မကြာသေးမီကနေ Netflix ကနေပြသခဲ့တဲ့ “Kingdom” ဇာတ်လမ်းတွဲဟာ အခုလတ်တလောမှာ ပရိသတ်တွေ အထူးအကြိုက်တွေ့ခဲ့တဲ့ စီးရီးတခုလည်း ဖြစ်ပါတယ်။ ပြီးခဲ့တဲ့ ဇန်နဝါရီလ ၂၅ ရက်နေ့မှာ Netflix မှာ တင်ပြီးတဲ့နောက်ပိုင်း ကိုရီးယားစကားပြော အဲဒီဒရာမာဟာ ကမ္ဘာတဝန်းမှာရှိတဲ့ ပရိသတ်တွေရဲ့အားပေးမှုကိုလည်း ရရှိခဲ့ပါတယ်။
ပထမဆုံး စတင်ပြသခဲ့တဲ့ Season မှာတော့ အပိုင်း ၆ ပိုင်းရှိပြီး ပရိသတ်တွေကတော့ တိုင်းပြည်ကို ကာကွယ်ဖို့ အိမ်ရှေ့စံမင်းသားက ဘယ်လိုဆက်ပြီး ကြိုးစားမယ်ဆိုတာကို သိချင်နေကြပြီ ဖြစ်ပါတယ်။ ပြီးတော့ ပရိသတ်တွေကြားထဲမှာ Season 2 ကို ဘယ်တော့ ပြတော့မှာလဲ ဆိုပြီး သိချင်စိတ်တွေက ပိုမိုပြင်းပြလာပါတယ်။
အရင်တုန်းက ကိုရီးယားစီးရီးတွေထဲမှာ မမြင်ခဲ့ရဖူးတဲ့ သမိုင်းနောက်ခံ Zombie သည်းထိတ်ရင်ဖို ဇာတ်လမ်းတခုကို အခြေခံထားပြီး စာရေးဆရာ Kim-Eun Hee ရေးသားတဲ့ ” Kingdom of the Gods” ဝတ္ထုကို အခြေခံထားပါတယ်။
ဂျိုဆွန်းခေတ်မှာရှိခဲ့တဲ့ အိမ်ရှေ့စံမင်းသားက တိုင်းပြည်မှာ ပလိပ်ရောဂါလိုမျိုး ကပ်ရောဂါတခုကို စုံစမ်းစစ်ဆေး အဖြေထုတ်ရတဲ့ တာဝန်ကို ထမ်းဆောင်ခဲ့ပါတယ်။ ဒါပေမဲ့ ဂျိုဆွန်းရဲ့ မြို့တော်အထိ အဲဒီ ပလိပ်ရောဂါ ပျံ့ပွားလာစေမှု မရှိစေဖို့အတွက် အသက်စွန့်ပြီး ကာကွယ်တဲ့ အကြောင်းပါ။
မင်းသား Ju Ji-hoon က အိမ်ရှေ့စံ၊ မင်းသား Ryu Seung-ryong က အမတ်ချုပ်ကြီး၊ မင်းသမီး Bae Doo-na က ဆေးအကူ မိန်းကလေးအဖြစ် သရုပ်ဆောင်ထားကြပါတယ်။ Season 2 စတင်ပြမယ့်ရက်ကို အခုအထိ မကြေညာသေးပေမယ့် ထုတ်လုပ်ရေးလုပ်ငန်းကိုတော့ အခု ဖေဖော်ဝါရီလထဲမှာ စတင်မယ်လို့ Koreafilm ဝက်ဘ်ဆိုက်မှာ ဖော်ပြထားပါတယ်။
တချို့သတင်းတွေရဲ့ အဆိုအရကတော့ ရိုက်ကူးရေးဟာ ယခုနှစ် ဇွန်လအထိ ကြာနိုင်တယ်လို့ ခန့်မှန်းထားပါတယ်။ ဆိုလိုချင်တာကတော့ နောက်ထပ် Season 2 ကတော့ နောက်နှစ် အခုလို အချိန်လောက်ရောက်မှပဲ ထွက်လာနိုင်ပါတယ်။
The post “Kingdom” စီးရီးရဲ့ Season 2 ကို မကြာမီ မြင်တွေ့ရဖွယ်ရှိ appeared first on ဧရာဝတီ.