။ ဝေဖန်တဲ့သူကလည်း သူ့ဝါသနာအရ ဝေဖန်တယ်။ အနုပညာသမားက အနုပညာ မလုပ်ရင် ဘာလုပ်စားကြမလဲ။ ဇာတ်ပို့ ဇာတ်ရံတွေက ဗီဒီယိုဈေးကွက် ပျက်ကတည်းက အဆင်မပြေကြတာပါ။ သူတတ်တဲ့ ပညာလေးနဲ့ လုပ်စားတာလေ”

“ကောင်းရောင်း ကောင်းဝယ်လုပ်စားတာလေ။ ပင်လယ်ရေက တယောက်တည်း သောက်လို့ မရပါဘူး။ နေရာတိုင်းမှာလည်း ဆိုင်တွေရှိနေတာပဲ။ တလမ်းမှာ တဆိုင်ပဲ လုပ်ရမယ်လို့ ဘယ်သူက အမိန့်ချထားလို့လဲ။သူ့မိတ်နဲ့သူပဲလေ။ သူ့အကြိုက်နဲ့သူပဲလေ။ အဲ့တော့ ရောင်းနေတဲ့ အနုပညာရှင်တွေလည်း သူတို့ သမာအာဇီဝ လုပ်စားတာ အားပေးရမယ်။ အနုပညာသမားက ဝန်ထမ်းမဟုတ်ဘူး။ လစာဝင်ငွေရယ် မရှိဘူးလေ”

“ကားရိုက်ရှိမှ ပိုက်ဆံရမှာ။ ကားရိုက် မရှိရင် ပိုက်ဆံမရဘူးလေ။ အခုလို ဈေးရောင်းတာကို အပြစ်မမြင်ကြပါနဲ့။ ကိုယ့်အခက်အခဲတွေနဲ့မို့ ကောင်းရောင်းကောင်းဝယ် အလုပ်လုပ်တာကိုပဲ အားပေးတယ်။ ချစ်တဲ့သူကလည်း ချစ်၊ မုန်းတဲ့သူကလည်း အမုန်းမြင်နေမှာပဲ။ အဲ့တော့ ဘာမှ မပြောလိုပါဘူး”လို့ အေးအေးခိုင်က ပြောပါတယ်။

အေးအေးခိုင်ကတော့ ဟာသသရုပ်ဆောင် အနေနဲ့ ရုပ်ရှင်နဲ့ ဗီဒီယိုဇာတ်ကားတွေမှာ ပါဝင် သရုပ်ဆောင်နေသူပါ။ မကြာသေးခင်ကလည်း “ဆူးပန်းခွေ သွယ်ဘယက် ပေရွက်လိပ် နားတောင်းဆင်” ဇာတ်လမ်းတွဲမှာ မကြာဥအဖြစ် သရုပ်ဆောင်ခဲ့သူပါ။ အေးအေးခိုင်ရဲ့သားကတော့ ဉာဏ်သွေးဟန် ဖြစ်ပြီး လက်ရှိ အမေရိကားမှာ ကျောင်းတက်နေသူ ဖြစ်ပါတယ်။

You may also like these stories:

“အနုပညာရှင်တွေ ဈေးရောင်းကြတာကို အပြစ်မမြင်စေချင်ဘူး”

မင်္ဂလာပွဲတွေမှာ သီဆိုဖျော်ဖြေတာမျိုးလုပ်မှာ မဟုတ်ဘူးလို့ ရှာရွတ်ခန် ပြော

The post “အမေရိကားမှာ ကျောင်းတက်နေတဲ့ သားကို စိတ်မပူရဘူး”လို့ အေးအေးခိုင် ပြော appeared first on ဧရာဝတီ.

COVID–19 ကာလ စီးပွားရေးများ ကျပ်တည်းနေကြချိန်မှာ အနုပညာများစွာ ဈေးရောင်းလာကြတာကို တွေ့မြင်ရပါတယ်။ အဲ့ဒီလို ဈေးရောင်းကြတဲ့အပေါ် လူအချို့က ဝေဖန်ကြတဲ့အတွက် ကိုယ်တိုင်က ဈေးမရောင်းပေမယ့် သူ့ရဲ့အမြင်ကို ဇာတ်ပို့ သရုပ်ဆောင် ရဲမွန်က အခုလိုပဲ ပြောပါတယ်။

“ကိုယ့်အခက်အခဲကို ကိုယ့်နည်းကိုယ့်ဟန်နဲ့ ဖြေရှင်းကြတာပေါ့။ ဒါကတော့ ကောင်းပါတယ်။ တချို့ကလည်း ဈေးရောင်းနေကျ လူတွေက မရောင်းရဘဲ အနုပညာရှင်တွေက ဈေးရောင်းတယ်ဆိုတော့ သူများအလုပ် ဝင်လုတယ်လို့ ရေးတာတွေ တွေ့တယ်။ ဒါပေမဲ့ တဖက်မှာကြည့်ပြန်တော့ အနုပညာသမားတင် မဟုတ်ပါဘူး။ စီးပွားရေးသမားတွေလည်း အခက်အခဲနဲ့ ရင်ဆိုင်နေကြရတာတွေ ရှိတဲ့အတွက် ကိုယ့်အခက်အခဲကို ကိုယ့်နည်းကိုယ့်ဟန်နဲ့ ဖြေရှင်းရတာလို့ တဖက်မှာလည်း ခံစားချက်တွေ ရင်ဖွင့်ထားတာ တွေ့တယ်”လို့ ရဲမွန်က ပြောပါတယ်။

ဆက်လက်ပြီး ရဲမွန်က “အဲ့တော့ နှစ်ဦးနှစ်ဖက်ကတော့ သူ့အမြင် ကိုယ့်အမြင်လေးတော့ ရှိကြမှာပေါ့။ ကျနော်ကတော့ ဘာမှ မပြောလိုပါဘူး။ ရောင်းနိုင်တဲ့သူက ရောင်းကြ။ ဝယ်စားနိုင်တဲ့သူက ဝယ်စားမယ်။ ကိုယ့်အခက်အခဲကို ကိုယ့်နည်းကိုယ့်ဟန်နဲ့ ဖြေရှင်းတာဆိုတော့ ဘာမှ မပြောလိုပါဘူး”လို့ ပြောပါတယ်။

အခုအချိန်မှာ အကုန်လုံးက ဒုက္ခရောက်နေတဲ့အချိန် ဖြစ်တဲ့အတွက် အချင်းချင်း အားပေးဖို့ ခက်ခဲပြီး အသက်နဲ့ရင်းပြီး ကူညီပေးနေတဲ့သူတွေထက်စာရင် တော်သေးတယ်လို့ ဆိုပါတယ်။

“ဒီအချိန်မှာတော့ အချင်းချင်း အားပေးဖို့ကတော့ တော်တော်တော့ ခက်တယ်။ အကုန်လုံးက ဒုက္ခရောက်နေကြတာ။ ကျနော်ဆိုလည်း ဒီတိုင်းပဲထိုင်ပြီး စားနေရတဲ့ အနေအထားဆိုတော့ တတ်နိုင်သလောက်တော့ အားမလျော့အောင် ကိုယ့်ထက် ဒုက္ခရောက်တဲ့သူတွေလည်း အများကြီး ရှိတယ်”

“ကိုယ့်ထက် အပင်ပန်းခံပြီးတော့ အသက်နဲ့ရင်းပြီးကူညီပေးနေတဲ့ ဆရာဝန်တွေ၊ သူနာပြုတွေ၊ ကြက်ခြေနီတွေ၊ Ambulance အဖွဲ့တွေ ၊ ပရဟိတအဖွဲ့တွေရော အများကြီးပေါ့နော်။ သူတို့တွေဆို ကျနော်တို့ထက်လည်း ပင်ပန်းတယ်။ အန္တရာယ်လည်း များတယ်။ အဲ့တော့ အဲ့လို လူတွေထက်စာရင် အများကြီး တော်သေးတယ်လို့ ပြောရမှာပေါ့” လို့ ရဲမွန်က ပြောပါတယ်။

တခြားသူတွေလို ဈေးရောင်းဖို့အတွက်တော့ အစီအစဉ် မရှိသေးဘဲ သူငယ်ချင်းများနဲ့ စုပေါင်းပြီး ပြုလုပ်ထားတဲ့ ပရဟိတအဖွဲ့လေးမှတဆင့် အဆင်မပြေတဲ့သူတွေကို လှူဒါန်းပေးနေတယ်လို့ ဆိုပါတယ်။

“အစီအစဉ်တော့ မရှိသေးဘူး။ ခက်တာက အချက်အပြုတ်ကျတော့လည်း ကျနော်က ကျွမ်းကျွမ်းကျင်ကျင် မချက်တတ်ဘူး။ မချက်တတ်တော့ ဖြစ်လာမယ် မထင်ဘူး။ ဒီကြားထဲမှာတော့ ကျနော်တို့ သူငယ်ချင်း၊ မိတ်ဆွေတွေ တနိုင်တပိုင် ပရဟိတ အဖွဲ့လေး ဖွဲ့ထားတယ်။ သင်္ကြန်မတိုင်ခင်က ဆန်တွေ၊ ဆီတွေ၊ ခေါက်ဆွဲခြောက်တွေ၊ စားစရာတွေ လှူဖြစ်တယ်။ အယောက် ၁၀၀ ကျော်ကို လှူဖြစ်တယ်။ ကျနော်တို့က အနုပညာသမားဖြစ်နေတော့ လူတွေအမြင်မှာ ဒီလောက်ကတော့ မခက်ခဲလောက်ဘူးလို့ ထင်မှာပေါ့”

“တကယ်တမ်းခက်ခဲတဲ့ အနုပညာရှင်တွေ အများကြီး ရှိပါတယ်။ တယောက်နဲ့တယောက် ပြန်မျှကြရတာပေါ့။ ကျနော်တို့တိုင်းပြည်မှာ ချစ်ဖို့ကောင်းတာက ဘာလဲဆိုရင် တခုခုဆို လှူမယ့် အလှူရှင်တွေက အများကြီး တွေ့ရတယ်။ ဟိုနေရာမှာ လှူတယ်၊ ဒီနေရာမှာ လှူတယ်။ လှူကြတာပေါ့နော်။ ဝမ်းသာစရာကောင်းပါတယ်။ ကျနော်တို့ ကပ်ဆိုးကြီးထဲမှာမှ မြင်ရတဲ့ ဝမ်းသာစရာတခုပေါ့” လို့ ရဲမွန်က ပြောပါတယ်။

ရဲမွန်ကတော့ ရုပ်ရှင်၊ ဗီဒီယိုဇာတ်ကားများနဲ့ ဇာတ်လမ်းတွဲတွေမှာ ပါဝင် သရုပ်ဆောင်နေတဲ့ ဇာတ်ပို့ သရုပ်ဆောင်တဦး ဖြစ်ပါတယ်။

You may also like these stories:

ဒေါ်အောင်ဆန်းစုကြည်ရဲ့ Mask ပြိုင်ပွဲကို ဝင်ပြိုင်ထားတဲ့ ချောစုခင်

“အနုပညာရှင်တွေ ဈေးရောင်းကြတာကို အပြစ်မမြင်စေချင်ဘူး”

The post အနုပညာရှင်တွေ ဈေးရောင်းကြတဲ့အပေါ် ဇာတ်ပို့ ရဲမွန်ရဲ့အမြင် appeared first on ဧရာဝတီ.

နယ်ပရိသတ်များစွာရဲ့ အားပေးမှုကို ရရှိထားတဲ့ သရုပ်ဆောင်ဆောင်းအိန္ဒြေထွန်းကတော့ အခုအချိန်မှာ ချစ်ရမယ့်သူမရှိဘဲ တကိုယ်တည်းဖြစ်နေပေမယ့် အရင်က ချစ်သူတယောက်ရှိခဲ့ပြီး ယူခါနီးမှာ ကွယ်လွန်သွားခဲ့တာလို့ ဆိုပါတယ်။

“အခုကျမမှာ ရည်းစားလည်း မရှိဘူး။ ပြီးတော့ ကျမရဲ့ချစ်သူ ဘောလုံးအသင်းဥက္ကဋ္ဌကလည်း ကြိုက်ခါနီးမှာဆုံးသွားတယ်။ သူနဲ့လည်း မယူဖြစ်လိုက်ဘူး။ ယူဖြစ်ရင်တော့ ပိုကောင်းတာပေါ့။ နဂိုကတည်းက အဆက်အစပ်မရှိဘူး။ အဲ့တုန်းက အသက် ၃၀ကျော်မှ ချစ်သူတယောက်တွေ့တာဆိုတော့ သူများတွေဆို ကိုယ့်အရွယ်မှာ ရည်းစား ၃ ၊ ၄ယောက်တွေ့ပြီးပြီ။ ကိုယ်ကရည်းစားကို မထားလိုက်ရဘူး။ ချစ်သူကလည်း ဆုံးသွားတော့လေ” လို့ ဆောင်းအိန္ဒြေထွန်းကပြောပါတယ်။

ဆက်လက်ပြီး “ပြီးတော့ ကျမက အခုတွေ့အခုမကြိုက်တတ်တာ။ ကြာမှကြိုက်တာ ၂နှစ် ၃နှစ်လောက်လေ့လာပြီးမှ လူတယောက်ကိုကြိုက်တတ်တယ်။ ကျမက ရိုးရိုးသားသားတွေ ကြိုက်တတ်တယ်။ ကိုယ်ကလည်း အနုပညာ အလုပ်လုပ်တယ်။ ကိုယ်ကြိုက်တာကလည်း ရိုးရိုးသားသားတွေဆိုတော့ အဲ့လိုဆိုရင်တော့ တွေ့မယ်လေ” လို့ ပြောပါတယ်။

ယခင်က ချစ်သူဖြစ်ခါနီးမှ ဆုံးပါးသွားတဲ့သူတယောက်အပြင် မရှိခဲ့ဘဲ အနုပညာလုပ်နေတဲ့ သက်တမ်းတလျှောက်လည်း အချစ်ရေးနဲ့ပတ်သက်ပြီး ကောလာဟလမထွက်ခဲ့ဘူးလို့ ဆိုပါတယ်။

“ကျမက အနုပညာသာလုပ်တာလေ။ ၃၅လမ်းမှာဆိုရင် ဆောင်းအိန္ဒြေထွန်း ဘယ်ဒါရိုက်တာနဲ့ဖြစ်တယ်တော့ ဘယ်မင်းသားနဲ့ ဖြစ်တယ်တို့ ဘယ်ထုတ်လုပ်ရေးနဲ့ဖြစ်တယ်တို့ဆိုတာ မရှိဘူးလေ။ ကိုယ်ကရည်းစားတခါမှ မထားဘူးတော့ အဲ့ဒီအသံမထွက်ဘူး”

“ ဆောင်းအိန္ဒြေထွန်းကို ဘဲတဗွေနဲ့တွေ့လိုက်တယ်ဆိုတာကိုမရှိတာ ကိုယ့်ဘဝမှာ ရှင်းရှင်းလင်းလင်းကြီးဖြစ်နေတော့ ကိုယ့်ဘဝမှာ လူတယောက်ကိုကြိုက်ဖို့ကခက်ခဲတယ်။ ပြီးတော့ ကျမက ရိုးသားမှုကိုအခြေခံထားတဲ့သူကိုပဲ သဘောကျတာ။ ပိုက်ဆံချမ်းသာစရာမလိုပါဘူး” လို့ ဆောင်းအိန္ဒြေထွန်းကပြောပါတယ်။

ဆောင်းအိန္ဒြေထွန်းအနေနဲ့ အနုပညာအလုပ်ကိုအရမ်းကြိုးစားရပြီး အချစ်နဲ့ပတ်သက်ရင်တော့ အရမ်းကံကောင်းပေမယ့် နောက် ၁နှစ် ၂နှစ်အတွင်းတော့ အနုပညာအလုပ်ပဲကြိုးစားသွားမယ်လို့ ဆိုပါတယ်။

“ပထမက ကိုယ်နဲ့ကြိုက်မလိုဖြစ်သွားတဲ့သူကတော့ ပိုက်ဆံအရမ်းချမ်းသာတယ်။ ကျမက အချစ်ရေးနဲ့ပတ်သက်ရင် အရမ်းကံကောင်းတယ်။ အနုပညာအလုပ်သာ အရမ်းကြိုးစားရတာ။ အဲ့တော့ မပြောတတ်သေးဘူး။ အပျိုကြီး လုပ်မယ်ပြောပြီးမှ ၁လ ၂လအတွင်းပါသွားရင် ကိုယ့်အပြစ်ဖြစ်နေမယ်။ အနုပညာအလုပ်မှာ ၁နှစ် ၂နှစ်လောက် စိတ်ထည့်ပြီး ကြိုးစားဦးမယ်။ အချစ်ရေးမှာက ကတိမပေးရဲဘူး။ ကြိုက်တဲ့သူတွေရှိပါတယ်” လို့ ဆောင်းအိန္ဒြေထွန်းက ပြောပါတယ်။

ဆောင်းအိန္ဒြေထွန်းကတော့ ကိုဗစ်ကာလစိတ်ညစ်နေတဲ့သူများ ၊ ဝင်ငွေမရှိတဲ့သူများအတွက် အွန်လိုင်းပေါ်မှ ဖုန်းဘေလ်များကို မဲဖောက်ပေးလျက်ရှိပြီး မေလ ၂၂ရက်နေ့ကလည်း အမေများအဖွဲ့နဲ့ စက်အဖွဲ့များကို ငွေကြေးများလှူဒါန်းပေးခဲ့ပါတယ်။

“ကျမက မနက်ဖြန်ဆိုတာကို ထည့်မတွက်တော့ဘူး။ ဒီနေ့မှာပဲဘယ်လိုလှူရင်ကောင်းမလဲ ဘယ်လိုပေးရင်ကောင်းမလဲ ကိုယ့်အတွက်မကျန်ရင် မကျန်ပါစေပေါ့နော်။ လှူနေရရင်ပျော်ရွှင်တယ်။ ချစ်တဲ့သူတွေကိုလည်း ပြောချင်တာ သတိတချက်လေးကို ထိန်းပြီးတော့ ကိုယ့်နောက်ပါမယ့်အလုပ်လေးကို လုပ်ကြပါလို့ ပြောချင်ပါတယ်” လို့ ဆောင်းအိန္ဒြေထွန်းကပြောပါတယ်။

You may also like these stories:

အနုပညာရှင်တွေ ဈေးရောင်းကြတဲ့အပေါ် ဇာတ်ပို့ ရဲမွန်ရဲ့အမြင်

ကွယ်လွန်သွားတဲ့ ဖခင်ကို ခြေဆုပ်လက်နယ် မပြုစုခဲ့ရလို့ စိတ်မကောင်းဖြစ်နေတဲ့ မျိုးမျိုးခိုင်

The post ကွယ်လွန်သွားတဲ့ ချစ်သူအကြောင်းပြောပြတဲ့ ဆောင်းအိန္ဒြေထွန်း appeared first on ဧရာဝတီ.

အမေများအဖွဲ့ကို ဦးဆောင်နေရသူ ဒေါ်နွဲ့နွဲ့စမ်းကတော့ လက်ရှိမှာ အဖွဲ့ကို လိုအပ်တဲ့အစားအသောက်ပစ္စည်းများ လာရောက်လှူဒါန်းကြပေမယ့် နေ့စဉ်ဈေးသုံးစရာပိုက်ဆံမရှိဘူးလို့ ပြောပါတယ်။

“အလှူတွေသာ လာမလှူရင် အမေတို့စားရေးသောက်ရေး တော်တော်ခက်မယ်။ ဆန်တွေဆီတွေကတော့ ဟိုကလှူလိုက် ဒီကလှူလိုက်နဲ့ရှိတယ်။ အမေတို့မှာ ဈေးဝယ်စားစရာပိုက်ဆံမရှိဘူး။ လှူကြပါတယ်။ မောင်လွင်မိုးတို့လည်း လာလှူတယ်။ စိုးမြတ်နန္ဒာနဲ့မောင်စိုးသူတို့လည်း လာလှူတယ်။ အူဝဲတို့ဇနီးမောင်နှံလည်း လှူကြပါတယ်။ ကိုခန့်တို့အဖွဲ့လည်း လာလှူကြပါတယ်။ ဒီလိုလာလှူလို့သာပေါ့ကွယ်” လို့ ဒေါ်နွဲ့နွဲ့စမ်းကပြောပါတယ်။

ငွေကြေးခက်ခဲမှုရှိတဲ့အတွက် ရင်းနှီးတဲ့သူများလှူဒါန်းမယ်ဆိုရင်တော့ ငွေကြေးလှူဒါန်းပေးဖို့ပြောလို့ရပေမယ့် မရင်းနှီးတဲ့သူကို ပြောမိရင် အမြင်တမျိုးဖြစ်မှာကို စိုးရိမ်မိတယ်လို့ ဆိုပါတယ်။

“ငွေကြေးကတော့ ခက်ခဲနေတာအမှန်ပဲ။ အမေကပြောတယ် မောင်မိုးရယ် ခေါက်ဆွဲတွေမလှူပါနဲ့ ပိုက်ဆံပဲလှူပေးပါဆိုပြီး ခင်တဲ့သူကိုအဲ့လိုပြောရတယ်။ မရင်းနှီးတဲ့သူက ဆန်လာလှူတာကို ပိုက်ဆံလှူပါပြောရင် သဘောတမျိုးပေါက်သွားမှာပေါ့။ လှူတာတော့ လက်ခံပါတယ်။ ဒါပေမယ့်အမေတို့မှာ နေ့စဉ်သုံးဖို့ ဈေးသုံးဟာအခက်အခဲဆုံးပဲ။ တရက်ကို ၄သောင်း လောက်နဲ့ ၁၀ရက်လောက်သုံးရင်ကုန်ပြီ။ ဒါတောင် မျှမျှတတသုံးနေရတာနော်” လို့ ပြောပါတယ်။

ဆက်လက်ပြီး “တချို့ကျတော့လည်း ၂သောင်းလောက် ဆန်နဲ့ ပိုက်ဆံ ၁သောင်းပေးတယ်ဆိုရင်လည်း အမေတို့က လာယူရတာ ကားခက အသွား ၁သောင်း အပြန် ၁သောင်းဆိုတော့ ကိုယ့်မရှိတဲ့ထဲကားခကပြန်ထွက်သွားတော့ ပစ္စည်းတွေပဲအဖက်တင်တာ။ ပစ္စည်းရှိတယ်။ ပိုက်ဆံမရှိဘူး” လို့ ဒေါ်နွဲ့နွဲ့စမ်းကပြောပါတယ်။

လတ်တလောမှာတော့ “အမေများအဖွဲ့”အိမ်ရာမှာတော့ အခက်အခဲရှိနေတာကြောင့် လှူဒါန်းထားတဲ့ပစ္စည်းများကို လာယူခိုင်းပြီး သူတို့အိမ်မှာသာ ပြန်နေခိုင်းထားတယ်လို့ သိရပါတယ်။

“အမေက အခုပြန်ပို့ထားတယ် အကုန်လုံးကို။ အတူရှိနေရင် နေ့တိုင်းဈေးဖိုးက တနေ့ကို ၃သောင်းလောက်ကုန်တယ်။ ၁၀ရက်ဆို ၃သိန်း ဘယ်အကုန်ခံနိုင်မလဲ။ ကိုယ့်အိမ်ကိုယ်ပြန်စားကြဆိုပြီး ပို့ထားတယ်။ လှူထားတာတွေလာယူကြ။ ပြီးရင်ပြန် အမေမကျွေးထားနိုင်ဘူး။ ကျွေးပြီးတော့လည်း သေတော့လည်းကိုယ်ပဲချရတာ”

“ ဆေးရုံတက်တော့လည်း ကိုယ်ပဲလိုက်ရတာလေ။ အမေက အမေတွေကိုခေါင်းအေးစေချင်လို့ထူထောင်ထားတဲ့ အမေအိမ်ရာက ရေပေးမယ်။ မီးပေးတယ်။ နေစရာပေးမယ်။ ဆန်ပေးမယ်။ ကျန်းမာရေးဖြစ်တဲ့နေ့မှာ ဆေးရုံလိုက်ပြီး ကုပေးမယ်။ သေရင်မသာချပေးမယ်။ ဒါပဲလုပ်ပေးနိုင်မယ်လေ” လို့ ဒေါ်နွဲ့နွဲ့စမ်းကပြောပါတယ်။

ပြီးခဲ့တဲ့ သင်္ကြန်ကလည်း COVID -19 ကြောင့် ပွဲတွေမလုပ်ဖြစ်ခဲ့တဲ့အတွက် သင်္ကြန်မှာကဖို့အတွက် ပြင်ဆင်ထားတဲ့ ကုန်ကျစရိတ်များစွာလည်း ကုန်ကျသွားပြီး “အမေများအဖွဲ့” ရေရှည်တည်တံ့စေဖို့အတွက် ဝိုင်းကူပေးကြဖို့လည်း ဒေါ်နွဲ့နွဲ့စမ်းက တောင်းဆိုခဲ့ပါတယ်။

You may also like these stories:

အသက်ကြီးလာလို့ အစားအသောက် အနေအထိုင် ဆင်ခြင်နေရတဲ့ ဒေါ်နွဲ့နွဲ့စမ်း

“ဇာတ်ပို့ ဇာတ်ရန်တွေဆိုတာလည်း အရေးပါတဲ့အတွက် လျစ်လျူမရှုကြပါနဲ့”

The post “အမေများအဖွဲ့” မှာ ငွေကြေးလည်း လိုအပ်နေတယ်လို့ ဒေါ်နွဲ့နွဲ့စမ်းပြော appeared first on ဧရာဝတီ.

ကက်ဆက်ခွေဇာတ်လမ်းများနဲ့ ပရိသတ်အားပေးမှုရရှိခဲ့တဲ့ နေထွဋ် (ခေါ်) Blake ကတော့ နောက်ပိုင်းမှာ အဆိုတော်ကြီးတွေရဲ့ သီချင်းများကို Version ပြောင်းပြီး Cover Song အနေနဲ့ သီဆိုလာတာကိုတွေ့ရပါတယ်။ ဘယ်လိုသီချင်းတွေကို အဓိကထားသီဆိုဖြစ်လဲဆိုတာကို နေထွဋ်ကဧရာဝတီကို အခုလိုပြောပြခဲ့ပါတယ်။

“အဓိက သီချင်းတွေကိုဘယ်လိုရွေးချယ်ပြီး Cover Song ဆိုလည်းဆိုရင် Mood ကိုအဓိကထားတယ်။ Low Feel Beat ပုံစံမျိုးနဲ့ မှောင်တဲ့ဘက်ကိုသွားချင်တဲ့ သီချင်းပုံစံမျိုးလေးပေါ့။ “အတ္တ”၊ “မနိုးပါစေနဲ့မိုး” သီချင်းရောက မှောင်တဲ့ဘက် ကိုသွားတယ်။ အဲ့တော့ ကျနော်က Mood ကိုကြည့်ပြီး သီချင်းတွေကိုဆိုပါတယ်” လို့ နေထွဋ်ကပြောပါတယ်။

သီချင်းပုံစံမျိုးစုံကို နားထောင်တာကို ကြိုက်ပြီး အခုလက်ရှိမှာတော့ ကျော်ဟိန်းရဲ့ “အဓိပ္ပါယ်ရှိတဲ့လူ” သီချင်းကို ကြိုက်နေတယ်လို့ ဆိုပါတယ်။

“ကျနော်အင်္ဂလိပ်သီချင်းရော၊ မြန်မာသီချင်းရော နားထောင်တယ်။ အရင်ကသီချင်းတွေရော အခုခေတ်သီချင်းတွေရော နားထောင်တယ်။ အစုံနားထောင်ပါတယ်။ အမျိုးအစားခွဲထားတာတော့ မရှိပါဘူး။ ကျနော့်ရဲ့ပုံစံအရဆိုရင် Low Feel ပုံစံမျိုး၊ Mary သီချင်းတွေဆို ကျနော်ကြိုက်တယ်။ ဦးကျော်ဟိန်းရဲ့ “အဓိပ္ပါယ်ရှိတဲ့လူ”သီချင်းကို အရမ်းကြိုက်တယ်” လို့ နေထွဋ်ကပြောပါတယ်။

လက်ရှိအချိန်ထိ Cover Song ၅ပုဒ်ဆိုပြီးဖြစ်ပြီး ပရိသတ်တွေအနေနဲ့ ဆိုစေချင်တဲ့သီချင်းရှိရင် ပြောလို့ရသလို သူကိုယ်တိုင်ရေးထားတဲ့သီချင်းလည်း ဆိုထားဖို့ရှိတယ်လို့ သိရပါတယ်။

နေထွဋ်ဆိုထားတဲ့ Cover Song တွေထဲက လူပြောများနေတဲ့ “မနိုးပါစေနဲ့မိုးရယ်” ၊ “အတ္တ” သီချင်းတွေကတော့ ဝေဖန်မှုများသလို တဖက်မှာလည်း နေထွဋ်ကို လူပိုသိသွားစေခဲ့ပါတယ်။

“တဖက်မှာလည်း အရမ်းအားပေးကြသလို တဖက်မှာလည်း မကောင်းတဲ့ကောမန့်တွေရှိတယ်။ ဘာလုပ်မှာလဲနော်။ ကောင်းတဲ့ကောမန့်တွေ ကျနော်ဖတ်တယ်။ မကောင်းတဲ့ကောမန့်တွေကိုလည်း ကျနော်ဖတ်တယ်။ တချို့ကျတော့လည်း စေတနာနဲ့ပြောတာလေ ဘယ်နားလေးကို ဘယ်လိုလေးပြင်လိုက်ဦး Mood လေးနည်းနည်းထည့်ဆို ဒီလိုမျိူးပြောတာတွေဆိုရင် ကျနော်လည်းသုံးလို့ရတယ်”

“ အဲ့လိုမျိုးဆိုရင် ကျနော်မှတ်ထားလိုက်ပြီ နောက်သီချင်းတွေဆို Mood ထည့်ပြီးဆိုလိုက်မယ်။ တချို့ကျတော့လည်း မင်းရုပ်ကချောနေတယ်။ သီချင်းနဲ့မလိုက်ဘူးပြောတော့ ကျနော်လည်း ဒီရုပ်ကိုဘယ်လိုသွားပြင်ရမှာလဲ” လို့ နေထွဋ်ကပြောပါတယ်။

ကက်ဆက်ခွေဇာတ်လမ်းတွေမှာ Blake ဆိုတဲ့နာမည်နဲ့လူသိလာခဲ့ပေမယ့် အခုအချိန်မှာ Cover Song တွေသီဆိုရမှ Follower လည်းပိုတိုးလာခဲ့ပြီး Tik Tok မှာလည်း သူ့သီချင်းနဲ့ ဆော့ကြတဲ့သူတွေများစွာရှိလာတယ်လို့ ဆိုပါတယ်။

နေထွဋ်အတွက် သရုပ်ဆောင်အလုပ်က ပထမဝါသနာဖြစ်တဲ့အတွက် အရေးပါသလို Music နဲ့ပတ်သက်ပြီးတော့လည်း ဝါသနာပါနေတာကြောင့် နောက်ပိုင်းမှာ ၂ခုလုံးတွဲလုပ်သွားမှာဖြစ်တယ်လို့သိရပါတယ်။

The post အဆိုတော် Mary သီချင်းတွေကို ကြိုက်တဲ့ နေထွဋ် (Blake) appeared first on ဧရာဝတီ.

COVID-19 ကပ်ရောဂါကြောင့် လနဲ့ချီပြီး ထုတ်လုပ်ရေးလုပ်ငန်းတွေ ရပ်နားခဲ့ရတဲ့ “Avatar” ရုပ်ရှင်ကားသစ်တွေရဲ့ ရိုက်ကူးရေးတွေကို ပြန်လည်စတင်တော့မှာဖြစ်တယ်လို့ သိရပါတယ်။

ပရိသတ်တွေ စောင့်မျှော်နေကြတဲ့ ဒါရိုက်တာကြီး James Cameron ရဲ့ နောက်ဆက်တွဲ ရုပ်ရှင်ထုတ်လုပ်ရေးဟာ ကပ်ရောဂါကြောင့် ရပ်ဆိုင်းခဲ့ရတာဖြစ်ပေမယ့် အစောဆုံး အခုသီတင်းပတ်အတွင်းမှာတော့ နယူးဇီလန်နိုင်ငံမှာ ရိုက်ကူးရေးတွေ ပြန်လည်စတင်နိုင်တော့မယ်လို့ ထုတ်လုပ်သူ Jon Landau က ရည်ညွှန်း ပြောဆိုခဲ့ပါတယ်။

ပြီးခဲ့တဲ့ မေလ ၂၁ ရက်နေ့မှာ ထုတ်လုပ်သူ Landau က “ကျနော်တို့ရဲ့ Avatar ရိုက်ကူးရေးတွေ စဖို့ အဆင်သင့်ပါပဲ။ လာမယ့် သီတင်းပတ်ထဲ နယူးဇီလန်ကို ပြန်လာဖို့ စိတ်လှုပ်ရှားနေပါပြီ” လို့ Instagram မှာ တင်ခဲ့ပါတယ်။ ပြီးခဲ့တဲ့ မတ်လတုန်းက ၂၀၀၉ ခုနှစ်က အောင်မြင်ခဲ့တဲ့ မူရင်းရုပ်ရှင်ရဲ့ နောက်ဆက်ရုပ်ရှင် ၄ကားလုံးဟာ ကမ္ဘာ့ကပ်ရောဂါ ဖြစ်ပွားမှုကြောင့် ထုတ်လုပ်ရေး ရပ်ဆိုင်းခဲ့ရတယ်လို့ နယူးဇီလန် မီဒီယာတွေမှာ ဖော်ပြခဲ့ကြပါတယ်။

ရုပ်ရှင်အတွက် ရိုက်ကူးရေးလုပ်သားတွေ အလုပ်ဝင်နိုင်ပါ့မလားဆိုတဲ့ မေးခွန်းကိုတော့ ထုတ်လုပ်သူ Landau က အဖြေမပေးနိုင်သေးတဲ့အကြောင်း ပြန်လည်ပြောဆိုခဲ့ပါတယ်။

ထုတ်လုပ်ရေး လုပ်ငန်းတွေ ရပ်ဆိုင်းလိုက်ရတဲ့ ဆုံးဖြတ်ချက်နဲ့ ပတ်သက်လို့ ထုတ်လုပ်သူ Landau က “ကျနော်တို့ဟာ ကမ္ဘာ့အကျပ်အတည်းရဲ့ အလယ်မှာ ရောက်နေပါတယ်။ ဒါဟာ ရုပ်ရှင်လုပ်ငန်းအတွက်သာ မဟုတ်ပါဘူး။ လူတိုင်းဟာ အခုအချိန်မှာ ကိုရိုနာဗိုင်းရပ်စ်ကို ရပ်ဆိုင်းစေဖို့ သူတို့လုပ်နိုင်တာတွေ အားလုံးကို လုပ်ဖို့လိုနေပါပြီ” လို့ ဆိုပါတယ်။

“Avatar” နောက်ဆက်တွဲ ရုပ်ရှင်တွေကိုတော့ လာမယ့် ၂၀၂၁ ခုနှစ်၊ ဒီဇင်ဘာလက စလို့ ၂ နှစ်ကို တကား ရုံတင်ပြသဖို့ စီစဉ်ထားပါတယ်။ ဒါပေမဲ့ နှောင့်နှေးမှုတချို့လည်း ရှိနိုင်တာကြောင့် ပြသမယ့် အချိန် ဇယားက အပြောင်းအလဲ ရှိနေနိုင်ပါသေးတယ်။

အခုလအစောပိုင်းမှာ Deadline မီဒီယာရဲ့ အဆိုအရ နယူးဇီလန် အစိုးရဟာ မတ်လတုန်းက ရပ်နားခဲ့ရတဲ့ ထုတ်လုပ်ရေးလုပ်ငန်းတွေကို ပြန်စဖို့ ခွင့်ပြုချက်အပါအဝင် ရုပ်ရှင်နဲ့ ရုပ်သံထုတ်လုပ်ရေး လုပ်ငန်းတွေအတွက် ကျန်းမာရေးနဲ့ ဘေးကင်းလုံခြုံမှုဆိုင်ရာ အစီအမံတွေကို ချမှတ်ခဲ့ပါတယ်လို့ သိရပါတယ်။

နယူးဇီလန် ရုပ်ရှင်ကော်မရှင်ကတော့ ရုပ်ရှင်နဲ့ ရုပ်သံထုတ်လုပ်ရေး လုပ်ငန်းတချို့ဟာ ဘေးကင်းလုံခြုံစွာနဲ့ ပြန်လည် စတင်နေပြီ ဖြစ်ကြောင်း၊ Amazon Prime Video ရဲ့ “Lord of the Rings” စီးရီး အပါအဝင်ပိတ်ထားခဲ့ရတဲ့ ငွေကြေး အကုန်အကျစိုက်ထုတ်ထားတဲ့ ထုတ်လုပ်ရေး လုပ်ငန်းတွေဟာလည်း မကြာမီ ပြန်လည်စတင်နိုင်တော့မှာ ဖြစ်တဲ့အကြောင်း Deadline မီဒီယာကို အတည်ပြုခဲ့ပါတယ်။

Ref:Reuters

You may also like these stories:

ကိုဗစ်ကြောင့် “Avatar 2” ရုပ်ရှင် ပြသမယ့်ရက် ရွှေ့ဆိုင်းမည် မဟုတ်

“Avatar 2” ရုပ်ရှင်ထဲက ဇာတ်ဝင်ခန်းနေရာ ပုံရိပ်တချို့ ထွက်ပေါ်လာ

‘Avatar’ ရုပ်ရှင်ကိုရုံပြန်တင်ပြီး ‘Avengers: Endgame’ ကို ကျော်တက်မည်ဟု James Cameron ပြော

The post တပတ်အတွင်း “Avatar” ရုပ်ရှင်ရိုက်ကူးရေး ပြန်လည် စတင်မည် appeared first on ဧရာဝတီ.

သရုပ်ဆောင် မိုးအောင်ရင်အား ကာမလိမ်လည်မှုဖြင့် ရည်းစားဟောင်းဖြစ်သူ မခင်မြတ်နိုးမှ တရားစွဲဆိုထားတဲ့ အမှုရဲ့ရုံးချိန်းကိုတော့ ယနေ့ မေလ ၂၅ ရက်နေ့၊ ရန်ကင်းမြို့နယ် တရားရုံးမှာ ပြုလုပ်ခဲ့ပါတယ်။

ဒီကနေ့ ရုံးချိန်းမှာတော့ အမှုကို စစ်ဆေးခဲ့ခြင်း မရှိဘဲ စွပ်စွဲခံရသူဘက်မှ တရားလိုရဲ့ စွပ်စွဲချက်ကို ပြင်ဆင်ရန်အတွက် အရှေ့ပိုင်းခရိုင်ရုံးမှာ တင်ပြထားကြောင့်လို့ သိရပါတယ်။

“အမှုတွဲက အမိန့်နဲ့ ပတ်သက်ပြီးပြင်ဆင်ချက် ပြန်လျှောက်ထားတာ အမှုတွဲက အရှေ့ပိုင်းခရိုင်ရုံးကို ရောက်နေတယ်။ ဟိုဘက်ကတော့ အမိန့်ချမှာက ၂၉ ရက်နေ့ အမိန့်မှာ အမှုပြင်ဆင်ချက် လျှောက်ထားတာကို အမိန့်ချမှာ” လို့ တရားလိုဖြစ်သူ မခင်မြတ်နိုးက ပြောပါတယ်။

ယနေ့ ရုံးချိန်းကိုတော့ စွပ်စွဲခံရသူ မိုးအောင်ရင်မှ ခွင့်တိုင်ကြားကာ လာရောက်ခြင်း မရှိခဲ့ပါ။ လာမယ့် မေလ ၂၉ ရက်နေ့မှာတော့ တရားလိုဖြစ်သူ မခင်မြတ်နိုးရဲ့ စွပ်စွဲချက်အား စွပ်စွဲခံရသူဘက်မှ ပြန်လည်ပြင်ဆင်ရန် တင်ပြထားမှုကို အရှေ့ပိုင်းခရိုင်ရုံးမှ အမိန့်ချမှတ်သွားမယ်လို့ သိရပါတယ်။

အမှုပြင်ဆင်ချက် အမိန့်ချမှတ်မှာနဲ့ ပတ်သက်ပြီးတော့ ခင်မြတ်နိုးက “ဒါကတော့ ကံတရားပဲပေါ့။ အမှုကို ရှုံးနိမ့်မယ်လို့တော့လည်း သိပ်တော့ မထင်ပါဘူး။ လူကြီးတွေကလည်း မှန်မှန်ကန်ကန် စိစစ်နေတာဆိုတော့ ရှုံးနိမ့်သွားခဲ့ရင်တော့လည်း ကံပဲပေါ့” လို့ ပြောပါတယ်။

လက်ရှိမှာတော့ တရားလိုဖြစ်သူ ခင်မြတ်နိုးဘက်မှ ထွက်ဆိုချက်များ၊ တရားလိုပြ သက်သေများကို စစ်ဆေးပြီးဖြစ်ပြီး နောက်ဆုံး စစ်ဆေးခဲ့တဲ့ ရုံးချိန်းမှာတော့ စွပ်စွဲခံရသူဘက်မှ တရားလိုအား ပြန်ခေါ်သက်သေအဖြစ် စစ်ဆေးခဲ့ပါတယ်။

သရုပ်ဆောင် မိုးအောင်ရင်ကိုတော့ ရည်းစားဟောင်းဖြစ်သူ ခင်မြတ်နိုးက နိုဝင်ဘာလ ၂၂ရက်နေ့က ရန်ကုန်မြို့၊ ရန်ကင်းမြို့နယ် တရားရုံးမှာ ရာဇသတ်ကြီးပုဒ်မ ၄၁၇ ဖြင့် တရားစွဲဆိုခဲ့တာဖြစ်ပြီး မိုးအောင်ရင်အနေနဲ့ ငွေကျပ် သိန်း ၁၀၀ အာမခံဖြင့် တရားရင်ဆိုင်နေရတာ ဖြစ်ပါတယ်။

You may also like these stories:

“မူးယစ်ဆေးဝါးနဲ့ ပတ်သက်တဲ့ မေးခွန်းတွေက မလိုဘူးလို့ ထင်တယ်”

“ဥပဒေကြောင်းအရ လိုအပ်ချက်တွေ ရှိနေတာကြောင့် အမှုကို အားမရဘူး”လို့ ခင်မြတ်နိုး ပြော

“မိုးအောင်ရင် ကိုယ်ထိလက်ရောက် ကျူးလွန်တာတွေ ရှိခဲ့တယ်”လို့ ခင်မြတ်နိုး ပြော

The post မိုးအောင်ရင်အမှု စွပ်စွဲချက် ပြင်ဆင်မှုအမိန့် ချရန် ပြန်လည် ချိန်းဆို appeared first on ဧရာဝတီ.

ဆွီဒင်အဆိုတော်အဖွဲ့ ABBA ရဲ့ အဖွဲ့ဝင် Björn Ulvaeus က အခုနှစ်နှောင်းပိုင်းလောက်မှာ သူတို့အဖွဲ့ဟာ သီချင်းအသစ်တချို့ကို ဖြန့်ချိမှာ ဖြစ်တယ်လို့ ပြောကြားခဲ့ပါတယ်။

၂၀၁၈ ခုနှစ်တုန်းက သူတို့အဖွဲ့ဟာ စတူဒီယိုနဲ့ နှစ်ပေါင်း ၃၅ နှစ်ကျော်ကြာ ဝေးကွာခဲ့ပြီးတဲ့နောက်ပိုင်း ပထမဆုံးအနေနဲ့ သီချင်းအသစ် တပုဒ်ကို အသံသွင်းယူခဲ့တယ်လို့ ကြေညာခဲ့ပါတယ်။ အဲ့ဒီနှစ်ရဲ့ ခရစ်စမတ်ကာလမှာ သီချင်းအသစ် ထွက်လာမယ်လို့ အားလုံးက မျှော်လင့်ခဲ့ကြပေမယ့် ဖြစ်မလာခဲ့ပါဘူး။

အသစ်ပြုလုပ်တဲ့အင်တာဗျူးတခုမှာ အဖွဲ့ဝင် Ulvaeus က ABBA ဟာ စတိတ်စင်ပေါ်မှာ အတူတူ ပြန်လည် ဖျော်ဖြေမယ့် ကိစ္စကို ငြင်းခဲ့ပေမယ့် ၂၀၂၀ နှစ်ကုန်မတိုင်မီ သီချင်းအသစ် ဖြန့်ချိမယ်လို့ ပြောဆိုခဲ့တာလည်း ဖြစ်ပါတယ်။

CNBC မီဒီယာနဲ့ ပြုလုပ်ခဲ့တဲ့ မေးမြန်းခန်းမှာ ပရိသတ်တွေက နောက်ထပ် သီချင်းအသစ်ကို မျှော်လင့်လို့ရပြီလားဆိုတဲ့ မေးခွန်းကို ထုတ်လုပ်သူနဲ့ သီချင်းရေးဆရာ Ulvaeus က “အခုနှစ် တချိန်ချိန်မှာ ဖြစ်မယ်လို့ ထင်ပါတယ်။ ဟုတ်ပါတယ်။ ကျနော် အဲ့ဒီလိုထင်ပါတယ်” လို့ ဆိုပါတယ်။

ပြီးခဲ့တဲ့ ဖေဖော်ဝါရီလတုန်းကလည်း အဖွဲ့ဝင်တဦးဖြစ်တဲ့ Benny Andersson က သူတို့အဖွဲ့ဟာ အခုနှစ်ကုန်ပိုင်းလောက်မှာ သီချင်းအသစ်တွေကို ဖြန့်ချိမယ်လို့ မျှော်လင့်ရတဲ့အကြောင်း ပြောဆိုခဲ့ပြီးတဲ့နောက်ပိုင်း အခုလို မှတ်ချက်ထွက်ပေါ်လာတာလည်း ဖြစ်ပါတယ်။

သူက “အခုနှစ်မှာ လာမှာပါ။ ဒီနွေရာသီ အပြီးမှာ ဖြစ်မယ်လို့ ခန့်မှန်းပါတယ်။ ဒါပေမဲ့ ကျနော်က ခန့်မှန်းရုံပဲ ခန့်မှန်းတာပါ။ တကယ်တော့ မသေချာပါဘူး။ အဲ့ဒီလိုတော့ ထင်ပါတယ်” လို့ ပြောဆိုခဲ့ပါတယ်။

“I Still Have Faith In You” လို့အမည်ပေးထားတဲ့ သီချင်းအသစ်တပုဒ်ကိုတော့ ၂၀၁၈ ခုနှစ်၊ ဒီဇင်ဘာလမှာ BBC ကနေ ထုတ်လွှင့်ဖို့ စီစဉ်ထားခဲ့ပါတယ်။ ဒါ့အပြင် “Don’t Shut Me Down” ဆိုတဲ့ နောက်ထပ် သီချင်း အသစ်တပုဒ်ကိုလည်း ဖြန့်ချိဖို့ ထပ်မံပြင်ဆင်ခဲ့ပါတယ်။ ဒါပေမဲ့ ထွက်မလာခဲပါဘူး။ အဖွဲ့ဝင် Ulvaeus ပြောဆိုတဲ့ သီချင်းအသစ်ဆိုတဲ့အထဲမှာ အဲ့ဒီသီချင်း၂ပုဒ် အကျုံးဝင်လားဆိုတာကိုလည်း ရှင်းရှင်းလင်းလင်း မသိရသေးပါဘူး။

အင်တာဗျူးထဲမှာတော့ ၃၅ နှစ်ကြာခဲ့ပြီးတဲ့နောက် ကျန်တဲ့ ABBA အဖွဲ့ဝင်တွေနဲ့အတူ စတူဒီယိုထဲကို ပြန်ဝင်ရတာဟာ တော်တော်လေးကို ကျေနပ်ဖို့ကောင်းတဲ့အကြောင်း ပြောပါတယ်။

သူူက “မနေ့တနေ့ကလို ကျနော်တို့က အချိန်ကို နောက်ပြန်လှည့်သွားသလို ဖြစ်ခဲ့ရပါတယ်။ တော်တော်လေးကို ထူးဆန်းပါတယ်။ ကျနော်တို့ကြားမှာရှိတဲ့ အဲ့ဒီခံစားချက်ဟာ တော်တော်လေးကို ထူးခြားပါတယ်” လို့ ပြောခဲ့ပါတယ်။

၁၉၇၂ ခုနှစ်တုန်းက ဆွီဒင်နိုင်ငံမှာ ဖွဲ့စည်းခဲ့တဲ့ ABBA အဖွဲ့ဟာ “Mamma Mia”၊ “Dancing Queen”၊ “Chiquitita” နဲ့ “Super Trooper” တို့အပါအဝင် သီချင်းတွေကို သီဆိုခဲ့ပြီး သူတို့ရဲ့ ဂီတသက်တမ်း တလျှောက်လုံးမှာ အယ်လ်ဘမ်ချပ်ရေ သန်း ၄၀၀ ကျော် ရောင်းချခဲ့ရပြီးလည်း ဖြစ်ပါတယ်။ ABBA အဖွဲ့ဟာ ၁၉၈၂ ခုနှစ်ကစလို့ ပရိသတ်ရှေ့မှောက်မှာ ဖျော်ဖြေမှုတွေ ပြုလုပ်ခဲ့တာမျိုး မရှိခဲ့ပါဘူး။

Ref: nme.com

The post အခုနှစ်ကုန်ပိုင်းမှာ ABBA အဖွဲ့ရဲ့ သီချင်းသစ် ဖြန့်ချိမည် appeared first on ဧရာဝတီ.

COVID-19 ကပ်ရောဂါ ဖြစ်ပွားနေချိန် ခက်ခဲတဲ့ ဇာတ်ပို့၊ ဇာတ်ရံများကို မြန်မာနိုင်ငံ ရုပ်ရှင် အစည်းအရုံးနဲ့ တတ်နိုင်တဲ့သူများက လှူပေးနေတဲ့အပေါ် ဝမ်းသာမိသလို ဒီလိုမျိုး အလှူခံပြီး မနေချင်ဘူးလို့ သရုပ်ဆောင် ကိုကိုဦးက ပြောပါတယ်။

“ကျနော်တို့ ဇာတ်ပို့ ဇာတ်ရံတွေကို လှူပေးနေကြတာလည်း ဝမ်းသာတယ်။ ဒါပေမဲ့ ကျနော်တို့ စိတ်ထဲမှာ အားနာတယ်။ အလှူခံပြီးနေရတာကိုက စိတ်ထဲ တမျိုးကြီးပဲ။ ကျနော်တို့ ဒီလိုကြီးပဲလည်း အလှူခံပြီး မနေချင်ဘူး။ ကျနော်တို့ ရုန်းကန်နိုင်လားဆိုတော့လည်း မရုန်းကန်နိုင်ဘူး။ တခြား စီးပွားရေး မလုပ်ခဲ့မိတဲ့အတွက် နောင်တလေးတွေတော့ ရတယ်”လို့ ကိုကိုဦးက ဧရာဝတီကို ပြောပါတယ်။

ဆက်လက်ပြီး ကိုကိုဦးက အနုပညာသမား အများစုက အနုပညာ အလုပ်ပဲ လုပ်တတ်ကြပြီး အခြား စီးပွားရေးလည်း မလုပ်တတ်ကြတဲ့အတွက် အခက်တွေ့ရတယ်လို့ ဆိုပါတယ်။

“ကိုဗစ် မြန်မြန်ပြီးဆုံးပါစေ ဆုတောင်းပါတယ်။ အနုပညာသမားတွေက အနုပညာအလုပ်ပဲ လုပ်ချင်တာပေါ့။ အနုပညာအလုပ်ပဲ လုပ်တတ်တာပေါ့။ တခြားအပြင်က စီးပွားရေးလည်း မလုပ်တတ်၊ လုပ်ဖို့ကလည်း အရင်းအနှီးလိုတယ်လေ။ အဲ့တော့ ကျနော်တို့က ပြင်ဆင်မှု မရှိကြဘူး။ ကျနော်တို့က အနုပညာအလုပ်နဲ့ တသက်လုံးကောင်းနေမယ်ပဲ ထင်ထားတာ”

“အဲ့မှာ ရုတ်တရက် ဗီဒီယို ဈေးကွက်လည်း ပျက်ပြီး ဂယက်ရိုက်နေချိန် ကိုဗစ်ကဖြစ်တော့ ကျနော်တို့အနုပညာသမားတွေ ပိုဆိုးသွားတာပေါ့။ ကျနော်တို့ အနုပညာသမားတွေ အပြင်စီးပွားရေး ဘာလုပ်ရမှန်းမသိဘဲ ဖြစ်တယ်လေ။ ငါတို့ အရင်ကတည်းက စီးပွားရေးလုပ်ခဲ့ရင် ကောင်းသား ဆိုပြီးနောင်တတွေတော့ရတာပေါ့”လို့ ကိုကိုဦးက ပြောပါတယ်။

လက်ရှိမှာ အနုပညာသမားအချို့ အွန်လိုင်းမှာ ဈေးရောင်းနေကြတာကို ဝေဖန်နေကြတဲ့အပေါ်လည်း ကိုကိုဦးက အခုလိုပဲ ဆိုပါတယ်။

“အနုပညာလုပ်ရာကနေ စီးပွားရေးလုပ်ရမှာကို ရှိန်နေကြတာ ရှိတယ်။ ရှိန်စရာ မလိုဘူး။ ကိုယ့်မိသားစုအဆင်ပြေဖို့အတွက် လုပ်ရမှာပဲ။ အနုပညာသမားတွေ ခက်ခဲနေတာကိုလည်း တချို့တော့ နားလည်ပေးကြတယ်။ တချို့က နားမလည်ပေးဘူး။ ကျနော်တို့ကို ဝေဖန်ပြောဆိုနေကြတယ်”

“ကျနော်တို့ အခက်အခဲကို မီဒီယာတွေကနေ ကျနော်တို့ အဆင်မပြေတာတွေ ပြောပြတော့ အပြောခံရတယ်။ ကျနော် ဖတ်ရတယ်။ ကျနော်တို့မှ အဆင်မပြေတာ မဟုတ်ပါဘူး။ အကုန် အဆင်မပြေတာ သိတယ်။ အဲ့အတွက် ကျနော်တို့တွေက ကိုယ်ဘာလုပ်ကိုင်စားမလဲ စဉ်းစားပြီး လုပ်သင့်တယ်”လို့ ဆိုပါတယ်။

ဆက်ပြီး “ အနုပညာသမားတွေကိုလည်း အမြင်စောင်းနေတာတွေ ရှိတယ်။ ကျနော်တို့ကို အမြင်မစောင်းစေချင်ပါဘူး။ ကျနော်တို့လည်း လူထဲက လူမို့ နားလည်မှုပေးကြပါ။ ပြောတာ မှားတာရှိရင်လည်း ခွင့်လွှတ်ပေးကြပါ။ ကျနော်တို့က အနုပညာကို ချစ်တဲ့အတွက် အနုပညာပဲ လုပ်နေတော့ တခြားစီးပွားရေးလုပ်ငန်းကို မလုပ်ခဲ့မိတဲ့အတွက် ကျနော်တို့ အလုပ်တွေ ရပ်တော့ စီးပွားရေးလေးတွေ လုပ်ကိုင်နေကြရတာကို နားလည်မှုလေးတွေ ပေးစေချင်တယ် ”လို့ ကိုကိုဦးက ပြောပါတယ်။

သရုပ်ဆောင် ကိုကိုဦးဟာ ဗီဒီယို၊ ရုပ်ရှင်ဇာတ်ကားတွေမှာ လူကြမ်းသရုပ်ဆောင်အဖြစ် ပရိသတ်အားပေးမှုတွေ ရရှိခဲ့သူဖြစ်ပြီး သားဖြစ်သူ သီဟအောင်ကလည်း လက်ရှိမှာ အနုပညာ လှုပ်ရှားမှုတွေ လုပ်ကိုင်နေပါတယ်။

You may also like these stories:

အခုနှစ်ကုန်ပိုင်းမှာ ABBA အဖွဲ့ရဲ့ သီချင်းသစ် ဖြန့်ချိမည်

တပတ်အတွင်း “Avatar” ရုပ်ရှင်ရိုက်ကူးရေး ပြန်လည် စတင်မည်

အဆိုတော် Mary သီချင်းတွေကို ကြိုက်တဲ့ နေထွဋ် (Blake)

The post “တခြား စီးပွားရေး မလုပ်ခဲ့တာ နောင်တရတယ်”လို့ ကိုကိုဦး ပြော appeared first on ဧရာဝတီ.

လူကြမ်းသရုပ်ဆောင် ဦးဘဂျမ်းက အင်တာဗျူးတွေ မေးရင် အလုပ်ကိုင်မရှိတဲ့ အကြောင်း ဝင်ငွေ မရှိကြောင်း ဖြေမိတာတွေကို ဝေဖန်ပြောဆိုနေကြတဲ့အပေါ် ဘာမှမခံစားပါဘူးလို့ ဧရာဝတီကို ဆိုပါတယ်။

“ကျနော်တို့ လူကြမ်းသရုပ်ဆောင်တွေကို လှူဒါန်းပေးတာ ဝမ်းသာပီတီ ဖြစ်ပါတယ်။ ကျနော်တို့ ဇာတ်ပို့ ဇာတ်ရံအလွှာတွေ စက်အဖွဲ့တွေ လူကြမ်းတွေက အခုလို လုပ်ငန်းရပ်ဆိုင်းသွားချိန်မှာ အလုပ်ကိုင်ကလည်း မရှိဘူး။ ဝင်ငွေကလည်းမရှိဘူး။ လှူဒါန်းပေးကြလို့လည်း ကျေးဇူးတင်ပါတယ်။ အရမ်းဝမ်းသာရပါတယ်။ ကျနော်တို့တွေကို အင်တာဗျူးတွေ မေးရင် ကျနော်တို့က အလုပ်ကိုင် မရှိတဲ့အကြောင်း၊ ဝင်ငွေ မရှိကြောင်း အမှန်တရားလေးတွေ ဖြေမိတာပေါ့”

“ပရိသတ်တွေထဲမှာ လွဲမှားတဲ့ ညီအစ်ကိုလေးတွေ ရှိတယ်။ သူတို့တွေက တခါလာလည်း ငိုပြနေကြတယ်။ အပြင်မှာ သူများ အသက်ကြီးတဲ့သူတွေလည်း လုပ်စားနေကြတာ။ အလုပ်မရှိလည်း ရှိတာ လုပ်ပေါ့လို့ ကျနော်တို့ကို ပြောတာတွေ့ပေမယ့် ဘာမှမခံစားပါဘူး။ သူတို့ပြောတာလည်း မှန်ပါတယ်” လို့ ဦးဘဂျမ်းက ပြောပါတယ်။

အိမ်ငှားခကို သမီးဖြစ်သူက ထောက်ပံ့နေတာကြောင့် ဘုရားတရား လုပ်ပြီး အေးချမ်းစွာ နေနေတယ်လို့ ဦးဘဂျမ်းက ဆိုပါတယ်။

“ကျနော် အခု အသက် ၆၃ နှစ်ထဲ ရောက်လာပြီ။ ကျနော် အိမ်ပိုင် မရှိဘူး။ အိမ်ငှားနေရတာကို သမီးလေးက အိမ်လခတွေ ထောက်ပံ့ပေးပါတယ်။ ကျနော့် ကလေးတွေ ငယ်စဉ်တုန်းကလည်း ထိုးကြိတ်ပြီးကျွေးခဲ့တာ ဖေကြီး အသက်ကြီးပြီ ပြောတယ်။ ရတာလေးနဲ့ ကိုယ့်ဟာကိုယ်သုံး သမီး အိမ်လခထောက်ပံ့လို့ အခု အလုပ် မရှိပေမယ့် အရင်က စုဆောင်းထားတာလေးနဲ့ စားပြီး ဘုရားတရားလေး လုပ်ပြီး အေးချမ်းစွာ နေနေပါတယ်”

“အကြွေးတော့ မကင်းဘူးပေါ့။ အလုပ်မရှိမှ ဘုရားတရား လုပ်တာလားလို့လည်း အပြောခံရပါတယ်။ အလုပ် မရှိလည်း လုပ်တယ်။ အလုပ်ရှိတုန်းကလည်း လုပ်တယ်။ များများ လုပ်နိုင်တာနဲ့ များများ မလုပ်နိုင်တာပဲ ကွာတာပါ။ ကျနော် မျက်လုံးဝေဒနာက လွဲပြီး ကျန်တာ အကုန်ကောင်းတယ်။ မျက်လုံးတဖက်က ရေတိမ် စွဲနေပါတယ်။ ဆရာဝန် ညွှန်ကြားချက်အတိုင်း နေထိုင်နေပါတယ်”လို့ ဦးဘဂျမ်းက ပြောပါတယ်။

လူကြမ်းသရုပ်ဆောင် ဦးဘဂျမ်းဟာ ယခင်က ရုပ်ရှင်နဲ့ ဗီဒီယို ဇာတ်ကားပေါင်းများစွာမှာ ဇာတ်ပို့ ဇာတ်ရံ လူကြမ်းတဦး အနေနဲ့ ပါဝင် သရုပ်ဆောင်ခဲ့သူ ဖြစ်ပါတယ်။

You may also like these stories:

“တခြား စီးပွားရေး မလုပ်ခဲ့တာ နောင်တရတယ်”လို့ ကိုကိုဦး ပြော

အခုနှစ်ကုန်ပိုင်းမှာ ABBA အဖွဲ့ရဲ့ သီချင်းသစ် ဖြန့်ချိမည်

တပတ်အတွင်း “Avatar” ရုပ်ရှင်ရိုက်ကူးရေး ပြန်လည် စတင်မည်

The post “ဝေဖန်ခံရပေမယ့် ခံစားမနေတော့ပါဘူး”လို့ လူကြမ်း ဦးဘဂျမ်း ပြော appeared first on ဧရာဝတီ.

COVID-19 ကာလမှာ ရုပ်ရှင်ရိုက်ကူးမှုများ ရပ်ဆိုင်းထားရတဲ့အတွက် စားဝတ်နေရေး အခက်အခဲ ဖြစ်နေသူများကို မြန်မာနိုင်ငံ ရုပ်ရှင်အစည်းအရုံးမှ ကူညီထောက်ပံ့မှုများ ပေးလျက်ရှိသလို ရုပ်ရှင်လောကသား အချင်းချင်းလည်း ပြန်လည် လှူဒါန်းမှုများ ပြုလုပ်နေကြတာကို တွေ့ရပါတယ်။

ဒီလိုလှူဒါန်းတာတွေဟာ အခုအချိန်မှာ ဘယ်လောက်ပဲလှူလှူ သိန်းထီပေါက်သလို ထင်ရတယ်လို့ ဇာတ်ပို့ သရုပ်ဆောင် ဂွမ်းပုံကြီးက ဧရာဝတီကို ပြောပါတယ်။

“အခုချိန်ခါက ၅ ပြားမှ မဝင်တဲ့အချိန်လေ။ ဒါကြောင့် ၁ ထောင်ပဲပေးပေး၊ ၁ သောင်းပဲ ပေးပေး ဘယ်လောက်လှူလှူ ကိုယ်တွေက အဆင်ပြေတာပေါ့။ သိန်းထီပေါက်သလားတောင် အောက်မေ့ရတယ်”

“ဆန်လေးပဲ ဝယ်နိုင်ဝယ်နိုင်၊ ဆီလေးပဲ ဝယ်နိုင်ဝယ်နိုင်၊ အခုအချိန်အခါကလေ တီဂွမ်းတို့ဆို လင်မယား နှစ်ယောက်ပဲဖြစ်တဲ့အတွက် ဈေးဖိုး ၂၅၀၀ ဆို လောက်တယ်။ သူဘယ်လောက်ပေးပေး ကိုယ့်အတွက် ဈေးဖိုး တရက်စာ ပေးရင်တောင် မနည်းပါဘူး” လို့ ဂွမ်းပုံကြီးက ဧရာဝတီကို ပြောပါတယ်။

လက်ရှိမှာတော့ အလုပ် မရှိတာကြောင့် သားတွေက ကျွေးမွေးထားတာကို စားနေရပြီး ကျန်းမာရေးဝန်ကြီးဌာနက ညွှန်ကြားချက်အတိုင်း နေထိုင်တယ်လို့ ဆိုပါတယ်။

“သားတွေက ကျွေးတယ် ဖအေနဲ့ မအေကို။ ကိုယ်တွေကတော့ အလုပ်မရှိဘူး။ ရိုက်ကူးရေးတွေကလည်း လုံးဝ မလာဘူး။ သူတို့လည်းရုံးတွေက ပိတ်ထားတာ ဆိုတော့။ သင်္ကြန် မရှိတော့လည်း အိမ်မှာရှိတာလေး ထုတ်စားပြီးတော့ ကျန်းမာရေးဌာနက ညွှန်ကြားတဲ့အတိုင်း အိမ်မှာပဲ နေကြတာပေါ့” လို့ ဂွမ်းပုံကြီးက ပြောပါတယ်။

ရုပ်ရှင်လောကမှာ အမျိုးသမီးသက်ကြီး အနုပညာရှင်များနဲ့ ဖွဲ့စည်းထားတဲ့ အမေများအဖွဲ့နဲ့ မမများအဖွဲ့ဆိုပြီး ရှိတဲ့အနက် အမေများအဖွဲ့ကိုတော့ အသက်ကြီးတဲ့ အမေများဖြင့် ဖွဲ့စည်းထားတာကြောင့် ဂါရဝ တရားနဲ့ လှူဒါန်းကြပြီး မမများအဖွဲ့မှာလည်း မပြေလည်တဲ့သူတွေ ရှိတာကြောင့် လှူဒါန်းစေချင်တယ်လို့ ပြောပါတယ်။

“အမေများအဖွဲ့ကိုတော့ ဂါရဝတရားထားတာပေါ့ကွယ်။ အသက်တွေကြီးပြီဆိုတော့ လှူကြတာကိုး။ တီဂွမ်းတို့ကျတော့ ငယ်သေးတယ်ဆိုတဲ့ သဘောပေါ့။ ၆၆ လေ။ ငယ်သေးတာပေါ့ကွယ်။ မမများအဖွဲ့ကလည်း လိုအပ်တာပေါ့။ ပြည့်စုံတဲ့သူ ရှိသလို မပြည့်စုံတဲ့သူတွေလည်း ရှိတယ်။ အဲ့တော့ ဒီလိုထောက်ပံ့ကြေးလေးတွေရတော့ သူတို့လည်း ပျော်ကြတယ်ပေါ့။ ရပါစေ။ သူတို့ကိုလည်း ပေးလိုက်ကြပါ” လို့ ဂွမ်းပုံကြီးက ပြောပါတယ်။

ဝါရင့်ဇာတ်ပို့သရုပ်ဆောင်ဂွမ်းပုံကြီးကတော့ အသက် ၆၆ နှစ်ရှိပြီဖြစ်ပြီး အမျိုးသားဖြစ်သူကလည်း သရုပ်ဆောင် တဦးဖြစ်တာကြောင့် အခုအချိန်မှာ အလုပ် မရှိတော့တဲ့အတွက် သားများရဲ့ထောက်ပံ့မှုဖြင့် ရပ်တည် နေထိုင်နေလျက်ရှိတယ်လို့ သိရပါတယ်။

You may also like these stories:

“ဝေဖန်ခံရပေမယ့် ခံစားမနေတော့ပါဘူး”လို့ လူကြမ်း ဦးဘဂျမ်း ပြော

“တခြား စီးပွားရေး မလုပ်ခဲ့တာ နောင်တရတယ်”လို့ ကိုကိုဦး ပြော

“အမေများအဖွဲ့” မှာ ငွေကြေးလည်း လိုအပ်နေတယ်လို့ ဒေါ်နွဲ့နွဲ့စမ်းပြော

The post “အခုအချိန်မှာ ဘယ်လောက်ပဲလှူလှူ သိန်းထီပေါက်သလိုပါပဲ”လို့ ဂွမ်းပုံကြီး ပြော appeared first on ဧရာဝတီ.

မင်းသား Daniel Radcliffe ဟာ ဟယ်ရီပေါ်တာ ရုပ်ရှင်တွေကို ရိုက်ကူးနေတဲ့အချိန်မှာ အရက်စွဲနေခဲ့တယ်လို့ ဆိုပါတယ်။ သူ့ရဲ့ နောက်ဆုံးဟယ်ရီပေါ်တာ ရုပ်ရှင်ကိုရိုက်ကူးခဲ့ပြီးတဲ့နောက် နှစ်အနည်းငယ်အထိ အရက်စွဲနေခဲ့တဲ့အကြောင်းကို ပွင့်ပွင့်လင်းလင်း ပြောဆိုခဲ့ပါတယ်။

၂၀၁၉ ခုနှစ်တုန်းက Off Camera မီဒီယာနဲ့ ပြုလုပ်ခဲ့တဲ့ အင်တာဗျူးတခုမှာ မင်းသားက လူငယ်မင်းသားတယောက်အနေနဲ့ အကြည့်ခံခဲ့ရတဲ့ ခံစားချက်ကို ရင်ဆိုင်ကျော်ဖြတ်ခဲ့ရတယ်လို့ ဆိုပါတယ်။

“ကျနော့်အကြောင်း ပြောရမယ်ဆိုရင် လူတွေရဲ့စောင့်ကြည့်တာကို ခံခဲ့ရတယ်ဆိုတဲ့ အချက်ကို မေ့ပျောက်ဖို့ အလျင်မြန်ဆုံး နည်းလမ်းကတော့ အရက်မူးနေဖို့ဖြစ်ပါတယ်။ ပြီးတော့ အရက် အရမ်းမူးလာတာနဲ့အမျှ လူတွေ စောင့်ကြည့်နေကြတယ်ဆိုတာကို ပိုပြီး ရှောင်ရှားလာနိုင်ပါတယ်”လို့ သူက ဆိုပါတယ်။

၂၀၁၀ ခုနှစ်ကစလို့ အရက်စွဲခဲ့တဲ့ မင်းသားက သူငယ်ချင်းတွေရဲ့ အကူအညီတွေနဲ့ အရက်ဖြတ်ခဲ့တယ်လို့ ဆိုပါတယ်။

သူက “ကျနော့်ရဲ့ ကိုယ်ပိုင်ဆုံးဖြတ်ချက်ဖြစ်ပါတယ်။ ညက ရေချိန်ကိုက်ထားပြီး နောက်တနေ့ မနက်မှာ အိပ်ရာထရတာဟာ တော်တော်လေးကို မကောင်းတဲ့ကိစ္စပါ။ ဒါပေမဲ့လည်း ကျနော့်ရဲ့ အလုပ်ကို အရမ်း ချစ်မြတ်နိုးပါတယ်။ ရိုက်ကွင်းကိုသွားရတာလည်း ကြိုက်ပါတယ်။ ပြီးတော့ ကျနော် ရိုက်ကွင်းမှာ မရှိတဲ့နေ့ဟာ နေ့တနေ့တောင် မဟုတ်ပါဘူး” လို့ ဆိုပါတယ်။

ဘီဘီစီနဲ့ ပြုလုပ်ခဲ့တဲ့ သီးခြားအင်တာဗျူးတခုမှာတော့ သူက “လူတွေရှေ့မှာ ဆောင်ရွက်ရမယ့် အပြုအမူဆိုတဲ့ စကားလုံးရဲ့ အဓိပ္ပါယ်ကို ကျနော် တကယ်မသိခဲ့ပါဘူး။ နာမည်ကြီးမှုက ကျနော့်ဘဝကို အနှောင့်အယှက် ဖြစ်နေတယ်လို့ ခံစားရတာ အဲ့ဒီတုန်းက ပထမဆုံးအကြိမ်ပါ။ ကျနော်အပြင်မှာ အရက်ထွက်သောက်တဲ့အခါ လူတွေက အရက်မူးနေတဲ့ လူတယောက်လို့ မြင်မှာ မဟုတ်ဘူး”

“ဟယ်ရီပေါ်တာက ဘားတခုမှာ အရက်မူးနေတယ်လို့ပဲ သိကြမှာ။ အဲ့ဒါက လူတွေရဲ့ စိတ်ဝင်စားစရာဖြစ်ခဲ့ပါတယ်။ လူတွေအတွက် ရယ်စရာ တခုဖြစ်ခဲ့မှာပါ။ အဲ့ဒါနဲ့ပဲ ကျနော်က ပိုသောက်တယ်။ ပိုမူးတယ်ဆိုတာမျိုး ဖြစ်လာခဲ့တယ်။ နှစ်အနည်းငယ်အထိ ကျနော်အရမ်းကို စွဲစွဲမြဲမြဲ သောက်ခဲ့တယ်” လို့ဆိုပါတယ်။

အသက် ၃၀ အရွယ် မင်းသား Daniel ဟာ ၂၀၀၁ ခုနှစ်မှာ ထွက်ရှိခဲ့တဲ့ Harry Potter and the Philosopher’s Stone ရုပ်ရှင်မှာ စတင်သရုပ်ဆောင်ခဲ့ပြီး ၁၀ နှစ်အတွင်း ဟယ်ရီပေါ်တာရုပ်ရှင် ၇ ကားမှာ ဆက်တိုက် သရုပ်ဆောင်ခဲ့ပါတယ်။ အဲ့ဒီအချိန်ကာလတုန်းက ကမ္ဘာပေါ်မှာ အနုပညာကြေးအမြင့်ဆုံး မင်းသားတွေထဲမှာ ပါဝင်ခဲ့ပြီး အဲ့ဒီရုပ်ရှင်စီးရီးမှာ ပါဝင်ခဲ့တဲ့ သူ့ရဲ့ သရုပ်ဆောင်မှုတွေကြောင့် ကမ္ဘာတဝန်းမှာ ပရိသတ်တွေကရော ဝေဖန်သူတွေကပါ ချီးကျူးခဲ့ကြပါတယ်။

ဟယ်ရီပေါ်တာရုပ်ရှင်တွေ ပြီးတဲ့နောက် မင်းသားဟာ “The Woman in Black” နဲ့ “Victor Frankenstein” ဆိုတဲ့ ရုပ်ရှင်တွေမှာလည်း ပါဝင်သရုပ်ဆောင်ခဲ့ပါတယ်။

Ref: hindustantimes

You may also like these stories:

အခုနှစ်ကုန်ပိုင်းမှာ ABBA အဖွဲ့ရဲ့ သီချင်းသစ် ဖြန့်ချိမည်

တပတ်အတွင်း “Avatar” ရုပ်ရှင်ရိုက်ကူးရေး ပြန်လည် စတင်မည်

မင်္ဂလာပွဲတွေမှာ သီဆိုဖျော်ဖြေတာမျိုးလုပ်မှာ မဟုတ်ဘူးလို့ ရှာရွတ်ခန် ပြော

The post ဟယ်ရီပေါ်တာ ဇာတ်ကောင်ကြောင့် အရက်စွဲခဲ့ဖူးတဲ့ Daniel Radcliffe appeared first on ဧရာဝတီ.

ထိုင်းနိုင်ငံက အမျိုးသားတဦးဟာ သူ့ရဲ့ မျက်နှာကို K-pop စတားတယောက်လိုမျိုး ဖြစ်စေဖို့ ပလတ်စတစ် ဆာဂျရီ အကြိမ်ရေ ၃၀ လောက် ခံယူလုပ်ဆောင်ခဲ့တယ်လို့ သိရပါတယ်။

Ratchadapong Prasit ဆိုတဲ့ အဲ့ဒီအမျိုးသားဟာ မွေးရာပါမျက်နှာကြောင့် သိမ်ငယ်စိတ်ဝင်ခဲ့ပြီး သူ့ရဲ့ မျက်နှာကို လုံး၀ ပြောင်းလဲပစ်ချင်ခဲ့တယ်လို့ ဆိုပါတယ်။ ဒါကြောင့် သူဟာ နှစ်ပေါင်းများစွာကြာ ပိုက်ဆံစုခဲ့ပြီး သူ့အသက် ၂၅ နှစ် အရွယ်မှာတော့ သူ့ရဲ့ မျက်နှာကို စတင်ပြောင်းလဲခဲ့ပါတယ်။

သူဟာ လွန်ခဲ့တဲ့ ၂ နှစ်လောက်က ခွဲစိတ်မှုတွေကို စတင်ခံယူခဲ့တာ ဖြစ်ပါတယ်။ သူ့အတွက် အလှကုန် ပစ္စည်းလုပ်ငန်းစဉ် ၃၀ ကြောင့် ထိုင်းဘတ် ၃ သိန်းလောက်အထိ ကုန်ကျခဲ့ပါတယ်။ ပလတ်စတစ် ဆာဂျရီကုသမှုကို ခံယူခဲ့ပြီးတဲ့နောက် သူ့ရဲ့ ဘဝဟာ လုံးဝပြောင်းလဲသွားခဲ့ပြီး ကုန်ကျခဲ့တဲ့ ပိုက်ဆံ တပြားတချပ်တိုင်းဟာ တန်တယ်လို့ သူက ဆိုပါတယ်။

အခုလိုမျိုး ခွဲစိတ်ကုသမှု ခံယူဖို့ Prasit ဟာ ဖိနပ်ရောင်းချသူတဦးအဖြစ် လုပ်ကိုင်ပြီး ငွေစုခဲ့တာပါ။ လက်ရှိမှာတော့ သူူဟာ ပတ္တယားမြို့မှာရှိတဲ့ ပြဇာတ်ရုံတခုမှာ အကသမားတဦးအနေနဲ့ လုပ်ကိုင်နေပြီး သူဟာ အောင်မြင်သူတယောက် ဖြစ်တယ်လို့ဆိုပါတယ်။

သူဟာ သူ့ရဲ့ မျက်နှာကိုတင် ပြောင်းလဲခဲ့တာ မဟုတ်ပါဘူး။ SHINEE အဖွဲ့ဝင်တဦးဖြစ်တဲ့ Minho နာမည်ကို သဘောကျလို့ သူ့ရဲ့ နာမည်ကိုလည်း Minho လို့ နာမည်ပြောင်းခဲ့ပါတယ်။

Prasit ဟာ ပလတ်စတစ်ဆာဂျရီကုသမှုကို စတင်မခံယူခင်ကတည်းက သူဟာ စတင်လူပြောများခဲ့တာပါ။ သူဟာ ၂၀၁၇ ခုနှစ် မေလတုန်းက Daily News မီဒီယာနဲ့ အင်တာဗျူးလုပ်ခဲ့ပြီးနောက်ပိုင်း လူထုရဲ့ စိတ်ဝင်စားမှုကို ခံခဲ့ရပါတယ်။ သူ့ရဲ့ဘဝကံကြမ္မာကို ပြောင်းလဲဖို့ ပလတ်စတစ်ဆာဂျရီတွေကို လုပ်ဆောင်မှာ ဖြစ်တယ်လို့ အဲ့ဒီတုန်းက ကြေညာခဲ့ပါတယ်။

သူဟာ လုပ်ငန်းခွင်မှာရော၊ ကိုယ်ရေးကိုယ်တာ ဘဝမှာရော မအောင်မြင်ခဲ့ဘူးလို့ ဆိုပါတယ်။ သူဟာ အကသမား တယောက်ဖြစ်ချင်ခဲ့ပြီ ပတ္တယားပြဇာတ်ရုံတခုမှာ လူရွေးပွဲကို ၇ ကြိမ်ဝင်ခဲ့ပေမယ့် အကြောင်းပြချက်တွေကြောင့် အကြိမ်တိုင်း အပယ်ခံခ့ရပါတယ်။ ဒါ့အပြင် မိန်းကလေးတွေက သူနဲ့ တွဲဖို့ တွန့်ဆုတ်နေတာကြောင့် အချစ်ကံလည်း ခေခဲ့ရတယ်လို့ ဆိုပါတယ်။

အခုတော့ ဆာဂျရီ မပြုလုပ်မီနဲ့ ပြုလုပ်ပြီး ရိုက်ကူးထားတဲ့ သူ့ရဲ့ ပုံတွေကြောင့် သူဟာ နာမည်ကြီးနေပြီဖြစ်ပါတယ်။ အခုတော့ သူဟာ ပတ္တယားပြဇာတ်ရုံမှာ အလုပ်လုပ်ကိုင်နေရုံသမာက ထိုင်းနိုင်ငံရဲ့ “One Man” အစီအစဉ်မှာလည်း နောက်ဆုံးဆန်ခါတင်ပြိုင်ပွဲဝင် ဖြစ်နေပါပြီ။ သူဟာ ထိုင်းရုပ်သံ အစီအစဉ်တော်တော်များများမှာလည်း ပါဝင်လာခဲ့ပြီး အခုတော့ ဆိုရှယ်မီဒီယာမှာပါ နာမည်ကြီးနေပြီ ဖြစ်ပါတယ်။

သူဟာ ခွဲစိတ်မှုခံယူခဲ့ပြီးတဲ့နောက် Daily News မီဒီယာနဲ့ ပြုလုပ်ခြ့တဲ့ အင်တာဗျူး တခုမှာ ကမ္ဘာကို သူ့ရဲ့ ပလတ်စတစ် ဆာဂျရီ ပြုပြင်ပြောင်းလဲမှုအကြောင်း ဝေမျှဖို့ ရှက်ရွံ့နေမှာ မဟုတ်ဘူးလို့ ပြောဆိုခဲ့ပါတယ်။ သူ့လိုမျိုးပဲ ပလတ်စတစ်ဆာဂျီကြောင့် ပြောင်းလဲသွားခဲ့တဲ့ နောက်တဦးကတော့ Miyyo Rizone ဆိုသူ ဖြစ်ပါတယ်။ သူဟာ ၂၀၁၉ ခုနှစ်မှာ ကာတွန်းဇာတ်ကောင်ပုံစံ ရရှိဖို့ ခွဲစိတ်ကုသမှုများစွာကို ခံယူခဲ့ပါတယ်။

Ref: nestia

You may also like these stories:

Facial Recognition စနစ်က ဘတ်စ်ကားပေါ်က ကြော်ငြာဓာတ်ပုံကို မှားယွင်းအရေးယူမှု ဖြစ်ပွ

ပရိသတ်ရှေ့မှောက်ကို ပြန်ရောက်လာတဲ့ မင်းသမီး ဖန်ပင်းပင်း

The post မျက်နှာကို ဆာဂျရီ အကြိမ်ပေါင်း ၃၀ လုပ်ဆောင်ခဲ့တဲ့ ထိုင်းအမျိုးသား appeared first on ဧရာဝတီ.

ကျော်သူ ဦးဆောင်တဲ့ နာရေးကူညီမှု အသင်းနဲ့ အနန္တမေတ္တာ ပရဟိတအဖွဲ့တို့ ပူးပေါင်းပြီး နွမ်းပါးသော ဇာတ်ပို့ ဇာတ်ရံ သရုပ်ဆောင် အယောက် ၄၀၀ အတွက် စားနပ်ရိက္ခာနဲ့ လူသုံးကုန် ပစ္စည်းတွေ လှူဒါန်းပေးခဲ့ကြပါတယ်။ ဒီလိုလှူဒါန်းမှုနဲ့ ပတ်သတ်ပြီး ကျော်သူက အခုလို ဆိုပါတယ်။

“COVID-19 ဖြစ်တဲ့အချိန်မှာ ကျနော်တို့ အသင်းကတော့ လုပ်စရာရှိတဲ့ အလုပ်တွေပေါ့။ လိုက်လှူတာတွေ ရှိတယ်။ ဆေးတွေ လိုက်ဖျန်းတယ်။ ဆေးရုံတွေကို ဆေးဝါးကုသရေး ပစ္စည်းတွေ PPE ဝတ်စုံတွေ၊ Mask လှူတာတွေ လှူဒါန်းပြီးပြီ”

“အနန္တမေတ္တာ သာသနာပြုပရဟိတအဖွဲ့ကနေ ကမ်းလှမ်းလာတယ်။ ရုပ်ရှင်လောကသားတွေလည်း လှူချင်တယ်ဆိုတော့ ကျနော်လည်း အဲ့ကျမှ သတိရတယ်။ ပရိဟတသမားဆိုတော့ အများကို ကူညီဖို့ အာရုံရောက်နေတာ အနီးကို ရှိတာကို သတိမထားမိဘူး။ ကိုယ့်အနုပညာ လောကသားတွေအတွက် မလုပ်ပေးရသေးတာတွေ ရှိတော့ ဆရာမ မိသားစုနဲ့ ကျနော် ပူးပေါင်းပြီးတော့ လှူဖြစ်တယ်”

“ဆန်၊ ဆီ၊ သကြား၊ လူသုံးကုန်ပစ္စည်းတွေ၊ မိုးကာ အင်္ကျီတွေနဲ့ ငွေ ၃ သောင်း လှူတယ်။ ဇာတ်ပို့ ဇာတ်ရံကတော့ ထောင်ကျော်တယ်။ အရင်ကလှူတော့ ၄၀၀ စာ လှူတော့ အခုလည်း ၄၀၀ စာ သတ်မှတ် လှူလိုက်တယ်။ မနက်ဖြန်တော့ ဇာတ်ညွှန်းအလွှာရယ်၊ အစည်းအရုံး ဝန်ထမ်းတွေရယ်၊ နာယကကြီးတွေရယ်ကိုနဲ့ အာလုံး အယောက် ၆၀၀ စာ လှူသွားမယ် ”လို့ ကျော်သူက ဆိုပါတယ်။

စားဝတ်နေရေး အခက်အခဲဖြစ်နေတဲ့ အနုပညာလောကသားတွေအတွက် အလှူရှင်တွေ ထပ်မံ ထွက်ပေါ်လာစေချင်တယ်လို့လည်း ကျော်သူက ဆိုပါတယ်။

“ကျနော် အခုလို လှူဒါန်းရတော့ အရမ်းဝမ်းသာတယ်။ ကျနော် လှူတော့ သူတို့တွေကလည်း ဝမ်းသာကြတယ်။ ဘာပဲဖြစ်ဖြစ် ငါတို့ လှူလိုက်တာ သူတို့ အတွက် ၁၀ ရက်ကျော်ကျော်လောက်ပဲ စားလို့ရမှာ ၁၀ ကျော်ရင် သူတို့ ဘယ်လိုကျော်ဖြတ်ဦးမလဲ စဉ်းစားလိုက်မိရင် ရင်လေးတယ်။ ဒါကြောင့် အလှူရှင်တွေ ပေါ်ပေါက်လာဖို့ အရေးကြီးတယ်”

“ကျနော်တို့ အနုပညာသမားက အနုပညာပဲ လုပ်တတ်တာ အလုပ်ကြမ်းလုပ်ဖို့ ဆိုတာလည်း တော်ရုံ မလုပ်နိုင်ဘူး။ ကျနော်ကိုယ်တိုင်လည်း လက်ဖက်ရည်ဆိုင် ဖွင့်ဖူးတယ်။ ဆေးဝါးပစ္စည်းဆိုင် ဖွင့်ခဲ့ဖူးတယ်။ ထီဆိုင် ဖွင့်ခဲ့ဖူးတယ်။ ရှုံးတာပဲ။ ကိုယ်တိုင် မလုပ်နိုင်တော့ ရှုံးတာပဲ။ စီးပွားရေးဆိုတာ နားလည်တာ မဟုတ်ဘူး။ အနုပညာသမားက အနုပညာလုပ်ဖို့ပဲ ခေါင်းထဲမှာ ရှိတာ”

“အဲ့တော့ အနုပညာလောကကြီး ထိုင်နေရရင် အကုန်ဒုက္ခရောက်တယ်။ ဒီရောဂါက ဘယ်လောက်ထိ သွားမလဲ မသိဘူး။ နောက် ၆ လဖြစ်မလား။ ၁ နှစ်ဖြစ်မလား။ ၁ နှစ်ခွဲ ဖြစ်မလား မပြောနိုင်ဘူး။ အဲ့လို အခြေအနေမျိုးဆို ကျနော်တောင် ဒုက္ခရောက်ရင် ရောက်သွားမှာ။ ရောဂါတွေ အမြန်ဆုံး ချုပ်ငြိမ်းဖို့ အရေးကြီးတယ်။ အမြန်ဆုံး အလုပ်ငန်းတွေ ပြန်လည်နိုင်ဖို့ အရေးကြီးတယ်။ လုပ်ငန်းတွေလည်း အမြန်ဆုံး ပြန်လည်ပတ်နိုင်ပါစေလို့ ဆုတောင်းနေရမှာပဲ”လို့ ကျော်သူက ဆိုပါတယ်။

You may also like these stories:

မျက်နှာကို ဆာဂျရီ အကြိမ်ပေါင်း ၃၀ လုပ်ဆောင်ခဲ့တဲ့ ထိုင်းအမျိုးသား

ဟယ်ရီပေါ်တာ ဇာတ်ကောင်ကြောင့် အရက်စွဲခဲ့ဖူးတဲ့ Daniel Radcliffe

The post အနုပညာရှင်တွေကို လှူဒါန်းပေးခဲ့တဲ့ ကျော်သူရဲ့ စကားသံ appeared first on ဧရာဝတီ.

လက်ရှိ မြန်မာနိုင်ငံမှာ COVID-19 ဖြစ်ပွားနေမှုက ကမ္ဘာနဲ့ယှဉ်ရင်တော့ အများကြီး ကုသိုလ်ကံကောင်းတယ်လို့ သရုပ်ဆောင် မတူးက ဧရာဝတီကို ပြောပါတယ်။

“COVID-19 စဖြစ်ကတည်းက တောတွေထဲထိ သွားပြီး ပညာပေးတွေ လုပ်ပေးတယ်။ ဆေးဖျန်းတာကအစ ကိုယ်တိုင် လိုက်ဖျန်းတယ်။ နယ်ဘက်က အိမ်တွေက စည်းကမ်းလေးတွေနဲ့ စနစ်တကျ လုပ်တာ တွေ့တယ်။ ကိုဗစ်ကို အန်တီတူးတို့က အတတ်နိုင်ဆုံး တွန်းလှန်နေကြတာပဲ။ ကမ္ဘာနဲ့ယှဉ်ရင်တော့ ကျမတို့ အများကြီး ကုသိုလ်ကံကောင်းတယ်လို့ မြင်ပါတယ်။ တခြားနိုင်ငံတွေမှာ ထောင်ပေါင်းများစွာ သေနေပေမယ့် ကျမတို့ဆီမှာ မသေဘူး”

“အန်တီတူးတို့ မြန်မာနိုင်ငံက ဘယ်လိုပဲဖြစ်ဖြစ် နိုင်အောင် တိုက်နိုင်မယ်လို့ ယုံပါတယ်။ စည်းကမ်း မလိုက်နာဘဲ Mask မတပ်ရင် အရေးယူတာတော့ ကောင်းတယ်။ အန်တီတူးတို့လည်း လုပ်အားပေးရင် Mask တပ်ထားတာ ကြာကြာ တပ်တော့ မူးလာတယ်။ ဒါပေမဲ့လည်း မတတ်နိုင်ဘူး။ တပ်ကြရမှာပဲ။ ကိုယ့်ကိုယ်ကိုယ် ကျန်းမာအောင်လုပ်ပါ။ ခွန်အားကောင်းအောင် လုပ်ပါ။ အလုပ် မရှိရင်တော့ Stay home အိမ်မှာပဲ နေကြပါ။ ကိုယ့်ကြောင့် မကူးစက်ပါစေနဲ့”လို့ မတူးက ပြောပါတယ်။

ပြည်တော်ပြန်တွေကြောင့် ရောဂါဖြစ်သူတွေကြာင့်သာ မြန်မာနိုင်ငံမှာ ရောဂါဖြစ်ပွားနေတာလို့ မတူးကဆိုပါတယ်။

“အခု ရောဂါဖြစ်တာကတော့ အန်တီတူးတို့ ကိုယ့်နိုင်ငံက လူတွေ ဖြစ်တာမဟုတ်ပါဘူး။ ပြည်တော်ပြန်တွေကနေ တိုးတိုးလာတယ်။ အဲ့ဒါကြောင့်သာဖြစ်တာပေါ့။ နောက် ကောလာဟလတွေကို မယုံဖို့ ပြောချင်တယ်။ အန်တီတို့ ပြည်သူတွေ အကုန်လုံးက နိုင်ငံတွေက သတင်းအမှန်တွေကိုပဲ ယူပါ။ သူများတွေ ကောလာဟလတွေပြောတာ မယုံပါနဲ့”

“ကောလာဟလ သတင်းတွေ ဖတ်ပြီး တအားကြောက်သွားတဲ့သူတွေ ရှိသလို အကြောက်လွန်တဲ့သူတွေလည်း ရှိတယ်။ Facebook တွေက အကောင်းရေးတာရှိသလို အဆိုးရေးတာလည်း ရှိတာကြောင့် ပြည်သူတွေက မြန်မာပြည်ရဲ့ တရားဝင်သတင်းတွေပဲ ကြည့်ကြပါ”လို့ မတူးက ပြောပါတယ်။

ဇာတ်ပို့ ဇာတ်ရံ သရုပ်ဆောင် မတူးဟာ ၂၀၁၇ ခုနှစ်၊ အလှမယ်ပြိုင်ပွဲမှာ အသက် ၅၁ နှစ်နှင့်အထက် Mrs.Myanmar 2017 ဆု ရရှိထားပြီး ပရဟိတလုပ်ငန်းတွေကိုလည်း လုပ်ကိုင်နေပါတယ်။

You may also like these stories:

COVID-19 နဲ့ ပတ်သက်ပြီး PPE နဲ့ Mask တွေ လှူဒါန်းဖြစ်တဲ့ မိစန္ဒီ

Covid-19 တုံ့ပြန်မှုသည် မြန်မာနိုင်ငံ အနာဂတ်ကို ပြန်လည်စိတ်ကူး ပုံဖေါ်ရန်ဖြစ်လာ

The post “မြန်မာက COVID-19 ဖြစ်ပွားမှု ကမ္ဘာနဲ့ယှဉ်ရင် ကံကောင်းပါတယ်”လို့ မတူး ပြော appeared first on ဧရာဝတီ.