ဟယ်ရီပေါ်တာဝတ္ထုထဲမှ ဇာတ်ကောင်နှစ်ခုကြား လိင်တူဆက်ဆံရေးရှိတယ်လို့ စာရေးဆရာမ J.K. Rowling ရဲ့ ဖွင့်ချချက်ဟာ ပရိသတ်တွေရဲ့ ဒေါသတကြီးနဲ့ တုံ့ပြန်ချက်တွေကို ရင်ဆိုင်ခဲ့ရပြီး ပရိသတ်တချို့ကတော့ ဒါဟာ ဝတ္ထုရေးဆရာမက အခုလတ်တလော ရေပန်းစားနေတဲ့အကြောင်းအရာတခုဆီ စာအုပ်ကို လမ်းကြောင်း ပြောင်းနေတာဖြစ်တယ်လို့ စွပ်စွဲလိုက်ကြပါတယ်။
၂၀၀၇ ခုနှစ်မှာ ဆရာမ Rowling က သူ့ရဲ့ ကမ္ဘာ့ရောင်းအား အကောင်းဆုံးစာအုပ်ထဲမှ Hogwarts ကျောင်းအုပ်ကြီး ပါမောက္ခ Albus Dumbledore ဟာ သူနဲ့ လုပ်ဖော်ကိုင်ဖက် မှော်ဆရာ Gellert Grindelwald နဲ့ ချစ်ကြိုက်ခဲ့ဖူးတယ်လို့ ထုတ်ဖော်ပြောခဲ့ပါတယ်။
ဆယ်စုနှစ်တခုကျော် ကြာခဲ့ပြီးတဲ့နောက် ဆရာမ Rowling က သူတို့နှစ်ဦးရဲ့ ကြားမှာ လိင်ပိုင်းဆိုင်ရာ ဆက်နွယ်မှုတခု ရှိခဲ့တယ်လို့ ပြောကြားခဲ့ရာကနေ ဆိုရှယ်မီဒီယာတွေပေါ်မှာ ဆရာမဟာ LGBT အသိုင်းအဝန်းဆီကနေ အမှတ်ရဖို့ ကြိုးစားနေတယ်၊ မျက်နှာသာရဖို့ကြိုးစားနေတယ်လို့ စွပ်စွဲမှုတွေဆီဦးတည်ခဲ့ကြပါတယ်။ အဲဒီလိုမျိုး ဝေဖန်ပြောကြားချက်တွေကိုတော့ ဆရာမ Rowling ရဲ့ အေးဂျင့်က တုံ့ပြန်ပြောကြားခဲ့တာ မရှိပါဘူး။
အခုလိုမျိုး စာရေးဆရာနဲ့ ရုပ်ရှင်ရိုက်ကူးထုတ်လုပ်သူတွေဟာ မူရင်းဇာတ်လမ်းကို ခေတ်သစ်အမြင်ပုံစံနဲ့ ပြောင်းလဲတာတွေ လုပ်လာတာဟာ အခုနောက်ပိုင်း တော်တော်လေးတွေ့ရများလာခဲ့ပါပြီ။ Marvel Comics အနေနဲ့လည်း သူတို့နောက်ဆုံး ထုတ်လုပ်ထားတဲ့ရုပ်ရှင် Captain Marvel မှာ မူရင်းကာတွန်း စီးရီးမှာ အမျိုးသားဇာတ်ကောင်ဖြစ်ပေမယ့် ရုပ်ရှင်ပြန်လည်ရိုက်ကူးတဲ့အခါ အဓိကဇာတ်ကောင်ကို အမျိုးသမီးအဖြစ် ဖန်တီးခဲ့တာဟာ ဝေဖန်ခံခဲ့ရပါတယ်။
အရင်တုန်းကလည်း ဆရာမ Rowling ဟာ လူဖြူ လိင်ကွဲချစ်သူ ဇာတ်ကောင်တွေ ကြီးစိုးတဲ့ စီးရီးကို အပြောင်းအလဲ တခုထည့်သွင်းဖို့ ကြိုးပမ်းခဲ့လု့ိ ဝေဖန်ခံခဲ့ရတာမျိုး ရှိခဲ့ပါတယ်။ ဥပမာ Harry Potter and The Cursed Child ပြဇာတ်မှာ Hermione နေရာကို လူမည်း သရုပ်ဆောင်တဦးကို သရုပ်ဆောင်စေဖို့ စိတ်ဆန္ဒရှိခဲ့မျိုး ဖြစ်ပါတယ်။ ဒါပေမဲ့ ပရိသတ်တော်တော်များများကတော့ ဟယ်ရီပေါ်တာ ကမ္ဘာမှာ အခုလိုမျိုး မတူကွဲပြားမှုကို မိတ်ဆက်ပေးလို့ ဘီလီယံနာ စာရေးဆရာမကို ကျေးဇူးတင်ခဲ့ကြပါတယ်။
Ref : asiaone
The post ဟယ်ရီပေါ်တာဝတ္ထုမှ ဇာတ်ကောင် ၂ခုကြား လိင်တူဆက်ဆံရေးရှိကြောင်း ပြောတဲ့ JK Rowling ဝေဖန်ခံရ appeared first on ဧရာဝတီ.