အဆိုတော် မီမီဝင်းဖေက ဂီတအလုပ်တွေကို ပြန်လုပ်နေဖြစ်ပြီး မိဘနှစ်ပါးကလည် းနိုင်ငံခြားကနေ မြန်မာပြည်ကို ပြန်လာတဲ့အတွက် ဝမ်းသာနေကြောင်း ဧရာဝတီကို ပြောပါတယ်။
“အမှန်အတိုင်းပြောရင်တော့ မမီက ၁၀ နှစ်လောက် နိုင်ငံခြားရောက်နေပါတယ်။ မေမေ၊ ဖေဖေတို့နဲ့ အချိန်ပေးတာပေါ့နော်။ အခုသူတို့ မြန်မာပြည် ပြန်လာတဲ့အခါကျတော့ မမီ အရမ်းဝမ်းသာပါတယ်။ ဒါဟာမမီရဲ့ ဘဝလေးကို မမီပြန်ရသလို ခံစားရပါတယ်။ မမီဘဝက တသက်လုံး သီချင်းတွေနဲ့ ဖြတ်သန်းခဲ့တဲ့ ဘဝတခုပေါ့နော်”လို့ မီမီဝင်းဖေက ဧရာဝတီကို ပြောပါတယ်။
တကျော့ပြန် ဂီတလှုပ်ရှားမှုတွေနဲ့ ပတ်သက်ပြီးလည်း မီမီဝင်းဖေက အခုလို ဆိုပါတယ်။
“Generation အရတော့ မမီသည် အရွယ်တခုကို ရောက်သွားပါပြီ။ Generation အဟောင်းတွေဖြစ်လာပြီပေါ့နော်။ မမီမှာ သူ့ဟာလေးနဲ့သူ ဆိုချင်တဲ့စိတ်ပေါ့နော်။ အပြည့်အဝ ရှိနေပါသေးတယ်။ အဲဒီစိတ်ရှိလို့လည်း လုပ်ဖြစ်သွားတာပါ။ မနှစ်ကဆို တကိုယ်တော်ပွဲလေး လုပ်ဖြစ်တယ်။ အခု ကိုဘိုဖြူနဲ့ အတွဲခွေလေး ထုတ်ဖြစ်တယ်။ ကိုယ့်Generationနဲ့ သင့်တော်မယ့် ပွဲလေးတွေလည်း ဆိုဖြစ်နေပါတယ်။ ဆိုတော့ မမီ ဂီတလောကမှာ ပျော်ဆဲပါပဲ”လို့ ဆိုပါတယ်။
မီမီဝင်းဖေက ဘိုဖြူနဲ့စုံတွဲသီဆိုထားတဲ့ “လွန်ဆန်နိုင်မလားအချစ်” တေးစီးရီးကို ဖြန့်ချိတော့မှာ ဖြစ်ပြီး ဒီအခွေနဲ့ ပတ်သက်လို့လည်း အခုလို ပြောပြပါတယ်။
“ကိုထီး(စိုင်းထီးဆိုင်)တို့၊ မအယ်လ်ခွန်းရီတို့နဲ့ ဆရာစိုင်းခမ်းလိတ် သီချင်းတွေ လုပ်ခဲ့တာတွေ ရှိတယ်။ မမီက မနိုရင်း (အယ်လ်ခွန်းရီ)ရဲ့သီချင်းနှစ်ပုဒ်။ ကျန်တာကတော့ ကိုထီး သီချင်းတွေပါ။ ကိုဘိုဖြူကလည်း ဆရာစိုင်းခမ်းလိတ်တို့ ကိုထီးတို့ကို တအားကြိုက်တဲ့သူပေါ့နော်။ လွှမ်းမိုးမှုလည်း ရှိပါတယ် ကိုဘိုဖြူ့အပေါ်မှာပေါ့။ မမီကကျတော့ ကိုထီးရဲ့ တပည့်အရင်းခေါက်ခေါက်ပါ”
“မမီကို ဒီလမ်းကြောင်းပေါ် ရောက်အောင်ဆွဲထုတ်ပေးတဲ့ သူတွေထဲမှာ ကိုထီးကလည်း အများကြီးလုပ်ပေးခဲ့တဲ့ အဆိုတော်ကြီးတယောက်ပါ။ မမီရဲ့ဆရာပေါ့နော်။ ကိုထီးကလည်း မရှိတော့ဘူးဆိုတော့ ကိုဘိုဖြူနဲ့က ခဏ ခဏပြောဖြစ်တယ်။ မမီကလည်း ဒီသီချင်းတွေကြိုက်တဲ့သူ၊ ကိုဘိုဖြူကလည်း ကြိုက်တဲ့သူ။ အခုလိုဖြစ်မြောက်အောင်ထုတ်ပေးတဲ့ ပရိုဂျုဆာရှိတဲ့အချိန်မှာ ထုတ်ဖြစ်သွားတာပါ”လို့ မီမီဝင်းဖေက ပြောပြပါတယ်။
ဒီအခွေမှာတော့ မီမီဝင်းဖေက စုံတွဲ ၄ ပုဒ်၊ Solo ၅ ပုဒ် ပါဝင်သီဆိုထားတယ်လို့ သိရပါတယ်။ ဒီအခွေထဲက သီချင်းတွေနဲ့ ပတ်သက်ပြီးလည်း မီမီဝင်းဖေက အခုလိုဆိုပါတယ်။
“အမှန်အတိုင်းပြောရရင် မမီလေ ကိုထီးတို့ မနိုရင်းတို့ သီချင်းတွေပြန်ဆိုမယ့်အချိန်မှာ နည်းနည်းစဉ်းစားတယ်။ ကိုထီးဆို မရှိတော့ဘူးပေါ့နော်။ တဖက်ကကျတော့လည်း အရမ်းဆိုချင်စိတ် ရှိတယ်။ တဖက်ကလည်း ဒီအတိုင်းလေးပဲ ထားချင်စိတ်။ အဲဒီစိတ်နှစ်ခုကြား စဉ်းစားစရာတွေဖြစ်ပြီး နောက်ဆုံးတော့ ဆိုချင်တဲ့စိတ်က ပိုအားသာသွားတာပေါ့နော်။ ပြီးတော့ သူတို့ကအကောင်းဆုံးလည်း လုပ်သွားတယ်။သူတို့က ကိုယ်ပိုင်ဖန်တီးမှုတွေလည်းဖြစ်တယ်။အဲဒီတော့ ဒီအတိုင်း ပဲထားလိုက်ရမလားဆိုတဲ့ စိတ်အများကြီးဖြစ်တယ်”
“တပိုင်းကကျတော့လည်း တန်ဖိုးထားပြီး ဒီအတိုင်းလေး ထားလိုက်မယ်ဆိုတဲ့စိတ် ဖြစ်ပါတယ်။ တဖက်ကကျတော့လည်း အရမ်းဆိုချင်စိတ် ရှိတယ်။သူတို့လုပ်သွားတဲ့ ဒီအလုပ်တွေကို ကြိုက်လွန်းလို့ ဆိုချင်လိုက်တာဆိုတဲ့စိတ်ဖြစ်တယ်။ အဲဒီနှစ်ခုကြားမှာ စဉ်းစားစရာတွေဖြစ်ပြီး နောက်ဆုံးတော့ ဆိုချင်တဲ့စိတ်က ပိုအားသာတာပေါ့နော်”လို့ မီမီဝင်းဖေက ပြောပါတယ်။
တေးသံရှင် မီမီဝင်းဖေက ဘိုဖြူနဲ့ ပထမဆုံး တွဲဆိုဖူးတဲ့ စုံတွဲတေးစီးရီး “လွန်ဆန်နိုင်မလား အချစ်”ကို ဇန်နဝါရီ ၁၉ ရက်နေ့မှာ လှိုင်းတေးသံသွင်းကနေ ဖြန့်ချိတော့မှာဖြစ်ပါတယ်။
The post တသက်လုံး သီချင်းတွေနဲ့ပဲ ဖြတ်သန်းမယ့် အဆိုတော် မီမီဝင်းဖေ appeared first on ဧရာဝတီ.