ကမ္ဘာကျော် ဘောလိဝုဒ် မင်းသမီး Priyanka Chopra ဟာ သူရဲ့ဘဝအတ္ထုပ္ပတ္တိကို ဖော်ပြမယ့် စာအုပ်အသစ် တအုပ်ကို ဖြန့်ချိဖို့ ပြင်ဆင်ထားပြီ ဖြစ်ပါတယ်။
အသက် ၃၅ နှစ်အရွယ် ရှိပြီဖြစ်တဲ့ မင်းသမီး Priyanka Chopra ဟာ အိန္ဒိယမှာ သူမွေးဖွားခဲ့ချိန်ကနေ စလို့ ၂၀၀၀ ပြည့်နှစ်မှာ Miss Universe မယ်ကမ္ဘာဆုကို ရရှိခဲ့ချိန် အလယ်၊ ဘောလိဝုဒ် မင်းသမီးကနေ ဟောလိဝုဒ်မင်းသမီး တဦးဖြစ်လာခဲ့ချိန် အဆုံး ရှည်လျားတဲ့ သူ့ဘဝ ခရီးစဉ်ကို ပြောပြထားတဲ့ “Unfinished” ဆိုတဲ့ စာအုပ်မှာ သူအခုလို အောင်မြင်လာခဲ့တဲ့ အကြောင်း အသေးစိတ် ဖော်ပြထားတယ်လို့ ဆိုပါတယ်။
“Quantico” ရုပ်သံဇာတ်လမ်းတွဲ မင်းသမီး Priyanka က သူရဲ့အကြောင်းဟာ အိပ်မက်တွေကို ဖြည့်ဆည်းချင်တဲ့သူတွေ၊ ဖန်မျက်နှာကျက်တွေကို ထိုးဖောက်ချင်တဲ့ လူတွေအတွက် ခွန်အားပေးနိုင်လိမ့်မယ်လို့ မျှော်လင့်တဲ့အကြောင်းလည်း ပြောဆိုထားပါတယ်။
သတင်းစာ ရှင်းလင်းပွဲ တခုမှာတော့ မင်းသမီး Priyanka က “ဒီစာအုပ်မှာ ပါဝင်တဲ့ အရာတွေက ကျမလိုပဲ ရိုးသားတယ်၊ ဟာသ ရွှင်မြူးတယ်၊ စိတ်ဓာတ်ခွန်အား ကောင်းတယ်၊ ရဲရင့်တယ်၊ မဟုတ်မခံ စိတ်ရှိတယ် ဆိုတာ ဖော်ပြမှာပါ။ ကျမက အမြဲတန်း တသီးတသန့် နေခဲ့တဲ့သူပါ။ ကျမရဲ့ ခရီးလမ်း တလျှောက်လုံးမှာ ကျမရဲ့ ခံစားချက်တွေအကြောင်း ဘယ်တုန်းကမှ ထုတ်မပြောခဲ့ပေမယ့် ကျမ အခုထုတ်ပြောဖို့ အဆင်သင့် ဖြစ်ပါတယ်”
“ကျမဟာ အကြောက်အလန့် မရှိ ကြီးပြင်းခဲ့ရပါတယ်။ ပြီးတော့ အပြောအဆိုတွေကို ပြောင်းလဲဖို့ ၊ ဖန်မျက်နှာကျက် တွေကို ဖောက်ထွက်ဖို့ အထူးသဖြင့် အမျိုးသမီးတွေ၊ လူတွေရဲ့ မျှော်လင့်ချက်တွေ အကြောင်းမှာ ကျမဇာတ်လမ်းကို ပြောပြမှာပါ။ အမျိုးသမီးတွေက ဘာကိုမှ ပိုင်ဆိုင်နိုင်မှာ မဟုတ်ဘူးလို့ ပြောကြတယ်။ ကျမက အရာအားလုံး လိုချင်ပါတယ်။ လူတိုင်းကလည်း ပိုင်ဆိုင်နိုင်တယ်လို့ ကျမယုံကြည်တယ်။ ကျမက သက်သေပြခဲ့ပါတယ်” လို့ ပြောကြားခဲ့ပါတယ်။
“Unfinished” စာအုပ်ကိုတော့ အိန္ဒိယ၊ အမေရိကန်နဲ့ ယူကေနိုင်ငံတို့မှာ နောက်နှစ်ကျရင် စတင်ရောင်းချမှာ ဖြစ်ပြီး Penguin Random House က ထုတ်ဝေဖြန့်ချိမှာ ဖြစ်ပါတယ်။ “Baywatch” ရုပ်ရှင်စတား Priyanka ရဲ့ ခရီးလမ်း စာအုပ်ဟာ သူကာလကြာရှည် တိုက်တွန်းလုပ်ဆောင်ခဲ့တဲ့ တန်းတူညီမျှမှုနဲ့ အမျိုးသမီး အခွင့်အရေး အတွက် ကမ်ပိန်းတွေ ပြီးတဲ့နောက် ထွက်ရှိလာခဲ့တာ ဖြစ်ပါတယ်။
သူဟာ ရုပ်ရှင်လုပ်ငန်းမှာ အမျိုးသမီးတွေအတွက် အခွင့်အရေး ရရှိစေဖို့ အခိုင်အမာ ရပ်တည်သွားမယ်လို့ မကြာသေး ခင်ကပဲ ထုတ်ပြောထားပါသေးတယ်။
Ref:contactmusic
The post ဘဝ အတ္ထုပ္ပတ္တိစာအုပ် ထုတ်ဝေဖြန့်ချိမယ့် ဘောလိဝုဒ် မင်းသမီး Priyanka Chopra appeared first on ဧရာဝတီ.