အဆိုတော် Rihanna ဟာ ၂၀၁၉ ခုနှစ်မှာ အယ်လ်ဘမ်အသစ်ဖြန့်ချိတော့မယ်ဆိုတဲ့ သတင်းတွေကို အတည်ပြုလိုက်ပါတယ်။
သူ့ရဲ့နှုတ်ခမ်းနီကြော်ငြာတခုမှာ Instagram အသုံးပြုသူတဦးက “ဘယ်တော့လောက် အယ်လ်ဘမ်အသစ်ကို ဖြန့်ချိမှာလဲ။ အယ်လ်ဘမ်အသစ်ဖြန့်ချိမယ့် ရက်အတိအကျ သိခွင့်ရှိမလား” ဆိုတဲ့မေးခွန်းကို မေးမြန်းခဲ့တာဖြစ်ပါတယ်။ အဲဒီအချိန်မှာပဲ အဆိုတော် Rihanna က “၂၀၁၉” လို့ ပြန်လည် ဖြေကြားခဲ့တာဖြစ်ပါတယ်။
အခုမကြာမီထွက်ရှိတော့မယ်လို့ဆိုတဲ့ အယ်လ်ဘမ်ဟာ သူ့အတွက်တော့ ၂၀၁၆ ခုနှစ်မှာ ထွက်ရှိခဲ့တဲ့ အဋ္ဌမမြောက် အယ်လ်ဘမ် “ANTI” ပြီးတဲ့နောက် ပထမဆုံးဖြန့်ချိမယ့်အယ်လ်ဘမ်လည်းဖြစ်လာမှာပါ။
သူက စတူဒီယိုထဲကို ပြန်လည်ရောက်ရှိနေပြီဖြစ်တဲ့အကြောင်း အခုနှစ်အတွင်းမှာပဲကြေညာခဲ့ပေမယ့် အတူပူးတွဲ သီဆိုသူနဲ့ သီချင်းစာရင်းအပါအဝင် အယ်လ်ဘမ်နဲ့ ပတ်သက်တဲ့ အကြောင်းအရာတွေကို မသိရှိရသေးပါဘူး။
သူ့ရဲ့ အသံပိုင်းဆိုင်ရာ ပရိုဂျူဆာ Kuk Harrell က သူ့ရဲ့ Instagram တိုက်ရိုက်ဗီဒီယိုမှာ R9 လု့ိခေါ်တဲ့ အယ်လ်ဘမ်ဟာ အရမ်းကို ထူးခြားကောင်းမွန်တဲ့အကြောင်းပြောထားပါတယ်။
“ANTI” အယ်လ်ဘမ်ဟာ ၅၉ ကြိမ်မြောက် ဂရမ်မီဆုပေးပွဲမှာ အကောင်းဆုံး Urban Contemporary အယ်လ်ဘမ်နဲ့ အကောင်းဆုံး အသံသွင်းယူမှုဆုတို့အတွက် ဆန်ခါတင်စာရင်းမှာ ပါဝင်ခဲ့ပါတယ်။
အဲဒီ့အယ်လ်ဘမ်ဟာ Rihanna ရဲ့ ဒုတိယမြောက် နံပါတ် ၁ ပွဲဦးထွက်နဲ့ အဌမမြောက် ထိပ်တန်း အယ်လ်ဘမ် ၁၀ ခုစာရင်းထဲရောက်ခဲ့ပါတယ်။
သူဟာ အခုနှစ်အစောပိုင်းမှာ ထွက်ရှိခဲ့တဲ့ “Ocean’s 8” ရုပ်ရှင်မှာ Met Gala ပွဲက ရတနာကို ခိုးယူဖို့ အခြား အမျိုးသမီး ၇ ဦးနဲ့အတူ ပါဝင်လှုပ်ရှားနေတဲ့ ဟက်ကာတဦးအဖြစ် ပါဝင်ခဲ့ပါတယ်။
၂၀၁၉ ခုနှစ်အတွက် Super Bowl ပွဲချိန်ဝက်ဖျော်ဖြေမှုအတွက် ကမ်းလှမ်းခံခဲ့ရပေမယ့် အမေရိကန်နိုင်ငံမှာ ရဲတပ်ဖွဲ့ရဲ့ ကြမ်းကြုတ်မှုကို ဆန့်ကျင်တဲ့အနေနဲ့ ဒူးထောက်ဆန္ဒပြခဲ့ပြီးနောက် အမေရိကန်ဘောလုံးပြိုင်ပွဲကနေ ဖယ်ရှားခံခဲ့ရတဲ့ Colin Kaepernick ကိုထာက်ခံတဲ့အနေနဲ့ ကမ်းလှမ်းမှုကို ပယ်ချခဲ့ပါတယ်။
Ref:variety
The post ၂၀၁၉ ခုနှစ်မှာ အယ်လ်ဘမ်သစ်ဖြန့်ချိမည်ဟု Rihanna အတည်ပြု appeared first on ဧရာဝတီ.