သရုပ်ဆောင် ဘယ်လောက် ကောင်းကောင်း ဒါရိုက်တာ စီစဉ်ညွှန်ကြားမှု သင်ပြမှုက သိပ်အဆင်မပြေဘူး ဆိုရင် ဇာတ်ကား ထင်သလောက် မကောင်းနိုင်ဘူးလို့ အခုနောက်ပိုင်း ဒါရိုက်တာအဖြစ်ပါ လုပ်ဆောင်နေတဲ့ သရုပ်ဆောင် မင်းဦးက ပြောပါတယ်။
“အခုလောလောဆယ်တော့ ဇာတ်လမ်းတွဲလေး ရိုက်နေတာပေါ့။ အက်ရှင် ကားလေးပါပဲ။ ကျနော်က Actor ပါ။ ဒါရိုက်တာလို့ ပြောရအောင်လည်း ဒါရိုက်တာအလုပ်က တပိုင်းတစပဲ ရှိပါသေးတယ်။ Actor ဘယ်လောက် ကောင်းကောင်း ဒါရိုက်တာ စီစဉ်ညွှန်ကြားမှု သင်ပြမှုက သိပ်အဆင်မပြေဘူးဆိုရင် ကျနော့်အထင် ဇာတ်ကား ထင်သလောက် ကောင်းမလာနိုင်ဘူးလေ။ ဒါရိုက်တာ အခန်းကဏ္ဍ အရေးကြီးတယ်လို့ ကျနော် ထင်တယ်။ ကျနော် အကယ်ဒမီ ရခဲ့တဲ့ ‘နင်စေရင်’ ဆိုရင် ဒါရိုက်တာ ပြောတဲ့အတိုင်း အကုန်လုပ်တယ်” လို့ မင်းဦးက ပြောပါတယ်။
ရုပ်ရှင်ဇာတ်ကား တကား ဖန်တီးရိုက်ကူးရာမှာ ဒါရိုက်တာရဲ့ အလုပ်က တာဝန်ကြီးတဲ့ အကြောင်းကိုလည်း မင်းဦးက အခုလိုပဲ ပြောပါတယ်။
“သူခိုင်းတဲ့အတိုင်း အကုန် ကြိုးစားလုပ်တယ်။ ပိုလည်း မလုပ်ဘူး။ ပြောရမယ်ဆိုရင် သရုပ်ဆောင်ဆိုတာက ဇာတ်ကားတကားမှာ ကိုယ်ပါဝင်ရမယ့် ကာရိုက်တာအရ သရုပ်ဆောင်ပိုင်း၊ အဝတ်အစားပိုင်း စသဖြင့် စဉ်းစားပြီးရင် ရပြီ။ ဒါရိုက်တာကျတော့ အရင်ဦးဆုံး တာဝန်ယူရတာက ပရိုဂျူဆာကို ဒီဇာတ်ကားကတော့ အဆင်ပြေမှာပါ စသဖြင့် တာဝန်ယူရတယ်။ နောက် သရုပ်ဆောင်တွေကို တာဝန်ယူရတယ်”
“ညီမရေ၊ သမီးရေ ဒီဇာတ်ကားကတော့ နင်နဲ့လိုက်တယ်။ ဦးမင်းဦးက တာဝန်ယူတယ် စသဖြင့် တယောက်ချင်းစီကို တာဝန်ယူရတယ်။ ဇာတ်တခုလုံးပေါ်မှာလည်း တာဝန်ယူရတာ ဆိုတော့ ဒါရိုက်တာ အလုပ်က အရမ်းကို တာဝန်ကြီးတယ်”လို့ မင်းဦးက ရှင်းပြပါတယ်။
ဒါရိုက်တာတိုင်းကို လေးစားတယ်ဆိုတဲ့ သရုပ်ဆောင် မင်းဦးက အနုပညာတခု ဖန်တီးတယ်ဆိုတာ လွယ်လွယ်လေးနဲ့ ဖြစ်မလာနိုင်ဘူးလို့ ဆိုပါတယ်။
“တကယ်တမ်းကျတော့ အနုပညာဆိုတာက ကျနော့်အမြင် ပြောရမယ်ဆိုရင် တကယ်ကို မလွယ်ဘူး။ ခက်ခဲတယ်။ ကျနော်ဆိုရင် ဒီစိတ်နဲ့ နေနေရတယ်။ ဇာတ်ကားပေါ်မှာပဲ စိတ်နှစ်ထားပြီးတော့ ငါဘယ်လို လုပ်ရင်ကောင်းမလဲ၊ ဇာတ်ကောင် တခုချင်းစီအပေါ်မှာ ဘယ်လိုလေးသွားရင် ကောင်းမလဲ၊ ဘယ်လို ကင်မရာ ဆိုရင်တော့ ပိုကောင်းမလဲ စသဖြင့် အသေးစိတ်က အစ လုပ်ချင်တာကြောင့် တချိန်လုံး ခေါင်းထဲ ထည့်ထားရတယ်။ အဲ့ဒါကြောင့် အနုပညာတခု ဖန်တီးတယ်ဆိုတာက လွယ်လွယ်လေးနဲ့ ဖြစ်မလာနိုင်ဘူး”
“ကျနော့်ထက် တရက် စောပြီးတော့ ဒါရိုက်တာ ဖြစ်တဲ့သူတွေကိုလည်း လေးစားတယ်။ တကယ်ပြောတာပါ။ ဘာဖြစ်လို့လဲဆိုတော့ ဒါရိုက်တာအလုပ် ဆိုတာက ဇာတ်ကားတကား မရိုက်ခင်ရော၊ ရိုက်နေတဲ့အချိန်ရော၊ ရိုက်ပြီးသွားတဲ့ အချိန်၊ ရုံတင်တဲ့ အချိန်ထိပါ တကယ်ကို မလွယ်တဲ့ ကိစ္စပါ။ အဲဒါကြောင့် တကယ်ကို ချီးကျူးပါတယ်။ နှစ်ရှည်လများ ဒါရိုက်တာအနေနဲ့ ရပ်တည်နေကြတဲ့ အနုပညာရှင်တွေကို တကယ်ကို လေးစားတယ်”လို့ မင်းဦးက ပြောပါတယ်။
သရုပ်ဆောင် မင်းဦးဟာ ၂၀၁၆ ခုနှစ်မှာ အကယ်ဒမီဆု ရရှိခဲ့ပြီး လက်ရှိအချိန်ထိ ပရိသတ် အားပေးမှုကို အခိုင်အမာ ရရှိထားပါတယ်။ မင်းဦးဟာ လက်ရှိမှာ ဒါရိုက်တာအဖြစ် ဇာတ်ကားတွေ ရိုက်ကူးနေပြီး ကိုယ်တိုင် ဒါရိုက်တာအဖြစ် ရိုက်ထားတဲ့ “ချူဆီ” ရုပ်ရှင်ကားကြီးကို ပရိသတ်တွေ အားပေးခဲ့ကြသလို မကြာခင်မှာလည်း သူ့ရဲ့ ဒုတိယမြောက် ရုပ်ရှင်ဇာတ်ကားကြီး “ကိုယ်ပွား” ကိုလည်း ကြည့်ရှုရတော့မှာ ဖြစ်ပါတယ်။
You may also like these stories:
ကာရိုက်တာတခုကို ပီပီပြင်ပြင်ပုံဖော်ဖို့ ခဲယဉ်းတယ်လို့ အိန္ဒြာကျော်ဇင် ပြော
ရုပ်ရှင်တခုတည်းမှာတင် အခန်းကဏ္ဍအမျိုးမျိုးကနေ ပါဝင်သရုပ်ဆောင်ခဲ့ကြသူများ
“John Wick 4” ရုပ်ရှင်ကို ၂၀၂၁ ခုနှစ်မှာ ကြည့်ရှုနိုင်မည်
ဖျော်ဖြေပွဲတွေ ပြန်လုပ်မယ်လို့ အဆိုတော် Britney Spears အတည်ပြု
The post “ဒါရိုက်တာ အလုပ်က အရမ်းကို တာဝန်ကြီးတယ်”လို့ မင်းဦး ပြော appeared first on ဧရာဝတီ.