အဆိုတော် Liam Payne ဟာ ဂျိမ်းစ်ဘွန်းအဖြစ် သရုပ်ဆောင်ဖို့ ဒါမှမဟုတ်ရင် Marvelနဲ့ DC Comics ရုပ်ရှင်တခုခုမှာ သရုပ်ဆောင်ချင်နေတယ်လို့ သိရပါတယ်။ ‘Strip That Down’ သီချင်းအဆိုတော် Liam ဟာ သရုပ်ဆောင်လောကဖက် ခြေလှမ်းဖို့ ဟန်ပြင်နေပြီး ကမ္ဘာကျော်ဇာတ်ရုပ်တခုမှာ ပါဝင်နိုင်ဖို့ မျက်စိကျနေတယ်လို့လည်း ဆိုပါတယ်။
သူ့အိပ်မက်ဖြစ်တဲ့ ရုပ်ရှင်သရုပ်ဆောင်အလုပ်နဲ့ ပတ်သက်လို့ အဆိုတော် Liam က “ကျနော် အရိုးသားဆုံးပြောရမယ်ဆိုရင် ဂျိမ်းစ်ဘွန်းဖြစ်ချင်ပါတယ်။ ဘွန်းအနေနဲ့ Daniel Craig ကျနော် သဘောကျပါတယ်။ သူဟာ အကောင်းဆုံ းဂျိမ်းစ်ဘွန်း တယောက်လည်း ဖြစ်ပါတယ်” လို့ The Sun သတင်းစာကို ပြောကြားခဲ့ပါတယ်။
ဆက်ပြီးသူက “ကျနော်က စူပါဟီးရိုးရုပ်ရှင်တွေကို သဘောကျပါတယ်။ ဒါကြောင့် Marvel ရုပ်ရှင်တခုမှာ ပါဝင်ချင်ပါတယ်။ ကျနော် ကလေးဘဝကတည်းက စူပါဟီးရိုးတယောက်ဖြစ်ချင်ခဲ့တာပါ။ ပြီးတော့ Marvel မှာပဲ ဖြစ်ဖြစ်၊ DC မှာပဲဖြစ်ဖြစ် ကျနော်တကယ် ပါဝင်ချင်ပါတယ်။ ကျနော်သရုပ်ဆောင်ရတာ သဘောကျပါတယ်။ သီချင်းဆိုတာက ကျနော့်အချစ်ဦး ဖြစ်ပေမယ့် သရုပ်ဆောင်တာကိုလည်း ကျနော် လုပ်ချင်ခဲ့တာပါ”လို့ ဆိုပါတယ်။
အဆိုတော် Liam ဟာ ဒါရိုက်တာ Steven Spielberg ပြန်လည်ရိုက်ကူးမယ့် ‘West Side Story’ ရုပ်ရှင်မှာ လည်းပါဝင်ဖို့ ပြောဆိုနေတယ်လို့ဆိုပါတယ်။ ရုပ်ရှင်သတင်းရင်းမြစ်တခုက “Liam ကိုချဉ်းကပ်ခဲ့ပြီး သူ့ကိုလည်း ထည့်သွင်းစဉ်းစားနေပါတယ်။
သရုပ်ဆောင် အေးဂျင့်တွေကို စကားပြောနေချိန်မှာ အကကနိုင်တဲ့ အသက် ၁၅ နှစ်ကနေ ၂၅ နှစ်ကြား အဆိုတော်တွေရှာဖို့ အမိန့်ထုတ်ထားပါတယ်။ Liam ဟာ Spielberg နဲ့ အလုပ်လုပ်ဖို့ အခွင့်အရေးကို စိတ်လှုပ်ရှားစွာနဲ့ စောင့်မျှော်နေပါတယ်လို့ ဆိုပါတယ်။
အခုလိုမျိုး Liam ရဲ့ ရုပ်ရှင်လောကဖက် ချဉ်းကပ်မှုဟာ ‘Dunkirk’ ရုပ်ရှင်မှာပါဝင်ခဲ့တဲ့ သူ့ရဲ့ One Direction အဖွဲ့သား Harry Styles ရဲ့ ခြေလှမ်းအတိုင်း လိုက်လံလုပ်ဆောင်တာလည်း ဖြစ်ပါတယ်။ Liam ဟာ သရုပ်ဆောင်ချင်တဲ့အကြောင်း ပြောဆိုခဲ့ဖူးပြီး လင်းနို့လူသားအဖြစ် သရုပ်ဆောင်ဖူးချင်တဲ့အကြောင်း ထုတ်ပြောခဲ့ဖူးပါတယ်။
BANG Showbiz မီဒီယာကိုပြောကြားရာမှာ သူက “ကျနော့်ရဲ့ အကြီးမားဆုံး ရည်မှန်းချက်ကတော့ သရုပ်ဆောင်လုပ်ဖို့ဖြစ်ပါတယ်။ ကျနော် ရုပ်ရှင်တခုကိုကြည့်လိုက်တိုင်း တနည်းနည်းနဲ့ ခံစားရပါတယ်။ လင်းနို့လူသားပဲဖြစ်ဖြစ် တခြား ဘာဇာတ်ကောင်ပဲဖြစ်ဖြစ် သရုပ်ဆောင်ချင်ပါတယ်” လု့ိ ပြောကြားခဲ့ပါတယ်။
Ref: contactmusic
The post ဂျိမ်းစ်ဘွန်းအဖြစ် သရုပ်ဆောင်ဖို့ စိတ်ဝင်စားနေတဲ့ အဆိုတော် Liam Payne appeared first on ဧရာဝတီ.