စာရေးဆရာမ ဂျူးရဲ့ နာမည်ကျော် ဝတ္ထုတပုဒ်ဖြစ်ခဲ့ပြီး ရုပ်ရှင်အနေနဲ့လည်း ဖန်တီးထားခဲ့ဖူးတဲ့ ‘ကြာတော့သည်လည်း မောင့်စကား’ကို သရုပ်ဆောင်အသစ်၊ ထုတ်ဝေသူအသစ်၊ ဇာတ်ညွှန်းအသစ်တွေနဲ့ ထပ်မံဖန်တီးထားပြီး မကြာခင်ရုံတင်ပြသတော့မှာ ဖြစ်ပါတယ်။
ဖေဖော်ဝါရီလ ၁ ရက်နေ့မှာ ရုံတင်ပြသတော့မယ့် ‘ကြာတော့သည်လည်း မောင့်စကား’ ရုပ်ရှင်ကားကြီးကို ဒါရိုက်တာမီးပွားက သရုပ်ဆောင် စိုင်းစိုင်းခမ်းလှိုင်၊ ထွန်းထွန်း၊ ဖွေးဖွေးတို့နဲ့ ရိုက်ကူးပြီး ဇာတ်ညွှန်းအသစ်အဖြစ် မိုးနီလွင်ကရေးသားပေးခဲ့တာ ဖြစ်ပါတယ်။ ဒါနဲ့ ပတ်သက်လို့ မိုးနီလွင်က ဧရာဝတီကို အခုလိုဆိုပါတယ်။
“ဒီဝတ္ထုကိုဇာတ်လမ်းခွဲရတဲ့အခါ သူများတွေကတော့ တာဝန်ကြီးတယ်လို့ထင်တယ်ပေါ့။ ဆရာမဂျုးရဲ့ဝတ္ထုကို ခွဲရတာ တာဝန်ကြီးတယ်ပေါ့နော်။ နောက်ပြီးလူကြိုက်လည်း အရမ်းများတဲ့ ဇာတ်ကောင်တွေလည်း ဖန်တီးရတယ်။ ပရိသတ်တွေ စွဲနေတဲ့ Plot တွေကိုသရုပ်ဖော်ရတယ် ။ ဒါပေမယ့်ကျနော်အနေနဲ့ အဲဒါတွေလုံးဝမရှိခဲ့ဘူး။ ဘာဖြစ်လို့လဲဆိုတော့ ကိုယ်တိုင်က ဆရာမဂျူးရဲ့ပရိသတ်ဖြစ်နေလို့” လို့ ဇာတ်ညွှန်းမိုးနီလွင်က ဧရာဝတီကိုပြောပါတယ်။
ဆရာမဂျူးရဲ့ နာမည်ကြီးဝတ္ထုကို ခွဲရတဲ့ဇာတ်ညွှန်းအတွက်စိတ်ဖိစီးမှုရှိ၊ မရှိဆိုတာနဲ့ပတ်သက်ပြီးလည်း အခုလိုဆိုပါတယ်။
“အဲဒီလိုတော့ မရှိဘူး။တခုပဲ။ ကျနော် ဒီကားကို စရိုက်တဲ့အချိန်မှာလည်းပါတယ်။ ရေးတဲ့အချိန်ကတည်းကပေါ့နော်။ ဝတ္ထုဖတ်တယ်၊ ရေးတယ်၊ ရိုက်ပြီးတော့လည်း Edit လုပ်တော့ အကြိမ်ကြိမ်ပြန်ကြည့်ရတယ်။ ပြန်ကြည့်ရတဲ့အခါမှာလည်း ခံစားရတဲ့ပုံစံတွေက မတူဘူး။ ရေးပြီးသွားတုန်းကတော့ ဇာတ်ညွန်းကို တအားသဘောကျတယ်။ ရိုက်တဲ့အချိန်မှာ ကျတော့ အခက်အခဲတွေအများကြီးပဲ။ ကိုယ်မကြိုက်ခဲ့တဲ့အပိုင်းတွေလည်း အများကြီးပဲ”
“ ကိုယ်ကဇာတ်ညွန်းရေး ဆရာတယောက်အနေနဲ့ဒီထက်ဖြစ်ချင်တာ၊ လိုချင်တာတွေရှိခဲ့တယ်။ ကားဆက်ပြီးတော့ ကြည့်လိုက်တဲ့အခါမှာလည်း အမှန်အတိုင်းပြောရရင် သိပ်ပြီးတော့သဘောမကျဘူး။ ကျနော်ဆိုတော်တော်ပြောတယ်။ ဟေ့ ဒီကားကို ငါပရိသတ်နဲ့အတူရုံမှာ ကြည့်ရမှာကြောက်တယ်လို့”
“ဒါပေမယ့် Editတွေပြန်ပြင်တယ်။ သီချင်းတွေထည့်တယ်။ လိုအပ်တဲ့အပိုင်းတွေပြန်ဖြည့်တယ်ပေါ့။ နောက်ဆုံးEditကို ပြန်ကြည့်တော့ ကျနော်တော်တော်ကြီးကြွေသွားတယ်။ ဒီကားကိုရေးခဲ့၊ ရိုက်ခဲ့တဲ့အတွက် နောင်တမရတဲ့ အထဲမှာ ပါတယ်ပေါ့။ ကိုယ်ကြိုက်ခဲ့တဲ့ဝတ္ထု ဒါကြီးကရုပ်ရှင်ကားကြီးတကားဖြစ်သွားတယ်။ ဒီဇာတ်ညွန်းကိုရေးတယ် ။ အကြိမ်ကြိမ်အခါခါလည်း ပြန်ပြင်တာတွေလည်းရှိပါတယ်”
“ဒါပေမယ့် First Draft ပေါ့ထွက်လာတော့.. ပထမဆုံး ဇာတ်ညွန်းကို ပရိုဂျုဆာ မခိုင်မာဝင်း(ရွှေစည်တော်)နဲ့ ဦးမီးပွားကိုပေးလိုက်တဲ့အခါသူတို့က အားသဘောကျတယ်ပေါ့။ မခိုင်မာရော၊ ဦးမီးပွားရောက ကိုမိုးနီရေးတဲ့ဇာတ်ညွန်းထဲမှာ ဒီဇာတ်ညွန်းကကကောင်းဆုံးပဲတဲ့”လို့ မိုးနီလွင်က ဆိုပါတယ်။
“ကြာတော့သည်လမ်း မောင့်စကား”ကို ရုံမတင်ခင်ကတည်းက ပရိသတ်များကြားမှာ ပါဝင်ကြတဲ့ သရုပ်ဆောင်များကို ဝေဖန်မှုများ ရှိနေခဲ့တာ ဖြစ်ပါတယ်။
“ဝတ္ထုကတအားရှည်တယ်။ ပြီးတော့နှစ်အုပ်တွဲလည်းဖြစ်နေတယ် ။ဒါကြောင့် ကျနော်ကအကုန်ကိုပြလို့မရဘူး။ အဲဒါကြောင့်ကျနော်တို့က ၂နာရီကြာတဲ့ ရုပ်ရှင်ဖြစ်တဲ့အတွက် ချန်ခဲ့ရတာတွေအများကြီးရှိပါတယ် ။ကျနော်တို့ဒီရုပ်ရှင်မှာ ဘာကိုပြချင်တာလဲပေါ့။ ပြချင်တာကအချစ်ပါဆိုတော့ အချစ်နဲ့ပတ်သက်ပြီးတော့ Plot တွေ ဇာတ်ရုပ်တွေဇာတ်ကောင် တွေ အဲဒီသုံးပွင့်ဆိုင်ဇာတ်လမ်းလေးကိုပဲ ဦးစားပေးပြီး ကျနော်သရုပ်ဖော်ခဲ့တယ်”လို့ဆိုပါတယ်။
“ကြာတော့သည်လမ်း မောင့်စကား” မှာပါဝင်ကြတဲ့ ဇာတ်ကောင်များရဲ့ ကာရိုက်တာအပိုင်းနဲ့လည်း ပတ်သက်လို့ မိုးနီလွင်က သူရဲ့ခံစားချက်ကို အခုလိုဆိုပါတယ်။
“ဆရာမရေးခဲ့တဲ့ ဇာတ်ကောင်သုံးယောက်စလုံးက လူသားအရမ်းဆန်တယ်။သူတို့သုံးယောက်သည် သုံးယောက်လုံးမှာ အကောင်းတွေချည်းပဲရှိမနေဘူး။ အဆိုးတွေပဲလည်း မဟုတ်ဘူး။ အကုန်လုံးက အကောင်းနဲ့အဆိုးမျှပြီးတော့ အချိန်တချိန်စီမှာ လှည့်ပြီးတော့ဖြစ်နေကြတယ် ။ ဒီဇာတ်ညွန်းကိုရေးနေတဲ့အချိန်မှာပဲ ကိုယ်ဝင်သွားခဲ့တဲ့ Mood က ဒီအချိန်မှာ “တင်တင်ဇော်” ဖြစ်သွားတယ် ။ဒီအချိန်မှာ “ဖြိုးကျော်” ဖြစ်သွားတယ် ။ဒီတချိန်မှာ “နန္ဒ” ဖြစ်သွားတဒီတချိန်မှာ နန္ဒဖြစ်သွားတယ် ။တလှည့်စီပါပဲ။ တစ်ယောက်တည်းကိုဦးတည်ပြီး ရေးသွားတယ်လို့တော့မရှိပါဘူး”
“ ဒါပေမယ့် အဓိကပြန်ပြောရရင် တင်တင်ဇော်သည် မိန်းကလေးဇာတ်ကောင်မလို့ အဲဒီအပိုင်းမှာတော့ နည်းပါလိမ့်မယ်။ နန္ဒ နဲ့ဖြိုးကျော်နေရာမှာတော့ ကျနော်ကယောကျာ်းလေးတယောက်ဖြစ်တဲ့အတွက် ပိုချစ်သွားတယ်လို့ ပြောလို့ ရမယ်။ သူတို့နှစ်ယောက်စလုံးနေရာမှာ ခံစားပေးနားလည်ပေးလို့ရတယ်။ ကျနော်နားမလည်နိုင်ဆုံးကတော့ တင်တင်ဇော်ပေါ့။ ခုထက်ထိ သူ့ကိုကျွန်တော်နားမလည်နိုင်သေးဘူး”လို့ ဧရာဝတီကို ဖြေပါတယ်။
ဒီဇာတ်ကားမှာ နန္ဒအဖြစ် စိုင်းစိုင်းခမ်းလှိုင်၊ ဖြိုးကျော်အဖြစ် ထွန်းထွန်းနဲ့ တင်တင်ဇော်အဖြစ် ဖွေးဖွေးတို့က ပါဝင်ထားကြတာ ဖြစ်ပါတယ်။
ဇာတ်ညွှန်းမိုးနီလွင်က လတ်တလော ‘ဒဏ္ဍာရီမိုး’ ရုပ်ရှင်နဲ့ ‘ကိုယ်ပွား’ရုပ်ရှင်ကားကြီးများအတွက် ဇာတ်ညွှန်းရေးထားပြီး ထပ်ထွက်လာမယ့် ရုပ်ရှင်ဇာတ်ညွှန်းတွေလည်းရှိတယ်လို့ သိရပါတယ်။
The post “ကြာတော့သည်လည်း မောင့်စကား” ရုပ်ရှင်ဇာတ်ညွှန်းရေးခဲ့ရတာ နောင်တမရတဲ့ မိုးနီလွင် appeared first on ဧရာဝတီ.