Myanmar Idol Season 3 မှတဆင့် ပရိသတ်များရဲ့ချစ်ခင်မှုကို ရရှိခဲ့သူတဦးဖြစ်တဲ့ အဆိုတော် မေမဒီကတော့ အနုပညာလမ်းကြောင်းပေါ်မှာ ပေါ်လိုက်ပျောက်လိုက်နဲ့ မုန့်လုံးရေပေါ် မဖြစ်ချင်တဲ့အတွက် ပရိသတ်နဲ့ အဆက်မပြတ်အောင် နေတယ်လို့ ပြောပါတယ်။
“အခုဆိုရင် သီချင်းဆိုပြိုင်ပွဲတွေက အများကြီးဖြစ်လာပြီ။ အဆိုရှင်တွေလည်း နည်းတာ မဟုတ်ဘူး။ ပြိုင်ပွဲတခုပြီးရင် အဆိုတော်တွေ အများကြီး ထွက်သွားတယ်။ ဒါပေမဲ့ အနုပညာလမ်းကြောင်းပေါ်မှာ ကျန်ခဲ့တဲ့သူက တအား နည်းတယ်။ အဲဒီလိုမျိုး ပေါ်လိုက် ပျောက်လိုက်နဲ့ မုန့်လုံးရေပေါ် မဖြစ်အောင် ကြိုးစားနေတယ်။ ပရိသတ်တွေနဲ့ အဆက်မပြတ် နေရအောင် အွန်လိုင်းမှာ ဓာတ်ပုံတွေ တင်ပေးတယ်။ ပရိသတ်တွေနဲ့ စကား အမြဲတမ်းပြောတယ်။ အွန်လိုင်းကနေ သီချင်းလေးတွေ Free တင်ပေးတယ်။ အဲဒီလိုလုပ်ပြီး ပရိသတ်နဲ့အဆက်မပြတ်နေနေရတယ်”လို့ မေမဒီကပြောပါတယ်။
မကြာခင်မှာလည်း သူမကိုယ်တိုင် ရေးသားထားပြီး ဆိုဖီယာနဲ့ တွဲဖက် သီဆိုထားတဲ့ “ယာယီ” ဆိုတဲ့ သီချင်း ထွက်ဖို့ရှိတယ်လို့ ပြောပါတယ်။
“ညီမ ရေးထားတဲ့ ယာယီ ဆိုတဲ့သီချင်း ခပ်မိုက်မိုက်လေးပေါ့။ ယောကျ်ားလေးတွေကို သိပ်ဂရုမစိုက်တော့ဘူး ဆိုတဲ့ ပုံစံဆိုတော့ ဆိုဖီယာရဲ့ပုံစံမျိုး ဖြစ်နေတာပေါ့။ သူဆိုနေကျ ပုံစံမျိုးလည်း ဖြစ်တယ်။ သူနဲ့ လိုက်မယ်ထင်တယ်။ ညီမ တယောက်တည်းလည်း မဆိုချင်ဘူး။ နှစ်ယောက်ပေါင်းပြီး လုပ်လိုက်မယ်။ အိုင်ဒေါက ထွက်ထားတဲ့ မောင်နှမတွေဆိုတော့ တူတူ တွဲလုပ်ဖြစ်သွားတာ”လို့ မေမဒီက ပြောပါတယ်။
ဆိုဖီယာနဲ့ မေမဒီတို့ နှဟ်ဦးကတော့ ပြိုင်ပွဲမှာ Season ချင်း မတူပေမယ့် နှစ်ယောက်သားက အပြင်မှာလည်းတွဲဖြစ်ပြီး သီချင်းနဲ့လည်း လိုက်ဖက်မှုရှိတာကြောင့် လုပ်ဖြစ်ခဲ့တာလို့ ဆိုပါတယ်။
သီချင်းကို ကိုယ်တိုင် ဖန်တီးဖြစ်ပုံနဲ့ ပတ်သက်ပြီးတော့ “ရင်တွင်း ခံစားချက်ပါ။ ယာယီဆိုတော့ နည်းနည်းတော့ စဉ်းစားစရာ ဖြစ်လိမ့်မယ်။ ကောင်လေးတယောက်နဲ့ တွဲတယ်ပေါ့။ နင်နဲ့ ငါနဲ့က ယာယီတွဲတယ်ပေါ့။ အဲဒီလိုသဘောမျိုး။ လှည့်ကွက်တွေကို ကောင်မလေးက သိပြီးတော့ ဂရုမစိုက်တော့တာပေါ့။၂၀၁၇ မှာ ရေးဖြစ်တာ။ လုပ်ခဲ့တဲ့ သီချင်းဟောင်းတွေကို ပြန်ရှာရင်းနဲ့ ဒီသီချင်းလေးက လုပ်ရင် ပေါက်မယ်။ ဆိုဖီယာနဲ့လုပ်ရင် မိုက်မယ်ဆိုပြီး လုပ်ဖြစ်သွားတာပါ။ Music ကတော့ ကိုချမ်းအေးဝင်းတီးပေးတာပါ” လို့ မေမဒီက ပြောပါတယ်။
ပြိုင်ပွဲပြီးသွားကတည်းက သီချင်းများကို ဖန်တီးကာ ပြုလုပ်နေလျက်ရှိပြီး သီချင်းပေါက်တာကတော့ ပရိသတ်နဲ့ ခံစားချက်အတိုင်းပဲလို့ပြောပါတယ်။
“ကိုယ်လုပ်လိုက်တဲ့ အလုပ်တခုက ပေါ့ပျက်ပျက် မဖြစ်ဖို့ အရေးကြီးတယ်။ ပြီးစလွယ်ဆိုတာထက် တကယ် စေတနာပါဖို့ အရေးကြီးတယ်။ စေတနာပါတဲ့ အရာတော်တော်များများက အောင်မြင်သွားတာများတယ်။ ညီမလည်း ပရိသတ်ကို စေတနာအမှန်နဲ့ အလုပ်တွေ လုပ်ပေးတယ်”
“Facebook မှာ သီချင်းတွေ တင်တယ်။ ကိုယ့်အတွက် ဘာမှပြန်မရဘူး။ သူတို့တွေ သီချင်းတပုဒ်ကို နားထောင်ပြီး ပျော်ရွှင်ရတာပဲဖြစ်ဖြစ် မိုက်တယ်ဆိုပြီး ခံစားချက်နဲ့ တိုက်ဆိုင်သွားရင် ကျေနပ်တယ်။ အဲဒီတခုပဲရှိတယ်။ ဒီဘက်ခေတ်မှာ တနေ့ကို သီချင်းတွေက အများကြီးထွက်နေတာဆိုတော့ မပြောတတ်ဘူး။ ပရိသတ်တွေရဲ့ခံစားချက်အတိုင်းပေါ့” လို့ မေမဒီက ပြောပါတယ်။
မေမဒီကတော့ Myanmar Idol Season 3 ရဲ့ Topt 10 မှာ ပါဝင်ခဲ့ပြီး ပရိသတ်ချစ်တဲ့ အဆိုတော်တယောက် ဖြစ်လာခဲ့တာ ဖြစ်ပါတယ်။
The post အနုပညာလမ်းကြောင်းမှာ ပေါ်လိုက် ပျောက်လိုက်နဲ့ မုန့်လုံးရေပေါ် မဖြစ်ချင်တဲ့ မေမဒီ appeared first on ဧရာဝတီ.