လူရွှင်တော်တော်တော်များများရဲ့ သင်ဆရာ ၊ မြင်ဆရာ ၊ ကြားဆရာတဦးဖြစ်ခဲ့တဲ့ ဟာသလူရွှင်တော်မန်းဝင်းဟာ တသက်မမေ့နိုင်စရာ ပြက်လုံးကို ချန်ရစ်ခဲ့ပြီး ဒီပြက်လုံးတွေလည်း နောက်လူတွေက အမြဲပြက်ပေးနေဦးမှာဖြစ်တယ်လို့ လုပ်ဖော်ကိုင်ဖက် လူရွှင်တော်များက အခုလို ပြောပြထားပါတယ်။
လူရွှင်တော် ထက်ထက်
“ကျနော်တို့ရဲ့ အစ်ကို ဆရာ အပေါင်းအသင်းပေါ့။ အထူးသဖြင့်တော့ အစ်ကိုလိုမျိုး ရင်းနှီးတဲ့ ဟာသလူရွှင်တော်ကြီး ကိုမန်းဝင်း သူ့ရဲ့နောက်ဆုံးခရီးလေးမှာ လူရွှင်တော်တယောက်အနေနဲ့ရော ဆရာတယောက်အနေနဲ့ရော တော်တော်စိတ်မကောင်းဖြစ်မိပါတယ်။ အရမ်းဝမ်းနည်းမိပါတယ်။ သူ့ဆီကလည်း ပညာတွေ ယူခဲ့ဖူးတော့ သူ့ရဲ့စိတ်ရင်းစိတ်ထား အရမ်းကောင်းတဲ့ လူရွှင်တော်ပါ”
“သူနဲ့ ပတ်သက်ပြီးတော့ တသက်လုံး မမေ့တဲ့ ပြက်လုံး ရှိပါတယ်။ မင်းသားလျှောက်တဲ့ ပြက်လုံးမျိုးပေါ့။ ကျနော်ရယ်၊ ကိုမန်းဝင်းရယ်၊ ကိုမန်းဝင်းရဲ့သမီး ဟေမာမန်းဝင်းရယ်၊ သားဖြစ်သူ ချမ်းသာမန်းဝင်းရယ်၊ နောက်ဒါရိုက်တာ ကိုကြည်သာရယ် အဲ့ ၅ ယောက်ဆုံရင် အဲ့ပြက်လုံးက အရမ်းရယ်ရတာ။ ပရိသတ်လည်း ခွက်ထိုးခွက်လှန် ရယ်ပါတယ်”
“နောက်ပိုင်း ၁ ယောက်မပါ၊ ၂ယောက်မပါ ဖြစ်တဲ့အခါမှာ ပြက်ချင်တယ် အဲ့ပြက်လုံးကို။ ဒါပေမဲ့ သူမပါလာတော့ ပရိသတ် သိပ်မရယ်ဘူး။ ဒါကတော့ ကျနော့်ဘဝအတွက် တသက်လုံး အမှတ်တရဖြစ်စေမှာပါ။ အစ်ကိုရယ် နေကောင်းအောင်နေဗျာ။ ပြန်ကမယ်ဗျာ။ ပြန်ကကြမယ်ဗျာ”
လူရွှင်တော် ဧရာ
“သူကအရင်သွားနှင့်တာပေါ့။ ဘာပဲပြောပြော ဘဝအမောတွေက လွတ်သွားပြီပေါ့။ ကျနော်တို့က ဒီလောကဓံခံရင်းနဲ့ ကျန်ခဲ့ကြမှာပေါ့”
လူရွှင်တော် ဒီလုံး
“ကိုမန်းဝင်းက ကျနော်တို့ရဲ့ သင်ဆရာ၊ မြင်ဆရာ၊ ကြားဆရာထဲမှာပါပါတယ်။ ကျနော်လည်း အချစ်ဆုံး လူရွှင်တော်တယောက်ပါ။ စိတ်မချမ်းသာဘူး။ ကိုမန်းဝင်း ကောင်းရာမွန်ရာ ရောက်ပါစေ။ ကိုမန်းဝင်းရဲ့ပြက်လုံးလေးတွေကို ကျနော်တို့ အမြဲပြက်နေမှာပါဗျာ”
ကံပွင့်
“လူဆိုတာက သေမျိုးချည်းပဲလေ။ တနေ့ကျရင်တော့ ဒီလမ်းကို သွားကြရမှာပဲ။ ဒါပေမဲ့ ခက်တာက လူတွေအားလုံးက သေပေမယ့် ကျနော်တို့ လူရွှင်တော်ကျတော့ ပြည်သူက ချစ်တဲ့အခါကျတော့ ဦးမန်းဝင်းကျတော့ ပိုဆိုးတာပေါ့။ ပရိသတ်က အရမ်းချစ်တယ်။ ပရိသတ်ကိုလည်း သူကချစ်တယ်။ ပရိသတ်ကချစ်တဲ့ သူတယောက်ရဲ့ နောက်ဆုံးခရီးက ဒီပရိသတ်တွေ အများကြီးနဲ့တွေ့ရတော့ ဝမ်းသာသင့်တာ မဟုတ်ပေမယ့် ရင်ထဲမှာတော့ ကြည်နူးမှုပဲပြောပြော သူ့နောက်ဆုံးခရီးကို အားရတာပေါ့”
“ဦးမန်းဝင်းရဲ့ နောက်ဆုံးခရီးမှာ ဘဝကူးတွေကောင်းပါစေ။ နောင်တမလွန်မှာလည်း ပြည်သူချစ်တဲ့ အနုပညာရှင် ဖြစ်ပါစေ။ တကယ်လို့ နိဗ္ဗာန် မရောက်သည့်တိုင် သူချစ်တဲ့မိသားစု သူချစ်တဲ့ ပရိသတ်နဲ့ ပြန်လည်ဆုံတွေ့ပါစေလို့ ဆုတောင်းပေးပါတယ်”
You may also like these stories:
“ဦးမန်းဝင်း ရုတ်တရက် ဆုံးပါးသွားတာ မယုံနိုင်ခဲ့ဘူး”
The post တသက်မမေ့နိုင်စရာ ပြက်လုံးများကို ချန်ရစ်ခဲ့သူ လူရွှင်တော် မန်းဝင်း appeared first on ဧရာဝတီ.
