ဒီတပတ်မှာတော့ မြန်မာရုပ်ရှင်ကား ပရိသတ်တွေအတွက် IMDB Rating (9.1) ရရှိထားပြီး နိုင်ငံတကာ ရုပ်ရှင်ပွဲတော် တွေမှာလည်း ဆုတွေရရှိထားတဲ့ “မုဒြာရဲ့ခေါ်သံ” (Mudras Calling) ရုပ်ရှင်ဇာတ်ကားအကြောင်း ညွှန်းပေးချင်ပါတယ်။
“မုဒြာရဲ့ခေါ်သံ” ရုပ်ရှင်ကားကို ဒါရိုက်တာ ခရစ္စတီးနားခီ ရိုက်ကူးထားပြီး မင်းသား ဇာဏ်ခီ၊ မင်းသမီး လှယဉ်ကျေးနဲ့ သရုပ်ဆောင် နန်းဝေဝေထွန်းတို့ ပါဝင် သရုပ်ဆောင်ထားပါတယ်။
ဇာတ်လမ်း အကျဉ်းကတော့ ဇာတိက မြန်မာပြည်မှာ မွေးဖွားပြီး ငယ်စဉ်ကတည်းက အမေရိကားမှာ နေထိုင် ကြီးပြင်း လာတဲ့ ဂျေဒန်ဝီလျံ (Jaden Willian) ဆိုတဲ့ လူငယ်တယောက်ဟာ သူ စာတမ်းပြုစုနေတဲ့ မြန်မာ့ရိုးရာ တူရိယာဂီတ ပညာတွေအကြောင်း လေ့လာဖို့ မြန်မာနိုင်ငံကို အလည် ရောက်လာပါတယ်။
ဂျေဒန်တယောက် မြန်မာနိုင်ငံကို အလည်ရောက်လာရင်း မြန်မာ့ရှေးဟောင်း သမိုင်းဝင်နယ်မြေ၊ ပုဂံဒေသမှာ မြန်မာ့ရိုးရာ ဂီတပညာတွေ အကြောင်းလေ့လာရင်း ပုဂံခရီးစဉ်က အပြန် သူ့ဇာတိမြို့ မန္တလေးမှာ မြန်မာလူမျိုး သူ့ရဲ့ မိဘအရင်းတွေကို ပြန်လည် ရှာဖွေတဲ့အကြောင်း ရိုက်ကူးထားတာပါ။
ဇာတ်လမ်းက ရိုးစင်းပေမယ့် အဓိကဇာတ်ဆောင် ဇာဏ်ခီရဲ့သရုပ်ဆောင်မှုနဲ့ ဒါရိုက်တာ ခရစ္စတီးနားခီရဲ့ ရိုက်ကူး တင်ပြချက်တွေက ချီးကျူးစရာ ကောင်းလှပါတယ်။ မြန်မာ့ဟန်၊ မြန်မာ့ဓလေ့၊ မြန်မာ့ယဉ်ကျေးမှု သဘာဝအလှတွေကို အသားပေး ရိုက်ကူးထားပြီး ဇာတ်ကားမှာ အသံပိုင်းစနစ်ကိုလည်း ဂရုတစိုက် သေချာ ဖန်တီးထားတာ တွေ့ရပါတယ်။
“မုဒြာရဲ့ခေါ်သံ” ရုပ်ရှင်ဟာ နိုင်ငံတကာရုပ်ရှင်ပွဲတော် ၉ ခုမှာ ပြသခဲ့ပြီး “Mexico International Film Festival 2017” ပွဲမှာ Silver Palm Award ဆု၊ “International Student Newcomer Woman Film Festival 2017” ပွဲမှာ Platinum Award ဆုနဲ့ စုစုပေါင်း ဆု ၂ ဆု ရရှိထားပါတယ်။
“ဥပါယ်တံမျဉ်” ရုပ်ရှင်ဇာတ်ကားနဲ့ ပရိသတ်အားပေးမှု တခဲနက် ရရှိထားတဲ့ ဒါရိုက်တာ ခရစ္စတီးနားခီရဲ့ ပထမဆုံး ပွဲဦးထွက်လက်ရာ “မုဒြာရဲ့ခေါ်သံ” ရုပ်ရှင်ကားဟာ ရုံတင်ပြသဖို့ အချိန် ၄ နှစ်ကျော် ကြန့်ကြာခဲ့တယ်လို့ သိရပါတယ်။ “မုဒြာရဲ့ခေါ်သံ” ရုပ်ရှင်ကားကို မတ်လ ၁၆ ရက်နေ့ကနေစပြီး မြန်မာတနိုင်ငံလုံး၊ JCGV ရုပ်ရှင်ရုံများမှာ ပြသသွားမယ်လို့ သိရပါတယ်။
မြင်တွေ့ရခဲတဲ့ မြန်မာ့ရိုးရာ ယဉ်ကျေးမှု အငွေ့အသက် ချစ်စရာ ဓလေ့ထုံးတမ်းတွေနဲ့ မြန်မာ့ အလှရှုခင်းတွေကို သေချာရိုက်ပြထားပြီး နိုင်ငံတကာရုပ်ရှင်ပွဲတော်တွေမှာ ဆုတွေရရှိထားတဲ့ ရုပ်ရှင်ကားကောင်း တကားမို့ ရုပ်ရှင်ချစ် ပရိသတ်တွေ သွားရောက် ကြည့်ရှုနိုင်အောင် ညွှန်းလိုက်ပါတယ်။
ဆက်စပ် သတင်းလင့်ခ် – ပရိသတ်များ စောင့်ဆိုင်းနေကြသည့် “မုဒြာရဲ့ခေါ်သံ” ရုပ်ရှင် မကြာမီ ရုံတင်တော့မည်
The post မြန်မာ့ဓလေ့၊ ယဉ်ကျေးမှု သဘာဝအလှတွေကို အသားပေး ရိုက်ကူးထားတဲ့ “မုဒြာရဲ့ခေါ်သံ” appeared first on ဧရာဝတီ.