Miss Myanmar World 2016 ဆုရှင် အလှမယ် Bella (ခ) မြတ်သီရိလွင်က MTV ရိုက်ကူးမှုများမှာ အတွေ့များ လာရပြီး နောက်ပိုင်း မှာတော့ ဖြည်းဖြည်းချင်း သရုပ်ဆောင်လုပ်သွားမယ်လို့ ဧရာဝတီကို ပြောပါတယ်။
“သရုပ်ဆောင်က လုပ်သွားမှာပါ။ Bella က ဖြည်းဖြည်းချင်းသွားတာ ပိုကြိုက်တယ်။ လှေကားဆိုတာ ၂ ထစ် ၃ ထစ်ကို ကျော်လှမ်းရင် ချော်လဲတတ်တယ်လေ။ Bella ကိုကမ်းလှမ်းလာတာတွေ ရှိတယ်။ အဲဒါတွေကို အကောင်းဆုံး ရိုက်ကူး နေတယ်။ နောက်ကမ်းလှမ်း လာမှာတွေကိုလည်း စောင့်နေတယ်။ ဇာတ်ကားကတော့ နောက်ပိုင်း ဖြည်းဖြည်းချင်း ရိုက်သွားမှာပါ”လို့ အလှမယ် Bella က ပြောပါတယ်။
မကြာသေးမီက ရိုက်ကူးထားတဲ့ အဆိုတော် နီနီခင်ဇော်ရဲ့ “ချစ်လျက်လမ်းခွဲ” Music Video မှာ Transgender (အမျိုးသားမှ အမျိုးသမီးအဖြစ် လိင်ပြောင်းထားသူ) တယောက်နေရာက သရုပ်ဆောင်တာနဲ့ ပတ်သက်ပြီး ပရိသတ်က ပဟေဠိ ဖြစ်ခဲ့တယ်လို့ ပြောပါတယ်။
အဲဒီသီချင်းမှာ Bella ကို ပထမ အမျိုးသမီးတယောက်အဖြစ် တွေ့မြင်ရပြီး နောက်ပိုင်းမှာ သူဟာ လိင်ခွဲစိပ်မှု ပြုလုပ်ထားတဲ့ အမျိုးသားတယောက် ဖြစ်နေတဲ့သူ တယောက်အကြောင်းကို ရိုက်ကူးထားတာဖြစ်ပါတယ်။
ဒါနဲ့ ပတ်သက်လို့ Bella က ‘“မနီနီခင်ဇော် သီချင်းမှာ မနီက အဲဒီသီချင်းကို စရေးကတည်းက Bella ကို ဒီနေရာမှာ ထားမယ်ဆိုပြီး ရေးတာပေါ့နော်။ အစကတည်းက အဲဒီနေရာမှာ သရုပ်ဆောင်ရမယ်ဆိုတာ ကြိုသိနေတယ်။ အဓိကကတော့ ပရိသတ်ကို နည်းနည်းလေး လှည့်ကွက်လေးလုပ်ထားတာပါ” လို့ ဆိုပါတယ်။
ဆက်လက်ပြီး “တချို့ပရိသတ်တွေက နားမလည်ဘူး။ Bella ဒါဘာလဲပေါ့။ ကိုစည်သူဇော်က ဘာလဲပေါ့။ နောက်ပိုင်းကျမှ Comment တွေ ပြန်ဖတ်ကြည့်မှ သိသွားကြတာ။ Bella နာမည်ကလည်း Bella မဟုတ်တော့ဘူး။ Facebook မှာရော အရမ်းရင်းနှီးတဲ့ သူတွေကတွေကရော ကိုစည်သူဇော်လို့ ခေါ်ကြတယ်”လို့ Bella ကပြောပါတယ်။
အဆိုတော် စန္ဒီမြင့်လွင်နဲ့ ဆိုဖီယာတို့သီဆိုထားတဲ့ IDFC (I Don’t Fxxking Care) သီချင်းမှာလည်း မော်ဒယ် ဂျက်ဆီကာဒါဒါနဲ့ အတူ Lesbian (အမျိုးသမီးချင်း ချစ်ခင် နှစ်သက်သူ) ပုံစံမျိုး သရုပ်ဆောင်ခဲ့တဲ့အပေါ်မှာလည်း ပီပြင်မှု ရှိတဲ့အတွက် ပရိသတ်များက သဘောကျနှစ်သက်နေကြပါတယ်။
“Bellaက သိပ်ပြီးတော့ မရွေးချယ်ဘူး။ Bella ပေးလာတဲ့အလုပ်ကို အကောင်းဆုံး လုပ်နိုင်မယ်ထင်ရင် လုပ်လိုက်တယ်။ ဒီ FG Entertainment ကလုပ်တဲ့ မစန္ဒီမြင့်လွင်နဲ့ မဆိုဖီယာတို့ သီချင်းမှာလည်း မဂျက်ဆီကာဒါဒါနဲ့ Lesbian ပုံစံလေး ရိုက်ဖြစ်တယ်။ အဲဒါကိုကြည့်ပြီးတော့ မနီနီခင်ဇော်က Transgender ပုံစံကို ကမ်းလှမ်းတယ်လို့ ထင်ပါတယ်” လို့ ပြောပါတယ်။
Bella ကတော့ FG Entertainment နဲ့ စာချုပ် ချုပ်ဆိုထားပြီး Music Video တွေ ဆက်လက်ရိုက်ကူးသွားဖို့ရှိပြီး ကြော်ငြာတွေ ၊ မဂ္ဂဇင်းဓာတ်ပုံတွေ ရိုက်နေတယ်လို့သိရပါတယ်။ အလှမယ် Bella ကတော့ အသက် ၁၇ နှစ် အရွယ်မှာ ၂၀၁၆ ခုနှစ်အတွက် Miss Myanmar World ဆုကိုရရှိထားပြီး အပြုံးချိုချိုလေးနဲ့ ပရိသတ်သဘောကျနှစ်သက်တဲ့ အလှမယ်တယောက် ဖြစ်ပါတယ်။
The post “သရုပ်ဆောင် အလုပ်ကို ဖြည်းဖြည်းချင်း လုပ်သွားမယ်” ဆိုတဲ့ အလှမယ် Bella appeared first on ဧရာဝတီ.