တရုတ်နိုင်ငံမှာ COVID-19 ရောဂါကြောင့် နိုင်ငံလုံးကျွတ် အသွားအလာ ကန့်သတ်မှုကို အချိန် ၆ လလောက် သတ်မှတ်ခဲ့ပြီးနောက် ပြီးခဲ့တဲ့ ဇူလိုင်လ ၂၀ ရက်နေ့ကလို့ နိုင်ငံတဝန်းမှာရှိတဲ့ မြို့တော်တော်များများက ရာနဲ့ချီတဲ့ ရုပ်ရှင်ရုံတွေကို ပြန်ဖွင့်လိုက်ပြီ ဖြစ်ပါတယ်။

ဒါဟာ ကမ္ဘာ့နေရာ တချို့မှာ ကူးစက်မှု အရှိန်မြင့်တက်နေဆဲဖြစ်တဲ့ ကပ်ရောဂါကို အောင်မြင်စွာ ထိန်းချုပ်နိုင်ခဲ့ပြီ ဖြစ်ကြောင်း ပြသမှု တခုလည်း ဖြစ်ပါတယ်။ ဒါပေမဲ့ COVID-19 အရေး စိုးရိမ်မှုတွေရှိနေဆဲဖြစ်တာကြောင့် ရုပ်ရှင်ချစ် ပရိသတ်တွေအတွက် အွန်လိုင်းကနေပဲ လက်မှတ်ရောင်းချတာ၊ မုန့်ဆိုင်တွေ ပိတ်ထားတာ၊ ရုံတွင်း လူအချင်းချင်း ခပ်ခွာခွာနေခိုင်းတဲ့ လုပ်ဆောင်ချက်တွေကိုလည်း လုပ်ဆောင်နေပါတယ်။

ရုပ်ရှင်ရုံတွေဟာ ပွဲစဉ်တခုချင်းစီကို သူတို့ပြသနိုင်တဲ့ ခုံအရေအတွက်ရဲ့ ၃၀ ရာခိုင်နှုန်းကျော်တဲ့အထိ ရောင်းချခွင့် မရှိတဲ့အပြင် ထိပ်တန်း လက်မှတ်ရောင်းချတဲ့ App တွေမှာ ခုံရွေးချယ်တဲ့ ဇယားရဲ့ ဖော်ပြချက်တွေအရ ရုပ်ရှင်ရုံ တော်တော်များများမှာ လူတွေဟာ အနည်းဆုံး ခုံနှစ်ခုံခြားပြီး ထိုင်ဖို့ လိုအပ်မှာလည်း ဖြစ်ပါတယ်။

တရုတ်နိုင်ငံရဲ့ အကြီးမားဆုံး ရုပ်ရှင်ရုံလုပ်ငန်းစုဖြစ်တဲ့ SFC မှ ရှန်ဟိုင်း ဒေသ မန်နေဂျာ Bao Yaopei က “ကျနော်တို့ရုပ်ရှင်ရုံကို ဘယ်တော့ပြန်ဖွင့်မှာလဲဆိုပြီး ကြည့်တဲ့ပရိသတ်တွေထံက တောင်းဆိုမှုတွေ ရရှိထားတာကြောင့် ကျနော်တို့က အကောင်းဆုံးမျှော်လင့်ထားပါတယ်” လို့ ဆိုပါတယ်။

Bao က ပြီးခဲ့တဲ့ဇူလိုင်လ ၂၀ ရက်နေ့ ရုပ်ရှင်ရုံတွေ ပထမဆုံး ပြန်လည် မဖွင့်လှစ်မီ ပြောဆိုခဲ့တာ ဖြစ်ပြီး ဝန်ထမ်းတွေဟာ ထိုင်ခုံတွေကို ဆေးကြောရှင်းလင်းတာနဲ့ 3D မျက်မှန်တွေကို ပိုးသတ်၊ ဆပ်ပြာသုတ်ထားတဲ့ အဝတ်တွေနဲ့ ဆေးကြောတာမျိုး လုပ်ဆောင်နေရတယ်လို့ဆိုပါတယ်။ ဒါပေမဲ့ ပရိသတ်တွေကတော့ ရုပ်ရှင်ရုံထဲကို တခြားလူတွေနဲ့ အတူတူ ဝင်ထိုင်ပြီး ရုပ်ရှင်က ပေးမယ့် ပျော်ရွှင်မှုကို အတူတူခံစားဖို့ မျှော်လင့်နေကြပြီလို့ သိရပါတယ်။

ကိုရိုနာဗိုင်းရပ်စ် စိုးရိမ်မှုတွေ ရှိနေဆဲဖြစ်တဲ့ မြို့တော် ပေကျင်းမှာတော့ ရုပ်ရှင်ရုံတွေကို အခုထိ ဆက်လက် ပိတ်ထားရဆဲ ဖြစ်ပါတယ်။ ပေကျင်းမြို့မှာရှိတဲ့ ပန်းခြံတွေ၊ ပြတိုက်တွေ၊ အားကစားစင်တာတွေနဲ့ စာကြည့်တိုက်တွေအနေနဲ့ ပုံမှန်လူဝင်နှုန်းရဲ့ ၅၀ ရာခိုင်နှုန်းကိုသာ နေ့စဉ် ဝင်ခွင့်ပြုထားပြီး ဘေးကင်း လုံခြုံမှုရှိတဲ့ အနေအထားနဲ့ လူ ၅၀၀ အထိ ပါဝင်တဲ့ ဆွေးနွေးပွဲတွေကိုလည်း ပြုလုပ်နိုင်ခွင့်ရှိပါတယ်။

ပြီးခဲ့တဲ့ ဇန်နဝါရီလ နှောင်းပိုင်းမှာ ပိတ်ခဲ့ရတဲ့ ရုပ်ရှင်ရုံတွေကို ပြန်ဖွင့်မယ်လို့ တရုတ် ရုပ်ရှင် အာဏာပိုင်တွေက လွန်ခဲ့တဲ့ မတ်လက ကြေညာခဲ့ပေမယ့် နိုင်ငံတဝန်း ရောဂါ ကူးစက်မှုအသစ်တွေ တွေ့လာရတာကြောင့် ပြန်ဖွင့်မယ့် အချိန်ကို ရွှေ့ဆိုင်းခဲ့ရတာဖြစ်ပါတယ်။

တရုတ်နိုင်ငံရဲ့ အကြီးမားဆုံး ရုပ်ရှင်လုပ်ငန်းစု Wanda Film က အခုနှစ် ပထမနှစ်ဝက်မှာ အနည်းဆုံး ဒေါ်လာ ၂၁၄ သန်းအသားတင် အရှုံးပေါ်မယ်လို့ ခန့်မှန်းထားပါတယ်။

Ref: thejakartapost

You may also like these stories:

“Tenet” ရုပ်ရှင် ရုံတင်ရက်ကို အကန့်အသတ်မရှိ ရွှေ့ဆိုင်း

နိုင်ငံတော် အတိုင်ပင်ခံပုဂ္ဂိုလ်နဲ့ ရုပ်ရှင်ကဏ္ဍများ ဆွေးနွေးမှု ပြုလုပ်မည်

The post တရုတ်မှာ ရုပ်ရှင်ရုံတွေ တဖြည်းဖြည်းချင်း ပြန်ဖွင့်ပြီ appeared first on ဧရာဝတီ.

သရုပ်ဆောင် စည်သူ (ပလပ်ကျွတ်) က COVID-19 ကြောင့် ရိုက်ကူးရေးတွေ ရပ်နားထားရတဲ့အချိန်မှာ ဖိနပ်များကို ကားနဲ့ လှည့်လည်ပြီး ရောင်းချနေသူပါ။ ဒီလို ဈေးရောင်းနေရတဲ့ အနုပညာသမားတွေဟာ ဈေးရောင်းနေရတာထက် ဝါသနာပါတဲ့ အနုပညာအလုပ်ကိုသာ ပိုလုပ်ချင်ကြတာပါလို့ ဆိုပါတယ်။

“ရုပ်ရှင်တွေ ပြန်ရိုက်ရတော့မယ် ကြားတယ်။ မင်္ဂလာ ဦးဇော်မင်းနှင့် အမေစုတို့နဲ့ တိုင်ပင် ပြောဆိုကြတော့မယ်လို့ ပြောသံကြားတယ်။ ပြန်ရိုက်ရရင်တော့ အရမ်းပျော်တာပေါ့။ ရင်လည်း ခုန်တယ်။ အဲ့ဒါပဲလုပ်ချင်နေတာလေ။ ဘယ်သူက ဈေးရောင်းချင်နေမှာလဲ”

“ကားမောင်းပြီး ဖိနပ်တွေ ရောင်းနေတာ ကားချင်းထိမှာလည်း ကြောက်ရ။ ရဲဖမ်းမှာ ကြောက်ရနဲ့ လုပ်နေရတာလေ။ အနုပညာကတော့ လွတ်လွတ်လပ်လပ်၊ ပေါ့ပေါ့ပါးပါးနဲ့ ပျော်ပျော်ရွှင်ရွှင် ကိုယ်ဝါသနာပါတာကို လုပ်ရတာဆိုတော့ ဒီအလုပ်ကိုပဲ ပြန်လုပ်ချင်တာပေါ့။ မြန်မြန်ရိုက်ရပါစေလို့လည်း ဆုတောင်းတယ်”လို့ စည်သူ (ပလပ်ကျွတ်)က ပြောပါတယ်။

ဆက်လက်ပြီး စည်သူ (ပလပ်ကျွတ်)က ဇာတ်ပို့ သရုပ်ဆောင်ဖြစ်တဲ့အတွက် အရည်အချင်းရှိနေမှ ထုတ်လုပ်သူ၊ ဒါရိုက်တာတွေက ခေါ်သုံးမှာလို့လည်း ပြောပါတယ်။

“ကျနော်တို့က ဇာတ်ပို့ ဆိုတော့လည်း သူတို့တွေ ခေါ်သုံးမှ အဆင်ပြေတာလေ။ အဲ့တော့ ခေါ်သုံးတာ မသုံးပေးတာ သူတို့ အပိုင်း၊ ကျနော်တို့ကတော့ ကြိုးစားနေရမှာပဲ။ ခေါ်နိုင်အောင်လည်း လုပ်ဖို့ ကျနော်တို့မှာ အရည်အချင်း ရှိရမှာ။ အရည်အချင်း မရှိရင်လည်း မခေါ်နိုင်ဘူး”လို့ ဆိုပါတယ်။

စည်သူ (ပလပ်ကျွတ်) က အရင်လို ထူးထူးဆန်းဆန်းတွေ မလုပ်ချင်တော့ဘူးလို့လည်း ဆိုပြီး ကွယ်လွန်သွားပြီဖြစ်တဲ့ မင်းသားကြီး ကျော်ဟိန်း ရဟန်းဝတ်နဲ့ ဟောခဲ့တဲ့ တရားတွေ နာပြီး အမှားကိုပြင်ကာ အမှန်ကို လျှောက်နေပြီလို့ ဆိုပါတယ်။

“အခုနောက်ပိုင်း သားသမီးကို တာဝန်ကျေရမယ်။ ဘယ်အရာမှ မမြဲဘူးဆိုတဲ့ အသိ၊ အားလုံးက ခဏလေးပါဆိုတဲ့ အသိ၊ ကိုယ်ပိုင်တာ ဘာမှမရှိဘူး။ ကိုယ်ပိုင်တာ စိတ်ထား၊ စိတ်ထားကောင်းဖို့ရယ်၊ အလှူဒါနလုပ်တဲ့ ကောင်းမှုရယ်၊ သူများပေါ် ကောင်းတဲ့ စိတ်ထားလေးတွေရယ်၊ အဲ့လို ကုသိုလ်ကောင်းမှုတွေက သူများပေါ်ပါသွားမှာဆိုတော့ အဲ့ဒါတွေကို လက်ကိုင်ထားပြီး စိတ်တွေ ပြင်လိုက်ပါပြီ”

“ဦးကျော်ဟိန်း ဟောခဲ့တဲ့ တရား “အမှားကိုပြင်ပြီး အမှန်ကို လျှောက်ပါပြီ” ဆိုတဲ့ စိတ်သွင်းပြီးနေပါတော့မယ်။ ကျနော့်ကို ဘုန်းကြီးပဲ ဝတ်ပါတော့လားကွာလို့ ပြောရင်လည်း ပြောပါစေ။ ဦးကျော်ဟိန်းရဲ့ တရားတွေ နာပြီးတဲ့ အချိန်မှာ အသိတွေ ဝင်လာတယ်”

“ဖြစ်လာတဲ့ပေါ် မူတည်ပြီးတော့ပဲ အကောင်းဆုံး ပေးဆပ်သွားမယ်။ ကာရိုက်တာ အရတော့ အရူးလား၊ အပေါလား၊ ကာရိုက်တာအရတော့ လုပ်ရမှာပဲ။ အရင်လိုတော့ ထူးထူးဆန်းဆန်းတွေ မလုပ်ချင် တော့ပါဘူး”လို့ စည်သူ(ပလပ်ကျွတ်)က ပြောပါတယ်။

စည်သူ (ပလပ်ကျွတ်) ကတော့ ရုပ်ရှင်နှင့် ဗီဒီယို ဇာတ်ကားပေါင်းများစွာမှာ ပါဝင်သရုပ်ဆောင်ခဲ့ပြီး စူပါဟီးရိုး ဝတ်စုံတွေ ဝတ်ဆင်လေ့ရှိတာကြောင့် လူသိများသူ တဦးပါ။ စည်သူ (ပလပ်ကျွတ်) ကတော့ “ကိုပေါ” ရုပ်ရှင် ဇာတ်ကားထဲမှာလည်း အဓိက သရုပ်ဆောင်အနေနဲ့ ပါဝင်ထားပါတယ်။

You may also like these stories:

ဖိနပ်ရောင်းရတဲ့ ငွေနဲ့ အိမ်လခ ပေးနိုင်ခဲ့တဲ့ စည်သူ (ပလပ်ကျွတ်)

The post ဈေးရောင်းတာထက် အနုပညာအလုပ်ကို ပိုလုပ်ချင်တဲ့ စည်သူ (ပလပ်ကျွတ်) appeared first on ဧရာဝတီ.

ဇာတ်ပို့သရုပ်ဆောင်တွေ ဖြစ်ကြတဲ့ ဇော်ဇော်နဲ့ ကျော်ကြီးက COVID-19 ကြောင့် ရိုက်ကူးရေးတွေ ရပ်နားထားရတာကနေ မကြာခင် ပြန်လည် ရိုက်ကူးခွင့် ရိုက်ရတော့မယ်လို့ အသံကြားရတဲ့အတွက် ပျော်မိတယ်လို့ ဆိုပါတယ်။

“ရိုက်ကူးရေးတွေ လွမ်းနေပြီ။ ချစ်သူတောင် အဲ့လောက် မလွမ်းဘူး။ ရိုက်ရတော့မယ်လို့ အသံကြားတာနဲ့တင် ပျော်နေတာ။ ရှုတင်တွေ မြန်မြန်ပြန်စပါစေလို့ ဆုတောင်းပါတယ်။ အခုဆို ၄ လလောက် ရှိပြီဆိုတော့ ပြန်စစေချင်ပါပြီ။ အရင် ရှုတင်တုန်းက အမှတ်တရတွေဆိုရင် သူငယ်ချင်းတွေ ပါရင် သူတို့က လိုက်နောက်နေတာ မအိပ်ရဲဘူး။ အိပ်နေရင် ဓာတ်ပုံတွေ ရိုက်ပြီး နောက်တယ်” လို့ ဇော်ဇော်က ပြောပါတယ်။

ရိုက်ကူးရေးရှိစဉ်က အမှတ်တရတွေများစွာ ရှိခဲ့ပြီး အခုလို ကိုဗစ်ကာလမှာတော့ ဆီချက်ခေါက်ဆွဲ လုပ်ရောင်းနေတယ်လို့ ဇော်ဇော်က ဆိုပါတယ်။

“ရိုက်ကွင်းတွေမှာ အမှတ်တရတွေလည်း အများကြီးရှိတော့ အရမ်းသတိရတာပေါ့။ ပျော်တာပေါ့။ ကျနော်တို့ ကိုဗစ်ကာလမှာ အခုနောက်ပိုင်း ဆီချက်ခေါက်ဆွဲတွေ ရောင်းနေတယ်။ အနုပညာသမားတွေကတော့ စီးပွားရေး မလုပ်ချင်ကြပါဘူး။ အနုပညာပဲ လုပ်ချင်ကြတာပါ။ အနုပညာလုပ်ခွင့်ရရင်ကို ကျေနပ်နေကြတာ”လို့ ဇော်ဇော်က ပြောပါတယ်။

ဇာတ်ပို့ ဇာတ်ရံ သရုပ်ဆောင် ကျော်ကြီးကလည်း အခုချိန်မှာ တခြားလုပ်ငန်းတွေ ပြန်စနေပြီ ဖြစ်တဲ့အတွက် ရှုတင်တွေကိုလည်း ပြန်စစေချင်ပြီလို့ ဆိုပါတယ်။

“ရိုက်ကူးရေးတွေ ပြန်စစေချင်ပြီ။ အရင်နေ့ရက်တိုင်းက ရှုတင်ပေါ်မှာဆိုတော့ အခုက တော်တော် ရပ်သွားတော့ ပိုလွမ်းတယ်။ ရှုတင်တွေကို နယ်တွေမှာလည်း သွားရိုက်တယ်။ အခုဆို မရိုက်ရတာ တော်တော်ကြာပြီ။ ပြန်ရိုက်ရပါစေတော့လို့ ဆုတောင်းပါတယ်”

“ပြန်ရိုက်ရရင် အရမ်းပျော်စရာကောင်းမှာပါ။ တခြားလုပ်ငန်းတွေတောင် ပြန်စနေပြီဆိုတော့ ကျနော်တို့ ရိုက်ကူးရေးတွေလည်း ပြန်စစေချင်ပြီ။ ရိုက်ကွင်းတွေမှာ ကိုယ့်သူငယ်ချင်းတွေ မပါရင်တော့ ပျင်းတာပေါ့။ ဇော်ဇော်တို့ ပါတဲ့ ရှုတင်တွေဆို တယောက်နဲ့ တယောက် နောက်နေတာ ပျော်နေရတယ်” လို့ ကျော်ကြီးက ပြောပါတယ်။

သရုပ်ဆောင် ကျော်ကြီးကတော့ ကိုဗစ်ကာလ အိမ်မှာပဲ နေဖြစ်ပြီး စီးပွားရေး လုပ်လို့ ရတဲ့ ပိုက်ဆံထက် အနုပညာလုပ်လို့ရတဲ့ အနုပညာကြေးကို ပိုတန်ဖိုးထားတယ်လို့ ဆိုပါတယ်။

“ကိုဗစ်ကာလ အိမ်မှာပဲ နေတာပေါ့။ ၂၀၁၇ ခုနှစ်ကတည်းက ရောင်းနေတဲ့ အဝတ်အစားရောင်းတဲ့ အလုပ်ကတော့ နည်းနည်းပါးသွားတာပေါ့။ ကျနော်တို့ စီးပွားရေး လုပ်လို့ ရတဲ့ ပိုက်ဆံထက် အနုပညာလုပ်လို့ရတဲ့ အနုပညာကြေးကို ပိုတန်ဖိုးထားတယ်။ ကားရိုက်လို့ရတဲ့ ပိုက်ဆံကို ပိုတန်ဖိုးထားတယ်” လို့ ကျော်ကြီးက ပြောပါတယ်။

ဇော်ဇော်နဲ့ ကျော်ကြီးတို့ သူငယ်ချင်းနှစ်ယောက်ကတော့ မြန်မာ ရုပ်ရှင်နဲ့ ဗီဒီယို ဇာတ်ကားပေါင်းများစွာမှာ ဇာတ်ပို့၊ ဇာတ်ရံ အနေနဲ့ ပါဝင် သရုပ်ဆောင်ကြသူတွေ ဖြစ်ပါတယ်။

You may also like these stories:

အသက် ၆၀ ပြည့်ရင် တရားအားထုတ်တော့မယ့် ဒါရိုက်တာ ကြည်ဖြူသျှင်

အောင်လအန်ဆန်း COVID-19 ရောဂါ ပျောက်ကင်းပြီ

“တန်ဖိုးကြီး အနုပညာသမားတွေ ဆုံးရှုံးရမှာ ကြောက်တယ်”လို့ ကျင်ဝှက် ပြော

The post ရိုက်ကူးရေးတွေ အမြန်ဆုံး ပြန်စစေချင်တဲ့ ဇာတ်ပို့ ဇော်ဇော်နဲ့ ကျော်ကြီး appeared first on ဧရာဝတီ.

K-pop ရဲ့ အရှိန်နှုန်းကို ရပ်တန့်နိုင်မယ့်အရာက မရှိသလောက်လို့ ဆိုရမလိုပါပဲ။ ကမ္ဘာတဝှမ်းမှာ COVID-19 ကပ်ရောဂါ ဖြစ်ပွားမှုကြောင့် နယ်လှည့် ဖျော်ဖြေပွဲတွေနဲ့ စတိတ်စင် တင်ဆက်မှုတွေကို ဖျက်သိမ်းထားရပေမယ့်လည်း အခုနှစ်ရဲ့ ပထမနှစ်ဝက် ကာလမှာ K-pop အယ်လ်ဘမ် အချပ်ရေ ၁၈ သန်းကျော် စံချိန်တင် ရောင်းချခဲ့ရတယ်လို့ သိရပါတယ်။

ကိုရီးယားဂီတ အကြောင်းအရာအသင်းရဲ့ Gaon Music Chart ရဲ့အဆိုအရ ၂၀၂၀ ပြည့်နှစ်ရဲ့ ပထမနှစ်ဝက်ကာလမှာ ထိပ်တန်း အယ်လ်ဘမ်ပေါင်း ၄၀၀ ရဲ့ ကော်ပီချပ်ရေ ၁၈ ဒဿမ ၀၈ သန်း ရောင်းချခဲ့ရပြီး ယခင်နှစ် အလားတူ ကာလကထက် ၄၀ ရာခိုင်နှုန်း မြင့်တက်လာခဲ့တယ်လို့ သိရပါတယ်။

ဒါဟာ ၂၀၁၀ ခုနှစ်မှာ အဲ့ဒီ Chart က အယ်လ်ဘမ် ရောင်းအားကို စတင် စာရင်းပြုစုခဲ့ပြီးနောက်ပိုင်း အမြင့်ဆုံးနှုန်းထားတခုလည်း ဖြစ်တယ်လို့ The Korea Herald မီဒီယာက ဆိုပါတယ်။ BTS ၊ Seventeen နဲ့ Twice အဖွဲ့တို့လို နာမည်ကျော်အဖွဲ့တွေနဲ့ တကိုယ်တော် အနုပညာရှင်တွေရဲ့ ထိပ်တန်း အယ်လ်ဘမ် ၁၀ ချပ်ဟာ စုစုပေါင်းရောင်းအား ကော်ပီချပ်ရေ ၁၀ သန်းကို ကျော်လွန်ခဲ့ပါတယ်။

BTS အဖွဲ့ရဲ့ “Map of the Soul: 7” အယ်လ်ဘမ်ဟာ ကော်ပီချပ်ရေ ၄ ဒဿမ ၂ သန်းကျော် ရောင်းချခဲ့ရပြီး ထပ်ဆုံးမှာ ရပ်တည်နေပါတယ်။ အမေရိကန်နိုင်ငံမှာ ရောင်းအားအကောင်းဆုံး ဖြစ်ခဲ့တဲ့ အဲ့ဒီအယ်လ်ဘမ်ဟာ ယူကေရဲ့ Official Chart နဲ့ ဂျပန်ရဲ့ Oricon Chart တွေမှာ ထိပ်ဆုံးရောက်ခဲ့ပါတယ်။

Seventeen အဖွဲ့ရဲ့ သတ္တမြောက် မီနီအယ်လ်ဘမ်ဖြစ်တဲ့ “Heng:garae” ဟာဆိုရင် ကော်ပီချပ်ရေ ၁ ဒဿမ ၂ သန်းကျော် ရောင်းချခဲ့ရပြီ ဒုတိယနေရာကနေ လိုက်ပါတယ်။ ဂျပန်နိုင်ငံမှာ အထူးအောင်မြင်ခဲ့တယ်လို့လည်း ဆိုပါတယ်။ ဂျပန်နိုင်ငံဟာ K-pop လောကအတွက် အဓိကဈေးကွက်ကြီးတခုဖြစ်နေဆဲဖြစ်ပြီး K-pop နဲ့ ပတ်သက်တဲ့ တင်ပို့ကုန်ရဲ့ ၆၀ ရာခိုင်နှုန်းကို နေရာယူထားတယ်လို့လည်း သိရပါတယ်။

အဖွဲ့တွေ လွှမ်းမိုးမှုရှိနေတဲ့ အဲ့ဒီစာရင်းမှာ ပါဝင်လာတာကတော့ တကိုယ်တော် လှုပ်ရှားနေတဲ့ EXO အဖွဲ့ဝင် Baekhyun ဖြစ်ပြီး သူ့ရဲ့ “Delight” အယ်လ်ဘမ်ဟာ ကော်ပီချပ်ရေ ၉ သိန်း ၇ သောင်းကျော် ရောင်းချခဲ့ရပါတယ်။ Gaon မှအကြီးတန်း သုတေသနပညာရှင် Kim Jin-woo ရဲ့အဆိုအရ နိုင်ငံရပ် ခြားဒေသတွေမှာ ခိုင်ခိုင်မာမာ ရှိနေတဲ့ K-pop ရဲ့ လှုပ်ရှားမှုတွေနဲ့ ကြီးမားတဲ့ နိုင်ငံတကာ ပရိသတ်အင်အားစုတွေကြောင့် အယ်လ်ဘမ် ရောင်းအားမြင့်ရတာဖြစ်တယ်လို့ သိရပါတယ်။

သူ့ရဲ့အဆိုအရ ကပ်ရောဂါကြောင့် ဖျော်ဖြေပွဲတွေနဲ့ ပရိသတ် တွေ့ဆုံပွဲတွေကို ဖျက်သိမ်းလိုက်ရခြင်းဟာ ပရိသတ်တွေအတွက် သူတို့ ချစ်ခင်နှစ်သက်ရာ အနုပညာရှင်တွေကို အားပေးဖို့ အယ်လ်ဘမ်ဝယ်တာကလွဲလို့ တခြားနည်းလမ်း မရှိတော့တာကြောင့် အယ်လ်ဘမ် ရောင်းအား မြင့်တက်မှုကို ဦးတည်စေခဲ့တာလို့ သိရပါတယ်။

Ref: straitstimes

You may also like these stories:

ကိုရီးယားအနုပညာရှင်တွေရဲ့ Tiktok အကောင့်တွေ ဖျက်ခံရ

The post ကိုဗစ်ကာလ ဖြစ်ပေမယ့် K-pop အယ်လ်ဘမ်များ စံချိန်တင်ရောင်းရ appeared first on ဧရာဝတီ.

မကြာသေးခင်တုန်းက အင်တာနက်အသုံးပြုသူတွေဟာ မင်းသား လီမင်ဟိုထံ နိုင်ဂျီးရီးယား အမျိုးသား တဦးက ပေးပို့တဲ့ ရယ်မောဖွယ် စာတစောင်အကြောင်း စိတ်ဝင်စားခဲ့ကြပါတယ်။

အဲ့ဒီ အမျိုးသားရဲ့ ချစ်သူက သူ့အပေါ် မသိကျိုးကျွံပြုရလောက်အောင် မင်းသား လီမင်ဟိုကို အရမ်းချစ်မြတ်နိုးတဲ့အတွက် အဲ့ဒီအမျိုးသားက စိတ်မကောင်းဖြစ်ရပြီး မင်းသားလီဟာ သူ့အတွက် ပြိုင်ဘက်တဦး ဖြစ်လာတာကြောင့် အခုလိုမျိုး သတိပေးတဲ့ စာကို ပို့လိုက်ရတာဖြစ်တယ်လို့ အဲ့ဒီစာထဲမှာ ဖော်ပြထားပါတယ်။

စာထဲမှာ အဲ့ဒီအမျိုးသားက မင်းသား လီကို ဝေဖန်ထားပြီး ပြင်းထန်တဲ့ သတိပေးချက် ထုတ်ထားပေမယ့် မင်းသားလိုမျိုး ဆွဲဆောင်မှုရှိတဲ့သူ ဖြစ်လာစေဖို့ မင်းသားသုံးနေတဲ့ ခေါင်းလျှော်ရည်အကြောင်း မေးမြန်းခဲ့တာကိုလည်း တွေ့ရပါတယ်။

“The King: Eternal Monarch” ဒရာမာ အောင်မြင်မှုနဲ့အတူ မင်းသား လီမင်ဟိုဟာ နိုင်ဂျီးရီးယားအမျိုးသမီးတွေ ချစ်ခင်နှစ်သက်ရတဲ့ သရုပ်ဆောင်တဦးဖြစ်လာခဲ့ပြီး နိုင်ဂျီးရီးယား အမျိုးသားတော်တော်များများကလည်း အလားတူစာတွေကို ရေးသားခဲ့ကြတယ်လို့ ဆိုပါတယ်။

အဲ့ဒီအိတ်ဖွင့်စာထဲမှာ “ချစ်ခင်ရတဲ့ အစ်ကိုရေ၊ ကျနော် ဒီစာကို နိုင်ဂျီရီးယား ချစ်သူကောင်လေးများ ကိုယ်စား ရေးလိုက်ရတာပါ။ ဖန်သားပြင်မှာ လီ ရဲ့ ပါဝင်မှုတခုတည်းက ကျနော်တို့ရဲ့ အချစ်ရေးမှာ နာကျင်မှုတွေ၊ ထိခိုက်မှုတွေ တော်တော်များများကို ဖြစ်ပေါ်စေခဲ့ပါတယ်။ ပြောရရင် ခင်ဗျားက ရက်အနည်းငယ်အတွင်းမှာ အချစ်ရေး ထောင်ပေါင်းပေါင်းများစွာကို သတ်ပစ်လိုက်ပါတယ်”

“ကျနော်တို့ရဲ့ ကောင်မလေးတွေက ကျနော်တိုရဲ့ ပုံတွေကို ပို့စ်တင်တာမျိုးတောင် မလုပ်တော့ဘူး။ သူတု့ိရဲ့ ပို့စ်တွေမှာ ခင်ဗျားရဲ့ ပုံတွေပဲ ဖြစ်နေတယ်။ တချို့ကဆိုရင် ခင်ဗျားကို သူတို့ရဲ့ လက်တွဲဖော်အဖြစ် ပုံစာရေးနေကြပြီ။ သူတို့ ကျနော်တို့ပုံတွေတင်တဲ့ တခုတည်းသောအချိန်က သူတို့အရေးပေါ်ကိစ္စ လိုအပ်မှပါ။ ကျနော် ဒီစာကို ရေးလိုက်ရတာက ကျနော် နာကျင်နေရပြီဆိုတာကို ပြောပြချင်လို့ပါ”

“ကျနော့် ကောင်မလေးက ပြီးခဲ့တဲ့ တနင်္လာနေ့ကစလို့ ခင်ဗျားရဲ့ပုံတွေကိုပဲ တင်နေပါတယ်။ ဒါနဲ့ ခင်ဗျား ဘယ်ဆပ်ပြာကို သုံးနေတာလဲ။ ခင်ဗျား သုံးနေတာကိုရော ကျနော်သုံးလို့ မရဘူးလား။ ကျနော်တို့ရဲ့ အချစ်ရေးကို ဖျက်ဆီးတာမျိုး မလုပ်ပါနဲ့တော့။ ကျနော်တို့ကို ချစ်သူကောင်လေး ခပ်ဆိုးဆိုးတွေဖြစ်အောင်မလုပ်ပါနဲ့တော့” လို့ ရေးသားထားပါတယ်။

မင်းသား လီမင်ဟိုဟာ နာမည်ကျော် ကိုရီးယား မင်းသားတဦးဖြစ်ပြီး အာရှမှာ သာမက တောင်အမေရိကနဲ့ အာဖရိကအထိ ကျော်ကြားသူလည်းဖြစ်ပါတယ်။ အာရှဒေသက ရုပ်ရည်လှပသူတွေဟာ အာဖရိကအကြိုက် မဟုတ်ပေမယ့် မင်းသားလီဟာ နိုင်ဂျီးရီးယားအပါအဝင် အာဖရိကနိုင်ငံတော်တော်များများမှာ လူကြိုက်အများဆုံး ကိုရီးယားစတားအဖြစ် ရပ်တည်နေဆဲ ဖြစ်ပါတယ်။

နိုင်ဂျီးရီးယား အမျိုးသမီးပရိသတ်တွေက မင်းသားလီကို “နိုင်ငံတော်ရဲ့ သားမက်” လို့ ခေါ်ကြပါတယ်။

Ref: kbizoom

You may also like these stories:

ကိုဗစ်ကာလ ဖြစ်ပေမယ့် K-pop အယ်လ်ဘမ်များ စံချိန်တင်ရောင်းရ

တရုတ်မှာ ရုပ်ရှင်ရုံတွေ တဖြည်းဖြည်းချင်း ပြန်ဖွင့်ပြီ

“Tenet” ရုပ်ရှင် ရုံတင်ရက်ကို အကန့်အသတ်မရှိ ရွှေ့ဆိုင်း

The post မင်းသား လီမင်ဟိုထံ နိုင်ဂျီးရီးယား အမျိုးသားတွေ အိတ်ဖွင့်စာ ရေးပို့ appeared first on ဧရာဝတီ.

ဘဝမှာ ဖြတ်သန်းခဲ့ရတဲ့ အခက်အခဲတွေကို စိတ်အားတင်ပြီး နေထိုင်နေတယ်လို့ တချိန်က ပရိသတ်တွေရဲ့ အချစ်တော် မင်းသမီး အကယ်ဒမီ ထက်ထက်မိုးဦးက မီဒီယာများကို ပြောပါတယ်။

“ကျန်းမာရေးကတော့ မကောင်းဘူး။ လက်လျှော့ချင်ပြီလားဆိုရင် ကိုယ့်ကိုယ်ကိုယ်တော့ လက်တော့လျှော့ချင်တာပေါ့။ ဒါပေမဲ့ လူက သေမှ မသေသေးတာ။ ဘဝက မသေမချင်းတော့ လူတိုင်းက ရုန်းကန်နေရဦးမှာပဲ။ လှုပ်ရှားနေရဦးမှာပဲ။ စိတ်ကို အားတင်းပြီးတော့ နေနေပါတယ်။ ဗိုက်ခွဲထားတာတော့ မသက်သာသေးဘူး။ အခုဒီ ၃ ၊ ၄ ရက်အတွင်းမှာ ပြန်ပြရဦးမှာ”

“ကောင်းကောင်း အနားမယူလို့ဆိုပြီးတော့ ဆရာမက ပြောတယ်။ ခွဲစိတ်ပြီးသွားရင် အနည်းဆုံး ၂လလောက်တော့ နားသင့်တယ်ပေါ့။ ကိုယ်က မနားဘဲနဲ့ ချက်ချင်း အလုပ်ထဲ ဝင်တယ်။ အတွင်းချုပ်ရိုးတွေက မကောင်းသေးဘူး” လို့ ထက်ထက်မိုးဦးက ပြောပါတယ်။

မင်းသမီးတွေ အများကြီးထဲမှာမှ သူ့ကျမှ ဝေဒနာမျိုးစုံ ခံစားရတာကြောင့် လူ့ဘဝကြီးကို ဆက်မလျှောက်ချင်တော့ဘဲ စိတ်ဓာတ်တွေကျရတယ်လို့ ဆိုပါတယ်။

“တခါတလေကျရင်လေ ကိုယ့်ကျမှလာပြီး ဖြစ်ရလေသလားပေါ့။ မင်းသမီးတွေလည်း အများကြီးပဲ။ ကိုယ့်လို နှလုံးခွဲရတယ်ဆိုတာ မရှိဘူး။ လည်ပင်းကို ခွဲလိုက်ရတယ်ဆိုတာ မရှိဘူး။ ဗိုက်ကို အကြိမ်ကြိမ် ခွဲလိုက်ရတယ်ဆိုတာ မရှိဘူး။ ငါ့ကျမှ ဖြစ်တာပဲလားပေါ့နော်။ တခါတလေကျရင် လူ့ဘဝကြီးမှာ ဆက်ပြီးတော့ မလျှောက်ချင်တော့ဘူး”

“ဒီပိုက်ဆံတခုတည်းပဲ ခက်ခဲတာ မဟုတ်ပါဘူး။ ခက်ခဲတာတွေက အများကြီးပဲ။ ကိုယ်ဘယ်လောက်ကောင်းအောင်နေနေ၊ ကိုယ်ဘယ်လောက်ပဲ ဘာကြီးပဲ ပေးဆပ်ပေးဆပ် ဘယ်သူမှ အသိအမှတ် မပြုဘူး။ အကောင်း မမြင်ဘူး။ ဝမ်းနည်းတာပေါ့။ စိတ်ဓာတ်လည်း ကျတယ်” လို့ ထက်ထက်မိုးဦးက ပြောပါတယ်။

ဆက်လက်ပြီး “ငယ်တုန်းကတော့ မိဘနဲ့ အတူ မနေရဘူး။ ဟိုလူ့နားပြေးကပ်နေ ဒီလူ့နားပြေးကပ်နေနဲ့ အဖေ့ကိုလည်း စိတ်မကောင်းဘူး။ ငယ်ငယ်တုန်းကတော့ ပစ်ထားပြီးတော့ အခုကျတော့မှ ကိုယ်တယောက်တည်း ခါးစည်းပြီး ခံရတယ်။ စိတ်မကောင်းဘူး။ ဒါပေမဲ့ မိဘနဲ့သားသမီးပဲ။ သားသမီးကတော့ မိဘကျေးဇူးကို ဆပ်ရမှာပဲ။ အကောင်းဆုံးတော့ ဆပ်သွားမယ်။ အဖေဖြစ်ရင် ဘာပဲဖြစ်ဖြစ် လုပ်ပေးသွားမယ်” လို့ ထက်ထက်မိုးဦးက ပြောပါတယ်။

ထက်ထက်မိုးဦးကိုတော့ သူတချိန်ကရိုက်ကူးခဲ့ပြီး အောင်မြင်ခဲ့တဲ့ Ve Ve အချိုရည်မှ ၂၃ နှစ် ကြာတဲ့အထိ ယနေ့တိုင် ထုတ်လွှင့်နေဆဲဖြစ်တာကြောင့် ထပ်ဆင့် အနုပညာကြေး သိန်း ၁၀၀ ကို ပေးခဲ့ပါတယ်။

“ရှင်းရှင်းပြောရရင် တသက်လုံး ကိုယ့်ဘဝမှာ ပိုက်ဆံကို ဘယ်သူမှ ကိုယ့်ကို အလကားပေးတယ် ကြည့်ခဲ့ပေးတယ်ဆိုတာ မရှိဘူး။ ကိုယ့်ဘာသာကိုယ် ရုန်းကန်ခဲ့ရတာပဲလေ။ အခုလိုမျိုး အရမ်းခက်ခဲနေတဲ့အချိန်မှာ ဒီလိုမျိုး အလုပ်တူတူ တွဲလုပ်ဖူးတဲ့သူတွေက သတိတရနဲ့ ကူညီပေးတယ်ဆိုတော့ ကျေးဇူးအများကြီး တင်ပါတယ်” လို့ ထက်ထက်မိုးဦးက ပြောပါတယ်။

ဖခင်ဖြစ်သူကျန်းမာရေးကြောင့် အခက်အခဲဖြစ်နေတဲ့အချိန်မှာ အခုလိုပြန်ကြည့်ပေးတဲ့အတွက် ကျေးဇူးတင်ရှိပြီး အဆိုပါ ငွေကြေးပေးတာနဲ့ ပတ်သက်ပြီးတော့လည်း အထင်လွဲမှားမှုတချို့ ရှိခဲ့ပါတယ်။

“ဘဝမှာဖြတ်သန်းခဲ့ရတဲ့ အခက်အခဲတွေလည်း အများကြီးပေါ့နော်။ ဒါပေမဲ့ အခုလို အခက်အခဲဖြစ်နေတဲ့အချိန်မှာ ဘယ်လိုမှ ထင်မထားဘူး။ အလုပ်အတူ တွဲလုပ်ခဲ့တဲ့ Ve Ve ကုမ္ပဏီက ထက်ထက်အတွက် အများကြီး အခုလိုမျိုး ကြည့်ပေးတဲ့အတွက် ကျေးဇူးတင်ပါတယ်။ ပြောမပြတတ်အောင် ဝမ်းသာပါတယ်။ ပြန်ပြီးတော့မှလည်း မေတ္တာပို့ပေးပါတယ်။ ဆုတောင်းပေးပါတယ်” လို့ ထက်ထက်မိုးဦးက ဆိုပါတယ်။

အကယ်ဒမီ ထက်ထက်မိုးဦးကတော့ လက်ရှိမှာ ကိုယ်တိုင်လည်း ခွဲစိတ်မှုများ ပြုလုပ်ထားမှုကြောင့် ကျန်းမာရေးမကောင်းဘဲ ဖခင်ဖြစ်သူရဲ့ ကျန်းမာရေးကြောင့်လည်း ကိုယ်တိုင်အနီးကပ်ပြုစုစောင့်ရှောက်လျက် ရှိပါတယ်။

You may also like these stories:

ဖခင်ရဲ့အသက် အချိန်မီ ကယ်နိုင်ဖို့ ကြိုးစားခွင့်ရခဲ့တဲ့ ထက်ထက်မိုးဦး

အနုပညာနဲ့ပတ်သက်ရင် မာနထားတဲ့အကြောင်း ပြောပြတဲ့ ထက်ထက်မိုးဦး

“အသက်ကြီးလာတော့ ကိုယ့်ထက်ငယ်တဲ့ သူတွေကို နေရာဖယ်ပေးရတယ်”လို့ ထက်ထက်မိုးဦး ပြော

The post စိတ်အားတင်းပြီး ဘဝကို နေထိုင်နေတဲ့ ထက်ထက်မိုးဦး appeared first on ဧရာဝတီ.

မန္တလေးမှာ မူးယစ်ဆေးဝါးများနဲ့အတူ ဖမ်းဆီးရမိခဲ့ပြီး ထောင်ဒဏ် ၁၁ နှစ် ကျခံနေရတဲ့ အဆိုတော်ရသအား မြင်းခြံထောင်သို့ ပြောင်းရွှေ့လိုက်တယ်လို့ သိရပါတယ်။

“ကျနော်တို့ သူငယ်ချင်းတွေထဲမှာ သည်းခံအတတ်ဆုံး၊ စိတ်ထားကောင်းတဲ့ ရသကို မှတ်မိကြသေးလား။ မူးယစ်ဆေးဝါး ပြစ်ဒဏ်ပေးခံရတယ်။ စိတ်မကောင်းဘူး။ အခု ဒီထက် ပိုကြေကွဲစရာက ၂၀၀၀ ခုနှစ်က ရသက အဆင်ပြေပါတယ်။ အခု အဆင်မပြေဘူး။ အဖေ၊ အမေတွေကလည်း အသက်အရွယ်တွေ ရနေကြတော့ ထောင်ဝင်စာ သွားမတွေ့နိုင်ဘူး”

“ပိုက်ဆံလေးပဲလွှဲပြီး နီးစပ်ရာနဲ့ ထောင်ဝင်စာ ပို့ပေးရတာ။ တလတခါ ထောင်ဝင်စာအတွက် ကျနော်လစဉ် တတ်နိုင်သလောက် ကူဖို့ တာဝန်ယူခဲ့ပါတယ်” လို့ ယုန်လေးက ပြောပါတယ်။

ဒီလိုအဆင်မပြေတဲ့ကြားထဲမှာပဲ ယခင်ကျခံနေရတဲ့ မန္တလေးအိုးဘိုထောင်ကနေ မြင်းခြံထောင်ကို ပြောင်းရွှေ့ခဲ့ရတာကြောင့် အဆင်မပြေမှုတွေ ဖြစ်နေတယ်လို့ သိရပါတယ်။

“ထောင်ဝင်စာ မလာတဲ့သူဆို ဘယ်လောက် မျက်နှာငယ်၊ ဘယ်လောက် ဖိနှိပ်ခံရတယ်ဆိုတာ ထောင်ကျဖူးတဲ့လူတိုင်း သိပါတယ်။ အိုးဘိုထောင်က ထောင်ပိုင်ကြီးကတော့ ကောင်းပါတယ်။ အခုအဆင်မပြေတဲ့ သောကတွေကြားထဲက ဒုထောင်ပိုင်ရဲ့ လုပ်ရက်ချက်၊ အထာ မထားချက်။ မနက်မှတောင် မဟုတ်ဘူး။ ညတွင်းချင်း ထောင်ပြောင်း ထည့်လိုက်တယ်။ မြင်းခြံထောင်တဲ့”

“တခြားသူတွေတောင် မနက်မှ အေးအေးဆေးဆေး ပြင်ဆင်ပြီး ပြောင်းရတာပါ။ မြင်းခြံထောင်ကြောင့် ဘာကြောင့် မဟုတ်ဘူး။ နေသားကျတဲ့ တနေရာက နောက်တနေရာ ထပ်ရွှေ့တဲ့အခါ အဆင်မပြေမှုတွေ အများကြီး ရှိပါတယ်”လို့ ယုန်လေးက ပြောပါတယ်။

ရသရဲ့ မိဘတွေက သောကရောက်ပြီး ယုန်လေးထံ ဖုန်းဆက်ကာ ရင်ဖွင့်ခဲ့တာကြောင့် စိတ်မကောင်းဖြစ်ခဲ့ရပြီး သူငယ်ချင်းဖြစ်သူ ရသကို မြင်းခြံထောင်ပိုင်ကြီးမှ စောင့်ရှောက်ပေးဖို့အတွက်လည်း တောင်းဆိုထားပါတယ်။

အယူခံတွေ မလိုက်နိုင်တဲ့အတွက်ကြောင့်လည်း လွတ်ငြိမ်းချမ်းသာ အတွက် မပါခဲ့ဘဲ အထဲမှာ အနေအစားလည်း ကျပ်တည်းခဲ့ရပြီး အကူအညီ လိုအပ်နေတဲ့အတွက်ကြောင့် ရသရဲ့သီချင်းကောင်းများကို ယူသုံးပေးကြဖို့နဲ့ ယူသုံးမယ်ဆိုရင်လည်း ရသရဲ့မိဘများနဲ့ ဆက်သွယ်ပေးမယ်လို့ ယုန်လေးက ဆိုထားပါတယ်။

“ကျနော်တို့ သူငယ်ချင်း ရသအတွက် ကျနော်တို့တွေ တတ်နိုင်သလောက် ဝိုင်းကူကြရအောင်။ အယူခံတွေလည်း မလိုက်နိုင်လို့ နိုင်ငံတော်လည်း မပါခဲ့ပါဘူး။ အထဲမှာ အနေအစားလည်း ကျပ်တည်းခဲ့ပါတယ်။ ကူညီမယ့် အနုပညာ ညီအစ်ကိုမောင်နှမများ ဆက်သွယ်ပေးပါ”

“တကယ်ကြီးကို အကူအညီ လိုနေတာပါ။ ရသ သီချင်းကောင်းတွေ အများကြီးပါ။ ယူသုံးပေးကြပါ။ ယူဆိုပေးကြပါ။ ရသ အမေနဲ့ ဆက်သွယ်ပေးပါ့မယ်။ ဒါလည်း ကူညီရာရောက်ပါတယ်”လို့ ယုန်လေးက ပြောထားပါတယ်။

အဆိုတော် ရသ (ခေါ်) ရဲမင်းသိန်း အပါအဝင် ၃ ဦးကိုတော့ ၂၀၁၈ ခုနှစ်၊ သြဂုတ်၁၄ ရက်နေ့က မန္တလေးမြို့ ချမ်းမြသာစည်မြို့နယ်အတွင်းရှိ အအေးခန်းဧည့်ရိပ်မွန်တခုမှာ WY လိမ္မော်ရောင် စိတ်ကြွဆေးပြား ၁၆၀၀ ပြားကျော်နှင့် မူးယစ်ဆေးဝါးသုံးစွဲရာမှာ အသုံးပြုတဲ့ ဆက်စပ်ပစ္စည်းများနဲ့အတူ ဖမ်းဆီးရမိခဲ့ပြီး မယ ၁၁/၂၀၁၈ ၊ ၁၉(က) ဖြင့် ၃ လကျော်ကြာ တရားရင်ဆိုင်ခဲ့ပြီး အလုပ်နဲ့ ထောင်ဒဏ် ၁၁ နှစ် ကျခံနေရတာပဲ ဖြစ်ပါတယ်။

You may also like these stories:

စိတ်အားတင်းပြီး ဘဝကို နေထိုင်နေတဲ့ ထက်ထက်မိုးဦး

ရိုက်ကူးရေးတွေ အမြန်ဆုံး ပြန်စစေချင်တဲ့ ဇာတ်ပို့ ဇော်ဇော်နဲ့ ကျော်ကြီး

ဈေးရောင်းတာထက် အနုပညာအလုပ်ကို ပိုလုပ်ချင်တဲ့ စည်သူ (ပလပ်ကျွတ်)

The post အဆိုတော် ရသအား မြင်းခြံအကျဉ်းထောင်သို့ ပြောင်းရွှေ့ခံရ appeared first on ဧရာဝတီ.

COVID-19 ကပ်ရောဂါ ကာလအတွင်း ပရိသတ်တွေကို ဆွဲဆောင်ရာမှာ ကူညီဖို့ လုပ်ဆောင်နေတဲ့ ရုပ်ရှင် လုပ်ငန်းရှင်တွေအတွက် ထိုးနှက်ချက်တခုအဖြစ် Walt Disney ကုမ္ပဏီဟာ သူတို့ရဲ့ “Mulan” ရုပ်ရှင် ဖြန့်ချိ ပြသမယ့်ရက်ကို ရွှေ့ဆိုင်းလိုက်ကြောင်း သိရပါတယ်။

“Mulan” ရုပ်ရှင်ကို ပြီးခဲ့တဲ့ မတ်လမှာ ရုံတင်ပြဖို့ စီစဉ်ခဲ့တာ ဖြစ်ပေမယ့် ရုပ်ရှင်ရုံ တော်တော်များများက ဆက်လက် ပိတ်ထားရဆဲဖြစ်တာကြောင့် ပြသမယ့်ရက်ကို အကြိမ်တော်တော်များများ ရွှေ့ဆိုင်းခဲ့ရပြီးလည်း ဖြစ်ပါတယ်။

နောက်ဆုံးအနေနဲ့ အဲ့ဒီရုပ်ရှင်ကို သြဂုတ်လ ၂၁ ရက်နေ့မှာ ရုံတင်ပြသဖို့ စီစဉ်ထားတာကြောင့် ရုပ်ရှင်ရုံ လုပ်ငန်းရှင်တွေအနေနဲ့ ရုပ်ရှင်ချစ် ပရိသတ်တွေအတွက် နွေရာသီ နှောင်းပိုင်းကာလမှာ လူကြည့်နှုန်း များလိမ့်မယ်လို့ မျှော်လင့်ခဲ့ကြတာ ဖြစ်ပါတယ်။

COVID – 19 ကြောင့် ထုတ်လုပ်ရေးလုပ်ငန်းတွေ ရပ်ဆိုင်းခဲ့ရလို့ Avatar နဲ့ Star Wars ရုပ်ရှင်အသစ်တွေကိုလည်း တနှစ် နောက်ဆုတ်ပြီး ပြသမှာဖြစ်တယ်လို့ Disney က ဆိုပါတယ်။ Avatar နောက်ဆက်တွဲ ရုပ်ရှင်အသစ်ကိုတော့ လာမယ့် ၂၀၂၂ ခုနှစ်၊ ဒီဇင်ဘာလနဲ့ Star Wars ရုပ်ရှင်အသစ်ကို ၂၀၂၃ ခုနှစ်၊ ဒီဇင်ဘာလရောက်မှသာ ပြသတော့မှာ ဖြစ်ပါတယ်။

Disney ရဲ့ ကိုယ်စားလှယ်တဦးက “ဒီလိုကမ္ဘာလုံးဆိုင်ရာ ကျန်းမာရေး အကျပ်အတည်းကာလမှာ ကျနော်တို့ ရုပ်ရှင်တွေကို ဘယ်လို ဖြန့်ချိမယ်ဆိုတာ ကံသေကံမ ပြောလို့ မရဘူးဆိုတာ ရှင်းလင်းလာပါတယ်။ ဒီနေ့မှာတော့ ကမ္ဘာတဝန်းမှာရှိတဲ့ ပရိသတ်တွေအတွက် Mulan ရုပ်ရှင်ကို အကျိုးရှိစွာ ဆောင်ယူလာနိုင်ဖို့ ကျနော်တို့ လုပ်ဆောင်နေချိန်မှာပဲ အဲ့ဒီရုပ်ရှင်ပြသမယ့် အစီအစဉ်ကို ရပ်ဆိုင်းလိုက်ရပါတယ်” လို့ ပြောကြားခဲ့ပါတယ်။

လာမယ့် သြဂုတ်လထဲမှာ ပြသဖို့ရှိတဲ့ Christopher Nolan ရဲ့ “Tenet” ရုပ်ရှင်ကို ရွှေ့ဆိုင်းဖို့ Warner Bros က ဆုံးဖြတ်ချက်ချပြီးတဲ့နောက်ပိုင်း “Mulan” ရုပ်ရှင် နောက်ဆုတ်တဲ့သတင်း ထွက်လာတာလည်း ဖြစ်ပါတယ်။ ပထမကတော့ အဲ့ဒီရုပ်ရှင် ၂ ကားလုံးဟာ လူအဝင်များတဲ့ နွေရာသီကာလမှာ ရုပ်ရှင်ရုံတွေအတွက် အကောင်းအဆုံး အခွင့်အလမ်း ဖြစ်လာမယ်လို့ မျှော်လင့်ထားကြတာလည်း ဖြစ်ပါတယ်။

အမေရိကန်နိုင်ငံမှာတော့ AMC နဲ့ Cineworld တို့လို ရုပ်ရှင်လုပ်ငန်းတွေက သူတို့ရဲ့ ရုပ်ရှင်ရုံတွေ ပြန်ဖွင့်မယ့်ရက်ကို ဇူလိုင်လကုန်ပိုင်းကနေ သြဂုတ်လလယ်ပိုင်းအထိ ရွှေ့ဆိုင်းထားခဲ့ပါတယ်။

ရုပ်ရှင်သမိုင်းမှာ ဒုတိယဝင်ငွေ အကောင်းဆုံးရုပ်ရှင်ဖြစ်တဲ့ ဒါရိုက်တာ James Cameron ရဲ့ Avatar ရဲ့ နောက်ဆက်တွဲ ရုပ်ရှင်ဟာ COVID- 19 မဖြစ်ခင်ကတည်းက အကြိမ်ပေါင်းများစွာ ရွှေ့ဆိုင်းခဲ့ရပြီးလည်း ဖြစ်ပါတယ်။ အဲ့ဒီနောက်ဆက်တွဲ ရုပ်ရှင်အသစ်ကို ၂၀၁၄ ခုနှစ်မှာကတည်းက ရုံတင်ပြသနိုင်ဖို့ စီစဉ်ခဲ့တာလည်း ဖြစ်ပါတယ်။

Star Wars ရုပ်ရှင်အသစ်နဲ့ ပတ်သက်တဲ့ အသေးစိတ် အချက်အလက်တွေကိုတော့ Disney က မထုတ်ပြန်သေးပါဘူး။

Ref: asiaone

You may also like these stories:

ကိုရိုနာဗိုင်းရပ်စ် ဂယက်ကြောင့် ရုပ်ရှင်ကားတွေ ပြသမယ့်ရက် ရွှေ့ဆိုင်း

“Mulan” ရုပ်ရှင်မှာ စတန့်ပြကွက်တွေကို ကိုယ်တိုင်သရုပ်ဆောင်ခဲ့တဲ့ မင်းသမီး Liu Yifei

The post “Mulan” ရုပ်ရှင် ပြသမယ့်ရက် အကန့်အသတ်မရှိ ရွှေ့ဆိုင်း appeared first on ဧရာဝတီ.

အဆိုတော် Kanye West က သူဟာ ရုပ်သံအစီအစဉ်စတား Kim Kardashian ကို ကွာရှင်းဖို့ ကြိုးစားနေတဲ့အကြောင်း ဇူလိုင်လ ၂၂ ရက်နေ့တုန်းက Twitter မှာ တင်ခဲ့ပေမယ့် မိနစ်ပိုင်းအကြာမှာပဲ အဲ့ဒီပို့စ်ကို ဖျက်ပစ်ခဲ့ပါတယ်။

သူက “အကျဉ်းထောင် ပြုပြင်ပြောင်းလဲရေးအတွက် Warldolf မှာ Meek နဲ့ Kim တို့ ဆုံခဲ့ကြချိန်ကတည်းက ကျနော် ကွာရှင်းဖို့ ကြိုးစားနေခဲ့တာပါ” လို့ ရေးသားခဲ့တာဖြစ်ပြီး ဘာကြောင့်ဆိုတာကိုတော့ အသေးစိတ် ရေးခဲ့တာ မရှိပါဘူး။

ရုပ်သံစတား Kim ရဲ့ ကိုယ်စားလှယ်ကတော့ တခုခု တုံ့ပြန်ပြောဆိုတာမျိုး မရှိသေးပါဘူး။ ပြီးခဲ့တဲ့ ဇူလိုင်လ ၂၀ ရက်နေ့ တုန်းကတော့ အဆိုတော် West ဟာ Twitter မှာ ပို့စ်တွေ တော်တော်များများကို တင်ခဲ့ပြီး ပြန်ဖျက်ပစ်ခဲ့ပါတယ်။ အဲ့ဒီပို့စ်တွေထဲမှာ သူ့ရဲ့ဇနီး Kim ဟာ ဆေးကုသရေးအခန်းထဲမှာ သူ့ကို သော့ခတ်ထားဖို့ ကြိုးစားခဲ့ပြီး သူဟာ Nelson Mandela နဲ့ အသွင်တူနေတဲ့အကြောင်း နှိုင်းယှဉ်ပြောကြားခဲ့ပါတယ်။

အဆိုတော် West ဟာ တောင်ကာရိုလိုင်းနားပြည်နယ်၊ Charleston မြို့က လူထုစုရုံးပွဲမှာ သူ့ရဲ့ အမေရိကန် သမ္မတဖြစ်ရေး ကမ်ပိန်းကို စတင်ခဲ့ပြီး တရက်အကြာမှာပဲ အခုလိုဖြစ်ရပ်တွေ ဆက်တိုက်ဖြစ်ပေါ်လာခဲ့တာပါ။ အဲ့ဒီပွဲမှာသူဟာ ကိုယ်ဝန် မဖျက်ချရေးအတွက် ဇနီး Kim နဲ့ရရှိခဲ့တဲ့ ဆုံးဖြတ်ချက်အကြောင်း ညွှန်းဆိုပြောကြားခဲ့ပါတယ်။

အဲ့ဒီအချိန်တုန်းကလည်း Kim ရဲ့ ကိုယ်စားလှယ်က မှတ်ချက်ပေးပြောဆိုဖို့ တောင်းဆိုမှုကို တုံ့ပြန်ခဲ့တာမျိုး မရှိခဲ့ပါဘူး။ သမ္မတ ဒေါ်နယ်ထရမ့်ကို ထောက်ခံသူ၊ အသက် ၄၃ နှစ်အရွယ် အဆိုတော် Kanye West က သူ့ရဲ့ သမ္မတဖြစ်ရေး ကမ်ပိန်းဟာ အမှန်တကယ် အားသွန်ခွန်စိုက် လုပ်ဆောင်တာလား၊ သူ့ရဲ့အယ်လ်ဘမ်နဲ့ ထုတ်ကုန်ပစ္စည်းတွေ ရောင်းချရရေး အတွက် လူပြိန်းကြိုက် စတန့်ပြတာလားဆိုတဲ့ မေးခွန်းကိုတော့ ဖြေကြားခဲ့တာမျိုး မရှိခဲ့ပါဘူး။

အဆိုတော် West ဟာ Kim နဲ့ ၂၀၁၄ ခုနှစ်မှာ လက်ထပ်ခဲ့တာဖြစ်ပြီး လောလောဆယ်အထိ အငှားကိုယ်ဝန်နဲ့ ရရှိခဲ့တဲ့ ကလေးတဦးအပါအဝင် သားသမီး ၄ ဦး ထွန်းကားခဲ့ပြီး ဖြစ်ပါတယ်။ သူတို့နှစ်ဦးလုံးရဲ့ နာမည်ကျော်ကြားမှု အခြေအနေနဲ့ လုပ်ငန်းတွေကြောင့် လူအများကြားမှာ စိတ်ဝင်စားခြင်းခံခဲ့ရပြီး အဲ့ဒီအခြေအနေဟာ နာမည်ကျော် မိသားစုတစုရဲ့ မိုးသက်မုန်တိုင်းသာဖြစ်တယ်လို့ နယူးယောက်တိုင်းမ် သတင်းစာကို ပြောဆိုခဲ့ဖူးပါတယ်။

Ref: thejakartapost

You may also like these stories:

အမေရိကန်သမ္မတ ရွေးကောက်ပွဲဝင်မယ်လို့ Kanye West ပြော

Kim Kardashian မွေးနေ့အတွက် ပရဟိတအဖွဲ့တွေကို ဒေါ်လာ ၁ သန်း လှူဒါန်းခဲ့တဲ့ Kanye West

“Mulan” ရုပ်ရှင် ပြသမယ့်ရက် အကန့်အသတ်မရှိ ရွှေ့ဆိုင်း

The post Kim Kardashian ကို ကွာရှင်းဖို့ ကြိုးစားနေကြောင်း Kanye West ပြော appeared first on ဧရာဝတီ.

သရုပ်ဆောင် ဝေဠုကျော်အား ကာမလိမ်လည်မှုဖြင့် တရားစွဲဆိုထားတဲ့ အလှမယ် သင်းသင်းကတော့ အခုအချိန်မှာ သူမကို လူမှုကွန်ရက် စာမျက်နှာပေါ်မှာ အကောင့်တုများနဲ့ တိုက်ခိုက်နေကြပြီး အသက်အန္တရာယ်တောင် စိုးရိမ်နေရတယ်လို့ ပြောပါတယ်။

“ပြီးခဲ့တဲ့ အပတ်ကဟာကို လျှောက်လွှဲချက် ယူတာ။ ကျမ မသိတဲ့ ကိစ္စတခုကို မသိရင် မသိဘူးပြောမှာပဲ။ အဖြေကလည်း ရှင်းနေပါတယ်။ အခုလောလောဆယ်မှာတော့ ကိုယ့်ကိုယ်ကိုယ် ဂရုစိုက်နေရတယ်။ လိုင်းပေါ်မှာ အကောင့်အတုတွေနဲ့ မိန်းမလို မိန်းမရစိတ်နဲ့ ဘာမှမသိဘဲ တိုက်ခိုက်နေတာတွေကြောင့် သတင်းက အကုန်ပျံ့နှံ့နေတယ်ဆိုတော့ ကျမက ဘာမှမပြောဘူး” လို့ သင်းသင်းက ပြောပါတယ်။

ဆက်လက်ပြီး “ပြီးခဲ့တဲ့တပတ်က အဲဒါနဲ့ ပတ်သက်ပြီး သူတို့ဘက်က ပြောထားတယ်။ ကျမကလည်းအဖြေကို အတိအကျ ယူပြီးသွားပြီ။ အခုလောလောဆယ်တော့ ကိုယ့်နောက်က ထပ်ကြပ်မကွာ လိုက်နေတာ ဘယ်သူဘယ်ဝါရယ်လို့တော့ အတိအကျ မပြောတော့ဘူး။ ကိုယ့်ကိုယ်ကိုယ်တောင် အသက်အန္တရာယ် အရမ်းစိုးရိမ်နေရတယ်။ ဘယ်သူဘယ်ဝါရယ်လို့ စွပ်စွဲလို့မရပါဘူး။ ဘယ်သူမှန်းကို ကိုယ်မသိနေတာ”လို့ ပြောပါတယ်။

ပြီးခဲ့တဲ့ တပတ်ရုံးချိန်းမှာတော့ ဝေဠုကျော်ဘက်မှ ရှေ့နေဖြစ်သူက သင်းသင်းအား ဒုတိယအကြိမ်မြောက် အပြန်အလှန် စစ်မေးမှုပြုလုပ်ခဲ့ပြီး မမှန်မကန် ထွက်ဆိုမှုဖြင့် အရေးယူရန်အတွက် ရုံးတော်ကိုလျှောက်ထားခဲ့တယ်လို့ သိရပါတယ်။

သင်းသင်းကိုတော့ ယခင်က အခု သရုပ်ဆောင် ဝေဠုကျော်အား တရားစွဲသလို အမှုတခုမှာ အနိုင်ရခဲ့ဖူးပြီး လျော်ကြေး ရယူခဲ့ဖူးတယ်ဆိုတဲ့ သတင်းစကားများ ပျံ့နှံ့ခဲ့ပြီး အဆိုပါ အကြောင်းအရာများမှာ မဟုတ်မှန်ကြောင်းကိုလည်း အခုလိုပဲ ပြောခဲ့ပါတယ်။

“ဘာမှ မစိုးရိမ်ပါနဲ့လို့။ သင်းကတော့ အမှန်တရားတခုကို သွားတယ်။ အချိန်တန်ရင် အမှန်တရားဆိုတာ ပေါ်လာမှာပါပဲ။ အမှန်တရားဆိုတာ ဖုံးကွယ်လို့မရပါဘူး။ ဒါပေမယ့် တခုပြောချင်တာက အတိတ်ဆိုတာ လူတိုင်းမှာရှိတယ်။ ဖော်ပြလို့ မရတဲ့အတိတ်ရှိသလို တခုရှိတာက ပိုက်ဆံ သိန်း ၃၀ ဆိုတာကြီးကို ကိုယ်ဘာမှမသိရဘဲနဲ့ ဘာမှမလုပ်ဘဲနဲ့ တဖက်စောင်းနင်းလိုင်းပေါ်မှာ ပျံ့နှံ့သွားတာတွေကို ပြန်ဖြေရှင်းနိုင်ခဲ့ပါပြီ။ ကျမ မှန်တယ်။ ကျမဘက်မှာ ယူထားတာ မရှိဘူး” လို့ သင်းသင်းက ပြောပါတယ်။

အဆိုပါကိစ္စရပ်များမှာလည်း လွန်ခဲ့တဲ့နှစ်များစွာက ဖြစ်ခဲ့တာတွေဖြစ်ပြီး ဖုံးကွယ်ခဲ့တာလည်း မဟုတ်ဘူးလို့ သိရပါတယ်။

“ကျမ ရွာကိုပြန်တယ်ဆိုတာက ရွာသစ်ကလေးရွာကို မဝင်ခဲ့ပါဘူး။ ကားနဲ့ပဲ ဖြတ်သွားခဲ့တာ။ ဘာလို့ မဝင်ခဲ့လဲဆိုရင် ကျမဦးလေးကို တခြားရွာမှာခေါ်ပြီးတော့ ကိုယ်မသိတဲ့ကိစ္စတခုကို မေးတယ်။ အဲဒါကြောင့် ဖြေရှင်းချက် မထုတ်ခဲ့တာ။ ကိုယ့်ဘက်က မသိလို့ မသိဘူးပဲ ဖြေခဲ့တာ။ အခုဖြစ်နေတာ ဝေဠုကျော်နဲ့ ဖြစ်နေတာ။ ဟိုကိစ္စက လွန်ခဲ့တဲ့ ၇ နှစ် ၈ နှစ်က ကိစ္စ။ ကိုယ့်ကိုယ်ကိုယ်တောင် မသိဘူး။ ဖုံးကွယ်ခဲ့တာလည်း မဟုတ်ဘူး” လို့ သင်းသင်းက ပြောပါတယ်။

ပြီးခဲ့တဲ့ကိစ္စရပ်တွေကိုလည်း သူမအတွက် အတိတ်ဆိုး အရိပ်ဆိုးလို့ မတွေးမိဘဲ နစ်နာတဲ့အတွက် ပြုလုပ်ခဲ့တာ ဖြစ်တယ်လို့ ဆိုပါတယ်။

“အရင်တုန်းကဆို ပြောတယ်။ ဝေဠုကျော်မို့ တရားစွဲတာလို့ ပြောတယ်။ သင်းက သိစေချင်တာ မိန်းကလေးတယောက်မှာ နစ်နာမှုရှိတာ ကိုယ့်ကိုယ်ကိုယ် အသိဆုံးပဲ။ အဲဒါဆို ဝေဠုကျော်မို့ တရားစွဲခဲ့တာ မဟုတ်ဘူး။ လွန်ခဲ့တဲ့ ၈ နှစ်၊ ၉ နှစ်၊ ၁၀ နှစ်က စွဲခဲ့တဲ့ အမှုက အခုလိုခေတ် မဟုတ်သေးဘူး”

“ အဲ့လိုဆို ဘယ်လိုပြောကြမလဲ ကိုယ်မတရားလို့ ကိုယ်မခံရတာ။ အတိတ်ဆိုးအရိပ်ဆိုးလို့ ပြောကြတယ်။ အမည်းစက်လို့ ပြောတယ်။ သင်းက ကိုယ့်ကိုယ်ကိုယ် မတွေးထားဘူး။ ဘယ်တော့မှလည်း တွေးမှာ မဟုတ်ဘူး။ ကိုယ်နစ်နာလို့ ကိုယ်လုပ်တာ” လို့ သင်းသင်းက ပြောပါတယ်။

အဆိုပါအကြောင်းအရာများကိုတော့ သင်းသင်းက ဒီကနေ့ ဇူလိုင်လ ၂၄ ရက်နေ့ သင်္ဃန်းကျွန်းမြို့နယ်တရားရုံးမှာ ပြုလုပ်ခဲ့တဲ့ရုံးချိန်းမှာ ပြောခဲ့တာပဲ ဖြစ်ပါတယ်။

သရုပ်ဆောင် ဝေဠုကျော်အား တရားလိုဖြစ်သူ သင်းသင်းမှ၂၀၁၉ ခုနှစ်၊ ဇန်နဝါရီလ ၈ ရက်နေ့က ရန်ကုန်မြို့၊ သင်္ဃန်းကျွန်းမြို့နယ် တရားရုံးမှာ စတင် တရားစွဲဆိုခဲ့တာဖြစ်ပြီး ဝေဠုကျော်အနေနဲ့ ငွေကျပ် သိန်း ၅၀ နဲ့ အာမခံ ရယူကာ အမှုရင်ဆိုင်နေတာ ဖြစ်ပါတယ်

You may also like these stories:

အမှုအတွက် ၁၀၀ ရာခိုင်နှုန်း ယုံကြည်ထားတယ်လို့ ဆိုလာတဲ့ သင်းသင်း

“ဝေဠုကျော်နဲ့ အသံဖိုင် စစ်ဆေးမှု အခြေအနေ ဇာတ်ရှိန် ကောင်းလာပြီ”လို့ သင်းသင်း ပြော

မိသားစု ဝမ်းရေးအတွက် သီချင်းဆိုနေတဲ့ အလှမယ် သင်းသင်း

The post “ကိုယ့်ကိုယ်ကိုယ် အသက်အန္တရာယ် စိုးရိမ်နေရတယ်”လို့ သင်းသင်း ပြော appeared first on ဧရာဝတီ.

ကာမလိမ်လည်မှုဖြင့် အလှမယ် သင်းသင်းရဲ့ တရားစွဲဆိုခြင်းကို ခံထားရတဲ့ သရုပ်ဆောင် ဝေဠုကျော်ကတော့ တရားစွဲဆိုထားခဲ့တဲ့ အချိန် ၁ နှစ်ခွဲအတွင်း ဘာမှမပြောဘဲ သက်သေများကိုသာ ထိုင်နားထောင်ခဲ့တယ်လို့ ဆိုပါတယ်။

“တနှစ်ခွဲလောက် ကျနော့်ဘက်က ဘာမှ မပြောဘူး။ အခုထက်ထိ ဘာမှ မပြောရသေးဘူး။ တနှစ်ခွဲလုံး တင်တဲ့ သက်သေတွေကို ထိုင်နားထောင်နေခဲ့တယ်။ ဒီနေ့ကတော့ ပြန်လှန် စစ်မေးအတွက် ၃ ချိန်းမြောက်ပေါ့။ ဒါဟာ ဂုဏ်သိက္ခာအတွက် ယှဉ်ပြိုင်နေရတာပါ။ သူ့ဘက်ကလည်း သူမှန်တယ်ပြောသလို ကျနော့်ဘက်ကလည်း မှန်တယ်ပြောမှာပဲလေ။ ဒါကိုတရားရုံးကနေ ဆုံးဖြတ်မှာ”

“အဲ့အတွက် ဒီဟာကို တယောက်နဲ့ တယောက် ဘယ်သူ့ရဲ့ဂုဏ်သိက္ခာကိုမှ ထိခိုက်စေဖို့ မဟုတ်ပါဘူး။ ဒါပေမယ့် ကျနော်တို့ ပြောသင့်ပြောထိုက်တာ၊ လုပ်သင့် လုပ်ထိုက်တာကို ကျနော့်ရှေ့နေတွေက လုပ်ထားတာပါ” လို့ ဝေဠုကျော်က ပြောပါတယ်။

လက်ရှိမှာတော့ ဝေဠုကျော်ဘက်က ရှေ့နေမှ တရားလိုဖြစ်သူ သင်းသင်းကို အပြန်အလှန် မေးခွန်းများကို စစ်မေးတာဟာ ရုံးချိန်း ၃ ချိန်းရှိပြီဖြစ်ပြီး ပြောသင့်ပြောထိုက် လုပ်သင့်လုပ်ထိုက်တာတွေကို ရှေ့နေများက လုပ်နေတာဖြစ်တယ်လို့ သိရပါတယ်။

သင်းသင်းကိုတော့ ဝေဠုကျော်ရဲ့ရှေ့နေဖြစ်သူမှ ယခင်က အလားတူ အမှုမျိုး ရှိခဲ့ဖူးလားဆိုတဲ့ အကြောင်းအရာများကို မေးမြန်းခဲ့ပြီး မစွဲဖူးဘူးဆို၍ လိမ်ညာထွက်ဆိုခဲ့တာကြောင့် သင်းသင်းကို အရေးယူပေးရန်အတွက် တရားရုံးမှာ လျှောက်ထားတယ်လို့ သိရပါတယ်။

“ကျနော့် ရှေ့နေက အမှုတခုကို စွဲခဲ့ဖူးလားပေါ့။ နောက်ဆက်တွဲအမှုကို စွဲဖူးသေးလားဆိုတော့ မစွဲခဲ့ဖူးဘူးလို့ ဖြေတယ်။ စွဲဖူးတဲ့အကြောင်းကိုလည်း ဒီကသက်သေ အခိုင်အလုံ ရထားတယ်။ ဒီဘက်က တင်တယ်။ အဲ့တော့ စွဲဖူးတဲ့အမှုတခုကို မစွဲဖူးဘူးလို့ လိမ်ညာထွက်တဲ့အတွက် ပုဒ်မ ၁၉၉ နဲ့ အရေးယူပေးဖို့အတွက် လျှောက်ထားတယ်” လို့ ဝေဠုကျော်က ပြောပါတယ်။

အဆိုပါ အရေးယူပေးရန် လျှောက်ထားမှုကိုတော့ အမှုနဲ့သက်ဆိုင်လို့သာ လျှောက်ထားတာဖြစ်ပြီး တရားရုံးက ခွင့်ပြုပါက ဆက်လက် တရားစွဲဆိုသွားမှာဖြစ်တယ်လို့ ဝေဠုကျော်ရဲ့ရှေ့နေဖြစ်သူက ပြောပါတယ်။

“ကျနော်တို့က စွဲတာ မဟုတ်ဘူး။ တရားရုံးမှာ အရေးယူပေးဖို့အတွက် လျှောက်ထားတာပါ။ စွဲတာမဟုတ်ပါဘူး။ ကျနော်တို့မှာ အဲ့လိုအာဏာလည်း မရှိဘူး။ တရားရုံးကို လျှောက်ထားတာ တရားရုံးကခွင့်ပြုရင်တော့ စွဲရင်စွဲမှာပေါ့။ တရားရုံးက ဘာလုပ်မယ်ဆိုတာ ကျနော်တို့လည်း ပြောလို့မရသေးပါဘူး” လို့ ရှေ့နေဖြစ်သူ ဦးဝေဖြိုးမြတ်က ပြောပါတယ်။

ဆက်လက်ပြီး “အမှုနဲ့ သက်ဆိုင်ခြင်း မရှိဘူးဆိုရင် တင်လို့လည်း မရဘူး။ လျှောက်ထားလို့လည်း မရဘူး။ အမှုနဲ့ သက်ဆိုင်တာတွေကို တင်ပြလို့သာ တရားရုံးမှာ လက်ခံထားတာ။ အမှုနဲ့ မဆိုင်ပါဘူး။ လက်မခံပါဘူးဆိုတာ တရားရုံးက ပြောလို့ မရဘူး။ အမှုနဲ့ သက်ဆိုင်တဲ့အတွက် သက်သေခံလည်း သွင်းထားပြီးပြီ။ တရားသူကြီး ကိုယ်တိုင်ကလည်း သက်သေခံအဖြစ် လက်ခံထားပြီးပါပြီ” လို့ ပြောပါတယ်။

ဝေဠုကျော်ကလည်း သူ့ရဲ့ရှေ့နေ ၂ဦးရဲ့ စွမ်းဆောင်မှုများကြောင့် အခုလိုရှေ့ဆက်သွားနေရတာဖြစ်တယ်လို့ ဆိုပါတယ်။

“ကျနော့် ရှေ့နေ ၂ယောက် ရှိပါတယ်။ ကိုဖိုးဖြူရယ်၊ ကိုဝေဖြိုးမြတ်ရယ်ပါ။ ကိုဖိုးဖြူ အရမ်းတော်ပါတယ်။ ကိုဝေဖြိုးမြတ် အရမ်းကြိုးစားပါတယ်။ သူတို့ စွမ်းဆောင်ပေးမှုနဲ့ ကျနော် ဆက်ပြီး သွားနေတာပေါ့” လို့ ဝေဠုကျော်က ပြောပါတယ်။

သရုပ်ဆောင် ဝေဠုကျော်အား တရားလိုဖြစ်သူ သင်းသင်းမှ ၂၀၁၉ ခုနှစ်၊ ဇန်နဝါရီလ ၈ ရက်နေ့က ရန်ကုန်မြို့၊ သင်္ဃန်းကျွန်းမြို့နယ် တရားရုံးမှာ စတင် တရားစွဲဆိုခဲ့တာဖြစ်ပြီး ဝေဠုကျော်အနေနဲ့ ငွေကျပ် သိန်း ၅၀ နဲ့ အာမခံ ရယူကာ အမှုရင်ဆိုင်နေတာ ဖြစ်ပါတယ်။

You may also like these stories:

“ကိုယ့်ကိုယ်ကိုယ် အသက်အန္တရာယ် စိုးရိမ်နေရတယ်”လို့ သင်းသင်း ပြော

အဆိုတော် ရသအား မြင်းခြံအကျဉ်းထောင်သို့ ပြောင်းရွှေ့ခံရ

The post “တရားစွဲခံရတဲ့ ၁ နှစ်ခွဲအတွင်း ဘာမှ မပြောခဲ့ပါဘူး”လို့ ဝေဠုကျော် ပြော appeared first on ဧရာဝတီ.

COVID-19 ကာလမှာ အိမ်မှာနေရင်း အွန်လိုင်းကနေ မာလာရှမ်းကော ချက်ရောင်းဖြစ်ပုံကို အလှမယ် နန်းခင်ဇေယျာက အခုလိုပဲ ဆိုပါတယ်။

“ကိုဗစ်ကာလမှာ အိမ်မှာပဲ နေနေရတာ။ နန်းခင်က လှုပ်လှုပ်ရှားရှားနေတဲ့သူ ဆိုတော့ အိမ်ထဲမှာ နေရတာ ကိုယ့်အတွက်က ထောင်ကျနေတဲ့အတိုင်း ဖြစ်နေတာ။ နန်းခင်ကလည်း ငြိမ်ငြိမ်နေတတ်တဲ့သူ မဟုတ်တော့ ပထမတော့ Work out တွေ လုပ်ပြီးတင်လိုက်သေးတယ်။ နောက်ဟင်းတွေလည်း ချက်ဖြစ်တယ်။ အဲ့တော့ ဟင်းချက်ရောင်းမယ်လို့ စဉ်းစားမိလိုက်တယ်”လို့ နန်းခင်ဇေယျာက ပြောပါတယ်။

ဆက်လက်ပြီး နန်းခင်ဇေယျာက ပထမ စဉ်းစားမိချိန်မှာ အဝတ်အစား ရောင်းဖို့ စဉ်းစားမိပေမယ့် ကိုယ်နဲ့ မစိမ်းတဲ့ အစားအသောက်ရောင်းဖို့ကို ရွေးခဲ့တယ်လို့ ဆိုပါတယ်။

“ပထမက အဝတ်အစားပဲ Live လွှင့်ရောင်းရင် ကောင်းမလား။ အစားအသောက်ပဲရောင်းရင် ကောင်းမလား စဉ်းစားလိုက်တော့ အစားအသောက်က ကိုယ်နဲ့ မစိမ်းတော့ အစားအသောက် လုပ်မယ်ပေါ့။ ကလေးတွေ၊ လူကြီးတွေ၊ လူငယ်တွေ ကြိုက်တတ်တာတွေ ချရေးလိုက်ချိန်မှာ မာလာရှမ်းကောကို လုပ်မယ်ဆိုပြီး ဖြစ်လာတယ်”

“ကိုယ်တိုင်ကလည်း စင်ကာပူမှာ တောက်လျှောက် စားနေတော့ မာလာရှမ်းကော လုပ်မယ်ဆိုပြီး လေ့လာပြီး ချက်တယ်။ ကိုယ်လိုချင်တဲ့ အရသာ ရဖို့လည်း အရသာ အများကြီး လုပ်ကြည့်တယ်။ အဲ့ထဲကမှ အကောင်းဆုံးကို လုပ်ဖြစ်တာပေါ့”လို့ နန်းခင်ဇေယျာက ပြောပါတယ်။

မာလာရှမ်းကောအပြင် မာလာရှမ်းကောနဲ့ တွဲဖက်သောက်လို့ရတဲ့ Bubble tea ကိုလည်း ရောင်းချဖို့ ရှိကြောင်း နန်းခင်ဇေယျာက ဆိုပါတယ်။

“စရောင်းကတည်းက အော်ဒါတွေလည်း အရမ်းတက်တယ်။ မာလာရှမ်းကော အစပ် Challenge ကို အနုပညာရှင်တွေနဲ့ပဲ လုပ်နေတာ။ နောက် ပရိသတ်တွေကလည်း လုပ်ချင်တယ်၊ စိတ်ဝင်စားတယ်ဆိုတော့ ပရိသတ်တွေအတွက် ရွှေထွဋ်တင်ကွင်းမှာ မာလာရှမ်းကော အစပ်စားပြိုင်ပွဲ လုပ်ခဲ့ပါတယ်။ ဆိုင်ဖွင့်ဖို့ အစီအစဉ် မရှိသေးဘူး။ မာလာရှမ်းကောအပြင် မာလာရှမ်းကောနဲ့ တွဲဖက်သောက်လို့ရတဲ့ Bubble tea ကို ဒီတပတ်မှာ စပြီး လုပ်မယ်”လို့ နန်းခင်ဇေယျာက ပြောပါတယ်။

မာလာရှမ်းကောကို Master Chef Myanmar အစီအစဉ်မှ ဒိုင်တယောက် ဝေဖန်တာနဲ့ ပတ်သက်ပြီးလည်း နန်းခင်ဇေယျာက အခုလိုပဲ ဆိုပါတယ်။

“မာလာရှမ်းကောကို ဒိုင်တယောက် ဝေဖန်တာကို ပြောနေကြတာက ဝေဖန်တဲ့သူကလည်း ကောင်းတာကို ဝေဖန်ထားတာပေါ့။ တချို့ သတင်းသမားတွေက သူလိုတဲ့ နေရာကို ဆွဲထည့်တာတော့ မကောင်းပါဘူး။ အဲ့နေ့က ဒိုင်အစ်မ ဖြေခဲ့တာတွေ ဗီဒီယိုကို ကြည့်ရင် သိနိုင်ပါတယ်။ တချို့သူတွေက စာကို လိုရင်း ဆွဲထည့်ပြီး ပရိသတ် စိတ်ဝင်စားမှု လိုချင်တာပေါ့”

“ပရိသတ်တွေက ခေါင်းစဉ်ကိုကြည့်ပြီး ဝေဖန်တာတွေလည်း တွေ့ရတယ်။ နန်းခင်ကတော့ ဘာမှ မခံစားရဘူး။ ကိုယ့် Customer ရှိတယ်။ ကိုယ့်ကွာလတီကို ကိုယ်ကြိုက်တယ်။ သူတို့ အားပေးရတာနဲ့တန်အောင် ကြိုးစားသွားဖို့ပဲ ရှိပါတယ်”လို့ နန်းခင်ဇေယျာက ပြောပါတယ်။

နန်းခင်ဇေယျာဟာ အလှမယ် ပြိုင်ပွဲကနေ တဆင့် အနုပညာလောကထဲကို ဝင်ရောက်လာသူ တဦး ဖြစ်ပါတယ်။ ရုပ်ရှင်၊ ဗီဒီယိုဇာတ်ကားတွေ များစွာ ရိုက်ကူးခဲ့ပြီး ပရိသတ်တွေရဲ့ အားပေးမှုကို ရရှိထားသူလည်း ဖြစ်ပါတယ်။ နန်းခင်ဇေယျာက “Non Stop” ဆိုတဲ့ တကိုယ်တော်ခွေလည်း ထွက်ရှိထားပါတယ်။

You may also like these stories:

အချစ်ရေးနဲ့ ပတ်သက်ပြီး ပွင့်ပွင့်လင်းလင်း ပြောပြလာတဲ့ နန်းခင်ဇေယျာ

“မျက်လုံး အိုက်တင်တွေကို မကြီးစိုးက သင်ပေးတယ်”လို့ နန်းခင်ဇေယျာ ပြော

The post မာလာရှမ်းကောအပြင် Bubble tea ပါ ရောင်းချမယ့် နန်းခင်ဇေယျာ appeared first on ဧရာဝတီ.

COVID-19 ကာလအတွင်း ရုပ်ရှင် ရိုက်ကူးရေးများ ရပ်နားထားရပြီး မကြာခင် ရိုက်ကူးရေးတွေ ပြန်စရင်တော့ ဝမ်းသာတယ်လို့ ဇာတ်ပို့ သရုပ်ဆောင် ရဲလေးမက ဆိုပါတယ်။

“ဇာတ်ကားတွေ ပြန်ရိုက်ဖို့တော့ ကြားတော့ ကြားနေရပါပြီ။ ကျနော်တို့ဆီက ထိန်းချုပ်မှု ကောင်းတော့ သူများနိုင်ငံတွေထက်စာရင် ဆိုးဆိုးဝါးဝါးတော့ ဖြစ်မယ် မထင်ဘူး။ စည်းကမ်း ဘယ်လို ချမှတ်ထားလဲ။ ချမှတ်ထားတဲ့ စည်းကမ်းလေးအတိုင်း ရိုက်ရင်တော့ အဆင်ပြေမှာပါ။ ပြန်ရိုက်ရရင်တော့ ဝမ်းသာတာပေါ့။ ကျနော်တို့က ၁၀ လပိုင်းမှာ ဇာတ်ကားရိုက်ဖို့တော့ ပြောထားတယ်”လို့ ရဲလေးမက ပြောပါတယ်။

သရုပ်ဆောင် အလုပ်အပြင် ဝမ်းရေးအတွက် မုန့်ဟင်းခါးလည်း ချက်ရောင်းနေတဲ့ ရဲလေးမက ရိုက်ကူးရေးကြောင့် ခရီးတွေ သွားတဲ့အခါ အိမ်က တူမလေးတွေက ဆိုင်မှာ ချက်ရောင်းပေးတယ်လို့ ပြောပါတယ်။

“မုန့်ဟင်းခါးလည်း ရောင်းပါတယ်။ ခရီးသွားရင်တော့ တူမလေးတွေ ချက်တယ်။ ခရီးသွားစရာ မရှိရင်တော့ ကျနော်ပဲ ချက်တယ်။ ရိုက်ကူးရေးကတော့ နောက်ပိုင်းကိုလည်း ရရင် ရသလို ရိုက်မယ်။ ရိုက်လို့ရှိရင်လည်း ရဲလေးမ မှားတာ၊ မှန်တာလေးတွေ ရှိရင်လည်း ထောက်ပြ ဝေဖန်ပေးပါ”လို့ ရဲလေးမက ပြောပါတယ်။

လတ်တလောမှာတော့ အွန်လိုင်းပေါ်ကနေ ဈေးရောင်းပေးနေတဲ့ ရဲလေးမက အခုလို ခေါ်ပြီးတော့ ဈေးရောင်းခိုင်းတဲ့အတွက်လည်း ကျေးဇူးတင်တယ်လို့ ဆိုပါတယ်။

“အခု လတ်တလောမှာ Live လေး လွှင့်ပြီး ဈေးတွေ ရောင်းဖြစ်နေတယ်။ အနုပညာရှင် တယောက်ကို ပရိသတ်တွေက ချစ်ခင်ပြီးတော့ စာနာမှုနဲ့ အလုပ်ပေးကြတာ ဖြစ်တဲ့အတွက် ထမင်းရှင်၊ ကျေးဇူးရှင် ဖြစ်သွားပြီ။ ခေါ်ပြီးတော့ ရောင်းခိုင်းတဲ့အတွက်လည်း ကျေးဇူးတင်တယ်။ ကိုယ်အရမ်း ကျပ်တည်းနေတဲ့အချိန်မှာ အခုလို ကူညီကြတာ ပျော်ပါတယ်။ ရောင်းရတာ များပါတယ်”လို့ ရဲလေးမက ပြောပါတယ်။

အနုပညာသက်တမ်း ၁၀ စုနှစ် တခုကို ရောက်နေပြီဖြစ်တဲ့ ရဲလေးမကတော့ ဒေါ်ထားအဖွဲ့မှ ဇာတ်ပို့ ဇာတ်ရံ သရုပ်ဆောင် တဦးဖြစ်ပါတယ်။ မိန်းမလျာ ဇာတ်ရုပ်တွေမှာ အတွေ့ရများတဲ့ ရဲလေးမကို ဟာသ သရုပ်ဆောင်အဖြစ် လူသိများပါတယ်။

ဗီဒီယိုကားတွေမှာ ပါဝင် သရုပ်ဆောင်ခဲ့တဲ့ ရဲလေးမကတော့ ဗီဒီယိုကားတွေ အရိုက်ပါးသွားချိန်မှာ မုန့်ဟင်းခါး ရောင်းခဲ့ပြီး ပရိသတ်တွေ အားပေးခဲ့ကြပါတယ်။

You may also like these stories:

လက်လှမ်းမှီသလောက် ဈေးရောင်းတာကို အပြစ်မမြင်စေချင်တဲ့ ရဲလေးမ

မုန့်ဟင်းခါးက ကျေးဇူးရှင်ဖြစ်လာတယ်လို့ ရဲလေးမ ပြော

The post “ရိုက်ကူးရေးကို စည်းကမ်းတကျ ရိုက်မယ်ဆို အဆင်ပြေမှာပါ” appeared first on ဧရာဝတီ.

ပရိသတ်တွေက လွမ်းလို့ ဆွေးလို့ကောင်းမယ့် သီချင်းလေးထွက်ဖို့ ပြောတာကြောင့် မိုးရာသီနဲ့ လိုက်ဖက်မယ့် သီချင်းတပုဒ် ထွက်ဖြစ်မယ့်အကြောင်း နန်းဆုရတီစိုးက အခုလိုပဲ ပြောပါတယ်။

“သီချင်းနာမည်က အလွမ်းရာသီပါ။ အလွမ်းအဆွေး သီချင်းလေးပေါ့။ ဒီသီချင်းကို ကိုညီမင်းခိုင် ရေးပေးထားတာ ၂ နှစ်ကျော်လောက်ရှိပြီ။ ဒီသီချင်းက မိုးရာသီနဲ့လည်း လိုက်ဖက်တယ်။ မိုးတွင်းမှာ ဒီသီချင်းလေး ထွက်ရင် လိုက်ဖက်မယ် ထင်တယ်။ နောက် ပရိသတ်တွေကလည်း သီချင်းထွက်ပေးဖို့ပြောတာကြောင့် မိုးရာသီမှာ လွမ်းလို့ ဆွေးလို့ ကောင်းမယ့် ဒီသီချင်းလေးကို ထွက်ဖြစ်တာပါ”လို့ နန်းဆုရတီစိုးက ပြောပါတယ်။

ဆက်လက်ပြီး နန်းဆုရတီစိုးက ဒီသီချင်းနဲ့ ပတ်သက်ပြီး ခံစားချက် အပိုင်းနဲ့ ရိုက်ကူးရေး အခက်အခဲတွေ အကြောင်းလည်း အခုလို ဆိုပါတယ်။

“သီချင်းနဲ့ ပတ်သက်ပြီး ခံစားချက်က အလွမ်းအဆွေးသီချင်း ဖြစ်တာကြောင့် လွမ်းအောင်ဆွေးအောင် ဆိုရတာပေါ့။ မုဒ်ထည့်ပြီး သေချာ ခံစားပြီး သီဆိုထားပါတယ်။ သီချင်းကတော့ တီးတာရော၊ ဆိုတာရော ပြီးသွားပြီ။ ဒါပေမယ့် ရိုက်ကူးရေးက အခက်အခဲ ဖြစ်နေတာပေါ့”

“ကလောမှာ အရင် သွားရိုက်လိုက်တယ်။ အခု ရန်ကုန်မှာ ပြန်ရိုက်တယ်။ ကိုဗစ်ကာလကြောင့် အချိန်တော်တော်လေး စောင့်လိုက်ရတဲ့ သီချင်းပေါ့။ ရိုက်သမျှ သီချင်းထဲမှာ အရှည်ဆုံး အကြာဆုံး ရိုက်ရတာပေါ့”လို့ နန်းဆုရတီစိုးက ပြောပါတယ်။

ကိုဗစ်ကာလမှာ အလုပ်လုပ်ချိန် ပိုရတာကြောင့် သီချင်းတွေ တပုဒ်ပြီးတပုဒ် ထွက်နိုင်အောင်ကြိုးစားနေတယ်လို့ နန်းဆုရတီစိုးက ဆိုပါတယ်။

“မိုးတွင်း မကုန်ခင်မှာ ထွက်ချင်တာဖြစ်တဲ့အတွက် ဒီလမကုန်ခင် ဒါမှမဟုတ် နောက်လဆန်းလောက်ပေါ့။ ပထမပတ်ကိုတော့ Target ထားပြီး ပြင်ဆင်ထားတယ်။ ကိုဗစ်ကာလ ဖြစ်သွားတဲ့အခါကျတော့ အလုပ်လုပ်ချိန် ပိုရတယ်။ တပုဒ်ပြီးတပုဒ် ထွက်နိုင်အောင် ကြိုးစားထားပါတယ်”

“ဒီသီချင်းပြီးရင်လည်း နောက်ထပ် သီချင်းထွက်နိုင်အောင် ကြိုးစား ပြင်ဆင်ထားပါတယ်။ နောက်မှာ တန်းစီထားတာ နှစ်ပုဒ်၊ သုံးပုဒ် ရှိတယ်။ အချစ်သီချင်းလည်း ပါတယ်။ အလွမ်းသီချင်းလည်း ပါတယ်။ ဒါပေမယ့် ဘယ်သီချင်း အရင်ထွက်မလဲ မသိသေးဘူး”လို့ နန်းဆုရတီစိုးက ပြောပါတယ်။

နန်းဆုရတီစိုးကတော့ အနုပညာလောကမှာ ဆယ်စုနှစ်ကျော်ကြာ လုပ်ကိုင်ခဲ့ပြီး သရုပ်ဆောင် အလုပ်အပြင် သီချင်းတွေလည်း ထွက်ရှိထားပါတယ်။ နန်းဆုရတီစိုးရဲ့ “ရူးအောင်ချစ်ရသူ” သီချင်းကလည်း ပရိသတ်တွေကြားမှာ ရေပန်းစားခဲ့ပါတယ်။

You may also like these stories:

ဝမ်းရေးအတွက် အခက်အခဲရှိသူတွေကို တွေးပူမိပြီး လှူဒါန်းခဲ့တဲ့ နန်းဆုရတီစိုး

ချစ်သူထားရင် တခါမှလျှို့ဝှက်မထားခဲ့ဘူးလို့ နန်းဆုရတီစိုးပြေ

The post မိုးတွင်းမှာ “အလွမ်းရာသီ” သီချင်းသစ် ထွက်မယ့် နန်းဆုရတီစိုး appeared first on ဧရာဝတီ.

ဟောင်ကောင်မင်းသမီး Elaine Ng ဟာ ၁၉၉၉ ခုနှစ်မှာ အက်ရှင်မင်းသား ဂျက်ကီချန်းနဲ့ ရခဲ့တဲ့ တိတ်တိတ်ပုန်း ကလေးကို မွေးခဲ့ပြီးတဲ့နောက် မင်းသားဆီက သူ့ကို ငွေပမာဏ တော်တော်များများ ပေးခဲ့တယ်ဆိုတဲ့ သတင်းကို ပြန်လည် တုံ့ပြန်ခဲ့ပါတယ်။

အသက် ၄၆ နှစ်အရွယ် မင်းသမီး Ng ဟာ မင်းသား ချန်းနဲ့ ရခဲ့တဲ့ ကိုယ်ဝန်ကို လျှို့ဝှက်ထားခဲ့ကြောင်း အဲ့ဒီနှစ်မှာ ဟိုးလေးတကျော်ဖြစ်ခဲ့ပြီး အဲ့ဒီနှစ်မှာပဲ သမီး Etta ကို မွေးဖွားခဲ့တာဖြစ်ပါတယ်။

အသက် ၆၆ နှစ်အရွယ် မင်းသား ဂျက်ကီချန်းဟာ ၁၉၈၂ ခုနှစ်ကလို့ မင်းသမီးဟောင်း Joan Lin နဲ့ လက်ထပ်ခဲ့တာ ဖြစ်ပြီး သူတို့နှစ်ဦးမှာ အသက် ၃၇ နှစ်အရွယ် မင်းသား Jaycee Chan ဆိုတဲ့ သားတဦးကို ရရှိထားပါတယ်။

တရုတ်အင်တာနက်ပေါ်မှာ မကြာသေးခင်တုန်းက တက်လာတဲ့ သတင်းတွေထဲမှာ Etta ကို မွေးဖွားခဲ့ပြီးတဲ့နောက် မင်းသမီး Ng နဲ့ ကိစ္စကို ရှင်းလင်းရာမှာ ကူညီဖို့ ရုပ်ရှင်လုပ်ငန်းရှင် Albert Yeung ဟာ မင်းသား ဂျက်ကီချန်းကို စင်ကာပူဒေါ်လာ ၇ ဒဿမ ၁၃ သန်းပေးခဲ့တယ်လို့ ဟောင်ကောင်အကြီးတန်း သတင်ထောက်တဦးက ပြောဆိုထားပါတယ်။

ပြီးခဲ့တဲ့ ဇူလိုင်လ ၂၆ ရက်နေ့မှာတော့ မင်းသမီး Ng က အဲ့ဒီသတင်းတွေကို ပြန်လည်ရှင်းလင်းခဲ့ပါတယ်။ မင်းသမီးက “ကမ္ဘာပေါ်မှာ လူပုံစံပေါင်းစုံ ရှိပါတယ်။ သန်း ၂၀၊ သန်း ၃၀၊ သန်း ၄၀ ပဲဖြစ်ဖြစ် လူတွေဟာ ပျော်ပျော်ပဲ အဲ့ဒါကို ပြောကြတယ်။ အဲ့ဒီနောက် တခြားလူတွေကို ပျော်စေဖို့ ဆုမွန်ကောင်း တောင်းပေးကြတယ်” လို့ တရုတ်ဘာသာနဲ့ ရေးသားခဲ့ပါတယ်။

အဲ့ဒီနောက် သူက ဘယ်ပိုက်ဆံကိုမှ ရယူခဲ့ခြင်း မရှိကြောင်းနဲ့ အဲ့ဒီလို ပြောဆိုကြတဲ့သူတွေအနေနဲ့ ကိုယ်ပြုတဲ့ကံ ကိုယ့်ထံပြန်လာမှာကို သတိထားသင့်တဲ့အကြောင်း ပြောဆိုခဲ့ပါတယ်။

မင်းသမီး Ng ဟာ Etta နဲ့အတူ ရှန်ဟိုင်းမြို့ကို ပြောင်းရွှေ့ခဲ့ပြီးတဲ့နောက် မင်းသမီးကို မင်းသားချန်းက ထောက်ပံ့ပေးခဲ့တယ်လို့ ကောလာဟလတွေ ထွက်ပေါ်ခဲ့ဖူးပေမယ့် ၂၀၁၇ ခုနှစ်မှာ မင်းသမီးက အဲ့ဒီသတင်းတွေကို ငြင်းဆိုခဲ့ပါတယ်။

မင်းသားချန်းဟာ သူ့ရဲ့နေထိုင် စားသောက်စရိတ်ကို ပေးခဲ့ခြင်း မရှိဘူးလို့ မင်းသမီးက ဆိုပါတယ်။ “Old Time Buddy – To Catch A Thief” နဲ့ “Legal Entanglement” တို့လို စီးရီးတွေနဲ့ နာမည်ကျော်တဲ့ မင်းသမီးဟာ သမီး Etta နဲ့ တကျက်ကျက် ရန်ဖြစ်ကြတဲ့ ဆက်ဆံရေးအကြောင်း သတင်းတွေမှာ ပါဝင်လေ့ ရှိပါတယ်။

သူတို့ သားအမိနှစ်ဦးဟာ တယောက်စည်း တယောက် သတိထားကြပြီး တဦးနဲ့တဦး စကားပြောဆိုကြတဲ့အခါမှ ရှောင်ရှားရမယ့် အကြောင်းအရာတွေကိုလည်း သတိထားကြတဲ့အကြောင်း၊ သမီးနဲ့ ဆက်ဆံရေးကိုလည်း တိုးတက်အောင် လုပ်ဆောင်ခဲ့တဲ့အကြောင်း ၂၀၁၉ ခုနှစ်မှာ မင်းသမီးက ပြောဆိုထားပါတယ်။

Ref: asiaone

The post ဂျက်ကီချန်းဆီက ကလေးစရိတ် မရခဲ့ကြောင်း ဟောင်ကောင်မင်းသမီး ပြော appeared first on ဧရာဝတီ.

ဘောလိဝုဒ်စတား၊ မယ်ကမ္ဘာဟောင်း Aishwarya Rai Bachchan နဲ့ သူ့ရဲ့ သမီးတို့ဟာ COVID-19 ကုသမှု ခံယူနေတဲ့ မွမ်ဘိုင်းမြို့က ဆေးရုံတခုကနေ ဆင်းသွားကြပြီလို့ ခင်ပွန်း မင်းသား Abhishek Bachchan က ဇူလိုင်လ ၂၇ ရက်နေ့မှာ ပြောဆိုခဲ့ပါတယ်။

အိန္ဒိယနိုင်ငံမှ ရောဂါကူးစက်ခံခဲ့ရသူတွေအထဲ နာမည်အကျော်ကြားဆုံးသူတွေဖြစ်တဲ့ မင်းသားကြီး အမီတာဘဂျမ်းနဲ့ သား Abhishek  တို့ ဆေးရုံတက်ခဲ့ရပြီး ရက်အနည်းငယ်အကြာ သူတို့သားအမိနှစ်ဦးဟာ လွန်ခဲ့တဲ့ သီတင်းတပတ်လောက်ကစလို့ ဆေးရုံတက်ခဲ့ရတာ ဖြစ်ပါတယ်။

မင်းသား Abhishek  က “Aishwarya နဲ့ Aaradhya တို့ဟာ ပိုးမတွေ့ အဖြေထွက်ခဲ့ပြီး ဆေးရုံကနေဆင်းသွားကြပြီ ဖြစ်ပါတယ်။ သူတို့ဟာ အိမ်မှာ ရှိနေပါတယ်” လို့ Twitter မှာ ရေးသားခဲ့ပါတယ်။ ဆုတောင်းမေတ္တာ ပို့သနေကြတဲ့ ပရိသတ်တွေကိုလည်း ကျေးဇူးတင်တယ်လို့ ဆိုပါတယ်။ ဆက်ပြီး မင်းသားက “ကျနော့်အဖေနဲ့ ကျနော်တို့ဟာ ဆေးဝန်ထမ်းတွေရဲ့ ဂရုစိုက်မှုအောက်က ဆေးရုံမှာ ရှိနေဆဲဖြစ်ပါတယ်” လို့ ဆိုပါတယ်။

မင်းသမီးနဲ့ ၈ နှစ်အရွယ် သမီး Aaradhya တို့ဟာ ကနဦးမှာ အသွားအလာ ကန့်သတ်ထားရှိခံခဲ့ရပြီးတဲ့နောက် အသက် ၇၇ နှစ်အရွယ်ယောက္ခမ အမီတာဘဂျမ်းနဲ့ ခင်ပွန်းတို့ တက်ရောက် ကုသမှုခံယူနေတဲ့ ဆေးရုံမှာပဲ တက်ရောက်ခဲ့တာ ဖြစ်ပါတယ်။

မင်းသမီး Aishwarya ဟာ ၁၉၉၄ ခုနှစ်မှာ မယ်ကမ္ဘာသရဖူကို ရရှိခဲ့တာဖြစ်ပြီး အဲ့ဒီနောက်ပိုင်းကစလို့ ဘောလိဝုဒ်ရဲ့ နာမည်အကျော်ကြားဆုံး လူတယောက် ဖြစ်လာခဲ့ပါတယ်။ သူဟာ ကိန်းစ်ရုပ်ရှင်ပွဲတော်ကိုလည်း ပုံမှန်တက်ရောက်လေ့ ရှိပါတယ်။

လောလောဆယ်မှာတော့ မင်းသားကြီး အမီတာနဲ့ အသက် ၄၄ နှစ်အရွယ် သား Abhishek တို့ဟာ ဆေးရုံ သီးသန့်ဆောင်မှာ ရှိနေဆဲ ဖြစ်ပါတယ်။ သူတို့နှစ်ဦး ဆေးရုံတက်တာ သီတင်းနှစ်ပတ်ကျော်ပြီ ဖြစ်ပေမယ့် ကျန်းမာရေး အခြေအနေအကြောင်း သတင်းထုတ်ပြန်တာမျိုး မရှိခဲ့ပါဘူး။ ဒါပေမယ့် ဆိုရှယ်မီဒီယာအသုံးပြုသူ မင်းသားကြီး အမီတာက Twitter ၊ Instagram နဲ့ Tumblr တို့မှာရှိတဲ့သန်းနဲ့ချီတဲ့ သူ့ပရိသတ်တွေကို ပုံမှန် သတင်းစကားပါးနေဆဲ ဖြစ်ပါတယ်။

မင်းသားကြီးအမီတာက “ကျနော် မျက်ရည် မဆည်နိုင်ဘူး” လို့ Twitter မှာ ဇူလိုင်လ ၂၇ ရက်နှောင်းပိုင်းတုန်းက တင်ခဲ့ပါတယ်။ ချွေးမနဲ့ မြေးမလေးတို့ အိမ်ပြန်နိုင်ပြီဆိုတဲ့ သတင်းစကားကို တုံ့ပြန်ပြောဆိုလိုက်တာလည်း ဖြစ်ပါတယ်။

“Big B” လို့လူသိများကြတဲ့ မင်းသားကြီး အမီတာဟာ အိန္ဒိယရုပ်ရှင်လောကမှာ ရာစုနှစ် ထက်ဝက်ကျော်လောက် ကျင်လည်ခဲ့သူ ဖြစ်ပါတယ်။ သူဟာ ၁၉၉၉ ခုနှစ်တုန်းက ဘီဘီစီအွန်လိုင်း မဲပေးမှုမှာ လူ၁သန်းထဲက မင်းသားတယောက်အနေနဲ့ မဲပေးရွေးချယ်ခံခဲ့ရပြီး လန်ဒန်မြို့မှာရှိတဲ့ Madame Tussaud ဖယောင်းပြတိုက်မှာ ရုပ်တုအဖြစ် ထားရှိခဲ့ရတဲ့ ပထမဆုံးအိန္ဒိယသရုပ်ဆောင်လည်း ဖြစ်ပါတယ်။

အိန္ဒိယရဲ့ ဘဏ္ဍာရေးနဲ့ ရုပ်ရှင်မြို့တော်ဖြစ်တဲ့ မွမ်ဘိုင်းမှာ ရောဂါကူးစက်ခံရသူ ၁ သိန်းကျော် စံချိန်တင်တွေ့ရှိထားရပြီး ရောဂါပိုးကြောင့် လူပေါင်း ၆၀၀ ကျော် သေဆုံးခဲ့ရပြီးလည်း ဖြစ်ပါတယ်။

Ref: thejakartapost

You may also like these stories:

ဂျက်ကီချန်းဆီက ကလေးစရိတ် မရခဲ့ကြောင်း ဟောင်ကောင်မင်းသမီး ပြော

မင်းသားကြီး အာနိုးရဲ့ သမီးနဲ့ လက်ထပ်လိုက်ပြီ ဖြစ်တဲ့ မင်းသား Chris Pratt

The post COVID-19 ကူးစက်ခံခဲ့ရတဲ့ မင်းသမီး Aishwarya Rai တို့သားအမိ ဆေးရုံကဆင်းပြီ appeared first on ဧရာဝတီ.

အလှမယ်ပြိုင်ပွဲတွေ များပြားလာတာနဲ့အမျှ အလှမယ်ဆိုတဲ့ ခေါင်းစဉ်အောက်မှာ ရောက်ရှိလာတဲ့သူတွေ ပေါ်ထွက်လာခဲ့ပါတယ်။ အလှမယ်တယောက်ဖြစ်တဲ့ နန်းခင်ဇေယျာကတော့ နိုင်ငံတကာက ခွင့်ပြုထားတဲ့ စည်းမျဉ်းစည်းကမ်းတွေနဲ့ ကိုက်ညီမှ Miss ဖြစ်တယ်လို့ ဧရာဝတီကို ပြောပါတယ်။

“တချို့သူတွေက သူတို့ကိုယ်သူတို့ Miss ပါဆိုပြီး ခံယူတာထက် ပရိသတ်တွေ လက်ခံရမယ်။ Miss တယောက်ရဲ့ စည်းမျဉ်းစည်းကမ်းနဲ့နေမှ အားလုံးက လက်ခံကြမှာ။ သူ့ကိုယ်သူ ငါဟာ Miss ငါဟာ Miss ပါလို့ပြောနေလည်း သူ့ရဲ့ စည်းမျဉ်းစည်းကမ်းနဲ့မညီရင် ဘယ်သူကမှ ဒါဟာ Miss လား။ ငါတို့တောင်မသိပါလား။ အဲ့လိုမျိုးတွေ ဖြစ်ကြတဲ့သူတွေလည်း ရှိပါတယ်” လို့ နန်းခင်ဇေယျာက ပြောပါတယ်။

ဆက်လက်ပြီး “နန်းခင်တို့အနေနဲ့ Miss ဆိုတာ နိုင်ငံတကာကနေ ခွင့်ပြုထားတဲ့ စည်းကမ်းချက်တွေနဲ့ ကိုက်ညီတဲ့သူမှပဲ ဖြစ်တာပေါ့။ ငါက Miss ဆိုပြီးတော့ ထဖြစ်လို့လည်း ဘယ်သူကမှ လက်ခံမှာ မဟုတ်ဘူး။ ကိုယ့်ဘာသာ ငါ Miss ဆိုပြီးပဲ အဆင်ပြေနိုင်တယ်” လို့ ပြောပါတယ်။

အလှမယ်တယောက်အနေနဲ့ ရှိသင့်ရှိထိုက်တဲ့ အရပ်အမောင်း၊ ဗဟုသုတနဲ့ တခြားသော အရည်အချင်းများ မရှိပါက နိုင်ငံတကာစင်မြင့်ထက်မှာ အောင်မြင်ရန် မဆိုထားနဲ့ မြန်မာနိုင်ငံမှာလည်း ဘာမှဖြစ်လာမှာ မဟုတ်ဘူးလို့ ဆိုပါတယ်။

“Miss တယောက်မှာ ရှိသင့်ရှိထိုက်တာက အဓိကက အရပ်အမောင်း၊ ဗဟုသုတတွေ ကြွယ်ဝရမယ်။ ပေါင်းသင်း ဆက်ဆံရေး ကောင်းရမယ်။ ပြီးရင် သေချာ ထိန်းသိမ်းထားတဲ့ ခန္ဓာကိုယ် ဖြစ်ရမယ်။ အဓိက ကျတယ်။ ရုပ်ကလည်း ကြည့်ပျော်ရှုပျော်လေး ရှိတယ်။ ဗဟုသုတလည်း မရှိဘူး။ အရပ်အမောင်းလည်း မရှိဘူးဆိုရင် ဘယ်လိုမှ နိုင်ငံတကာ စင်မြင့်မှာ မပြောနဲ့။ မြန်မာပြည်မှာတောင်ဖြစ်လာနိုင်မှာ မဟုတ်ပါဘူး” လို့ နန်းခင်ဇေယျာက ပြောပါတယ်။

Miss တယောက်ဖြစ်လို့ လိုအပ်တဲ့ အရည်အချင်းများကိုလည်း အခုလိုပြောပြခဲ့ပါတယ်။

“မြန်မာနိုင်ငံမှာ Miss ဖြစ်ချင်တယ်ဆိုရင် သေချာလေ့လာမှ ရမယ်။ အနုပညာကိုလည်း လေ့လာရမယ်။ ဗဟုသုတလည်း လေ့လာရမယ်။ ဘာသာစကားလည်း ကောင်းရမယ်။ အရပ်အမောင်းလည်း သေချာ ရှိရမယ်။ အရပ်ပုရင်တော့ Miss တယောက်က မဖြစ်နိုင်ဘူး။ ၅ ပေ ၅ လောက်ကတော့ ရှိရမယ်”

“ဒါပေမယ့် ၅ ပေ ၅ တောင် အင်တာနေရှင်နယ်မှာ လုံးဝ ဂျပုဖြစ်နေတာ။ နန်းခင်တောင် ၅ ပေ ၆ ကို ဂျပု ဖြစ်နေတာ။ အရပ်ကိုရှည်အောင် ကြိုးစားရမယ်။ ကိုယ့်ရဲ့ခန္ဓာကိုယ်မှာ အဆီမရှိအောင် ထိန်းရမယ်။ ဒါကတော့ အမြဲလုပ်နေရမယ့် အလုပ်တွေပါ” လို့ နန်းခင်ဇေယျာက ပြောပါတယ်။

နန်းခင်ဇေယျာကတော့ အလှမယ်တယောက်နဲ့ ရပ်တည်လာခဲ့တာဟာ အခုဆိုရင် ၆ နှစ်တာကာလ ရှိပြီဖြစ်ပြီး လက်ရှိမှာတော့ အစားအသောက်များကို အွန်လိုင်းမှတဆင့် ရောင်းချပေးလျက် ရှိပါတယ်။

You may also like these stories:

မာလာရှမ်းကောအပြင် Bubble tea ပါ ရောင်းချမယ့် နန်းခင်ဇေယျာ

မိုးတွင်းမှာ “အလွမ်းရာသီ” သီချင်းသစ် ထွက်မယ့် နန်းဆုရတီစိုး

The post အလှမယ် တယောက်မှာ ရှိသင့်တဲ့ အရည်အချင်းတွေ ပြောပြတဲ့ နန်းခင်ဇေယျာ appeared first on ဧရာဝတီ.

ဖက်ရှင် ထူထူးဆန်းဆန်းတွေ ဝတ်ဆင်တတ်တဲ့ ဟာသ သရုပ်ဆောင် စည်သူ(ပလပ်ကျွတ်)ကတော့ ၂၀၀၄ ခုနှစ်ကတည်းက အိမ်ထောင်ကျခဲ့တာဖြစ်ပြီး သိက္ခာကျမှာစိုးလို့ မိသားစုကို ဖွက်ထားသလို ဖြစ်ခဲ့တယ်လို့ ဧရာဝတီကို ပြောပါတယ်။

“ကျနော် အိမ်ထောင်ကျတာ ၂၀၀၄ ခုနှစ်ကတည်းက။ ဦးကျော်ဟိန်းနဲ့ ဇာတ်ကားရိုက်ပြီးမှ အိမ်ထောင်ကျတာပေါ့။ ပလပ်ကျွတ်ဆိုတာ အပေါအရူးလို့ သတ်မှတ်ထားတာလေ။ အနုပညာလောကရော အပြင်လောကရောကပါ အဲ့လို သတ်မှတ်ထားတော့ ကျနော့်သားနဲ့ ကျနော့် မိန်းမကလည်း ကျနော့်ကို အရမ်းချစ်တော့ သိက္ခာကျမှာစိုးလို့ ဖွက်ထားတဲ့ ပုံစံမျိုး ဖြစ်နေတယ်”

“ကျနော်က တည်တည်ငြိမ်ငြိမ် မဟုတ်ဘူးလေ။ သူများဆို ရိုက်စရာရှိရိုက်ပေမယ့် တည်တည်ငြိမ်ငြိမ်ပဲ။ သူတို့နောက်မှာ အမည်းစက်မရှိဘူး။ ကျနော်တို့ကျတော့ နောက်မှာ အမည်းစက်ကြီး ငပေါ ဆိုတဲ့ အမည်းစက်ရှိတယ်။ ဒါကလည်း ကျနော်ကိုယ်တိုင်က စိတ်ချမ်းသာအောင် နေတယ်။ သူတပါးကိုလည်း စိတ်ချမ်းသာအောင် ထားတယ်”

“အဲ့လို မျိုးနေတော့ အမြဲ ကျနော့်ကို နှိမ်တယ်။ ဒါပေမယ့် ကျနော်က ဘာမှမဖြစ်ပါဘူး။ ဟုတ်ကဲ့ဆိုပြီး ပြုံးပြုံးလေးနေပေမယ့် ရင်ထဲတော့ မကောင်းဘူးပေါ့။ အဲ့ဒါတွေက မိသားစုကို ထိခိုက်မှာစိုးလို့ သူတို့ကို ထုတ်မပြတာပါ”လို့ စည်သူ(ပလပ်ကျွတ်) က ပြောပါတယ်။

အမျိုးသမီးက ခရစ်ယာန် ဘာသာဝင်ဖြစ်ပေမယ့် သူ့အပေါ် ပါရမီဖြည့်ဖက်ကောင်းဖြစ်ပုံကိုလည်း စည်သူ (ပလပ်ကျွတ်)က အခုလို ဆိုပါတယ်။

“ကျနော့် အမျိုးသမီးက ခရစ်ယာန်ဘာသာဆိုပေမယ့် ကျနော် ခရီးတွေ သွားရင် မျက်နှာသစ်တော်ရေ ကပ်ပေးတယ်။ ဆီမီးအမွှေးတိုင် ထွန်းပေးတယ်။ ဘုရား မရှိခိုးရုံတမယ် အကုန်လိုက်လုပ်ပေးပါတယ်။ ကျနော့်အတွက် အရမ်းတော်တဲ့ မိန်းမပါ။ အရမ်းအလိုက်သိတဲ့ မိန်းမပါ။ ဖုန်း Password တောင် ပေးမသိလည်း ဘာမှ မပြောဘူး”လို့ စည်သူ (ပလပ်ကျွတ်)က ပြောပါတယ်။

ယခင်ကတော့ မိသားစုကို ထုတ်မပြခဲ့ပေမယ့် ရှေ့ဆက်ပြီး အသိသတိထားပြီး မိသားစုကိုပဲ ချစ်ပါတော့မယ်လို့လည်း စည်သူ(ပလပ်ကျွတ်)က ဆိုပါတယ်။

“ကျနော် Facebook မှာ Single လို့ ရေးထားတာ လူပျိုပုံစံမျိုးနဲ့ နေတာဆိုတော့ ပရိသတ်တွေက ချစ်တာလည်း ပါမယ်။ ကိုယ်လည်း ကြောင်တာတွေ ပါမယ်။ အဲ့ဒါတွေ မြင်ရင်မကောင်းဘူးလေ။ ကျနော် ဇူလိုင် ၁၉ ကစပြီး အသိသတိထားပြီး ဖြတ်လိုက်ပါပြီ။ အဲ့လို စိတ်တွေ မရှိတော့ပဲဖြတ်ပြီး မိသားစုကို ပဲချစ်ပါတော့မယ် ”လို့ စည်သူ(ပလပ်ကျွတ်) က ပြောပါတယ်။

စည်သူ (ပလပ်ကျွတ်) ကတော့ ရုပ်ရှင်နှင့် ဗီဒီယို ဇာတ်ကားပေါင်းများမှာ ဟာသ သရုပ်ဆောင် အဖြစ် ပါဝင် သရုပ်ဆောင်ပြီး စူပါဟီးရိုး ဝတ်စုံတွေ ဝတ်ဆင်လေ့ရှိတာကြောင့် လူသိများသူ တဦးပါ။ စည်သူ (ပလပ်ကျွတ်) ကတော့ “ကိုပေါ” ရုပ်ရှင် ဇာတ်ကားထဲမှာလည်း ပါဝင် သရုပ်ဆောင်ထားပါတယ်။

You may also like these stories:

ဈေးရောင်းတာထက် အနုပညာအလုပ်ကို ပိုလုပ်ချင်တဲ့ စည်သူ (ပလပ်ကျွတ်)

ဖိနပ်ရောင်းရတဲ့ ငွေနဲ့ အိမ်လခ ပေးနိုင်ခဲ့တဲ့ စည်သူ (ပလပ်ကျွတ်)

အနုပညာအလုပ် မရှိချိန် ဖိနပ် ရောင်းနေတဲ့ စည်သူ(ပလပ်ကျွတ်)

The post သိက္ခာကျမှာစိုးလို့ မိသားစုကို ဖွက်ထားသလို ဖြစ်ခဲ့တဲ့ စည်သူ (ပလပ်ကျွတ်) appeared first on ဧရာဝတီ.

Galaxy Star ပြိုင်ပွဲမှ ပရိသတ်အားပေးမှု ရရှိခဲ့တဲ့ အဆိုတော် နေမင်းအိမ်က ဒီလို ကိုဗစ်ကာလမှာ ရောဂါတွေ ဖြစ်နေပေမယ့် ဒုတိယမြောက်သမီးလေးကို ရောဂါကင်းစင်စွာနဲ့ မွေးဖွားလာတာက သူ့အတွက် ဆုလာဘ်တခုပါလို့ ဧရာဝတီကို ဆိုပါတယ်။

“ကျနော့် ဒုတိယမြောက် သမီးရတနာလေးကတော့ ဇူလိုင်လ၂၆ ရက်နေ့ က မွေးဖွားခဲ့ပါတယ်။ ၇ ပေါင်နဲ့ ၈ အောင်စပါ။ ပင်လုံဆေးရုံမှာ မွေးဖွားခဲ့တာပါ။ အမျိုးသမီးရော ကလေးလေးရော နေကောင်းပါတယ်။ သမီးနာမည်ကိုတော့ သေချာတော့ မစဉ်းစားရသေးဘူး။ သေချာလေးရွေးပြီးတော့ ပေးမှာပါ”

“သမီးလေးကို အေးအေးချမ်းချမ်းလေး ဖွားမြင်စေချင်တာလေ။ အခုလို ရောဂါတွေ ဖြစ်နေပေမယ့် သမီးလေးက ရောဂါကင်းစင်စွာနဲ့ မွေးဖွားလာတာက ကျနော့်အတွက် ဆုလာဘ်တခုပါ။ ကျနော့်သား မွေးတုန်းကလည်း ကျနော်ရော အခု ကျနော့်အမျိုးသမီးနဲ့ စိတ်ကူးတူတာလေးတခု ရှိတယ်။ ကျနော်တို့ ဖြတ်သန်းခဲ့ရတဲ့ ပုံစံမျိုးနဲ့ မတူတဲ့ ပုံစံလေးနဲ့ မိဘနဲ့ သားသမီးကြားမှာ ကိုယ့်ဘက်ကလည်း ကိုယ်လိုချင်တာပဲ ဖြစ်ရမယ်ဆိုတဲ့ ခံယူချက် မထားထားဘူး”

“ပြီးတော့ ကိုယ့်ရဲ့ သားသမီး ကြီးပြင်းလာတဲ့ ပတ်ဝန်းကျင် အခြေအနေ၊ စိတ်ကူးစိတ်သန်းပေါ် မူတည်ပြီး ကျနော်တို့ကိုယ်တိုင် သိအောင် ကြိုးစားပြီး သူတို့လေးတွေနဲ့ တိုင်ပင်ပြီး အကောင်းဆုံး ပံ့ပိုးပေးသွားဖို့ပဲ တိုင်ပင်ထားပါတယ်”လို့ နေမင်းအိမ်က ပြောပါတယ်။

သမီးလေး ရလာချိန်မှာတော့ တည်တည်ငြိမ်ငြိမ်နဲ့ ရှေ့ဆက်သွားဖို့ ပိုအရေးကြီးလာတယ်လို့ နေမင်းအိမ်က ဆိုပါတယ်။

“ကျနော် တည်တည်ငြိမ်ငြိမ်နဲ့ ရှေ့ဆက်သွားဖို့ ပိုအရေးကြီးလာတာပေါ့။ အရှေ့မှာ သားလေးဆိုတော့ ကျနော့်ကိုယ်ကျနော် လူငယ်တယောက်လို သတ်မှတ်ထားတယ်လို့ ခံစားနေတုန်း သားအဖ နှစ်ယောက် အတူတူ သူငယ်ချင်းလို ပေါင်းမယ်။ ညီအစ်ကိုလို နေမယ်ဆိုပြီး ကျနော် ဘယ်သွားသွားလည်း ခေါ်သွားဖြစ်တယ်”

“အဲ့လိုနေဖြစ်တာ သမီးလေးမွေးတော့ ကိုယ့်ကိုယ်ကိုယ် ပြန်စဉ်းစားတော့ သားယောကျာ်းလေး ရှိတဲ့ အဖေတယောက် မဟုတ်တော့ဘဲ သမီးလေးပါ ရှိလာတော့၊ သားရော သမီးရော ရှိလာတော့ လူငယ်လိုနေထိုင်ချင်ပေမယ့် နေထိုင်မှု လွန်ကဲလို့ မရဘူး ဆိုတာလေးတွေ သိလာတယ်။ သားလေးကိုရော၊ သမီးလေးကိုရော ချစ်ပေးကြတဲ့သူတွေကို အရမ်းကျေးဇူးတင်ပါတယ်”လို့ နေမင်းအိမ်က ပြောပါတယ်။

နေမင်းအိမ်ကတော့ Galaxy Star Myanmar 2017 မှာ Winner ဆုရရှိပြီး ပရိသတ် အားပေးရရှိလာခဲ့သူတဦးဖြစ်လို ပထမဆုံး တကိုယ်တော်ခွေ “အရေးကြီးဆုံး” လို့ အမည်ရတဲ့ တေးအယ်ဘမ်လ်လည်း ထွက်ရှိထားပါသေးတယ်။

You may also like these stories:

ဘင်ဂျမင်ဆုမ်းရဲ့ သီချင်းအသစ်ကို ချီးကျူးလိုက်တဲ့ ဖြူဖြူကျော်သိန်း

COVID-19 နဲ့ ပတ်သက်ပြီး သတင်းမှားတွေ မယုံကြဖို့ ဖြိုးမြတ်အောင် ပြော

The post ဒုတိယမြောက်ရင်သွေးက သမီးလေးဖြစ်လို့ ပျော်နေတဲ့ နေမင်းအိမ် appeared first on ဧရာဝတီ.

ဇာတ်လမ်းတွဲ ပိုစတာ ထွက်ရှိစဉ်ကတည်းက ဇာတ်လမ်းထဲက ကာရိုက်တာများနဲ့ ပတ်သက်ပြီး ပရိသတ်တွေရဲ့ ဝေဖန်မှုတွေ ရှိနေတဲ့ “ရင်ခုန်သံ ၇၄ ရက်” ဇာတ်လမ်းတွဲထဲက ကာရိုက်တာများဟာ စိတ်ကူးယဉ် ဖန်တီးထားတာတွေသာဖြစ်တယ်လို့ ဒါရိုက်တာ မေဘရဏီက ဧရာဝတီကို ပြောပါတယ်။

“ဒီဇာတ်လမ်းမှာဆိုရင် Fantasy Romance အဓိကပေါ့။ စိတ်ကူးယဉ်ဇာတ်လမ်း အဓိက၊ ဒီထဲက ရှိတဲ့ဇာတ်ကောင်တွေက အပြင်မှာ တကယ်ရှိတဲ့ ဇာတ်ကောင်တွေလည်း မဟုတ်ဘူး။ ဒဏ္ဍာရီထဲက ဇာတ်ကောင်တွေလည်း မဟုတ်ဘူး။ လုံးဝကို စိတ်ကူးယဉ်သက်သက် မိုးနတ်သားဆိုတာ တခြားကာရိုက်တာ သက်သက်တခုပေါ့”

“ဒီကားထဲမှာပဲပါတဲ့ ကာရိုက်တာ သက်သက်တခုပါ။ ပြီးတော့ ဇာတ်လမ်းကလည်း Fantasy ဆိုပေမယ့်လည်း Romance လေးတွေ အများကြီးပါတယ်။ စောင့်ကြည့်ပေးရင် သိပါလိမ့်မယ်”လို့ မေဘရဏီက ပြောပါတယ်။

ဒီဇာတ်လမ်းတွဲထဲမှာတော့ နတ်သားများအနေနဲ့ ဇာတ်ကောင်များကို ဖန်တီးထားပြီး ဝတ်စားဆင်ယင်မှုများကိုလည်း ဝေဖန်တာတွေ ရှိနေခဲ့ပါတယ်။

ခါရာရဲ့ဇာတ်ကောင် ဝတ်စုံနဲ့ မိတ်ကပ် အပြင်အဆင်များကိုလည်း သိကြားမင်း၊ တရုတ်နတ်သားဆိုတဲ့ ပြောဆိုမှုများလည်း ရှိနေခဲ့ပြီး ဒီဇာတ်ကောင်တွေကတော့ စိတ်ကူးယဉ်သက်သက်သာဖြစ်တယ်လို့ သိရပါတယ်။

“ရင်ခုန်သံ ၇၄ ရက်”ဇာတ်လမ်းတွဲထဲက မိုးနတ်သား ကာရိုက်တာကတော့ ရိုက်ဖူးသမျှထဲမှာ သဘောအကျဆုံး ကာရိုက်တာပဲ။ ဒီကားက တကယ့်ကို စိန်ခေါ်မှု အရမ်းဖြစ်တယ်။ အရမ်းရင်ခုန်တယ်။ အရမ်းမျှော်လင့်ထားတယ်။ တခါမှ မမြင်ဖူးသေးတဲ့ ကာရိုက်တာပေါ့”

“ အခုမြင်ရတဲ့အခါမှာ သရုပ်ဆောင်တွေရဲ့ စီးမျောမှုပေါ့။ ခါရာရဲ့စီးမျောမှုက အရမ်းကို ကိုက်ညီနေတယ်။ ခါရာတင် မဟုတ်ဘူး။ ဒီကားမှာပါတဲ့ သရုပ်ဆောင်တွေ မိုးယံဇွန်၊ မြတ်နိုးအေး တခြားသရုပ်ဆောင်တွေလည်း ကာရိုက်တာနဲ့အရမ်းလိုက်ဖက်တယ်” လို့ မေဘရဏီက ပြောပါတယ်။

“ရင်ခုန်သံ ၇၄ ရက်” ဇာတ်လမ်းတွဲကတော့ ဒါရိုက်တာ မေဘရဏီရဲ့ ဒုတိယမြောက် ဇာတ်လမ်းတွဲဖြစ်ပြီး ဒီကားဟာ တခါမှ မမြင်ဖူးသေးတဲ့ ဇာတ်လမ်းဖြစ်တာကြောင့် စိန်ခေါ်မှု ဖြစ်တယ်လို့ ဆိုပါတယ်။

“ခါရာက မိုးနတ်သား ကာရိုက်တာနဲ့ အရမ်းလိုက်တာ။ သူဒီဝတ်စုံ ဝတ်တဲ့အချိန်မှာလည်း သူနဲ့အရမ်းကိုလိုက်ပြီးတော့ ထင်းထွက်နေတာ။ သူနဲ့က အပြင်မှာ ခင်တာကြာပြီ ဆိုပေမယ့်လည်း ဒီကားရိုက်တော့ သူ့ကို မိုးနတ်သားလို့ပဲ ခေါ်တာ။ အရမ်းစီးမျောပြီး အရမ်းကွက်တိ ကျလွန်းတယ်”

“ဝတ်စုံနဲ့ ပတ်သတ်ပြီးတော့ အများကြီး အချိန်ယူ ပြင်ဆင်ခဲ့တယ်။ ဇာတ်ကား မရိုက်ခင် ၂ လလောက်အလိုအထိ ဝတ်စုံကို မိတ်ကပ်တွေလိမ်းပြီး ဝတ်ကြည့်ပြီးမှ လုပ်ခဲ့တာ။ ဝတ်စုံက ပေါ့ပေါ့ပါးပါးရှိပြီးတော့ နတ်သားဆိုတော့ ဖြူသန့်နေပြီး ရွှေရောင်အဆင်းရှိတဲ့ နတ်သား ပုံစံမျိုးဖြစ်အောင် လုပ်ထားတာပါ” လို့ မေဘရဏီက ပြောပါတယ်။

“ရင်ခုန်သံ ၇၄ ရက်”ဇာတ်လမ်းတွဲကိုတော့ သြဂုတ်လအတွင်းမှာ MNTV ရုပ်သံလိုင်းမှာ ထုတ်လွှင့်ပြသသွားမှာဖြစ်ပါတယ်။ ဒီထဲမှာတော့ ခါရာ ၊ မိုးယံဇွန် ၊ မြတ်နိုးအေး ၊ ပြည့်ဝတီမောင် ၊ မေသူထွန်း ၊ ထက်ဦးထွဋ် တို့က ပါဝင်သရုပ်ဆောင်ထားတာဖြစ်ပြီး ရွှေရည်ရွှန်းလဲ့ရဲ့ ဇာတ်ညွှန်းကို မေဘရဏီက ရိုက်ကူးထားတာပဲ ဖြစ်ပါတယ်။

You may also like these stories:

ရုပ်ရှင် ရိုက်ကူးရေးများ ပြန်လည် ခွင့်ပြုတော့မည်

မိုးတွင်းမှာ “အလွမ်းရာသီ” သီချင်းသစ် ထွက်မယ့် နန်းဆုရတီစိုး

Tom Cruise တို့ ရိုက်ကူးရေးအဖွဲ့ကို နော်ဝေမှာ Quarantine ကင်းလွတ်ခွင့်ပေး

The post “ရင်ခုန်သံ ၇၄ ရက်” ဇာတ်လမ်းတွဲက စိတ်ကူးယဉ် ဇာတ်လမ်းပါ appeared first on ဧရာဝတီ.