ပြီးခဲ့တဲ့ ရက်ပိုင်းက ကျင်းပခဲ့တဲ့ အဝေးသင် တက္ကသိုလ်၊ ဒဿနိက မေဂျာ၊ ဒုတိယနှစ် စာမေးပွဲရဲ့ အင်္ဂလိပ်စာမေးခွန်းမှာ စိုင်းစိုင်းခမ်းလှိုင်ရဲ့ Show ပွဲနဲ့ပတ်သက်ပြီး မေးခွန်းထုတ်ထားခဲ့ပါတယ်။ ဒါနဲ့ ပတ်သက်လို့ အဆိုတော် စိုင်းစိုင်းခမ်းလှိုင်က သူ့ရဲ့ ပရိသတ်တွေ တင်မကဘဲ လူကြီးများကပါ အသိအမှတ်ပြုတဲ့အတွက် ကြည်နူးပီတိဖြစ်မိတယ်လို့ ပြောပါတယ်။
“မကြာခဏ လွန်ခဲ့တဲ့နှစ်တွေကတည်းက တချို့စာမေးပွဲမေးခွန်းတွေမှာ စိုင်းစိုင်းရှိုးသွားကြည့်ရင်တို့ဆိုတဲ့ မေးခွန်းမျိုးတွေ တွေ့ဖူးပါတယ်”
“အဲဒီအချိန်မှာ ဘယ်လိုခံစားရလဲဆိုတော့ စာမေးပွဲ မေးခွန်းထုတ်တဲ့ တက္ကသိုလ်က ဆရာမကြီးတွေ၊ ဆရာကြီးတွေကအစ ကျနော့်ကို မြန်မာနိုင်ငံက အဆိုတော် တယောက်အနေနဲ့ အသိအမှတ်ပြုပြီးတော့ သတိထားမိတယ်ဆိုတဲ့ ခံစားချက်ရတဲ့အတွက် ပရိသတ်တွေ တင်မကဘူး၊ လူကြီးတွေ ဆရာကြီးဆရာမကြီးတွေပါ မြန်မာနိုင်ငံမှာ စိုင်းစိုင်းဆိုတဲ့ အဆိုတော်ရှိပါလား အသိအမှတ်ပြုပါလားဆိုပြီး ကြည်နူး ပီတိဖြစ်ပါတယ်”လို့ စိုင်းစိုင်းခမ်းလှိုင်က ပြောပါတယ်။
မေးခွန်းထည့်သွင်း အမေးခံရခြင်းဟာ ပထမဆုံးအကြိမ် မဟုတ်တော့ဘဲ မကြာခဏ အမေးခံရပြီး ယခုနှစ်မှာတော့ လူပိုသိသွားတာလို့ သိရပါတယ်။
စိုင်းစိုင်းကတော့ မကြာသေးခင် အချိန်က “ပြီးခဲ့သောဇာတ်လမ်းအကျဉ်း” ဆိုတဲ့ တကိုယ်တော်ဖျော်ဖြေပွဲကို ပြုလုပ်ထားပြီး အဲ့ဒီဖျော်ဖြေပွဲရဲ့အခွေကိုတော့ ဒီဇင်ဘာလမှာ ပြန်လည်ထုတ်ပေးမယ်လို့ ပြောပါတယ်။
“ပြီးခဲ့သောဇာတ်လမ်းအကျဉ်းကို ဒီဗီဒီအနေနဲ့ရော Audio အနေနဲ့ရော ပြန်ပြီးတော့ထုတ်ဖို့ရှိပါတယ်။ ဒီဇင်ဘာမှာ ထွက်ပါမယ်။ ဒီနှစ်ထဲမှာ ရုပ်ရှင်တကား ရိုက်ဖို့အတွက် ပြင်ဆင်နေပါတယ်။ ကျနော်ရဲ့ကားတွေ ရုံတင်ဖို့ အတွက်လည်း ထုတ်လုပ်ရေးတွေက ကြိုးစားနေပါတယ်” လို့စိုင်းစိုင်းခမ်းလှိုင်က ပြောပါတယ်။
စိုင်းစိုင်းခမ်းလှိုင်ကတော့ သူ့ရဲ့မွေးရပ်ဇာတိဖြစ်တဲ့ တောင်ကြီးမြို့ရဲ့ တန်ဆောင်တိုင်ပွဲကို သွားရောက်ဖို့အတွက်လည်း သူငယ်ချင်းတွေနဲ့ တိုင်ပင်နေပြီး သွားဖြစ်ဖို့များတယ်လို့ ပြောပါတယ်။
စိုင်းစိုင်းခမ်းလှိုင်က လတ်တလောမှာတော့ နိုဝင်ဘာလ ၁၁ ရက်နေ့မှာ ပြုလုပ်မယ့် အဆိုတော် G Fatt ရဲ့ တကိုယ်တော် ဖျော်ဖြေပွဲမှာလည်း ပါဝင်ပြီး သီဆိုဖျော်ဖြေပေးသွားမှာ ဖြစ်ပါတယ်။
The post တက္ကသိုလ်စာမေးပွဲ မေးခွန်းမှာ ထည့်သွင်းမေးခံရလို့ ပီတိဖြစ်နေတဲ့ စိုင်းစိုင်းခမ်းလှိုင် appeared first on ဧရာဝတီ.
