“Miss Myanmar World 2018 Winner” ဆု ရရှိထားတဲ့ ဟန်တီက ဒီနှစ် သူမရဲ့ မွေးနေ့မှာတော့ အလိုတော်ပြည့် ကျောင်းမှာ အလှူလုပ်ဖြစ်မယ်လို့ ဧရာဝတီကို ဆိုပါတယ်။
“ဒီနှစ် မွေးနေ့အတွက် မွေးနေ့အကြိုပွဲကို အလိုတော်ပြည့်ကျောင်းမှာ လုပ်ပါမယ်။ ဇူလိုင်လ၂၁ ရက်နေ့မှာ We love တွေလည်း ဖိတ်ထားတယ်။ ပြီးတော့ ဟန်တီ ချစ်ရတဲ့ သူငယ်ချင်းတွေ၊ ဆွေမျိုးတွေကို အဓိက ဖိတ်ပြီး ဟန်တီမွေးနေ့ အလှုလေးလုပ်မှာပါ”လို့ Miss Myanmar World 2018 ဟန်တီက ဧရာဝတီကို ပြောပြပါတယ်။
“Miss Myanmar World” အလှမယ် ဟန်တီက နှစ်စဉ် မွေးနေ့ ပြုလုပ်နေကြ ဖြစ်တာကြောင့် မထူးခြားပေမယ့် ဒီနှစ် မွေးနေ့မှာတော့ ထူးခြားတာ ရှိတယ်လို့လည်း ဆိုပါတယ်။ Miss ဆုကိုပါ ရရှိထားတာ ဖြစ်တဲ့အတွက် အလှူအပြင့် ပရဟိတအလုပ်ကိုပါ အရင်ကထက် ပိုပြီးလုပ်ဆောင်မယ်လို့လည်း ဆိုပါတယ်။
“တကယ့် မွေးနေ့ အစစ်အမှန် ဇူလိုင်လ ၂၅ ရက်နေ့မှာတော့ ပရဟိတအလှူ လုပ်ဖြစ်မယ်။ ဟန်တီ ဘယ်ကို လှူရမယ်၊ ဘယ်နားမှာ ပိုလိုအပ်လဲဆိုတာကို တိုင်ပင်နေတယ်။ သေချာတိုင်ပင်ပြီးမှလည်း ပရဟိတ လုပ်မှာ။ ဒါကြောင့် မွေးနေ့အကြို အလှူပွဲဆိုပြီး အရင်လုပ်ဖြစ်လိုက်တာပါ” လို့လည်း ဆိုပါတယ်။
ဟန်တီက Miss ပြိုင်ပွဲတွေ စတင်ဝင်ပြိုင်ရင်း ယခုဆိုရင် ၄ နှစ် အတွေ့အကြုံ ရရှိနေပြီလို့ ဆိုပါတယ်။ အရင် Miss ရခဲ့တဲ့ အတွေ့အကြုံနဲ့ အခုထပ်မံပြီး Miss ပြိုင်ပွဲဝင်တဲ့အတွေ့အကြုံများနဲ့ ပတ်သက်လို့လည်း ဟန်တီက အခုလို ဆိုပါတယ်။
“လွန်ခဲ့တဲ့နှစ်တွေက ရခဲ့ဖူးတဲ့ဆုတွေနဲ့ အခုရလိုက်တဲ့ ဆုကတော့ ကွာခြားမှုတွေ အများကြီး ရှိပါတယ်။ အရင် အခေါက်တွေကထက် ပိုတိုးပြီးတော့ ပန်းတိုင်ကို မှန်းထားတယ်။ ဖြေးဖြေးချင်းလည်း လုပ်ဆောင်နေပါတယ်။ ၄ နှစ်တာ ကာလအတွင်းမှာလည်း Miss တယောက် အနေနဲ့ပဲ လုပ်ဆောင်ခဲ့တယ်။ ပရဟိတတွေ အများကြီး လုပ်ဆောင်ခဲ့တယ်။ ခုချိန်မှာလည်း ဟန်တီ နောက်တခေါက် ထပ်ရသွားတဲ့အတွက် ဒါတွေက ထပ်လုပ်ဆောင်နေမှာပါ”လို့ ဟန်တီက ပြောပါတယ်။
ဟန်တီက အသက် ၁၄ နှစ်အရွယ်တည်းက Miss ပြိုင်ပွဲကနေတဆင့် အနုပညာလောကထဲကို ဝင်ရောက်လာခဲ့တာဖြစ်ပြီး ဆယ်ကျော်သက်အရွယ်မှာ အနုပညာအလုပ်တွေကို စတင်လုပ်ခဲ့ရတဲ့ ခံစားချက်များကိုလည်း ဧရာဝတီကို အခုလို ဆိုပါတယ်။
“ဟန်တီ့ရဲ့ ဒီဆယ်ကျော်သက် ဘဝပျော်ရွှင်မှုကတော့ မရှိခဲ့ဘူး။ ကစားကွင်းတို့ ၊ဘာတို့ မရှိခဲ့ဘူး။ ဘယ်လို ပြောရမလဲ၊ ငယ်ငယ်တုန်းကလေ ကျောင်းတွေ၊ အတန်းတွေ ပျက်ခဲ့ရတယ်။ ဒီတော့ စာတွေပြန်လိုက်ပြီးတော့ သူများတွေထက် အချိန်ပိုယူပြီးတော့ စာသင်ရတာတွေရှိခဲ့တယ်။ သူငယ်ချင်းတွေနဲ့ ကုန်ဆုံးချိန်တောင် နည်းခဲ့တယ်။ ကိုယ်ရွေးချယ်တဲ့ လမ်းမို့ ကျေနပ်ပါတယ်။ အဲဒီအရွယ် ကတည်းကသာ စမလုပ်ခဲ့မိရင် ခုလို ဒီနေရာတောင် ရောက်လာမှာ မဟုတ်ဘူး။ ဒီတော့ကျေနပ်ပါတယ်” လို့ ဟန်တီက ဆိုပါတယ်။
ဟန်တီက “Miss World International 2018” ပြိုင်ပွဲအတွက် ပညာရေးကိုလည်း ၆ လ နားထားတယ်လို့ ဆိုပြီး ပြိုင်ပွဲရက်က နီးကပ်နေပြီး ပြည်ပကို နိုဝင်ဘာလမှာ သွားရောက်ယှဉ်ပြိုင်ရမှာဖြစ်တယ်လို့ သိရပါတယ်။
“ခုချိန်မှာတော့ ကိုယ့်ကိုယ်ကို အရမ်းဂရုစိုက်နေရပါတယ်။ သွားပြိုင်ဖို့က အချိန်လေးလတောင်မရှိတော့ဘူး။ အရမ်းနီးနေပြီ။ အဓိကလုပ်နေတာတော့ Training တွေ၊ ပြိုင်ပွဲမှာ Challenge တွေရှိတယ်။ Talent တွေလည်း မျိုးစုံရှိတယ်။ အဲဒါတွေအတွက် အခုဟန်တီ ပြင်ဆင်မှုတွေနဲ့ပဲ အချိန်ကုန်နေတယ်ပေါ့နော်။ အရင်က ပြိုင်ခဲ့ဖူးတဲ့ အတွေ့အကြုံတွေကြောင့် အရမ်းကြီးတော့ တုန်လှုပ်မှုမရှိဘူး။ ဟန်တီ့အနေနဲ့ ဘယ်လိုမျိုး ပြင်ဆင်သွားရမယ် ဆိုတာသိတယ်” လို့ ဟန်တီက ဆိုပါတယ်။
“ဘယ်လိုပွဲမှာ ဘယ်လို ပြင်ဆင်ရမယ်၊ ဘယ်လိုပွဲမှာ ဘာတွေနဲ့ လိုက်တယ် ဆိုတာကအစ အကောင်းဆုံး ပြင်ဆင်သွားမှာပါ” လို့လည်း ဟန်တီက ဆိုပါတယ်။
The post မွေးနေ့အကြို အလှူတွေ လုပ်ဖြစ်မယ့် “Miss Myanmar World 2018” အလှမယ် ဟန်တီ appeared first on ဧရာဝတီ.