သရုပ်ဆောင် မိုးအောင်ရင်အား ရည်းစားဟောင်းဖြစ်သူ မခင်မြတ်နိုးမှ ကာမလိမ်လည်မှုဖြင့် တရားစွဲဆိုထားတဲ့ အမှုရဲ့ ၁၅ ကြိမ်မြောက် ရုံးချိန်းမှာ မိုးအောင်ရင်က ကျန်းမာရေး မကောင်းတဲ့အတွက် ခွင့်တိုင်ကြားခဲ့ပါတယ်။ ဒီလို ခွင့်တိုင်ကြားတာဟာ ကြိုတင် ခွင့်တောင်းခြင်းမရှိဘဲ ပျက်ကွက်တာဖြစ်တာကြောင့် ကြိုတင်ခွင့်တိုင်ကြားရန်အတွက် တရားရုံးက သတိပေးခဲ့တယ်လို့ သိရပါတယ်။

“ယနေ့ ရုံးချိန်းက ၁၅ ကြိမ်မြောက် ရုံးချိန်းဖြစ်ပါတယ်။ တရားလို မခင်မြတ်နိုး လာပါတယ်။ သူ့ရဲ့ရှေ့နေ လာပါတယ်။ စွပ်စွဲခံရသူ မိုးအောင်ရင် မလာပါဘူး။ ကျန်းမာရေး မကောင်းတဲ့အတွက် ခွင့်တင်ပြထားပါတယ်။ ကြိုတင်ခွင့်တောင်းခြင်း မရှိဘဲ ပျက်ကွက်လို့ စွပ်စွဲခံရသူ မိုးအောင်ရင်ဘက်ကို ကြိုတင် ခွင့်တိုင်ကြားရန် သတိပေးပြီး ရုံးချိန်း ပြန်ချိန်းပေးခဲ့ပါတယ်”လို့ ရန်ကင်းမြို့နယ် တရားရုံး ပြန်ကြားရေးအရာရှိ ဦးထွန်းနိုင်ဝင်းက ပြောပါတယ်။

နောက်တကြိမ် ရုံးချိန်းကိုတော့ ဇူလိုင်လ ၈ ရက်နေ့ ပြန်လည် ချိန်းဆိုခဲ့ပြီး တရားလိုဖြစ်သူ မခင်မြတ်နိုးကို ပြန်ခေါ်သက်သေအဖြစ် စစ်ဆေးသွားမှာ ဖြစ်ပါတယ်။

မခင်မြတ်နိုးအား ပြန်ခေါ်သက်သေအဖြစ် စစ်ဆေးပြီးပါက မှုခင်းစီမံခန့်ခွဲမှု အစည်းအဝေး ပြုလုပ်ပြီး မိုးအောင်ရင်ကို ပြန်လည် စစ်ဆေးမှာဖြစ်တယ်လို့ သိရပါတယ်။

စွပ်စွဲခံရသူ မိုးအောင်ရင်မှ တရားလိုရဲ့ စွဲဆိုထားတဲ့အမှု ပြင်ဆင်ချက်ကို ရန်ကုန်အရှေ့ပိုင်းခရိုင်ရုံးမှာ လျှောက်ထားခဲ့ခြင်းကိုလည်း မေလ ၂၉ ရက်နေ့က ပလပ်ကြောင်း အမိန့်ချခဲ့ပါတယ်။ ဒါကြောင့် အမှုကို မူလမြို့နယ် တရားရုံးမှာ ပြန်လည် စစ်ဆေးသွားမှာ ဖြစ်ပေမယ့် ရုံးချိန်းပျက်ကွက်မှုများကြောင့် ဆက်လက် မစစ်ဆေးနိုင်ပါ။

သရုပ်ဆောင် မိုးအောင်ရင်ကိုတော့ ရည်းစားဟောင်းဖြစ်သူ ခင်မြတ်နိုးက ၂၀၁၉ ခုနှစ်၊ နိုဝင်ဘာလ ၂၂ ရက်နေ့က ရန်ကုန်မြို့၊ ရန်ကင်းမြို့နယ် တရားရုံးမှာ ရာဇသတ်ကြီးပုဒ်မ ၄၁၇ ဖြင့် တရားစွဲဆိုခဲ့တာဖြစ်ပြီး မိုးအောင်ရင် အနေနဲ့ ငွေကျပ် သိန်း ၁၀၀ အာမခံနဲ့ တရားရင်ဆိုင်နေရတာ ဖြစ်ပါတယ်။

The post ခွင့်မတိုင်ဘဲ ရုံးချိန်း ပျက်ကွက်လို့ မိုးအောင်ရင် သတိပေးခံရ appeared first on ဧရာဝတီ.

သရုပ်ဆောင် စမိုင်းလ်က ဒီနေ့ ဇွန် ၁၇ ရက်နေ့မှာ ကျရောက်တဲ့ သမီးငယ် ဆုရတီမောင် (ခ) ကလိုဝီရဲ့ အသက် ၁၂ နှစ်ပြည့် မွေးနေ့ အလှူကို ရန်ကုန်မြို့၊ မြောက်ဒဂုံမြို့နယ်ရှိ “ခိုင်နှင်းဝေ မိဘမဲ့ဂေဟာ” မှာ အလှူငွေ ၁၂ သိန်း သွားရောက် လှူဒါန်းခဲ့ပါတယ်။

“မခိုင်နှင်းဝေဆီမှာ လာလှူဖြစ်တာက သမီးလေး နားလည်အောင်လို့။ ကလေးတိုင်းလည်း ကံမကောင်းသလို၊ ကလေးတိုင်းလည်း ကံမဆိုးဘူး။ သမီးလေးက ကံကောင်းပြီး ကျမတို့ဆီမှာ သမီးလေး လာဖြစ်ရပေမယ့် ကံသိပ်မကောင်းတဲ့ ကလေးတွေ ဒီမှာ စွန့်ပစ်တာတွေကို သမီးလေး သိအောင်ပေါ့။ နောက်ပြီး သူ ရလာတဲ့ ဘဝကို တန်ဖိုးထားတတ်အောင် မွေးနေ့ဆို မိဘမဲ့ ကလေးတွေဆီ သွားလှူဒါန်း ဖြစ်တယ်”လို့ စမိုင်းလ်က ပြောပါတယ်။

ဆက်လက်ပြီး စမိုင်းလ်က သမီးဖြစ်သူရဲ့ မွေးနေ့မှာ ငွေသား ၁၂ သိန်း လှူဖြစ်ပုံနဲ့ သမီးကို မွေးနေ့ လက်ဆောင်အဖြစ် ခွေးလေး ဝယ်ပေးခဲ့တယ်လို့လည်း ဆိုပါတယ်။

“၁၂ နှစ်ပြည့် မွေးနေ့မို့ ငွေသား ၁၂သိန်း နဲ့ ကလေးတွေကို ကိတ်မုန့်ခွဲပေးပြီး ကျွေးတာပေါ့။ သမီးလေးက ခွေးလေး လိုချင်တယ်ဆိုတော့ အဲ့ခွေးလေးကို မှာထားတာက ဒီလ ၂၀ ရက်နေ့မှ ရောက်မယ်။ အိမ်မှာလည်း ၅ ကောင် ရှိတယ်။ သူက တိရစ္ဆာန်ချစ်တဲ့သူ ဖြစ်တဲ့အတွက် မွေးနေ့ရောက်ရင် ပူဆာတာက ခွေးသေးသေးလေးတွေ ပူဆာတာ။ ခွေးလေးတွေကို ချစ်လည်း ချစ်တယ်။ အရမ်းလည်းဂရုစိုက်တယ်”လို့ စမိုင်းလ်က ပြောပါတယ်။

သမီးတွေကို ကိုယ်ချင်းစာတရား ထားဖို့ အမြဲမှာဖြစ်တယ်ဆိုတဲ့ စမိုင်းလ်က ဘုရားတရားကို ပိုလုပ်ဖြစ်အောင် သင်ပေးတယ်လို့လည်း ဆိုပါတယ်။

“သူတို့ကို ကိုယ်ချင်းစာတရားလေးတွေ ထားဖို့တော့ အမြဲမှာဖြစ်တယ်။ ကိုယ်ချင်းစာတရားရှိမှ သူများပေါ် နားလည်နိုင်မှာလေ။ ပိုက်ဆံတွေ ဘယ်လောက် ရှိရှိ၊ မောက်မာနေရင် ဘယ်သူမှလည်း အထင်မကြီးဘူးလေ။ ကိုယ်ချင်းစာတရားလေး ရှိပြီး လူတွေ နားလည်အောင်လို့ပဲ အမြဲသင်ပေးဖြစ်တယ်။ ဆုံးမတယ်ဆိုတာထက် နားလည်အောင် ပြောပြတယ်”

“ဆုပေး၊ ဒဏ်ပေးနဲ့ လုပ်ရတဲ့ အရွယ်လည်း မဟုတ်တော့ဘူး။ အဲ့တော့ နားလည်အောင်ပဲ ပြောပြဖြစ်တယ်။ အရွယ်ရောက်လာတဲ့ ကလေးတွေကို အကောင်းနဲ့အဆိုး ခွဲခြားပြီး သင်ပေးတာပေါ့။ သမီးက အရင်က ကလေး၊ အခုတော့ ၁၂ နှစ် ဆိုတော့ ဘုရားတရားကို ပိုလုပ်ဖြစ်အောင် သင်ပေးဖြစ်တယ်။ လူရွေးတတ်ဖို့ သွန်သင်ပေးတာပေါ့”လို့ စမိုင်းလ်က ပြောပါတယ်။

သရုပ်ဆောင် စမိုင်းလ်နဲ့ မိသားစုက အလှူအတန်းများ မကြာခဏ ဆိုသလို ပြုလုပ်တတ်သူပါ။ အခုအခါမှာတော့ သမီးငယ်ဖြစ်သူရဲ့ မွေးနေ့ကို သရုပ်ဆောင် ခိုင်နှင်းဝေရဲ့ မိဘမဲ့ ရင်သွေးလေးများ ဂေဟာမှာ လာရောက် လှူဒါန်းခဲ့တာ ဖြစ်ပါတယ်။

The post ခိုင်နှင်းဝေ ရင်သွေးဂေဟာမှာ မွေးနေ့အလှူ လုပ်ခဲ့တဲ့ စမိုင်းလ်ရဲ့သမီးငယ်လေး appeared first on ဧရာဝတီ.

ဗြိတိန်တော်ဝင်မင်းသမီး ဒိုင်ယာနာနဲ့ မင်းသားချားလ်စ်တို့ရဲ့ အိမ်ထောင်ရေး ပျက်ပြားခဲ့မှု အခြေအနေ အကြောင်း ဇာတ်အိမ်တည်ရိုက်ကူးမယ့် ရုပ်ရှင်မှာ မင်းသမီး Kristen Stewart က ဒိုင်ယာနာအဖြစ် သရုပ်ဆောင်မှာ ဖြစ်တယ်လို့ ဟောလိဝုဒ် မီဒီယာ Deadline က ဇွန်လ ၁၇ ရက်နေ့မှာ သတင်းထုတ်ပြန်ခဲ့ပါတယ်။

“Twilight Saga” ရုပ်ရှင်တွေနဲ့ နာမည်ကျော်ကြားတဲ့ အသက် ၃၀ အရွယ် မင်းသမီး Stewart ဟာ မင်းသမီး ဒိုင်ယာနာက မင်းသားချားလ်စ်နဲ့လမ်းခွဲဖို့ ဆုံးဖြတ်ချက်ချပြီး ဘုရင့်မိဖုရား ဖြစ်ဖို့ အခွင့်အရေးကို ဖယ်ရှားခဲ့တဲ့အချိန် ၁၉၉၀ ပြည့်လွန်နှစ် အစောပိုင်းကာလကို အခြေခံမယ့်ရုပ်ရှင်မှာ ပါဝင်မှာလည်း ဖြစ်ပါတယ်။

မင်းသား ချားလ်စ် နဲ့ ဒိုင်ယာနာတို့ဟာ ၁၉၉၂ ခုနှစ်မှာ လမ်းခွဲခဲ့ပြီး အဲ့ဒီနောက်လေးနှစ်အကြာမှာ ခေတ်သစ် ဗြိတိန်တော်ဝင် မိသားစု ထဲက ထူးခြားတဲ့ လုပ်ဆောင်မှုအဖြစ် ကွာရှင်းပြတ်စဲမှုကို လုပ်ဆောင်ခဲ့ပါတယ်။ မင်းသမီး ဒိုင်ယာနာဟာ အသက် ၃၆ နှစ်အရွယ်၊ ၁၉၉၇ ခုနှစ်၊ ပဲရစ်မြို့က ကားတိုက်မှုအတွင်းမှာ သေဆုံးခဲ့ပါတယ်။

ဒါရိုက်တာ Chilean Pablo Larrain ရိုက်ကူးမယ့် အဲ့ဒီရုပ်ရှင်ကို ၂၀၂၁ ခုနှစ်မှာ စတင် ရိုက်ကူးမယ်လို့ ခန့်မှန်းရပါတယ်။ မင်းသား ချားလ်စ်အဖြစ် ဘယ်သူ သရုပ်ဆောင်မယ်ဆိုတာကိုတော့ မသိရသေးပါဘူး။

ဒါရိုက်တာ Larrain က “တစုံတယောက်က ဘုရင်မ မဖြစ်ဖို့ ဆုံးဖြတ်လိုက်တဲ့အချိန်မှာ ကျနော်ကတော့ အဲ့ဒါဟာ တကယ့် ပုံပြင်တခုကို ကျွမ်းထိုးမှောက်ခုံဖြစ်သွားစေလောက်တဲ့ ဆုံးဖြတ်ချက်ကြီးတခုလို့ ထင်ပါတယ်။ ခင်ဗျားက ဘာလို့ အဲ့ဒီလိုဆုံးဖြတ်ချက်ချလိုက်တာလဲလို့ မေးမိတယ်”

“ အဲ့ဒါဟာ လူသန်းပေါင်းများစွာဆီရောက်သွားတဲ့ အားလုံးသိကြတဲ့ ဇာတ်လမ်းတခုပါ။ အဲ့ဒါကို ကျနော်တို့ရိုက်ချင်တာပါ။ အဲ့ဒီလိုမျိုး စိတ်ဝင်စားဖွယ် ဘဝတခုကို စိတ်ဝင်စားကြတဲ့ ကမ္ဘာတဝန်းက ပရိသတ်တွေနဲ့ ကျယ်ကျယ်ပြန့်ပြန့် ချိတ်ဆက်နိုင်မယ့်ရုပ်ရှင်ကို ကျနော်တို့ ဖန်တီးချင်ပါတယ်” လို့ဆိုပါတယ်။

ဒိုင်ယာနာရဲ့ အရပ်သားနာမည် “Spencer” လို့ နာမည်ပေးထားတဲ့ အဲ့ဒီရုပ်ရှင်ဟာ ကွယ်လွန်သူ ဗြိတိန် တော်ဝင်မင်းသမီး ရဲ့ ဘဝအကြောင်း ရုပ်ရှင်၊ ရုပ်သံစီးရီး၊ မှတ်တမ်းရုပ်ရှင်နဲ့ Broadway ပြဇာတ်တွေ အထိ ဖန်တီးခဲ့ကြတဲ့ အနုပညာတွေထဲ မှာတော့ နောက်ဆုံးထုတ်ကုန်ဖြစ်လာပါတယ်။

အမေရိကန်သမ္မတ John F. Kennedy ရဲ့ ဇနီးအကြောင်း ရိုက်ကူးခဲ့တဲ့ “Jackie” ရုပ်ရှင်နဲ့ ဝေဖန်သူတွေရဲ့ ချီးကျူးမှုကို ရရှိခဲ့သူ ဒါရိုက်တာ Larrain က မင်းသမီး Stewart ဟာ အဓိကဇာတ်ကောင်နေရာနဲ့ အလိုက်ဖက်ဆုံးဖြစ်လို့ ဆိုပါတယ်။

သူက “သူဟာ တော်တော်လေးကို ထူးခြားပါတယ်။ တော်တော်လေးကို ထိခိုက်လွယ်တယ်။ ကျနော်တို့ လိုချင်တဲ့ ကြံ့ခိုင်မှုလည်း ရှိတယ်။ တချိန်တည်းမှာ သူဟာ ရင်သပ်ရှုမောဖွယ်နဲ့ စိတ်ဝင်စားဖွယ် ကောင်းအောင် လုပ်နိုင်မယ်လို့ ကျနော်ထင်ပါတယ်” လို့ Deadline မီဒီယာကို ပြောကြားခဲ့ပါတယ်။

Ref:Reuters

You may also like these stories:

Sushant Singh ကွယ်လွန်ပြီးနောက် ဘောလိဝုဒ်လောကမှ ဂယက်များ

Zoom မှာ Keanu Reeves နဲ့ စကားပြောနိုင်မယ့် အစီအစဉ် လေလံပေး

ကိုဗစ်ကြောင့် ၂၀၂၁ အော်စကာဆုပေးပွဲကို အချိန် ၂ လ နောက်ဆုတ်

The post တော်ဝင်မင်းသမီး ဒိုင်ယာနာအဖြစ် Kristen Stewart သရုပ်ဆောင်မည် appeared first on ဧရာဝတီ.

Captain America စူပါဟီးရိုးဇာတ်ကောင်အဖြစ် Marvel ရုပ်ရှင်တော်တော်များများမှာ အချိန် ၈ နှစ်နီးပါးလောက် သရုပ်ဆောင်ခဲ့တဲ့ မင်းသား Chris Evans က သူကလေးဘဝကစလို့ အကြိုက်နှစ်သက်ရဆုံး စူပါဟီးရိုးဟာ Captain America မဟုတ်ခဲ့ဘူးလို့ ပြောဆိုလိုက်ပါတယ်။

Style မဂ္ဂဇင်းနဲ့ ပြုလုပ်ခဲ့တဲ့ အင်တာဗျူး တခုမှာ မင်းသားက ကလေးဘဝတုန်းက ကြိုက်နှစ်သက်ခဲ့ရတဲ့ Marvel စူပါဟီးရိုး အကြောင်း ပြောဆိုခဲ့ပါတယ်။

မင်းသားက “ကျနော် Captain America ကိုချစ်ပါတယ်။ ဒါပေမယ့် ပင့်ကူလူသားက ကျနော့်ကလေးဘ၀ ဟီးရိုးပါ။ အဆောင်အဦတွေရဲ့ဘေးမှာ တွယ်တက်ရတာမျိုး၊ အဆောင်အဦတခုကနေ တခုကို ခုန်ကူးဖို့ ကြိုးစားရတဲ့ ဇာတ်ဝင်ခန်းတွေ လုပ်ရတာ ကျနော်သဘောကျပါတယ်” လို့ ဆိုပါတယ်။

လက်ရှိမှာတော့ ပင့်ကူလူသားဇာတ်ကောင်နေရာမှာ မင်းသား Tom Holland က သရုပ်ဆောင်နေတာဖြစ်ပါတယ်။ ပင့်ကူလူသား မင်းသား Holland နဲ့အတူ ပထမဆုံး သရုပ်ဆောင်ခဲ့တဲ့ ဘာလင်လေလိပ် အက်ရှင်ဇာတ်ဝင်ခန်း အကြောင်းကိုလည်းမင်းသား Chris က ပြောပြခဲ့ပါတယ်။

သူက “ကျနော်က ပင့်ကူလူသားမျက်နှာဖုံးကို ဝတ်ရမှာ ကြောက်တယ်။ ကျနော်က ချုပ်နှောင်ထားတဲ့အရာတွေကို ကြောက်ပါတယ်။ ရိုက်ကွင်းမှာ နာရီနဲ့ ချီပြီး အဲ့ဒီလို ဝတ်စုံနဲ့ မျက်နှာဖုံးကို ဝတ်ထားရမယ်ဆိုဆိုရင် ကျနော် ဘာဖြစ်သွားမလဲဆိုတာ မတွေးတတ်တော့ပါဘူး။ ကျနော်က ပိုအေးတယ်လို့ ယူဆတဲ့ Captain America ဝတ်စုံကိုပဲ ကြိုက်ပါတယ်” လို့ဆိုပါတယ်။

၂၀၁၉ ခုနှစ်မှာ ထွက်ရှိခဲ့တဲ့ ‘Avengers: Endgame’ ရုပ်ရှင်မှာ မင်းသား Chris က Captain America အဖြစ် နောက်ဆုံး သရုပ်ဆောင်ထားပါတယ်။ မင်းသားဟာ ၂၀၁၁ ခုနှစ်မှာထွက်ရှိခဲ့တဲ့ ‘2011’s Captain America: The First Avenger’ ရုပ်ရှင်နဲ့ MCU နဲ့အတူ သရုပ်ဆောင်လုပ်ငန်းတွေကို စတင်ခဲ့ပါတယ်။ ဒါပေမယ့်လည်း အဲ့ဒီ ဇာတ်ကောင်နေရာမှာ ပါဝင်ဖို့ ရွေးချယ်ရတာ လွယ်ကူခဲ့တဲ့ ကိစ္စမဟုတ်ဘူးလို့ ဆိုပါတယ်။

သူက “ကျနော်က လူမသိ၊ သူမသိနေရတာကို ကြိုက်လို့ လူသိမခံဘဲ လမ်းပေါ်မှာ လမ်းတောင် လျှောက်နိုင်ပါ့ မလားဆိုပြီး တော်တော်လေး စိုးရိမ်ခဲ့ပါတယ်။ ဒါပေမယ့် ပိုပြီး စိုးရိမ်ရတာက နောက်ထပ် ၁၀ နှစ်လောက်အထိ တူညီတဲ့ ဇာတ်ကောင်တခုမှာ သရုပ်ဆောင်ဖို့ ဆိုတာကို သိထားပြီး ကာလရှည်စာချုပ်ချုပ်ရမှာကိုပါပဲ။ အဲ့ဒါက လွယ်ကူတဲ့ ဆုံးဖြတ်ချက်တော့ မဟုတ်ခဲ့ပါဘူး။ ဒါပေမယ့် အခုတော့ ကျနော်ပျော်နေပါတယ်” လို့ ပြောဆိုခဲ့ပါတယ်။

Ref: hindustantimes

You may also like these stories:

သရုပ်ဆောင်ကြေး ပြဿနာ ကြုံနေရတဲ့ Black Panther မင်းသား Chadwick Boseman

MCU ကို ပြန်လာဖို့ ဆွေးနွေးမှု မပြီးဆုံးနိုင်သေးတဲ့ Marvel နဲ့ Robert Downey Jr.

သရုပ်ဆောင်အလုပ်ကနေ နုတ်ထွက်ချင်နေတဲ့ မင်းသား Chris Evans

The post အကြိုက်ဆုံး စူပါဟီးရိုးမှာ ပင့်ကူလူသားလို့ Chris Evans ပြော appeared first on ဧရာဝတီ.

ပြီးခဲ့တဲ့ရက်ပိုင်းက ခိုင်နှင်းဝေရဲ့ ရင်သွေးလေးများဂေဟာမှာ လူသေအဝတ်နဲ့ပြုလုပ်ထားတဲ့ အင်းပြားတခုကိုတွေ့ရှိခဲ့ပြီး ဒီလိုတွေ့တဲ့အတွက် လုပ်ရက်လေခြင်းလို့ပဲ တွေးတယ်လို့ ခိုင်နှင်းဝေကပြောပါတယ်။

“ကျမရဲ့မိတ်ဆွေ အစ်မတယောက်က ရန်ကုန်လာရင်းနဲ့ ကျမဆီလာလည်တာ အဲ့မှာသူက ကျိုက်မရော ဆရာတော် ဆီသွားဖူးမယ်ဆိုပြီး ပြောတယ်။ ကျမကလည်း စိတ်ညစ်နေတာ အဲ့လိုစိတ်ညစ်နေရင် ဆရာတော်ဆီသွားတယ်။ ဘုရားတရားလုပ်တယ်”

“ အဲဒါနဲ့ကျိုက်မရောဆရာတော်ကို တခါမှမဖူးဘူး။ သွားဖူးတာ ဆရာတော်နဲ့စကားတွေပြောရင်း ဆရာတော်က သမီးအမြဲတမ်းနေတဲ့နေရာမှာ အတိုက်အခံရှိတယ်ဆိုပြီး စစ်ပေးတာပေါ့။ အမြဲတမ်းနေတဲ့နေရာဆိုတော့ ကိုယ့်အိမ်လားပေါ့။ အိမ်ကလည်း ပြောင်းထားတာ ၁လလောက်ပဲရှိသေးတယ်။ ဧည့်သည်လည်း ဘယ်သူ့မှ မလာသေးဘူး”လို့ ခိုင်နှင်းဝေကပြောပါတယ်။

ဆက်လက်ပြီး “အဲ့လိုအမြဲတမ်းနေတဲ့နေရာဆိုတာလည်း ကလေးတွေဂေဟာပဲဖြစ်မယ်ပေါ့။ ကလေးတွေအတွက်ပဲ ခေါင်းထဲမှာရှိတော့ အိမ်ဆိုတာသိပ်ပြီးတော့ ခေါင်းထဲမှာမရှိဘူး။ အဲဒါနဲ့ဂေဟာကိုပဲ ဆရာတော်ရဲ့တပည့်အသက် ၇၀ ကျော်လောက်ရှိတယ်။ အဲ့အဘကိုခေါ်လိုက်တော့ ဘုရားစင်မှာ အာရုံတချက်ပြုလိုက်တဲ့အခါမှာ ရွက်လှပင်ရဲ့ အောက်မှာတဲ့ဆိုလု့ိ ဒီမှာလည်းရွက်လှပင်မရှိဘူးပေါ့။ ရှာရင်းရှာရင်းနဲ့ ဂေဟာရဲ့အရှေ့မှာရွက်လှပင်တွေရှိတယ်။ အဲ့ပတ်ပတ်လည်ကိုတူးပြီးရှာတော့ ဘာမှမတွေ့ဘူး”

“ အင်းပြားဆိုတာ ရွှေပြားကြေးပြားလို့ပဲထင်တယ်။ အဲဒါနဲ့ရွှံ့ကို ရေနဲ့ဆေးချခိုင်းတော့မှ ပိတ်စလေးတွေ့တော့ လျှော်လိုက်တာ လေးထောင့်ဟာလေးကို ပိတ်နဲ့လုံးထားတာ။ စိတ်ထဲမှာတော့ လုပ်ရက်လိုက်လေခြင်း။ ကိုယ့်ကို လုပ်တယ်ဆိုရင်တောင် ကလေးတွေရှိတဲ့နေရာမှာ လုပ်ရက်တယ်ပေါ့။ ဘယ်သူဘယ်သူကိုမှ မစွပ်စွဲပါဘူး။ စွပ်စွဲရင်သူများအကုသိုလ် ကိုယ်မယူချင်ဘူးဆိုတော့ ရေထဲပြန်မျောပေးလိုက်တယ်” လို့ ခိုင်နှင်းဝေကပြောပါတယ်။

ဂေဟာမှာရှိတဲ့ကလေးတွေကိုတော့ သစ်တံခါးဆရာတော်ရဲ့ ပရိတ်ကြိုးများကိုဆွဲပေးထားပြီး ကလေးတွေရဲ့ ကံလည်းရှိတာကြောင့် လုပ်တဲ့သူကအကုသိုလ်ဖြစ်မှာလို့ ဆိုပါတယ်။

“ကလေးတွေကတော့ သစ်တံခါးဆရာတော်ပေးထားတဲ့ ပရိတ်ကြိုးတွေကတော့ အမြဲတမ်းသူတို့လည်ပင်းမှာရှိတယ်။ ကျမဘယ်ဘုန်းကြီးကျောင်းသွားသွား သားတွေသမီးတွေအတွက်ပဲတောင်းတယ်။ ပရိတ်ရေလည်း အမြဲတမ်းလည်း ဖျန်းတယ်။ ဘုရားစာတွေလည်း အမြဲတမ်းရွတ်တယ်ဆိုတော့ သားတွေသမီးတွေကို စိုးရိမ်တာပေါ့။ ဒါပေမယ့် ကလေးတွေဆိုတော့ ကလေးတွေရဲ့ကံရှိပါတယ်။ ကျန်တာတော့ လုပ်တဲ့သူက အကုသိုလ်ဖြစ်မှာပေါ့” လို့ ခိုင်နှင်းဝေက ပြောပါတယ်။

ဒီလိုမျိုးအင်းပြားတွေ့တဲ့အကြောင်းကို Facebook မှာတင်ခဲ့တာဟာလည်း သူ့ဆီမှာအတိုက်အခိုက်တွေ ရှိနေတဲ့အကြောင်းကို သိစေချင်လို့ဖြစ်ပြီး အတိုက်အခိုက်မှန်သမျှကိုလည်း မေတ္တာထားတယ်လို့ ဆိုပါတယ်။

“ကျမကိုချစ်တဲ့သူရှိသလို မုန်းတဲ့သူလည်းရှိမှာပဲလေ။ ကိုယ့်ကိုမုန်းတဲ့သူကို ချစ်ပါလို့ပြောလို့မှမရတာ ကိုယ့်အပေါ်မှာ တိုက်ခိုက်လာတဲ့ အတိုက်အခိုက်မှန်သမျှအားလုံးက အားလုံးကိုမေတ္တာထားပါတယ်။ ကျမကိုတိုက်ခိုက်တဲ့သူ၊ မုန်းတဲ့သူတွေအားလုံးကိုလည်း ဆုတောင်းမေတ္တာပို့ပေးပါတယ်”

“ ကျမမှာလည်းချစ်ခြင်းမုန်းခြင်း မရှိဘူးပေါ့။ အဓိကကတော့ ကျမသားတွေသမီးတွေကို မထိစေချင်ဘူး။ ခံစားချက်မဲ့တယ်။ Facebook မှာတင်တာလည်း ကျမမှာ ဘယ်လိုအတိုက်အခိုက်တွေရှိတယ်ဆိုတာကို သိအောင် အဲ့လိုအတိုက်အခိုက်တွေရှိလည်း ရင်ထဲမှာမတုန်လှုပ်ဘူး” လို့ ခိုင်နှင်းဝေကပြောပါတယ်။

ခိုင်နှင်းဝေရဲ့ ရင်သွေးလေးများဂေဟာမှာတော့ မိဘမဲ့ဂေဟာပေါင်း ၃၁ ယောက်ရှိပြီး အလှူရှင်များရဲ့ လှူဒါန်းမှုများနဲ့ ရပ်တည်လျက်ရှိတယ်လို့ သိရပါတယ်။

You may also like these stories:

မိဘမဲ့ကလေး ငါးယောက်ကို မွေးစားလိုက်တဲ့ သရုပ်ဆောင်ခိုင်နှင်းဝေ

The post ရင်သွေးဂေဟာနားမှာ အင်းပြားတွေ ထားခံရတယ်လို့ ခိုင်နှင်းဝေပြော appeared first on ဧရာဝတီ.

မြန်မာအိုင်ဒေါသီချင်းဆိုပြိုင်ပွဲရဲ့ ပြိုင်ပွဲဝင်တဦး ဖြစ်ခဲ့တဲ့ အဆိုတော် မေမဒီက COVID-19 ဖြစ်ပွားချိန် အနုပညာလုပ်ငန်းတွေ မလုပ်ရသေးတာကြောင့် စီးပွားရေးအနေနဲ့ “ပွားစိန်” ဆိတ်စွပ်နံပြား ရောင်းချနေတယ်လို့ ဧရာဝတီကို ဆိုပါတယ်။

“အခုချိန်က ကိုဗစ်ကာလ အလုပ်တွေ ပြန်လုပ်နေကြပေမယ့် ကိုယ်တွေက ပွဲတွေဆိုလို့မရသေးတဲ့ အခါ ဘာအလုပ်မှ မရှိတဲ့အချိန် စီးပွားရေး လုပ်မှဖြစ်မယ်ဆိုပြီး ဆိတ်စွပ်နံပြားကို ရောင်းဖြစ်တာ။ ကိုယ်တိုင်လည်း ဆိတ်စွပ်ကို ကြိုက်တယ်။ အမေလုပ်တာလည်းကောင်းတယ်။ ဆိတ်စွပ်ကကျတော့ တော်တော်များများက မရောင်းကြဘူး။ တခြားအစားအစာတွေပဲ ရောင်းတာနေကျတော့ ကျမက ဒါလေးလုပ်ဖြစ်သွားတာပါ”

“ကျမ တို့ဆိုရင် ဆိတ်စွပ်ကို မြို့ထဲ သွားစားရတာဝေးတယ်။ တခြားဆိုင် တွေက အဆီအရမ်းများတယ်။ မေမေက အိမ်မှာချက်ပေးတယ်။ အဲ့ဒါကို ရောင်းတာ ပေါ့။ သူများဆိတ်စွပ်နဲ့ မတူဘူး။ အဆီမပါဘူး။ အာဟာရဖြစ်တယ်။ အချိုမှုန့် မထည့်ဘူး။ အိမ်ချက် သန့်သန့်လေးနဲ့ သေချာလေးချက်ထားတယ်” လို့ မေမဒီက ဆိုပါတယ်။

ဆိတ်စွပ်နာမည်ကို ပွားစိန်ဆိုပြီး ပေးဖြစ်ပုံကိုလည်း အခုလိုဆိုပါတယ်။

“ပွားစိန်ဆိုပြီးပေးဖြစ်တာက ကျမနာမည်ကို မသုံးချင်ဘူးလေ။ ကိုယ့်မှာလည်း လက်ပွားလေး ပါတာနဲ့ ပွားစိန်ဆိုပြီးပေးလိုက်တာပါ။ အခုချိန်မှာက အရမ်းကြီးကြီးမားမားတွေ ရောင်းလို့ကမရဘူးလေ။ အခွေအတွက်လည်း လုပ်နေတော့ တခြားစီးပွားရေးကို ကိုယ်ဦးဆောင်ပြီးလုပ်ဖို့က အာရုံမရှိသေးပါဘူး။ အခုလည်း အမေက ဦးဆောင်ပြီး လုပ်ပေးနေတယ်။ နောက်ပိုင်းလုပ်ဖို့လည်း စဉ်းစားမှာပါ ”လို့ မေမဒီကပြောပါတယ်။

သားမိနှစ်ယောက်တည်း လုပ်တဲ့အတွက် အခက်အခဲတွေရှိတယ်လို့ဆိုတဲ့ မေမဒီက အနုပညာတွေ မလုပ်ရချိန် အိမ်ဝင်ငွေ ရအောင်ဈေးရောင်းတာလို့ဆိုပါတယ်။

“သားမိနှစ်ယောက်တည်း လုပ်တဲ့အတွက် အခက်အခဲတွေကရှိတယ်။ အရမ်းအများကြီး မလုပ်ဘူး။ ဝမ်းရေးအတွက် အနုပညာတွေ မလုပ်ရချိန် အိမ်ဝင်ငွေရအောင်ဈေးရောင်းတာပေါ့။ တပတ်ကို နှစ်ရက်ပဲ ရောင်းတယ်။ ကြာသပတေးနဲ့ တနင်္ဂနွေပဲရောင်းတယ်။ တပွဲကို ငါးထောင်နဲ့ရောင်းပေးပါတယ်”

“ တရက်ကို အနည်းဆုံးပွဲ ၃၀ဆယ်လက်ခံတယ်။ တခါတလေလည်း ပွဲ၇၀ မှာတာရှိတယ်။ ကျမတို့ နေတာက ၅လွှာဆိုတော့ ဆိတ်သားထုတ်တွေက အရမ်းလေးတော့ နည်းနည်းတော့ ပင်ပန်းတယ်။ ချက်တော့ မေမေနဲ့ ကိုယ်နဲ့ ချက်တာပေါ့။ ကျမရဲ့ ဆိတ်စွတ်နံပြားကို မှာပြီး ကျမကို လှူခိုင်းတာ အရမ်းပီတိ ဖြစ်ရပါတယ်။ မြောက်ဒဂုံ ဆိုရင် ကိုယ်တိုင်လိုက်ပို့ပေးတယ်။ တခြားမြို့နယ်ကို Deliနဲ့ ပို့ပေးပါတယ်။ စရောင်းချိန်က အားပေးကြလို့ ကျေးဇူးတင်ပါတယ် ”လို့ မေမဒီကပြောပါတယ်။

မေမဒီကိုတော့ ပရိသတ်တွေက Myanmar Idol Season-3 သီချင်းဆိုပြိုင်ပွဲဝင်တယောက်ဖြစ်ကတည်းက စတင် အားပေးလာခဲ့ကြတာဖြစ်ပါတယ်။ ပြိုင်ပွဲပြီးသွားတဲ့နောက်မှာလည်း ဂီတအလုပ်တွေကို တစိုက်မတ်မတ် လုပ်ဆောင်လာတာ တွေ့ရပါတယ်။ ပိုးမီ၊ ဂေဂေး၊ မင်းရတုပိုင်၊ ဖြူဖွေး တို့နဲ့ အတူတွဲပြီး “Friend” ဆိုတဲ့ တေးသီချင်းအခွေ ထွက်ရှိခဲ့ပါသေးတယ်။

You may also like these stories:

ရင်သွေးဂေဟာနားမှာ အင်းပြားတွေ ထားခံရတယ်လို့ ခိုင်နှင်းဝေပြော

ခိုင်နှင်းဝေ ရင်သွေးဂေဟာမှာ မွေးနေ့အလှူ လုပ်ခဲ့တဲ့ စမိုင်းလ်ရဲ့သမီးငယ်လေး

The post လက်ပွားလေးပါတဲ့ အဆိုတော်မေမဒီရဲ့ “ပွားစိန်”ဆိတ်စွပ်နံပြား appeared first on ဧရာဝတီ.

ပြီးခဲ့တဲ့ ကိုဗစ်ကာလ ဧပြီလ ၁၀ရက်နေ့က အွန်လိုင်းမှတဆင့်ပြုလုပ်ခဲ့တဲ့ စိုင်းစိုင်းခမ်းလှိုင်ရဲ့ Birthday Show in Bedroom မှရရှိတဲ့ငွေကြေးများအားလုံးကို လှူဒါန်းပြီးစီးခဲ့ပြီဖြစ်တယ်လို့သိရပါတယ်။

“Sai Sai Birthday Show in Bedroom မှကောက်ခံရရှိသော အလှူငွေများမှ နောက်ဆုံးလက်ကျန် ၄၇၆၉၈၆၀ ကျပ်ကို ကျနော်လှူဒါန်းသော ၅၂၃၀၁၄၀ ကျပ်ထပ်ပေါင်း၍ သိန်း ၁၀၀ ကျပ်တိတိကို မန္တလေး COVID – 19 ကိစ္စအသုံးပြုနိုင်ပါရန် လှူဒါန်းပြီးဖြစ်ပါကြောင်း တင်ပြပါတယ်” လို့ စိုင်းစိုင်းခမ်းလှိုင်က ဆိုထားပါတယ်။

အလှူငွေတွေအားလုံး တပြားမကျန်ကိုတော့ ၄နေရာခွဲကာ COVID -19 ထိန်းချုပ်ရေးနှင့် အရေးပေါ်တုန့်ပြန်ရေး ကော်မတီ ၊ ရန်ကုန်တိုင်းပြည်သူ့ကျန်းမာရေးနှင့်ကုသရေးဦးစီးဌာန ၊ ရန်ကုန်တိုင်း(ဖောင်ကြီးစင်တာ) မှာ အသက်ရှုစက် ၁လုံး ၊ မန္တလေးတိုင်း Covid -19 ထိန်းချုပ်ကာကွယ်ကုသရေးနေရာများမှာ လှူဒါန်းခဲ့တာဖြစ်တယ်လို့ သိရပါတယ်။

“ကျနော့်မွေးနေ့ဖျော်ဖြေပွဲ အကြောင်းပြုပြီး ပရိသတ်များနဲ့ မိတ်ဆွေများအားလုံးရဲ့ စုပေါင်း အလှူဖြစ်ပါတယ်” လို့ စိုင်းစိုင်းခမ်းလှိုင်က ပြောပါတယ်။

စိုင်းစိုင်းခမ်းလှိုင်ကတော့ ဧပြီ ၁၀ ရက်နေ့က သူရဲ့ မွေးနေ့အမှတ်တရ အဖြစ် Birthday Show in Bed ကို ပြုလုပ်ကာ အွန်လိုင်းမှ ပရိသတ်များကို ဖျော်ဖြေခဲ့တာဖြစ်ပြီး ဒီအပေါ်မှာ ဝေဖန်မှုတွေလည်း ရှိခဲ့ပါတယ်။ ဒါပေမဲ့ စိုင်းစိုင်းခမ်းလှိုင်က အဲ့ဒီကနေ ရရှိခဲ့တဲ့ ငွေကြေးများကို COVID -19 နဲ့ပတ်သက်ပြီး အနုပညာအား၊ ငွေအင်အားများဖြင့် လှူဒါန်းမှုများစွာ ပြုလုပ်ခဲ့တာပဲဖြစ်ပါတယ်။

ကိုဗစ်ကာလမှာလည်း စိုင်းစိုင်းခမ်းလှိုင်အနေနဲ့ အနုပညာရှင်များစွာနဲ့ “ကမ္ဘာမြေသီချင်း” ဆိုတဲ့ ခွန်အားဖြစ်သီချင်းကို လည်း ဖန်တီးခဲ့ပါတယ်။

You may also like these stories:

ရင်သွေးဂေဟာနားမှာ အင်းပြားတွေ ထားခံရတယ်လို့ ခိုင်နှင်းဝေပြော

လက်ပွားလေးပါတဲ့ အဆိုတော်မေမဒီရဲ့ “ပွားစိန်”ဆိတ်စွပ်နံပြား

အကြိုက်ဆုံး စူပါဟီးရိုးမှာ ပင့်ကူလူသားလို့ Chris Evans ပြော

The post Birthday Show မှရရှိတဲ့ ငွေကြေးများအားလုံး လှူဒါန်းပြီးဖြစ်တဲ့ စိုင်းစိုင်းခမ်းလှိုင် appeared first on ဧရာဝတီ.

လက်ရှိကိုဗစ်ကာလအချိန်ဟာ အားလုံးအတွက် ခက်ခဲပေမယ့် တကယ်ယူတတ်ရင် သင်ခန်းစာတွေ ရပါတယ်လို့ အဆိုတော် မီးနိုက ဧရာဝတီကို ဆိုပါတယ်။

“မီးနိုကိုယ်တိုင်က ပြည့်စုံနေတဲ့သူတယောက် မဟုတ်ဘူး။ မီးနိုတို့ အားလုံးအတွက် ကိုဗစ်က တကယ်ယူတတ်ရင် သင်ခန်းစာတခုရတယ်။ မီးနိုတို့ဆိုရင် သီချင်းတွေ လုပ်တယ်။ ရတဲ့ ပိုက်ဆံတွေနဲ့ သီချင်းတွေပြန်လုပ်တယ်။ “သမင် မွေးရင်းကျားစားရင်း” ဖြစ်နေတာ ။ ငွေကိုစုမထားမိတာလည်း ရှိတယ်။ စုဆောင်းမိတာလည်း နည်းတာမျိုးတွေ ရှိတာပေါ့”

“ နောက်ခံ Background ရှိသင့်တယ်လို့ ထင်တယ်။ မီးနိုအတွက်ကတော့ တခြားအလုပ်လုပ်ဖို့ ရည်မှန်းချက်က ရှိတယ်။ ပြင်ဆင်မှု အပိုင်းကျတော့ လိုအပ်နေတဲ့ အခါကျတော့ မလုပ်ဖြစ်သေးဘူး။ ကိုယ့်မှာ စုဆောင်းထားတဲ့ အရာလေးတွေ နဲ့ပဲ သားမိနှစ်ယောက်လုံး နေနေတာပေါ့။ မီးနိုတို့အသိုင်းအဝိုင်းက လူတွေ လည်း အားမလျော့ပါနဲ့လို့ပြောချင်တယ်” လို့ အဆိုတော် မီးနိုက ဆိုပါတယ်။

ကိုဗစ်ကာလမှာ အနုပညာတချို့လည်း အွန်လိုင်းပေါ်ကနေ ဈေးရောင်းလာကြပြီး ဒီလို ဈေးရောင်းဖို့အတွက် ဝါသနာမပါတဲ့အတွက် မရောင်းဖြစ်ဘူးလို့ မီးနိုကဆိုပါတယ်။

“ ဈေးရောင်းတဲ့သူတွေလည်း ဈေးတွေ ရောင်းနေကြတယ်။ မီးနိုတို့ ကျတော့ လည်း စီးပွားရေးလုပ်ဖို့ အချိန်မပေးနိုင် တော့ မလုပ်ဖြစ်တာလည်းပါတယ်။ ဝါသနာမပါတာလည်း ပါတယ်။ အားတော့ မလျော့ကြပါနဲ့။ ကိုဗစ်ကြီးပြီးရင် တက်ညီလက်ညီနဲ့ အလုပ်တွေ ပြန်လုပ်ကြမယ်လို့ အားပေးတိုက်တွန်းချင်တယ်”လို့ မီးနိုကပြောပါတယ်။

ဒီလိုကာလမှာ ဝမ်းရေးအတွက် ရှာဖွေစားသောက်နေရတာ ခက်ခဲပေမယ့် အပြင်ကိုသွားလာတဲ့အခါ ကျန်းမာရေးအတွက် ဆောင်ရန်၊ ရှောင်ရန်လေးတွေ လိုက်နာသင့်တယ်လို့လည်း ဆိုပါတယ်။

“ကိုဗစ်ပြီးတဲ့ အချိန်က မိုးတွင်းဖြစ်နေပြီ။ မိုးတွင်းကာလက ပွဲတွေ ရှားတော့ အခြေအနေကတော့ သိပ်မကောင်းဘူး။ စိတ်တော့ မလျှော့ပါနဲ့။ကိုယ်ထက် ဆာလောင်နေသူတွေ ကိုယ့်ထက်ဆိုးတဲ့ သူတွေ ရှိတာဆိုတော့ အားမလျှော့ဖို့ တော့ အားပေးချင်တယ်။ အခုချိန်မှာ ရက်တွေ ထက်တိုးတာလည်းကောင်းဖို့ အတွက်တိုးလာတာပေါ့။ ကိုယ့်အသိုင်းဝိုင်းမှာ ကိုယ့်လူနဲ့ ကိုယ်သွားလာနေတာကတော့ ဘာရောဂါမှမဖြစ်အောင်ဆင်ခြင်လို့ရတယ်”

“မဖြစ်မနေအလုပ်တွေ သွားနေကြ တယ်။ တနေ့လုပ်မှတနေ့စားနေရတဲ့သူတွေ အတွက် မဖြစ်မနေ အလုပ်ဆင်း နေရတဲ့အခါ သူတို့ အတွက် ပင်ပန်းခက်ခဲ တယ်။ သူတို့က ဒီရောဂါကို ကြည့်နိုင်မှာ မဟုတ်ဘူး။ အဓိကကတော့ ဆောင်ရန်ရှောင်ရန်လေးတွေ သေချာလုပ်ကြပါ။ ဂရုစိုက်ကြပါဦး။ လက်လည်း ခဏခဏဆေးကြပါ ”လို့ မီးနိုကပြောပါတယ်။

မီးနိုကတော့ Melody World သီချင်းဆိုပြိုင်ပွဲကတဆင့် ဂီတလောကထဲကို ဝင်ရောက်လာခဲ့တာဖြစ်ပြီး Galaxy Star ပြိုင်ပွဲလည်း ဝင်ရောက် ယှဉ်ပြိုင်ခဲ့ပါသေးတယ်။ မီးနိုရဲ့ “အနှောင်အဖွဲ့” သီချင်းက ပရိသတ် အားပေးမှုတွေလည်း ရရှိခဲ့ပါတယ်။

You may also like these stories:

အကြိုက်ဆုံး စူပါဟီးရိုးမှာ ပင့်ကူလူသားလို့ Chris Evans ပြော

ရင်သွေးဂေဟာနားမှာ အင်းပြားတွေ ထားခံရတယ်လို့ ခိုင်နှင်းဝေပြော

လက်ပွားလေးပါတဲ့ အဆိုတော်မေမဒီရဲ့ “ပွားစိန်”ဆိတ်စွပ်နံပြား

The post ကိုဗစ်ကာလက ယူတတ်ရင် သင်ခန်းစာတွေ ရတယ်လို့ မီးနိုပြော appeared first on ဧရာဝတီ.

မင်းသား လီမင်ဟို ပါဝင်တဲ့ “The King: Eternal Monarch” စီးရီးကို မကြာသေးခင်က ပြသပြီးတာ ဖြစ်ပေမယ့် အသက် ၃၂ နှစ်အရွယ် မင်းသား လီဟာ ဆိုရှယ်မီဒီယာပေါ်မှာ အခုအထိ မင်းမူနေတာ တွေ့ရပါတယ်။

တောင်ကိုရီးယားမီဒီယာ Naver ရဲ့ အဆိုအရ မင်းသား လီဟာ သူ့ရဲ့ ဆိုရှယ်မီဒီယာ အကောင့်တွေ အားလုံးကို စုပေါင်းလိုက်မယ်ဆိုရင် Follower အများဆုံး ကိုရီးယားသရုပ်ဆောင်ဖြစ်တယ်လို့ သိရပါတယ်။

မင်းသားဟာ Facebook မှာ Follower အရေအတွက် ၁၇ ဒဿမ ၄ သန်း၊ Instagram မှာ ၁၆ ဒဿမ ၇ သန်း၊ Twitter မှာ ၂ ဒဿမ ၉ သန်း နဲ့ တရုတ်လူမှုကွန်ရက်မီဒီယာ Weibo မှ ၂၈ ဒဿမ ၆ သန်း ရှိပါတယ်။ ၂၀၁၁ ခုနှစ်တုန်းက “City Hunter” နဲ့ ၂၀၁၃ ခုနှစ်မှာ “The Heirs” တို့လိုမျိုး ဒရာမာတွေမှာ ခေါင်းဆောင်အနေနဲ့ ပါဝင်ခဲ့ပြီး ရုပ်ရည်ချောမောမှုကြောင့် လူသိများတဲ့ မင်းသားဟာ ပြီးခဲ့တဲ့နှစ်ကမှ စစ်မှုထမ်းကာလ ပြီးဆုံးခဲ့တာ ဖြစ်ပါတယ်။

တောင်ကိုရီးယားနဲ့ အရှေ့တောင်အာရှနိုင်ငံတွေမှာ “F4” ရုပ်သံဇာတ်လမ်းတွဲနဲ့ တရှိန်ထိုး နာမည်ရခဲ့တဲ့ မင်းသား လီဟာ စစ်မှုထမ်းဆောင်ပြီးတဲ့နောက် ပထမဆုံး အနုပညာ လှုပ်ရှားမှုအနေနဲ့ “The King: Eternal Monarch” ဒရာမာကို လက်ခံ ရိုက်ကူးခဲ့ပါတယ်။

အဲ့ဒီ ဒရာမာမှာ မင်းသားနဲ့အတူ ၂၀၁၆ ခုနှစ်တုန်းက အထူးအောင်မြင်ခဲ့တဲ့ “Goblin” ဒရာမာ မင်းသမီး ကင်ဂိုအွန်းတို့က ပါဝင်သရုပ်ဆောင်ခဲ့ပါတယ်။ မင်းသားလီက သူ့ကို အားပေးကြပြီး “The King” ဒရာမာကို ကြည့်ရှုပေးခဲ့ကြတဲ့ ပရိသတ်တွေကို ကျေးဇူးတင်ကြောင်း မကြာသေးခင်တုန်းက ပြောဆိုခဲ့ပါတယ်။

Soompi သတင်းရဲ့အဆိုအရ မင်းသားက “ဒီဒရာမာဟာ ကျနော်အသက် ၃၀ ကျော်မှာ ပထမဆုံး သရုပ်ဆောင်တဲ့ ဒရာမာဖြစ်ပါတယ်။ ကျနော့် အနာဂတ် နောက်ထပ် စာမျက်နှာကို အလှဆင်မယ့် အားဖြည့်တဲ့အချိန်တခု ဖြစ်လာလိမ့်မယ်လို့ ကျနော်ထင်ပါတယ်။ အချိန် အကြာကြီးစောင့်နေပေးခဲ့ကြတဲ့ ပရိသတ်တွေနဲ့ ကြည့်ရှုသူတွေကို ကျေးဇူးတင်ချင်ပါတယ်” လို့ ပြောခဲ့ပါတယ်။

ဒါပေမဲ့ အဲ့ဒီဒရာမာဟာ တောင်ကိုရီးယားနိုင်ငံမှာထက် တခြားနိုင်ငံတွေမှာ လူကြည့်နှုန်း အခြေအနေ ပိုကောင်းခဲ့တာကို တွေ့ရပါတယ်။ ကမ္ဘာတဝန်းက ပရိသတ်တွေအနေနဲ့ Netflix ကနေ ကြည့်ရှုနိုင်ပြီး အခုအချိန်အထိတော့ ဒေသတွင်းမှာ ပြသခဲ့ဖူးသမျှ Netflix ရဲ့ ဒရာမာတွေထဲမှာ လူကြည်နှုန်းအများဆုံးအဖြစ် မှတ်တမ်းဝင်ထားပါတယ်။

Ref: straitstimes

The post ဆိုရှယ်မီဒီယာမှာ Follower အများဆုံး ကိုရီးယားမင်းသား လီမင်ဟို appeared first on ဧရာဝတီ.

၂၀၁၇ ခုနှစ်ကနေ စတင် ထုတ်လွှင့်ခဲ့တဲ့ စပိန် ဓားပြမှုခင်းဒရာမာ “Money Heist” ကို တောင်ကိုရီးယားနိုင်ငံက ပြန်ရိုက်ကူးသွားမယ်လို့ Ilgan Sports သတင်းစာက သတင်းထုတ်ပြန်ခဲ့ပါတယ်။ Netflix ရဲ့ နာမည်အကျော်ကြားဆုံး စီးရီးတခုဖြစ်တဲ့ အဲ့ဒီ စပိန်စကားပြော စီးရီးမှာ တော်ဝင်ဘဏ်တိုက်ကို ဓားပြတိုက်ဖို့ လူ ၈ ယောက်အထိ စုဆောင်းခဲ့တဲ့ ပါမောက္ခတဦးအကြောင်း ရိုက်ကူးထားတာ ဖြစ်ပါတယ်။

မူလက အဲ့ဒီစီးရီးကို အပိုင်းနှစ်ပိုင်း ခွဲပြီး ကန့်သတ်အနေအထားနဲ့သာ ပြသဖို့ စီစဉ်ခဲ့တာဖြစ်ပါတယ်။ စပိန်နိုင်ငံရဲ့ Antena ရုပ်သံလိုင်းကနေ အပိုင်း ၁၅ ပိုင်းကို ထုတ်လွှင့်ပြီးတော့မှ တကမ္ဘာလုံးကို ထုတ်လွှင့်ဖို့ Netflix က လက်လွှဲယူခဲ့တာ ဖြစ်ပါတယ်။ အဲ့ဒီနောက် လူကြိုက်များ အောင်မြင်လာခဲ့ရာကနေ Season အသစ်တွေကို ဘတ်ဂျက်ငွေ အမြောက်အများသုံးပြီး ဆက်လက်ရိုက်ကူး ပြသခဲ့ပါတယ်။

အဲ့ဒီ စီးရီးဟာ ၄၆ ကြိမ်မြောက် နိုင်ငံတကာ အမ်မီဆုပေးပွဲမှာ အကောင်းဆုံး ဒရာမာဆု အပါအဝင် ဆုများစွာကို ရရှိသိမ်းပိုက်ထားပြီးလည်း ဖြစ်ပါတယ်။ အဲ့ဒီစီးရီးထဲမှာ ပါဝင်တဲ့ အီတလီဖက်ဆစ်ဆန့်ကျင်ရေး သီချင်း “Bella ciao” ဟာဆိုရင်လည်း ၂၀၁၈ ခုနှစ် ဥရောပတလွှားမှာ လူပြောအများဆုံး သီချင်းဖြစ်ခဲ့ပါတယ်။ ၂၀၁၈ ခုနှစ်မှာပဲ အဲ့ဒီစီးရီးဟာ Netflix မှာ လူကြည့်အများဆုံး အင်္ဂလိပ်စကားပြော မဟုတ်တဲ့ စီးရီးဖြစ်ခဲ့ပါတယ်။

အီတလီ တော်ဝင်ဘဏ်တိုက်ကို အပိုင်စီးပြီး ယူရို ၂ ဒဿမ ၄ သန်း ရယူဖို့ ကြိုးပမ်းကြတဲ့ လူ ၉ ယောက်ဟာ ဘဏ်အတွင်းမှာ အချိန် ၁၁ ရက်နေပြီး ရဲတပ်ဖွဲ့ မသိအောင် ငွေတွေ ရိုက်ထုတ်ခဲ့တဲ့အကြောင်းအရာကို ပရိသတ်တွေက တော်တော်တော်လေး စိတ်ဝင်စားကြခဲ့တာလည်း ဖြစ်ပါတယ်။ အဲ့ဒီနောက် သူတို့အဖွဲ့က စပိန်ဗဟိုဘဏ်ကို အနုကြမ်းစီးဖို့ ကြိုးပမ်းကြတာကိုလည်း မြင်တွေ့ရမှာဖြစ်ပါတယ်။

အဲ့ဒီ စပိန်စီးရီးဟာ တောင်ကိုရီးယားမှာလည်း လူကြည့်အများဆုံး Netflix စီးရီး ၁၀ ခုစာရင်းမှာ ပါဝင်ခဲ့ပါတယ်။ တောင်ကိုရီးယား ကုမ္ပဏီ BH Entertainment နဲ့ ထုတ်လုပ်ရေးအေဂျင်စီ ZIUM Contents တို့က ကီုရီးယား စကားပြောနဲ့ ပြန်လည် ဖန်တီးဖို့ ပြင်ဆင်ခဲ့ကြတာလည်း ဖြစ်ပါတယ်။ BH Entertainment ကတော့ မင်းသား လီဗြောင်ဟွန်းနဲ့ မင်းသား Yoo Ji Tae တို့လို နာမည်ကျော် သရုပ်ဆောင်တွေကို စီမံခန့်ခွဲပေးနေတဲ့ ကုမ္ပဏီ ဖြစ်ပါတယ်။

ZIUM Contents ကတော့ ဟောလိဝုဒ်ကတောင် ပြန်ရိုက်ကူးမယ့် “Gonjiam: Haunted Asylum” ကိုရီးယား ရုပ်ရှင်ကို ထုတ်လုပ်ခဲ့တဲ့ စတူဒီယို ဖြစ်ပါတယ်။အခု အဲ့ဒီသတင်း ထွက်လာတဲ့အချိန်မှာတော့ ကိုရီးယားက အင်တာနက် အသုံးပြုသူတွေဟာ အဲ့ဒီနာမည်ကျော် စီးရီးမှာ ပါဝင်သင့်တဲ့ ကိုရီးယား သရုပ်ဆောင်တွေကို စတင်ရွေးချယ်နေကြပြီ ဖြစ်ပါတယ်။

Ref: straitstimes

The post စပိန်မှုခင်းစီးရီး “Money Heist” ကို ကိုရီးယားဗားရှင်းနဲ့ ပြန်ရိုက်ကူးမည် appeared first on ဧရာဝတီ.

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ယနေ့၊ ဇွန်လ ၁၉ရက်နေ့မှာ ကျရောက်တဲ့ အသက် ၇၅ နှစ်ပြည့် မွေးနေ့မှာတော့ ပြည်သူ ၇၅၀၀ ရဲ့ မွေးနေ့ဆုတောင်း ဓာတ်ပုံများဖြင့် ဖန်တီးထားတဲ့ ဘေလ်ဘုတ် (Billboard) ပြုလုပ်ကာ ဆုတောင်းပေးခဲ့ကြပါတယ်။

အဆိုပါ ပြည်သူ ၇၅၀၀ ထဲမှာတော့ အနုပညာရှင်များ၊ ကျော်ကြားသူများစွာ ပါဝင်ခဲ့ပြီး သူတို့တွေရဲ့ ဒေါ်အောင်ဆန်းစုကြည်အတွက် မွေးနေ့ဆုတောင်းများကို ဖော်ပြပေးလိုက်ပါတယ်။

ပြည်သူ ၇၅၀၀ ထဲမှာ ပါဝင်ခဲ့တဲ့ ဒါရိုက်တာ ကြည်ဖြူသျှင်က အခုလို ဆုတောင်းပေးထားပါတယ်။

“အမေစု”ရဲ့ ဓာတ်ပုံ ဟောဒီကားချပ်ကြီးထဲမှာ ကျမ ဓာတ်ပုံပါတယ်ဆိုတဲ့အသိက ကြည်နူးပီတိဖြစ်ရပါတယ်။ ဘယ်သူပါတယ်ဆိုတာ၊ တပုံချင်း ထောက်ပြလို့ မရပေမယ့်၊ အားလုံးရဲ့ ပေါင်းစည်း ညီညွတ်မှု၊ ရင်ဘတ်ချင်း တူညီမှုတို့ဟာ အနာဂတ် မြန်မာပြည်အတွက် လှပတဲ့အတွေးကို ပေးစေပါတယ်”

“ကျမတို့အားလုံး လူထုခေါင်းဆောင် အမေစုရဲ့ (၇၅) နှစ် ပြည့် မွေးနေ့မှသည် အားလုံးစည်းလုံးညီညွတ်စွာနဲ့ မြန်မာပြည် အနာဂတ် လှပဖို့ ကျရာနေရာကနေ ပုံဖော်ကြရမှာပါ။ အဲဒီအခါမှာ ငါဘယ်နေရာမှာပါတယ်ဆိုတာ ပြနိုင်ဖို့ ၊ မြင်ရဖို့ထက်။ ငြိမ်းချမ်းသော၊ ဖွံ့ဖြိုးတိုးတက်သော၊ မြန်မာပြည်အနာဂတ်ဖြစ်လာဖို့က ပိုအရေးကြီးပါတယ်။ Happy Birthday ပါ “အမေစု” ၊ အမေ ဖြစ်စေချင်တဲ့ ၊ မြန်မာပြည်ငြိမ်းချမ်းရေး အမြန်ရပါစေ”လို့ ဒါရိုက်တာ ကြည်ဖြူသျှင်က ဆုတောင်းပေးထားပါတယ်။

အဆိုတော် တင်ဇာမော်ကလည်း သူ့ရဲ့ Facebook အကောင့်မှာ မွေးနေ့ဆုတောင်းသီချင်း သီဆိုထားတဲ့ ဗီဒီယိုဖိုင် တင်ထားပြီး “၇၅ နှစ်မြောက်မွေးနေ့မှသည် နောင်နှစ်ပေါင်းများစွာ တိုင်အောင် ကျန်းမာပျော်ရွှင်ပါစေ အန်တီစု (အမေစု)” လို့ ဆုတောင်းပေးထားပါတယ်။

သရုပ်ဆောင် ဖွေးဖွေးကလည်း သူ့ရဲ့ မိသားစုဝင်များနဲ့အတူ “အမေ ဒေါ်အောင်ဆန်းစုကြည်၏ ၇၅ နှစ်ပြည့် မွေးနေ့အတွက် ဖွေးတို့မိသားစုမှ ဆုတောင်းလို့ အစချီကာ “အမေစု၊ သက်ရှည်ကျန်းမာ၊ အန္တရာယ်ကင်း၊ ပျော်ရွှင်ရပါစေ” လို့ ဆုတောင်းထားပါတယ်။

သရုပ်ဆောင် စမိုင်းလ်ကလည်း ဒေါ်အောင်ဆန်းစုကြည်ရဲ့မွေးနေ့ မတိုင်ခင် တရက်က ရန်ကုန်မြို့ရှိ ဒေါ်အောင်ဆန်းစုကြည်ရဲ့ နေအိမ်သို့ သွားရောက်ကာ ICJ ကို သွားခဲ့ကြတဲ့ မောင်နှမများကိုယ်စား မွေးနေ့ကိတ် သွားရောက် ပို့ပေးခဲ့ပြီး “Happy Birthday ပါ။ ချစ်ရတဲ့အမေစု သက်ရှည်ကျန်းမာပါစေ” လို့ ဆုတောင်းပေးထားပါတယ်။

သရုပ်ဆောင် ဒေါင်းကလည်း “သူမ နှလုံးသားဟာ ဗလာ” ဆိုတဲ့ ကဗျာတပုဒ်နဲ့အတူ အမှတ်တရတွေအများကြီးရှိတဲ့ ဓာတ်ပုံနဲ့အတူ အမှတ်တရအဖြစ် တင်ပေးထားပါတယ်။

You may also like these stories:

“ဒေါ်အောင်ဆန်းစုကြည်ရဲ့ လမ်းညွှန်မှုတွေအတိုင်း နေစေချင်တယ်”

The post ဒေါ်အောင်ဆန်းစုကြည်ရဲ့ မွေးနေ့မှာ ဆုတောင်းပေးကြတဲ့ အနုပညာရှင်များ appeared first on ဧရာဝတီ.

မြန်မာ့ရုပ်ရှင်သမိုင်းပြတိုက်မှာ အနုပညာရှင်များစွာရဲ့ ဓာတ်ပုံကို ဘုတ်နဲ့ ပြသထားပေမယ့် ဒီလိုပြသထားတဲ့ အထဲမှာ ဓာတ်ပုံ မပါခဲ့တဲ့ အနုပညာရှင်တွေလည်း ရှိနေပါတယ်။ ဒီလို နာမည်ကျန်ခဲ့သူတွေအတွက် နောက်ထပ် စီစဉ်နေတယ်လို့ ရုပ်ရှင်အစည်းအရုံးဒုဥက္ကဋ္ဌ ဦးအေးကြူလေးက ဧရာဝတီကို ပြောပါတယ်။

“ရုပ်ရှင်သမိုင်း ပြတိုက်အတွက် ကျနော်တို့ ကော်မတီတွေ ဖွဲ့ပေးထားတယ်။ အခန်း ၆ ခန်း ဖွဲ့ထားတယ်။ ပြတိုက်ဆိုတာ တခါတည်းလုပ်လို့တော့ မပြီးဘူး။ လိုတာတွေ ထပ်ဖြည့်ရမှာ။ အခု အွန်လိုင်းမှာ မင်းသား ၊ မင်းသမီးတွေ ပုံ မပါတာတွေ ပြောနေတာ သူတို့ကလည်း နောက်တချပ် ထပ်လုပ်ရမှာ မပြီးသေးဘူး”

“ ဒီမှာ ရုပ်ရှင် အဓိက မင်းသား မင်းသမီးခေါင်းတွေ တပ်ထားတာပေါ့။ ၆ ခန်းလုံး မကြည့်ဖူးသေးတော့ ပြောနေတာပေါ့။ နောက်ထပ် လုပ်နေတာမပြီးသေးတာကို Background ရိုက်ပြီးတင်လိုက်တော့ ဘယ်သူ မပါဘူး။ ဘယ်လို မပါဘူးတွေ ဖြစ်ကုန်တာပေါ့။ ဘာပဲကောင်းတာလုပ်လုပ် လက်ညှိုးထိုးချင်သူတွေက ထောက်လျှောက် လုပ်မှာ” လို့ ဦးအေးကြူလေးက ပြောပါတယ်။

ဆက်လက်ပြီး ဦးအေးကြူလေးက ဓာတ်ပုံ ကျန်ခဲ့သူတွေကို စာရင်းထပ်လုပ်နေပြီး အခုလို ဝိုင်းပြောနေမယ့်အစား လာကူပေးရင် ပိုအဆင်ပြေတယ်လို့ ဆိုပါတယ်။

“ဆန်ပေး၊ ဆီပေးတာတောင် လက်ညှိုးထိုးနေတာ။ လူပေါင်း ၁၅၀၀ စာ လုပ်ရတာလေ။ အခုလည်း ဓာတ်ပုံတွေ ရှိတဲ့သူနဲ့ ရှိတဲ့အားနဲ့ စုပြီးထည့်တာပဲ။ လူခေါင်း ၁၀၀လောက်ကိုလည်း မနည်းရှာ ထည့်ရတာ။ ရသလောက် လက်လှမ်းမီသလောက် လုပ်နေတာပဲ။ ကျန်ခဲ့တဲ့သူတွေကိုလည်း စာရင်းတွေ ထပ်လုပ်နေပါတယ်။ လက်ညှိုးထိုးနေမယ့် အစားဝိုင်း ကူလိုက်ရင်တော့ အဆင်ပြေတာပေါ့”လို့ ဦးအေးကြူလေးက ပြောပါတယ်။

ရုပ်ရှင်သမိုင်းပြတိုက်ကိုတော့ အခကြေးငွေနဲ့ ဖွင့်လှစ်မှာဖြစ်ပြီး ပြတိုက်မှာ လုပ်ကိုင်နေရသူတွေဟာ အခုလို အပြောခံရတာကိုလည်း စိတ်မကောင်းစရာပဲလို့ ဦးအေးကြူလေးက ဆိုပါတယ်။

“ပြတိုက်က မဖွင့်ရသေးဘူး။ ပြတိုက်ကို ရုပ်ရှင် မင်းသား၊ မင်းသမီးတွေနဲ့ ရိုက်နေတယ်။ အဲ့ဒါလေးပြလိုက်ရင်တော့ ကြည့်ကြမှာ။ အခုချိန်မှာ ဖွင့်ရင်လည်း ဖွင့်လို့ရတယ်။ တရက် လူသိပ်လာတာမှ မဟုတ်တာ။ တနေ့လုံးမှ ၁၀ ယောက် ၁၅ ယောက်လောက် လာမှာ။ ဖွင့်ချင်ရင်တော့ ဖွင့်လို့ရတယ်”

“ဖွင့်ရင်တော့ အခကြေးငွေနဲ့ ဖွင့်ရမှာ။ ကုန်ထားတာ မနည်းဘူး။ ဝန်ထမ်းတွေ ပေးရဖို့ စရိတ်တွေ ပြန်ကျေရင် ရပြီပေါ့။ မဟုတ်ရင် အထွက်တွေ ချည်းပဲလေ၊ အဝင် မရှိဘူး။ ပထမ ငွေကျပ် ၅၀၀ကောက် မလို့ နောက် ၁၀၀၀ လောက်ဖို့ လုပ်နေတယ်။ ပြတိုက်အတွက် လိုတာလေးတွေ ထောက်ပြလိုက်ရင်ကောင်းတယ်”

“လုပ်နေတဲ့သူတွေ လည်း ကျန်ခဲ့တာကို ထည့်ပြီးဖြည့်ပြီး လုပ်ရင် ကွက်တိဖြစ်သွားမှာပေါ့။ စေတနာနဲ့ ဝေဖန်ထောက်ပြရင် လုပ်ကြမှာပါ။ ဒီမှာလုပ်နေရတဲ့သူတွေ ကျတော့လည်း တပြားမှရတာ မဟုတ်ဘဲ ကိုယ်ဟာကိုယ်လုပ်လိုက် ပြောခံလိုက်ရနဲ့ စိတ်မကောင်းစရာပဲ”လို့ ဦးအေးကြူလေးက ပြောပါတယ်။

ရုပ်ရှင်သမိုင်းပြတိုက်အတွင်းမှာတော့ အနုပညာရှင်များရဲ့ ဓာတ်ပုံတွေ၊ အကယ်ဒမီ ဆုတွေကို အမှတ်တရအနေနဲ့ သိမ်းဆည်းထားတာ တွေ့ရပါတယ်။ ၂၀၂၀ ခုနှစ်၊ အောက်တိုဘာလ အတွင်းမှာ ရုပ်ရှင် နှစ် ၁၀၀ ပြည့် အထိမ်းအမှတ် ရှိတာကြောင့် အခုလို ပြင်ဆင်ထားခြင်းဖြစ်တယ်လို့ သိရပါတယ်။

မြန်မာ့ရှပ်ရှင်ဟာ ၁၉၂၀ ပြည့်နှစ်မှာ စတင်ပေါ်ပေါက်ခဲ့တာ ဖြစ်ပြီး ၂၀၂၀ ခုနှစ်အတွင်းမှာ နှစ် ၁၀၀ တိုင်ခဲ့ပြီ ဖြစ်ပါတယ်။

You may also like these stories:

ဝါရင့် အနုပညာရှင်တွေနဲ့အတူ မှတ်တမ်းတင်ခံရတဲ့ ယွန်းယွန်း

ရုပ်ရှင်သမိုင်းပြတိုက်မှာ မိသားစုလိုက် မှတ်တမ်းတင်ခံရတဲ့ ခင်သီတာထွန်း

ရုပ်ရှင်သမိုင်းပြတိုက်မှာ အသိအမှတ်ပြုခံရလို့ ဂုဏ်ယူနေတဲ့ ထွန်းထွန်း

The post “ရုပ်ရှင်ပြတိုက်မှာ ကျန်ခဲ့တဲ့ ပုံတွေ ပြန်ဖြည့်မှာပါ”လို့ ဦးအေးကြူလေး ပြော appeared first on ဧရာဝတီ.

တချိန်က အငြိမ့်ပွဲတွေမှာ ပရိသတ်များ သဲသဲလှုပ် အားပေးခံခဲ့ရတဲ့ “ရွှေညီကို” အဖွဲ့ကတော့ လက်ရှိမှာ ဘာတွေ လုပ်နေလဲဆိုတာ သိချင်လို့ မေးလာတဲ့သူတွေကို အဖွဲ့ဝင်တဦးဖြစ်တဲ့ လူရွှင်တော် ကောင်းကျော်က အခုလိုပဲ ပြောပြခဲ့ပါတယ်။

“သဘင့်တက္ကသိုလ်ကြီးမှာ နှစ်ပေါင်း ၃၀ ကျော် ပညာဆည်းပူး သင်ကြားလာပြီးနောက် တရုတ်နိုင်ငံ၊ ဝူဟန်မြို့မှ ပါမောက္ခ မစ္စတာကိုဗစ်ရဲ့ ထောက်ခံအားပေးမှုကြောင့် ဌာနအသီးသီးမှ ရာထူးအကြီးကြီးတွေနဲ့ နိုင်ငံဝန်ထမ်းကောင်းများ အဖြစ် တာဝန်ထမ်းဆောင်နေပါကြောင်း ဖြေကြားအပ်ပါသည်” လို့ ကောင်းကျော်က ဟာသနှောကာ ပြောပြထားပါတယ်။

“ဦးငြိမ်းချမ်း (စားသောက်ကုန်လုပ်ငန်း ညွှန်ကြားရေးမှူးချုပ် ) ၊ ဦးကောင်းကျော် (စားသောက်ကုန်လုပ်ငန်းညွှန်ကြားရေးမှူးချုပ် ) ၊ ဦးဝိုင်းချစ် (လူသုံးကုန်လုပ်ငန်း ညွှန်ကြားရေးမှူးချုပ်) ၊ ဦးထက်ထက် (ကုန်းလမ်းပို့ဆောင်ရေး ညွှန်ကြားရေးမှူးချုပ်) တို့ အသီးသီး လုပ်ကိုင်နေကြတယ်”လို့ ကောင်းကျော်က ဆိုထားပါတယ်။

လူရွှင်တော် ငြိမ်းချမ်းက လက်ရှိမှာတော့ သူကိုယ်တိုင် ချက်ပြုတ်ရောင်းချတဲ့ အုန်းနို့ခေါက်ဆွဲကို အိမ်အရောက် ဝန်ဆောင်မှုဖြင့် ရောင်းချပေးနေပြီး ကောင်းကျော်ကတော့ ကြက်တောင်ယာချက်၊ ချဉ်ပေါင်မျှစ် ဇရစ်ကြော်တို့ကို ရောင်းချလျက် ရှိပါတယ်။ လူရွှင်တော် ထက်ထက်ကတော့ တက္ကစီမောင်းနေပြီး ဝိုင်းချစ်ကတော့ ရပ်ကွက်ထဲမှာ ကုန်စုံဆိုင်ဖွင့်ထားတယ်လို့ သိရပါတယ်။

လူရွှင်တော် ၅ ယောက်နဲ့ ဖွဲ့စည်းထားတဲ့ သူတို့အဖွဲ့မှာတော့ ရှဲဒိုးက ဆုံးပါးသွားခဲ့ပြီဖြစ်ပြီး နောက်ပိုင်းမှာတော့ ကျန်ရှိတဲ့ အဖွဲ့ဝင်များက ဘဝရပ်တည်ချက် အမျိုးမျိုးဖြင့် ရပ်တည်နေကြတာ ဖြစ်ပါတယ်။

သူတို့ အဖွဲ့ကတော့ အဖွဲ့တဖွဲ့အနေနဲ့ ပရိသတ်တွေကို မဖျော်ဖြေနိုင်ကြတော့ပေမယ့် တဦးချင်းစီသဘင်ပညာနဲ့ အသက်မွေးဝမ်းကြောင်း ဆက်လက် လုပ်ကိုင်နေကြပြီး အခုလို COVID-19 ကာလမှာတော့ အဆင်ပြေရာအလုပ်ကို လုပ်ကိုင်နေကြတာ ဖြစ်ပါတယ်။

You may also like these stories:

“ရုပ်ရှင်ပြတိုက်မှာ ကျန်ခဲ့တဲ့ ပုံတွေ ပြန်ဖြည့်မှာပါ”လို့ ဦးအေးကြူလေး ပြော

ရင်သွေးဂေဟာနားမှာ အင်းပြားတွေ ထားခံရတယ်လို့ ခိုင်နှင်းဝေပြော

ဒေါ်အောင်ဆန်းစုကြည်ရဲ့ မွေးနေ့မှာ ဆုတောင်းပေးကြတဲ့ အနုပညာရှင်များ

The post တချိန်က ပရိသတ် အားပေးခံရတဲ့ ရွှေညီကို လူရွှင်တော်တွေ ဘာလုပ်နေကြလဲ appeared first on ဧရာဝတီ.

လက်ရှိ မြန်မာနိုင်ငံရုပ်ရှင်အစည်းအရုံးရဲ့ ဥက္ကဋ္ဌတဦးဖြစ်တဲ့ ဦးညီညီထွန်းလွင်က အကယ်ဒမီပွဲနဲ့ ပတ်သက်လို့ သူရဲ့ အမြင်ကို အခုလိုပဲ ပြောပါတယ်။

“အကယ်ဒမီက ဘယ်သူမှ စကားမစရဲဘူး။ မစရဲဘူးဆိုတာက အဲ့လို စလာရင် အကယ်ဒမီ အလုပ်ချင်ဆုံးက အစည်းအရုံးပဲဖြစ်မှာ။ ဘာလို့လဲဆို အစည်းအရုံးက အကယ်ဒမီကရတဲ့ ပိုက်ဆံနဲ့ ဝန်ထမ်းတွေ လစာပေးရတာ။ အကယ်ဒမီ အကဲဖြတ်လူကြီးတွေ ဇာတ်ကားကြည့်ထားတာ သိန်း ၅၀၀ လောက် ကုန်တယ်။ လောလောဆယ် အစည်းအရုံးက ရင်းနှီးထားတာ ရှိတယ်”

“အခုက ၂ နည်းရှိတယ်။ နောက်နှစ် ပေါင်းလုပ်မလား။ အခု အောက်တိုဘာ နိုဝင်ဘာမှာ Indoor လုပ် မလား။ သိပ်လူများများလုပ်လို့ မရရင် ၉၇ ကားထဲမှာ ပါတဲ့ လူတွေပဲ ဖိတ်ပြီး လုပ်မလား။ တချို့ကလည်း ကိုရီးယားမှာ လုပ်သွားတဲ့ ပုံစံလို လုပ်ပါလားပြောကြတယ်။ အဲ့လိုလုပ်ရင် စပွန်ဆာ ပေးထားတဲ့ ကုမ္ပဏီက သဘောတူမလား”

“အကယ်ဒမီလုပ်တာ စပွန်ဆာ ပေးထားတဲ့ ကုမ္ပဏီရဲ့ ကုန်ကျစရိတ်နဲ့ လုပ်ရမှာ။ သူတို့ကလည်း သူတို့ကုမ္ပဏီ နာမည် လိုချင်လို့ လုပ်တာလေ။ စည်ကားမှ သဘောကျမှာပေါ့။ အကျဉ်းချုံးလုပ်ရင် သဘောတူပါ့မလား ကြိုက်ပါ့မလား။ အဲ့ပြဿနာတော့ ရှိတယ် ”လို့ ဦးညီညီထွန်းလွင်က ပြောပါတယ်။

ရုပ်ရှင် ရိုက်ကူးရေး ရိုက်ကူးချင်တဲ့သူတွေအတွက် ကျန်းမာရေးဝန်ကြီးဌာနကို စာတင်ထားတယ်လို့ဆိုပြီး ဦးညီညီထွန်းလွင်က သတ်မှတ်ထားတဲ့ စည်းမျဉ်းစည်းကမ်းတွေနဲ့ ရိုက်ကူးရင် ကန့်ကွက်ရန် မရှိဘူးလို့ ဆိုပါတယ်။

“အခုထိ အကယ်ဒမီကိစ္စကို ဘယ်သူမှ မစဉ်းစားနိုင်သေးဘူး။ အခုလောလောဆယ် ရိပ်က္ခာဝေတာတွေရယ်၊ နောက် ရိုက်ကူးရေး ရိုက်ဖို့ အစည်းအဝေးတွေ လုပ်ရမယ်။ သူတို့ကလည်း ရိုက်ချင်ပြီ။ Lockdown ဖြည်တဲ့ ဇူလိုင်ဆိုရင် ရိုက်ချင်ကြပြီ။ အဲ့အတွက် အခု အဲ့ဒါတွေပဲ လုပ်နေကြတယ်။ အကယ်ဒမီကိုတော့ ဘယ်သူမှ စကားမစသေးဘူး။ ရိုက်ကူးချင်တဲ့သူတွေအတွက် ကျန်းမာရေးဝန်ကြီးဌာနကို စာတင်ထားတယ်”

“ကျန်းမာရေးဝန်ကြီးဌာနကလည်း သတ်မှတ်ထားတဲ့ စည်းမျဉ်းစည်းကမ်းတွေနဲ့ ရိုက်ကူးရင် ကန့်ကွက်ရန် မရှိ၊ ကျနော်တို့က ခွင့်ပြုဖို့ကျတော့ ထုတ်လုပ်သူတို့ ဒါရိုက်တာတို့က ကျန်းမာရေးဝန်ကြီးဌာနက ထုတ်ပြန်ထားတဲ့ စည်းမျဉ်းစည်းကမ်းတွေကို လိုက်နာပြီး ရိုက်ကူးပါမယ်လို့ ဝန်ခံ ကတိပြုမှ ကျနော်တို့ကလည်း ထောက်ခံချက် ပေးလို့ရမှာ။ လောလောဆယ်တော့ ၂၅ ရက်နေ့ အစည်းအဝေးခေါ်ပြီး ပြောပြမယ်”လို့ ဦးညီညီထွန်းလွင်က ပြောပါတယ်။

ကျန်းမာရေးကြောင့် ဇာတ်ကားတွေ သိပ်မရိုက်ဖြစ်တော့တဲ့ ဒါရိုက်တာ ညီညီထွန်းလွင်ကတော့ အခုလက်ရှိမှာ မြန်မာနိုင်ငံရုပ်ရှင် အစည်းအရုံးရဲ့ ဥက္ကဋ္ဌတယောက်အဖြစ် တာဝန် ထမ်းဆောင်နေသူ ဖြစ်ပါတယ်။

You may also like these stories:

တချိန်က ပရိသတ် အားပေးခံရတဲ့ ရွှေညီကို လူရွှင်တော်တွေ ဘာလုပ်နေကြလဲ

“ရုပ်ရှင်ပြတိုက်မှာ ကျန်ခဲ့တဲ့ ပုံတွေ ပြန်ဖြည့်မှာပါ”လို့ ဦးအေးကြူလေး ပြော

The post “အကယ်ဒမီပွဲလုပ်ဖို့ ဘယ်သူမှ စကားမစသေးဘူး”လို့ ဦးညီညီထွန်းလွင် ပြော appeared first on ဧရာဝတီ.

မိဘမဲ့ကလေးများကို မွေးစားပြီး ရင်သွေးလေးများဂေဟာဖွင့်လှစ်ထားတဲ့ ခိုင်နှင်းဝေကတော့ သူမရဲ့ ဂေဟာက ကလေးတွေကို မွေးစားချင်တဲ့သူတွေရှိပေမယ့် မပေးသေးဘူးလို့ ပြောပါတယ်။

“မွေးစားချင်တာတွေတော့ရှိတယ်။ ကျမက အခုလောလောဆယ်မှာတော့ မပေးသေးဘူး။ ဘာဖြစ်လို့လဲဆိုတော့ ကျမကလည်း ထပ်ပြီးမမွေးနိုင်ဘူးလေ။ ပေးချင်လည်း ပေးဖြစ်မယ်ဆိုပေမယ့် ဒီကလေး အကြီးတွေကျတော့ သံယောဇဉ်ဖြစ်နေပြီ။ ကိုယ့်သားသမီးတွေလိုဖြစ်နေပြီဆိုတော့ သူတို့ကိုတော့မပေးတော့ဘူးလို့ စဉ်းစားထားတယ်”

“ နောက်လာပေးမယ့်ကလေးတွေကို မွေးစားမယ့်သူရှိရင်၊ သူတို့ဘဝအတွက်ကောင်းစားမယ့်သူ ချစ်ခင်ပေးမယ့်သူဆိုရင် မွေးစားဖို့ပေးမှာပါ” လို့ ခိုင်နှင်းဝေကပြောပါတယ်။

ကလေးအကြီးတွေကိုတော့ သံယောဇဉ်ဖြစ်နေတဲ့အတွက် မပေးတော့ဘူးလို့ စဉ်းစားထားပြီး နောက်လာမယ့် ကလေးတွေကိုတော့ သူတို့ကိုချစ်ပေးနိုင်မယ့်သူ ၊ ကောင်းစားစေမယ့်သူတွေကိုမွေးစားဖို့ပေးမှာပါလို့ ဆိုပါတယ်။

ကလေးတွေကို ကျွေးမွေးပြုစုတာဝန်ယူရတဲ့အခါမှာ အလှူငွေတွေနဲ့ရပ်တည်နေရပေမယ့် အလှူရှင်တွေမရှိတော့မှထက် တခြားသူများရဲ့အတိုက်အခိုက်ကြောင့် ကလေးတွေထိခိုက်မှာကို လက်မခံနိုင်ဘူးလို့ ဆိုပါတယ်။

“ကျမသားသမီးတွေအတွက် အထိခိုက်မခံနိုင်ဘူးဆိုတာ ကျမတို့က အလှူငွေနဲ့ပဲရပ်တည်ပြီး အလှူငွေနဲ့ပဲသွားရတာ ဆိုတော့ ကမ္ဘာကပ်ဆိုက်လို့ စီးပွားရေးတွေကျနေတဲ့အချိန် အလှူရှင်မရှိတော့မှာမျိုးကို စိတ်မပူဘူး။ သူများတကာ အတိုက်အခိုက်ကြောင့် ကိုယ့်သားသမီးတွေထိခိုက်မှာမျိုးကို လက်မခံနိုင်ဘူး”

“ ကျမသားသမီးတွေရဲ့ရှေ့ရေးစားဝတ်နေရေး ၊ ကျောင်းထားရမယ်ဆိုတာတွေရှိတယ်။ သူတို့ကိုကျမတယောက်တည်း ထိန်းလို့မရဘူးလေ။ စီမံခန့်ခွဲပေးရတယ်။ ဒါတွေကိုထိန်းပေးဖို့အတွက် ဝန်ထမ်းတွေလည်းရှိဖို့လိုတယ်” လို့ ခိုင်နှင်းဝေကပြောပါတယ်။

ရင်သွေးဂေဟာမှာတော့ ကလေးတွေကိုစောင့်ရှောက်ပေးဖို့အတွက် ဝန်ထမ်းများကိုထားရှိရပြီး ဒီဝန်ထမ်းတွေရဲ့ လစာ ၊ မိသားစုများရဲ့စီးပွားရေးတွေကိုလည်း တာဝန်ယူထားရတာကြောင့် အလှူရှင်တွေနည်းသွားတဲ့အခါမျိုးမှာလည်း ကိုယ်တိုင်စုထားတဲ့ငွေကြေးများနဲ့ ပြန်လည်အသုံးပြုဖြစ်တယ်လို့ သိရပါတယ်။

“ဝန်ထမ်းတွေထားတယ်ဆိုတာလည်း ပိုက်ဆံပေးပြီးလစာနဲ့ထားရတယ်။ သူတို့စားဝတ်နေရေး မိသားစုအကုန်လုံးကို ကျမခေါင်းပေါ်မှာ ရွက်ထားရတယ်။ သူတို့အတွက် အထိခိုက်မခံနိုင်ဘူး။ အဲ့အတွက်ကြောင့် အလှူရှင်တွေနည်းသွားရင် ကိုယ့်မှာရှိတာလေးနဲ့ သူတို့အတွက် စုထားတဲ့အလှူငွေတွေရှိတယ်။ ကျောင်းကားဝယ်ဖို့ စုထားတာလေးတွေရှိတယ်။ အဲဒါလေးတွေနဲ့ ပြန်ပြီးအသုံးပြုတာပေါ့” လို့ ခိုင်နှင်းဝေက ပြောပါတယ်။

လက်ရှိခိုင်နှင်းဝေရဲ့ ရင်သွေးလေးများဂေဟာမှာတော့ ကလေး ၃၁ယောက်ရှိပြီး မကြာခင်ရက်ပိုင်းက အဆိုပါဂေဟာတွင် လူသေအဝတ်ဖြင့်ပြုလုပ်ထားတဲ့ အင်းပြားတွေ့ရှိခဲ့ပါသေးတယ်။

You may also like these stories:

“အကယ်ဒမီပွဲလုပ်ဖို့ ဘယ်သူမှ စကားမစသေးဘူး”လို့ ဦးညီညီထွန်းလွင် ပြော

တချိန်က ပရိသတ် အားပေးခံရတဲ့ ရွှေညီကို လူရွှင်တော်တွေ ဘာလုပ်နေကြလဲ

“ရုပ်ရှင်ပြတိုက်မှာ ကျန်ခဲ့တဲ့ ပုံတွေ ပြန်ဖြည့်မှာပါ”လို့ ဦးအေးကြူလေး ပြော

The post ကလေးမွေးစားချင်တဲ့သူတွေရှိပေမယ့် မပေးသေးဘူးလို့ ခိုင်နှင်းဝေပြော appeared first on ဧရာဝတီ.

နှစ်စဉ်နှစ်တိုင်းရဲ့ ဇွန်လ တတိယပတ် တနင်္ဂနွေနေ့ဟာ “အဖေများနေ့” ဖြစ်ပါတယ်။ ဒီနေ့ကျရောက်တဲ့ အဖေများနေ့မှာ အဖေချစ်တဲ့ သမီးတွေလည်းဖြစ်၊ အနုပညာရှင်များလည်းဖြစ်တဲ့ သရုပ်ဆောင်မင်းသမီးတွေ သူတို့ဖခင်ကို အမှတ်တရပြောထားကြတာကို ပြန်လည်ဖော်ပြပေးလိုက်ပါတယ်။

ဖွေးဖွေး

အဖေက ရှည်ရှည်ဝေးဝေး ကဗျာဆန်ဆန်တွေမကြိုက်လို့ လိုရင်းတိုရှင်းပဲရေးသည်။ ဒါတောင်ရှည်နေသေးသည်။ ဖခင်များနေ့မှမဟုတ် အမြဲတမ်းနီးပါး အဖေ့ကိုချစ်သည်။ Always Love You Da အဖေ နဲ့ သမီး က စိတ်ကြီးတာခြင်း တူတော့ (အဖေကတော့ပိုကြီးတာပေါ့လေ၊ ငယ်ငယ်က အဖေက မိုးကုတ်က ဆိုင်ကယ်တဗြင်းဗြင်းနဲ့လမ်းသရဲတဲ့ ဂေါ်။ တော်တော်တော့ညှိယူခဲ့ကြရပေမယ့် အခု အချိန်မှာတော့ အဖေပေးတဲ့မေတ္တာတွေ နားလည်မှုတွေကြောင့် သမီး အားအရမ်းပိုရှိရတယ်။ ကျေးဇူးပါ အဖေ။ ဖေချစ်များအားလုံး နဲ့ အဖေများအားလုံးလဲ ချစ်ခြင်းမေတ္တာပို့သပါတယ်ရှင်။

မိုးဟေကို

အဖေ မိသားစုတစုလုံးရဲ့ ဦးဆောင်သူ၊ ရှာဖွေကျွေးမွေးစောင့်ရှောက်ခဲ့သူ အဖေ။ ဒီနေ့ဒီအချိန်အထိ မမောမပန်း မငြိုမငြင်ဘဲ လုပ်ကျွေးတာဝန်ကျေခဲ့သူ အဖေ။ မိသားစုနဲ့အတူ အဆိုးအကောင်းတွေကို မျှဝေရင်ဆိုင်ခွန်အားပေးရင်း အနားမှာ ကျန်းမာစွာရှိနေပေးတဲ့အတွက် ပြုစုစောင့်ရှောက်ခွင့်ပေးတဲ့အတွက် ပျော်ရွှင်ကြည်နူးမိပါတယ်။

မိဘဆိုတာ သားသမီးတွေအတွက်ဆို အမြဲအဖြည့်ခံသူတွေပါ။ သားသမီးတွေကို သူတို့ဘဝနဲ့ရင်းပြီး “ပိုး”မွေးသလို ပြုစုစောင့်ရှောက်ခဲ့သလို အမြင့်ဆုံးကိုပျံနိုင်အောင် တောင်ပံတပ်ပေးတဲ့ ပဲ့ကိုင်ရှင်တွေပါ။ မိုးအတွက်ကတော့ “အမေများနေ့” “အဖေများနေ့” ဆိုတာသတ်မှတ်ရက်မှ ရှိတာမဟုတ်ပါဘူး။ မိုးအမြဲ ဦးထိပ်ထားလေးစားရိုသေ တန်ဖိုးထား ရတဲ့ မိဘနှစ်ပါးအတွက် မိုးရဲ့နေ့စဉ်ဘဝ ဖြတ်သန်းမှု၊ ကြိုးစားမှုစတဲ့ အချိန်တိုင်းဟာ အဖေ့အတွက်နေ့တွေပါပဲ။

မိုးယုစံ

Happy Father’s Day တည်ကြည် ခန့်ညားပြီး စိတ်ထားအလွန်ကောင်း အေးဆေးနေတတ်ပြီး အချက်အပြုတ် အလွန်ကောင်း၊ မိသားစုအပေါ်တာဝန်ကျေပြီး သမီးကနေ အခုမြေးလေးထိ ကိုယ်တိုင်လုပ်ပေးတတ်တဲ့အဖေ ဒီနေ့မှာ အဖေတွေအားလုံးကို ဂုဏ်ပြုရင်း မိုးယု ပါးပါးကိုပဲ ကျေးဇူးတင်ကြောင်း ချစ်‌ကြောင်းပြောချင်ပါတယ်။

နေခြည်ဦး

Happy Father’s Day ဒီနှစ်မှာ ဖေဖေ့ကိုသမီးတို့က ဆုတဆုပေးချင်ပါတယ်။ ဖခင်တာဝန်အကျေပွန်ဆုံးဆု။

ဒါတွေကတော့ အနုပညာရှင်တွေရဲ့ အဖေများနေ့နဲ့ပတ်သက်ပြီး သူတို့ရဲ့အဖေတွေနဲ့ ပတ်သက်တဲ့အမှတ်တရတွေ ၊ ကျေးဇူးတရားတွေ ၊ ကောင်းခြင်းဆိုးခြင်းတွေကို ဖော်ကျူးထားတဲ့ ဆုတောင်းစကားတွေပဲ ဖြစ်ပါတယ်။ ဒီနေ့ကျရောက်တဲ့ အဖေများနေ့မှာ ကမ္ဘာပေါ်ရှိ အဖေများအားလုံး ကျန်းမာပျော်ရွှင်စေဖို့ ဆုတောင်းပေးပါတယ်။

The post အဖေချစ်တဲ့ မင်းသမီးတွေရဲ့ “အဖေများနေ့” အမှတ်တရစကားသံများ appeared first on ဧရာဝတီ.

သရုပ်ဆောင်စမိုင်းလ်ကတော့ သူမရဲ့အသက် ၃၆နှစ်ပြည့်မွေးနေ့အလှူအဖြစ် သိန်း ၃၆၀ ကို ပျော်ရွှင်စရာ အစီအစဉ်များနဲ့အတူ လှူဒါန်းသွားမှာဖြစ်တယ်လို့ သိရပါတယ်။

ဇွန်လ ၂၀ ရက်နေ့မှာ မြန်မာနိုင်ငံရုပ်ရှင်အစည်းအရုံးတွင် အမေများအဖွဲ့ ၊ မမများအဖွဲ့ ၊ ကိုလူချောအဖွဲ့ ၊ စက်မှုအဖွဲ့ ၊ ဇာတ်ပို့ဇာတ်ရံများအဖွဲ့တို့ကို သိန်း ၆၀ လှူဒါန်းခဲ့ပါတယ်။

“မြန်မာပြည်ရောက်လာကတည်းက စီးပွားရေးကို ဇောက်ချလုပ်ခဲ့တဲ့အခါကျတော့ အမြဲတမ်းတော်တော်များများကို လှူဖြစ်တယ်။ သေချာပြန်စဉ်းစားတော့ ရုပ်ရှင်ဘက်ကို မလှူရသေးဘူး။ အမေများအဖွဲ့ကိုလည်း တခါမှစုပြီး အများကြီး မလှူဖူးသေးဘူး”

“ မှတ်မှတ်ရရလေးဖြစ်အောင် ရုပ်ရှင်လောကသားတွေလည်း ဒုက္ခရောက်နေတာအများကြီးလေ။ ကူညီပြီးလှူဖြစ်တာပေါ့။ တခါတည်း အများကြီးစုပြီး ပထမဆုံးလှူဖြစ်တာပေါ့။ သင်္ကြန်မတိုင်ခင်ကတည်းက လှူဖို့စဉ်းစားထားတာ” လို့ စမိုင်းလ်က ပြောပါတယ်။

ဒီကနေ့မှာတော့ သူမရဲ့သူငယ်ချင်းများနဲ့အတူ ဂိမ်းအစီအစဉ်များပြုလုပ်ပြီး ပရိသတ်များအတွက် ဖုန်းငွေဖြည့်ကတ်များ ၊ အသက်ရှုစက် နဲ့ ဒေါ်ခင်ကြည်ဖောင်ဒေးရှင်းအတွက် လှူဒါန်းမှုများပြုလုပ်သွားမှာဖြစ်တယ်လို့ သိရပါတယ်။

“စမိုင်းလ်ရဲ့ Page ကနေ ညနေ ၄နာရီကနေစပြီး Live လုပ်မယ်။ အကုန်လုံးလှူမယ်။ အသက်ရှုစက်လည်း လှူမယ်။ ဒေါ်ခင်ကြည်ဖောင်ဒေးရှင်းကိုလည်း လှူမယ်။ ပရိသတ်တွေ အကုန်လုံးကိုလည်း လှူမယ်။ ပြီးတော့ မနက်ကတည်းက လူ ၁ထောင်ကို ငွေဖြည့်ကတ် ၃၆သိန်းဖို့လှူမယ်။ ၃၆နှစ်ပြည့်တာမလို့ပါ”

“ ပြီးရင်ဂိမ်းတွေလည်းဆော့မယ်။ ဂိမ်းတွေဆော့ရင်းလည်း ပိုက်ဆံရမယ်။ သိန်း ၃၀၀ ဖိုးကိုမနက်ဖြန် တနေ့လုံးလှူနေမှာ။ ကံစမ်းမဲတွေလည်းပါမယ်” လို့ စမိုင်းလ်ကပြောပါတယ်။

အဆိုပါ အစီအစဉ်ကိုတော့ ညနေ ၄နာရီမှစတင်ကာ စမိုင်းလ်ရဲ့ Page မှာ Live ပြုလုပ်သွားမှာဖြစ်ပြီး ဖုန်းငွေဖြည့်ကတ် လက်ဆောင်များကိုတော့ ဒီကနေ့မနက်မှစတင်ကာ ပေးနေပြီဖြစ်တယ်လို့ သိရပါတယ်။

“ကျမတို့က လူလတ်ပိုင်းအရွယ် အိမ်ထောင်ရှင်ကလေးအဖေ အမေတွေဖြစ်သွားကြပြီ။ ကျမတို့အရွယ်လူတွေက ကိုယ့်အတွက် ကိုယ်ပျော်တာ နည်းသွားပြီ။ ကျမတို့က သားသမီးကို အချိန်ပိုပေးတယ်။ စီးပွားရေးကို အချိန်ပေးတယ်။ မိသားစုကို အချိန်ပေးတယ်။ လူလတ်ပိုင်းအရွယ်တွေက ကိုယ့်ကိုယ်ကိုယ်အချိန်ပေးဖို့မေ့ပြီး မပျော်ကြဘူး”

“ကျမတို့ သူငယ်ချင်းအုပ်စုလေးက ကိုယ့်ကိုယ်ကို အချိန်ပေးပြီး အလကားနေပျော်ပြီးဆော့နေတာဆိုတော့ကိုယ်ပျော်သလိုသူများတွေကိုလည်း ပျော်စေချင်တယ်။ ကိုယ့်သူငယ်ချင်းတွေနဲ့ ပျော်လို့ရတယ်ဆိုတဲ့ Message လေးလည်းပေးချင်တယ်။ အဲဒါကြောင့် Game လေးတွေလည်းလုပ်မယ်။ အလှူလေးတွေလည်းလုပ်မယ်” လို့ စမိုင်းလ်ကပြောပါတယ်။

မွေးနေ့နှစ်တိုင်းမှာ အမျိုးသားရဲ့ Surprise များနဲ့ ဖြတ်သန်းနေတာဟာ အယူပဲယူနေရတာဖြစ်တဲ့အတွက် ဒီနှစ်မွေးနေ့မှာတော့ အလှူအတန်းများစွာလုပ်တာဖြစ်တယ်လို့ သိရပါတယ်။

The post အသက် ၃၆ နှစ်ပြည့်မှာ သိန်း ၃၆၀ လှူဒါန်းသွားမယ့် စမိုင်းလ် appeared first on ဧရာဝတီ.

၁၉၉၀ ပြည့်နှစ်က စတင်လာခဲ့တဲ့ ကိုရီးယားနိုင်ငံရဲ့ ဒါရိုက်တာအဖွဲ့အစည်းကနေ ချီးမြင့်တဲ့ အင်ချွန်း Chunsa ရုပ်ရှင်ပွဲတော်လို့ လူသိများတဲ့ Chunsa ရုပ်ရှင်ထူးချွန်ဆုပေးပွဲအခမ်းအနားကို ဇွန်လ ၁၉ ရက်က ကျင်းပခဲ့ပါ တယ်။

၂၅ ကြိမ်မြောက်တိုင်ခဲ့ပြီဖြစ်တဲ့ အဆိုပါဆုပေးပွဲမှာ တနှစ်အတွင်း အကောင်းဆုံး လင်းလက်တောက်ပနိုင်ခဲ့တဲ့ ရုပ်ရှင်ကားတွေကို ရွေးချယ်ချီးမြင့်ပေးခဲ့တာပါ။ COVID-19 အခြေအနေကြောင့် ဒီနှစ်ဆုပေးပွဲကို ပရိသတ် မပါ ဝင်ခဲ့သလို Online ကနေလည်း ထုတ်လွှင့်ပြသပေးခဲ့ခြင်းမရှိပါဘူး။

ကိုရီးယားနိုင်ငံ လွတ်မြောက်ရေးပြည်သူ့စစ်အဖွဲ့နဲ့ဂျပန်စစ်တပ်ကြား ဖြစ်ပွားခဲ့တဲ့ စစ်ပွဲအကြောင်းကို အခြေခံ ရိုက်ကူး ထားတဲ့ “The Battle: Roar to Victory” ဇာတ်ကားက အကောင်းဆုံးဒါရိုက်တာဆုနဲ့ နည်းပညာထူးချွန်ဆုတွေကို သိမ်းပိုက်နိုင်ခဲ့ပါတယ်။

မင်းသား လီဗြောင်ဟွန်းပါဝင်ထားတဲ့ “The Man Standing Next” ကတော့ အကောင်းဆုံး အမျိုးသားသရုပ်ဆောင်ဆုနဲ့ အကောင်းဆုံး ဇာတ်ပို့သရုပ်ဆောင်ဆုတွေကို ဆွတ်ခူးသွားခဲ့ပါတယ်။

စာရေးဆရာမ ချိုနမ်ဂျူရဲ့ အရောင်းရဆုံး ဝတ္ထုကို မှီငြမ်းရိုက်ကူးထားတဲ့ “Kim Ji Young, Born 1982” ဇာတ်ကားမှာ မင်းသမီး Kim Mi Kyung က အကောင်းဆုံး ဇာတ်ပို့အမျိုးသမီးသရုပ်ဆောင်ဆုကိုရခဲ့ပြီး ကင်ဒိုယောင်က မျက်နှာသစ်ဒါရိုက်တာ ဆုကို ရယူသွားနိုင်ခဲ့ပါတယ်။

၂၀၁၉ ခုနှစ်မှာထွက်ရှိခဲ့တဲ့ မင်းသား ဂျိုဂျွန်ဆော့နဲ့ မင်းသမီး ယွန်နာတို့ပါဝင်သရုပ်ဆောင်ထားတဲ့ “E.X.I.T” ဇာတ်ကားကတော့ ပရိသတ်အကြိုက်ဆုံးဆုနဲ့ ဇာတ်ညွှန်းဆုကို သိမ်းပိုက်နိုင်ခဲ့ပါတယ်။

“The Man Standing Next” ဇာတ်ကားနဲ့ အကောင်းဆုံးသရုပ်ဆောင်ဆု ရရှိခဲ့တဲ့ မင်းသား လီဗြောင်ဟွန်းက “အခုလို ရွေးချယ်ခံခဲ့ရတဲ့ ဂုဏ်ယူမိပါတယ်။ တခြားဆန်ခါတင်စာရင်းဝင်ခဲ့သူတွေအကုန်လုံးကလည်း ထူးချွန်သူတွေပါ။ ကျနော်နဲ့အတူ တွဲဖက်သရုပ်ဆောင်တွေဆီကလည်း ပညာတွေရပါတယ်။ အနုပညာလောကမှာ အချိန်ကြာနေပြီ ဆိုပေမယ့် ဒီဇာတ်ကားက အသစ်လိုပဲ ခံစားရပါတယ်။ ကျနော်တယောက်တည်း ဆုလက်ခံယူရလို့ စိတ်မကောင်း ဖြစ်မိတယ်” လို့ ဆိုပါတယ်။

“Bring Me Home” ဇာတ်ကားနဲ့ အကောင်းဆုံးအမျိုးသမီးသရုပ်ဆောင်ဆုရခဲ့တဲ့ မင်းသမီး လီယောင်အေးက “ဒီဆုကိုရတဲ့အတွက် အရမ်းဂုဏ် ယူမိပါတယ်။ တခြားအရာတွေထက်တောင် အဓိပ္ပာယ်ပိုရှိတယ်လို့ ခံစားရပါ တယ်။ ရုပ်ရှင်မရိုက်ဘဲ အကြာကြီး နေခဲ့တော့ လုပ်နိုင်ပါ့မလား စိုးရိမ်ခဲ့ရပေမယ့် အကောင်းဆုံးဆုရတဲ့အတွက် နောက်ထပ် အင်အားတွေရလာတယ်” လို့ ကျေးဇူးတင်စကား ပြောပြခဲ့ပါတယ်။

“Parasite” ဇာတ်ကားနဲ့ အော်စကာဆုရခဲ့တဲ့ ဒါရိုက်တာ ဘုံဂျူဟိုကလည်း Chunsa Film Art Awards ဆုပေးပွဲရဲ့ ပထမဆုံးဆုအဖြစ် The White Crane ဆုကို ရရှိခဲ့ပေမယ့် အခမ်းအနားကို မတက်ရောက်နိုင်ခဲ့တာ ကြောင့် ကိုယ်စားဒါရိုက်တာ မင်ကူဒုံက လက်ခံရယူပေးခဲ့ပါတယ်။

Ref:Soompi

The post တောင်ကိုရီးယားနိုင်ငံရဲ့ ၂၅ ကြိမ်မြောက် Chunsa ရုပ်ရှင်ထူးချွန်ဆုပေးပွဲ appeared first on ဧရာဝတီ.

ပြီးခဲ့တဲ့ ဇွန်လ ၂၀ ရက်တုန်းက အမေရိကန်နိုင်ငံ၊ အိုကလာဟိုးမားပြည်နယ်၊ Tulsa မြို့မှာပြုလုပ်ခဲ့တဲ့ အမေရိကန်သမ္မတ ဒေါ်နယ်ထရမ့်ရဲ့လူထုစုဝေးပွဲကို တက်ရောက်မယ်ဆိုပြီး TikTok အသုံးပြုသူတွေက အယောင်ဆောင် စာရင်းပေးခဲ့ကြတယ်လို့ သိရပါတယ်။

TikTok အပါအဝင် ဆိုရှယ်မီဒီယာ ပလက်ဖောင်း အသုံးပြုသူတွေက သူတို့ဟာ လုံးဝ သွားရောက်မှာ မဟုတ်တဲ့ လူထုစုဝေးပွဲအတွက် အခမဲ့ အွန်လိုင်း စာရင်းပေးသွင်းမှုကို အယောင်ဆောင် လုပ်ဆောင်ခဲ့ကြတယ်လို့ ပြောကြားခဲ့ပါတယ်။ နယူးယောက်တိုင်းမ် သတင်းရဲ့အဆိုအရ K-pop ပရိသတ်တွေဟာ အလားတူမျိုး လုပ်ဆောင်ခဲ့ကြတယ်လို့ သိရပါတယ်။

အဲ့ဒီ စုဝေးပွဲ မတိုင်ခင် သမ္မတထရမ့်ရဲ့ ကမ်ပိန်းမန်နေဂျာ Brad Parscale က ပွဲတက်ရောက်ဖို့ လူ ၁ သန်းကျော် ဆန္ဒပြုတောင်းဆိုထားတယ်လို့ ပြောကြားခဲ့ပါတယ်။ ဒါပေမဲ့ လူ ၁ သောင်း ၉ ထောင်လောက်ဆန့်တဲ့ BOK Center ကွင်းထဲ ပြုလုပ်ခဲ့တဲ့ အဲ့ဒီ စုဝေးပွဲမှာ ထိုင်ခုံအလွတ် တော်တော်များများ ရှိခဲ့တယ်လို့ သိရပါတယ်။

သမ္မတ ထရမ့်နဲ့ ဒုတိယသမ္မတ မိုက်ပန့်စ်တို့ဟာလည်း ကွင်းပြင်ပအထိ ထုတ်လွှင့်ဖို့ စီစဉ်ထားတဲ့ မိန့်ခွန်း အစီအစဉ်ကိုလည်း ဖျက်သိမ်းခဲ့ပါတယ်။

Tulsa မီးသတ်ဌာနပြောခွင့်ရသူ တဦးကတော့ တက်ရောက်လာသူ အရေအတွက် အယောက် ၆၂၀၀ လောက် ရှိတယ်လို့ ရိုက်တာသတင်းဌာနကို ပြောခဲ့ပါတယ်။ သမ္မတရဲ့ ကမ်ပိန်းအကြံပေးတွေတော့ လက်ရှိမှာ ဒီမိုကရက်တစ် ပြိုင်ဖက် ဒုသမ္မတဟောင်း ဂျိုးဘိုက်တန်ရဲ့ နောက်မှာ လူထုထောက်ခံမှု ရနေတဲ့ သမ္မတအတွက် အခုပွဲဟာ အခြေခိုင်ပြီး ထောက်ခံမှုတွေ ရှိနေတာကို ပြသရာ ရောက်တယ်လို့ ဆိုပါတယ်။

မကြာသေးခင် ရက်တွေအတွင်း သမ္မတရဲ့ စုဝေးပွဲ ကျင်းပခဲ့တဲ့ အိုကလာဟိုးမားပြည်နယ်မှာ COVID-19 ကူးစက်ခံရသူ မြင့်တက်ခဲ့တာကြောင့် ဗိုင်းရပ်စ် ကူးစက်ခံရနိုင်ချေ ရှိနေလို့ ပွဲတက်ရောက်မယ့်သူတွေကို သတိပေးခဲ့ရတယ်လို့ ပြည်နယ် ကျန်းမာရေးဌာနက ဆိုပါတယ်။

Trump ကမ်ပိန်းအဖွဲ့ကတော့ အရင်လာ အရင်နေရာရ စနစ်နဲ့ ဝင်ခွင့်ပြုခဲ့ပြီး ဘယ်သူ့ကိုမှ လက်မှတ်ထုတ်ပေးခဲ့တာ မရှိခဲ့ဘူးလို့လည်း ဆိုပါတယ်။ သမ္မတရဲ့ ပွဲကို တက်ရောက်ဖို့ ဖုန်းနံပါတ် တောင်းခံခဲ့ရတာ မျိုးရှိခဲ့ပေမယ့် တက်ရောက်ဖို့ စာရင်းသွင်းသူတချို့က အတုအယောင် ဖုန်းနံပါတ်တွေကို ပဲ ပေးကြခဲ့ကြတယ်လို့ ဆိုပါတယ်။

TikTok ပေါ်မှာလည်း လူဖြူကြီးစိုးရေး ဝါဒီတဦးကို COVID-19 ကာလအတွင်း ကွင်းထဲမှာ မိန့်ခွန်းပြောခွင့် မပြုရေး လှုံ့ဆော်မှုတွေ ကျယ်ကျယ်ပြန့်ပြန့်ဖြစ်ပေါ်ခဲ့ပြီး K-pop ပရိသတ်တွေပါ အဲ့ဒီလှုံ့ဆော်မှုအတွင်း ပူးပေါင်းပါဝင်ခဲ့ကြတယ်လို့ သိရပါတယ်။

လွန်ခဲ့တဲ့ သီတင်းပတ်တွေအတွင်း K-pop ပရိသတ်တွေဟာ ဆိုရှယ်မီဒီယာပေါ်မှာ Black Lives Matter လှုပ်ရှားမှုအတွက် တက်တက်ကြွကြွ ပါဝင်ခဲ့ကြပြီး ဆန္ဒပြမှုတွေအတွင်း တရားမဝင် အပြုအမူတွေ ဆောင်ရွက်ခဲ့ကြတဲ့ သက်သေတွေ တောင်းခံနေတဲ့ ဒဲလက်စ်မြို့ ရဲဌာနရဲ့ App ဆီကိုလည်း အနှောင့်အယှက် မက်ဆေ့ချ်တွေ ပို့ခဲ့ကြပါတယ်။

ပြီးခဲ့တဲ့ ဇွန်လ ၂၀ ရက် ညနေခင်းမှာတော့ သမ္မတရဲ့ စုဝေးပွဲ ကျင်းပရာနေရာ ပြင်ပမှာ အော်ဟစ် စုရုံးမှုတွေ ရှိခဲ့ပြီး ပွဲအတွင်းကို Black Lives Matter ဆန္ဒပြသူ ၃၀ လောက်နဲ့ သမ္မတကို ထောက်ခံသူတချို့က ဝင်ရောက်ဖို့ စောင့်ဆိုင်းခဲ့ကြပါတယ်။

Ref:Reuters

You may also like these stories:

TikTok ကုမ္ပဏီ နှစ်ဝက်အတွင်း ဒေါ်လာ ၇ ဘီလျံကျော် ရရှိ

K-pop လောကအကြောင်း ရုပ်ရှင် ထုတ်ရိုက်မယ့် သြစတြေးလျ မင်းသမီး Rebel Wilson

The post ထရမ့် စုဝေးပွဲကို TikTok သုံးသူတွေနဲ့ K-pop ပရိသတ်တွေ အယောင်ဆောင် စာရင်းပေး appeared first on ဧရာဝတီ.

ကမ္ဘာကျော်မင်းသား၊ ဒါရိုက်တာ Stephen Chow ဟာ ဟောင်ကောင်ရဲ့ ဈေးကြီးတဲ့ တောင်ကုန်းဒေသ The Peak မှာရှိတဲ့ သူ့ရဲ့ ဇိမ်ခံအိမ်ကို ငွေကြေးပြဿနာတွေကြောင့် ပေါင်လိုက်ရတယ်လို့ သိရပါတယ်။

အသက် ၅၇ နှစ်အရွယ် လူပျိုကြီး Chow ဟာ ကမ္ဘာ့ဈေးအကြီးဆုံး လမ်းတလမ်းဖြစ်တဲ့ 12 Pollock’s Path မှာရှိတဲ့ သူ့ရဲ့အိမ်ကို ပြီးခဲ့တဲ့ မတ်လအတွင်း၊ အာရှမှာ COVID-19 ရေချိန်အမြင့်ဆုံးရောက်နေတဲ့အချိန် JPMorgan Chase ဘဏ်မှာ ပေါင်နှံခဲ့တာဖြစ်တယ်လို့ ဟောင်ကောင်သတင်းမီဒီယာ Apple Daily က ဆိုပါတယ်။ အဲ့ဒီ ပေါင်နှံမှုကို မင်းသား Chow ရဲ့ အစ်မဖြစ်သူက လက်မှတ်ရေးထိုးခဲ့တာပါ။

ဝယ်သူတဦးကတော့ အကျယ် ၅၇၁၁ စတုရန်းပေရှိပြီး ဟောင်ကောင်မြို့ကို မြင်ကွင်းကျယ်အနေအထား မြင်နိုင်တဲ့ အဲ့ဒီအိမ်ကို ဒေါ်လာ ၁၄၁ ဒဿမ ၉ သန်းနဲ့ ဝယ်သူဖို့ ချဉ်းကပ်ခဲ့ပေမယ့် မင်းသား Chow က မရောင်းခဲ့ဘူးလို့ သိရပါတယ်။

သတင်းတွေမှာတော့ အခုလိုမျိုး မင်းသားဟာ သူ့ရဲ့ ပိုင်ဆိုင်မှုကို ပေါင်နှံတာ ဒါပထမဆုံးအကြိမ် မဟုတ်ဘူးလို့ ဖော်ပြကြပါတယ်။ သူဟာ ၂၀၁၁ ခုနှစ်မှာ အဲ့ဒီအိမ်ကို ပေါင်နှံတာ လုပ်ခဲ့ဖူး ပြီးခဲ့တဲ့နှစ်ကမှ ပြန်ရွေးနိုင်ခဲ့တာ ဖြစ်ပါတယ်။

အခုလို သတင်းတွေကို မင်းသား Chow က အတည်မပြုပေမယ့် ကမ္ဘာ့ရုပ်ရှင်လုပ်ငန်းကို တုံ့ဆိုင်းမှုတွေအထိ ဖြစ်စေခဲ့တဲ့ COVID-19 ကပ်ရောဂါကြောင့် မင်းသားဟာ ဆိုးဆိုးရွားရွား ထိခိုက်ခဲ့တယ်ဆိုတဲ့ သတင်းတွေက ထွက်ပေါ်နေခဲ့ပြီး ဖြစ်ပါတယ်။

ပြီးခဲ့တဲ့နှစ်မှာ ဖြန့်ချိခဲ့တဲ့ မင်းသားရဲ့ “The New King of Comedy” ရုပ်ရှင်ဟာ အခြေအနေသိပ်မကောင်းခဲ့ပဲ သူ့ရဲ့ အဓိကဈေးကွက်ဖြစ်တဲ့ တရုတ်နိုင်ငံမှာ ဒေါ်လာ ၈၈ ဒဿမ ၂ သန်းပဲ ရရှိခဲ့ပါတယ်။ ၂၀၁၆ ခုနှစ်တုန်းက ဖြန့်ချိခဲ့တဲ့ “The Mermaid” ရုပ်ရှင်ကတော့ တရုတ်နိုင်ငံမှာ ယွမ် ၃ ဒဿမ ၃၉ ဘီလီယံအထိ ရရှိခဲ့ပါတယ်။

ကပ်ရောဂါကြောင့် ရင်းနှီးမြှုပ်နှံမှုတွေ နည်းပါးခဲ့ရတဲ့ ရုပ်ရှင်သစ်အတွက် ငွေကြေးထည့်ဝင်ဖို့ သူ့ရဲ့ ပိုင်ဆိုင်မှုကို ပေါင်နှံခဲ့ရတာ ဖြစ်နိုင်တယ်လို့ ဟောင်ကောင်နဲ့ တရုတ်မီဒီယာတွေက ဆိုပါတယ်။

၂၀၀၄ ခုနှစ်မှာ မင်းသား Chow ဟာ Pollock’s Path မှာရှိတဲ့ မြေတပိုင်းကို ဟောင်ကောင်ဒေါ်လာ သန်း ၃၂၀ နဲ့ ဝယ်ယူခဲ့ပါတယ်။ အဲ့ဒီမြေပေါ်မှာ အိမ် ၄ လုံး ဆောက်ဖို့ တည်ဆောက်သူတဦးနဲ့ အလုပ်တွဲလုပ်ခဲ့ပေမယ့် နှစ်အနည်းငယ်အတွင်းမှာ ၃ လုံးကို ပြန်ရောင်းခဲ့ပြီး နံပါတ် ၁၂ အိမ်တခုတည်းကိုသာ သူ့အတွက် ချန်ထားခဲ့တာ ဖြစ်ပါတယ်။

မင်းသားဟာ တခြားပြဿနာတွေနဲ့လည်း ရင်ဆိုင်နေရသူဖြစ်ပါတယ်။ သူ့ရဲ့ ချစ်သူဟောင်း ဟောင်ကောင် ဆောက်လုပ်ရေး ကုမ္ပဏီဆက်ခံသူ Yu Wenfeng က မင်းသားအတွက် သူလုပ်ပေးခဲ့ရတဲ့ အလုပ် ကော်မရှင်ခကို တရားရုံးကနေတဆင့် တောင်းခံတာနဲ့လည်း ကြုံနေရသူ ဖြစ်ပါတယ်။

Ref: thejakartapost

You may also like these stories:

ထရမ့် စုဝေးပွဲကို TikTok သုံးသူတွေနဲ့ K-pop ပရိသတ်တွေ အယောင်ဆောင် စာရင်းပေး

တောင်ကိုရီးယားနိုင်ငံရဲ့ ၂၅ ကြိမ်မြောက် Chunsa ရုပ်ရှင်ထူးချွန်ဆုပေးပွဲ

အသက် ၃၆ နှစ်ပြည့်မှာ သိန်း ၃၆၀ လှူဒါန်းသွားမယ့် စမိုင်းလ်

The post ငွေကြေးပြဿနာတွေကြောင့် ဇိမ်ခံအိမ်ကို ပေါင်လိုက်ရတဲ့ Stephen Chow appeared first on ဧရာဝတီ.