အဆိုတော် Justin Bieber ဟာ လက်ထပ်ခဲ့ပြီးပြီလို့ သတင်းထွက်နေတဲ့ ဇနီးလောင်း Hailey Baldwin နဲ့ အပြင်ထွက်ချိန်မှာတော့ စိတ်ခံစားချက်တွေကို မထိန်းနိုင်ဖြစ်ခဲ့ပုံရပါတယ်။ သူတို့စုံတွဲနှစ်ဦးကို Beverly Hills မှာ ရိုက်ကူးခဲ့တဲ့ ဓာတ်ပုံမှာ မြင်တွေ့ခဲ့ရတာဖြစ်ပြီး ကားထဲထိုင်နေကြချိန်မှာ အသက် ၂၄ နှစ်အရွယ် Bieber က သူ့ရဲ့မျက်နှာကို လက်နဲ့ အုပ်ထားပြီး အသက် ၂၁ နှစ်အရွယ် Baldwin သူတို့ကို စိုးရိမ်တကြီးနဲ့ ကြည့်နေတဲ့ မြင်ကွင်းဖြစ်ပါတယ်။
အဆိုတော် Bieber ရဲ့ ချစ်သူဟောင်း Selena Gomez က စိတ်ရောဂါကုဆေးရုံကို တက်ရောက်ခဲ့ရတယ်ဆိုတဲ့ သတင်းထွက်ပေါ်ပြီး တရက်အကြာမှာ အခုလိုမျိုး လူမြင်ကွင်းမှာ ခံစားချက်တွေ ထိန်းမနိုင်သိမ်းမရဖြစ်နေတဲ့ ပုံစံကို မြင်တွေ့ခဲ့ကြရတာလည်းဖြစ်ပါတယ်။
လက်ထပ်ခဲ့ပြီးပြီလို့ယူဆရတဲ့ ကြင်စဦးဇနီးမောင်နှံနှစ်ဦးဟာ ကြီးမားတဲ့ အနက်ရောင် Range Rover ကားထဲမှာ ထိုင်နေခဲ့ကြတာကို မြင်တွေ့ခဲ့ရပြီး မော်ဒယ် Baldwin ကတော့ ကားမောင်းသူနေရာမှာ ထိုင်နေခဲ့တာကို တွေ့ရပါတယ်။
ပြီးခဲ့တဲ့ တရက်တုန်းကတော့ အဆိုတော် Bieber ကို မျက်နှာသုန်သုန်မှုန်မှုန်နဲ့ မြင်တွေ့ခဲ့ရပြီး လော့စ်အင်ဂျလိစ်မှာရှိတဲ့ ဘုရားကျောင်းကနေ ထွက်လာချိန်မှာ သူငယ်ချင်းတွေရဲ့ နှစ်သိမ့်မှုကို ခံယူနေခဲ့တာကိုလည်း တွေ့ရပါတယ်။ ဒါ့အပြင် ရေချိုးဝတ်စုံကိုဝတ်ပြီး ခြေဗလာနဲ့ သူ့အိမ်အပြင်က လမ်းမထက်မှာ စိုးရိမ်မှုလွန်ကဲနေတဲ့ပုံစံနဲ့ သူ့ကို မြင်တွေ့ခဲ့ရပြီးလည်း ဖြစ်ပါတယ်။
Bieber ရဲ့ ချစ်သူဟောင်း အဆိုတော် Selena ဟာ သူ့ရဲ့ ကျောက်ကပ်အစားထိုးကုသမှုကနေ စိတ်ပိုင်းဆိုင်ရာ ထိခိုက်မှုနဲ့ စိတ်ရှုပ်ထွေးမှုတွေကို ခံစားခဲ့ရပြီးနောက် ဆေးရုံကိုရောက်ရှိသွားတယ်လို့ TMZ မီဒီယာမှာ ဖော်ပြပါတယ်။
အသက် ၂၆ နှစ်အရွယ် Selena ဟာ ပြီးခဲ့တဲ့စက်တင်ဘာလအစောပိုင်းတုန်းကလည်း Cedars-Sinai ဆေးကုသရေးစင်တာမှာ ဆေးကုသမှုခံယူခဲ့ရပြီး တဖန် သွေးတွင်းဆဲလ်လျော့ကျမှုနဲ့ စိတ်ပိုင်းဆိုင်ရာ ပြဿနာတွေကြောင့် ပြီးခဲ့တဲ့ သီတင်းပတ်မှာပဲ ဆေးရုံပြန်တက်လိုက်ရပြီး IV ဆေးသွင်းရတဲ့အထိ ဖြစ်ခဲ့ပါတယ်။
ပြီးခဲ့တဲ့လတုန်းကတော့ အဆိုတော် Selena ဟာ အဆိုးမြင်မှတ်ချက်စကားတွေကြောင့် လူမှုကွန်ရက်မီဒီယာတွေပေါ်ကနေ ခေတ္တအနားယူမယ်ဆိုတဲ့ သတင်းကိုလည်း ကြေညာခဲ့ပါတယ်။ တချိန်တည်းမှာပဲ မကြာသေးခင်တုန်းက Bieber နဲ့ Baldwin တို့လက်ထပ်လိုက်ကြပြီဖြစ်တယ်လို့ သတင်းတွေ ထွက်ခဲ့ပေမယ့် နှစ်ဖက်လုံးကတော့ အတည်ပြုတာမျိုး မရှိသေးပါဘူး။
Ref: news.com.au
The post ချစ်သူဟောင်း Selena Gomez ဆေးရုံတက်နေရလို့ ငိုကြွေးခဲ့တဲ့ Justin Bieber appeared first on ဧရာဝတီ.