နာမည်ကျော် ဟောလိဝုဒ်မင်းသား Keanu Reeves နဲ့ စကားလက်ဆုံ ကျချင်တဲ့ ပရိသတ်တွေအတွက် အခုတော့ အခွင့်အရေးတခု ပေါ်ပေါက်လာခဲ့ပြီ ဖြစ်ပါတယ်။ မင်းသားကို ချစ်ကြတဲ့ ပရိသတ်တဦးဟာ မင်းသားနဲ့ Zoom မှာ တွေ့ဆုံစကားပြောနိုင်မယ့်အပြင် တချိန်တည်းမှာပဲ ပရဟိတအသင်းတခုကို ငွေလှူဒါန်းနိုင်မှာလည်း ဖြစ်ပါတယ်။
အသက် ၅၅ နှစ်အရွယ် မင်းသား Reeves ဟာ ကောင်းမှုပြုလုပ်ဖို့အတွက် အခုလိုမျိုး ကိုယ့်ကိုယ်ကိုယ် လေလံပစ်လိုက်ရတဲ့အကြောင်းအရင်းကတော့ အမေရိကန်၊ Idaho ပြည်နယ်က ကင်ဆာရောဂါ ခံစားနေရတဲ့ ကလေးတွေကို ခွန်အားပေးတဲ့နေရာမှာ ထောက်ပံ့ ကူညီပေးနေတဲ့ Camp Rainbow Gold လို့ခေါ်တဲ့ ကလေးသူငယ်ကင်ဆာ ပရဟိတအဖွဲ့ကို ငွေကူညီပေးချင်လို့ ဖြစ်ပါတယ်။
လေလံဆွဲတဲ့ နေရာမှာ အနိုင်ရသူတဦးဟာ “အင်တာနက်ပေါ်က ချစ်သူ” လို့ ခေါ်ကြတဲ့ မင်းသားနဲ့ Zoom ကနေ ၁၅ မိနစ်ကြာ တွေ့ဆုံစကားပြောခွင့် ရရှိမှာဖြစ်ပါတယ်။ ဇွန်လ ၁၇ ရက်၊ စင်ကာပူစံတော်ချိန် မနက် ၉ နာရီ ၃၀ မိနစ်အချိန် မှာတော့ လေလံဈေးဟာ ဒေါ်လာ ၁၆,၄၀၀ အထိ ရောက်ရှိနေပြီ ဖြစ်ပါတယ်။
အဲ့ဒီ လေလံပေးတဲ့ ဝက်ဘ်ဆိုက်မှာ တကယ်လို့ ခြိမ်းခြောက်တာမျိုးနဲ့ မသင့်လျော်တဲ့ အပြုအမူမျိုးရှိခဲ့ရင် Camp Rainbow Gold အဖွဲ့နဲ့ အနုပညာရှင်ဘက်ကနေ ဖျက်သိမ်းခွင့်ရှိတယ်လို့ ဖော်ပြထားတာကြောင့် တကယ်လို့ လေလံအနိုင်ရသူ အနေနဲ့ ကိုယ့်ရဲ့ အပြုအမူကို သတိထားလုပ်ဆောင်ရမှာလည်း ဖြစ်ပါတယ်။
မင်းသားနဲ့ တွေ့ဆုံ စကားပြောနိုင်မယ့် အစီအစဉ်ကိုတော့ ဇူလိုင်လ ၆ ရက် ပတ်ဝန်းကျင်မှာ ပြုလုပ်သွားမယ်လို့ ဆိုပါတယ်။ လေလံဆွဲတဲ့ အစီအစဉ်ကိုတော့ ဇွန်လ ၂၂ ရက်နေ့မှာ ပိတ်သွားမယ်လို့ သိရပါတယ်။
လေလံပေးတဲ့ ဝက်ဘ်ဆိုက်မှာတော့ “အိမ်မှာ Zoom ကနေတဆင့် မင်းသားနဲ့ တွေ့ဆုံခွင့်ရမယ့် အခွင့်အရေးဟာ တကယ့်ကိုပဲ တန်ဖိုးမဖြစ်နိုင်လောက်အောင်ပါပဲ။ မေးခွန်းတွေကို အဆင်သင့်ပြင်ထားပါ။ မင်းသား၊ ဒါရိုက်တာ၊ ထုတ်လုပ်သူ၊ ဂီတပညာရှင် Keanu Reeves နဲ့ ၁၅ မိနစ်လောက် အချိန်ကုန်ဆုံးလိုက်ပါ” လို့ ဖော်ပြထားပါတယ်။
Camp Rainbow Gold လို့ခေါ်တဲ့ အဖွဲ့အနေနဲ့ အရင်တုန်းကလည်း Fifth Harmony အဖွဲ့ဝင် Ally Brooke နဲ့အတူ ၁၅ မိနစ် Zoom ဖျော်ဖြေပွဲ ပြုလုပ်ပြီး လေလံဆွဲတာတွေကို ဆောင်ရွက်ခဲ့ကြဖူးပါတယ်။
ဟောလိဝုဒ်ရဲ့ စိတ်ထားအကောင်းဆုံး အမျိုးသားတယောက်လို့ ဆိုကြတဲ့ မင်းသား Reeves ဟာ သူ့ရဲ့ ကောင်းမှုကုသိုလ် လုပ်ဆောင်မှုတွေကို ဆိုရှယ်မီဒီယာတွေပေါ်မှာ တင်လေ့ရှိသူ မဟုတ်ပါဘူး။ သူ့ရဲ့ အဓိက ဦးစားပေးဟာ ပုဂ္ဂိုလ်ဆိုင်ရာ လုံခြုံမှုဖြစ်တာကြောင့် လူမှုကွန်ရက်တွေပေါ်မှာ ရှိနေဖို့ ဆန္ဒ မရှိဘူးလို့ ၂၀၁၆ ခုနှစ်တုန်းက ပြောဖူးပါတယ်။
၂၀၁၉ ခုနှစ်မှာ Forbes မဂ္ဂဇင်းရဲ့ အဆိုအရ မင်းသားဟာ အသားတင်ပိုင်ဆိုင်မှု ဒေါ်လာ သန်း ၃၆၀ ရှိတယ်လို့ သိရပါတယ်။ လက်ရှိမှာတော့ သူဟာ Alexandra Grant ဆိုတဲ့ ချစ်သူနဲ့ တွဲနေပါတယ်။
Ref: cnalifestyle
You may also like these stories:
စူပါဟီးရိုးအဖြစ် သရုပ်ဆောင်ဖို့ Marvel ရဲ့ စိတ်ဝင်စားမှုကိုခံနေရတဲ့ Keanu Reeves
ပရဟိတ လှူဒါန်းမှုတွေကို လျှို့ဝှက်လုပ်ဆောင်လေ့ ရှိတဲ့ မင်းသား Keanu Reeves
The post Zoom မှာ Keanu Reeves နဲ့ စကားပြောနိုင်မယ့် အစီအစဉ် လေလံပေး appeared first on ဧရာဝတီ.