အမေရိကန်သမ္မတ ဒေါ်နယ်ထရမ့်က သူ့ရဲ့ ကမ်ပိန်း လူထုစုဝေးပွဲတွေမှာ Rolling Stones အဖွဲ့ရဲ့ နာမည်ကျော် သီချင်း “You Can’t Always Get What You Want” ကို အသုံးပြုနေမှုနဲ့ ပတ်သက်ပြီး သမ္မတ ထရမ့်အား တရားစွဲဆိုသွားမယ်လို့ Rolling Stones အဖွဲ့က ပြောဆိုလိုက်ပါတယ်။
အဲဒီတီးဝိုင်းဟာ သမ္မတ ထရမ့်အနေနဲ့ သီချင်းအသုံးပြုမှု ရပ်တန့်ရေးအတွက် BMI ဖျော်ဖြေမှုဆိုင်ရာ အခွင့်အရေးအဖွဲ့ကို တာဝန် ပေးအပ်လိုက်ကြောင်း ဇွန်လ ၂၈ ရက်နေ့မှာ Deadline က ရရှိခဲ့တဲ့ ထုတ်ပြန်ချက်ထဲမှာ ဖော်ပြထားပါတယ်။
Rolling Stones ရဲ့ တရားဝင် Twitter အကောင့်မှာ ဖော်ပြထားတဲ့ ထုတ်ပြန်ချက်ထဲမှာတော့ “BMI အဖွဲ့ဟာ သူတို့ရဲ့ သီချင်းတွေကို ခွင့်မပြုဘဲ အသုံးပြုမှုဟာ လိုင်စင်သဘောတူညီချက်ကို ချိုးဖောက်ရာရောက်တယ်လို့ Rolling Stones တီးဝိုင်းကိုယ်စား Trump ကမ်ပိန်းအဖွဲ့ထံ သတိပေးခဲ့ကြောင်း” ဖော်ပြထားပါတယ်။
တကယ်လို့် သမ္မတ ဒေါ်နယ်ထရမ့်အနေနဲ့ ဒီကန့်ကွက်မှုကို လျစ်လျူရှုပြီး ဆက်ပြီးတော့ လုပ်ဆောင်နေမယ်ဆိုရင် ခွင့်ပြုချက် မတင်ဘဲ သီချင်းအသုံးပြုမှုနဲ့ တားမြစ်မှုကို ချိုးဖောက်မှုတွေနဲ့ တရားစွဲဆိုမှုအား ရင်ဆိုင်ရမယ်လို့ ပြောဆိုထားပါတယ်။
ပြီးခဲ့တဲ့ ၂၀၁၆ ခုနှစ်တုန်းကလည်း သမ္မတ ထရမ့်က သူ့ရဲ့ လူထုစုဝေးပွဲတွေမှာ အဲ့ဒီသီချင်းကို အသုံးပြုခဲ့မှုကြောင့်ပဲ တီးဝိုင်းကနေ ကမ်ပိန်းအဖွဲ့ထံ စာထုတ်ပြီး သတိပေးခဲ့ရပါတယ်။ အဲ့ဒီသီချင်းကို အရင်တုန်းကတော့ ရီပါဘလစ်ကန် ပါတီကနဦး ရွေးကောက်ပွဲတွေမှာ ဖွင့်ခဲ့တာဖြစ်ပါတယ်။
BMI အဖွဲ့ကတော့ သမ္မတ ထရမ့်အတွက် လုပ်ဆောင်ပေးနေတဲ့ ရှေ့နေတွေဆီကနေ တုံ့ပြန်ချက် တစုံတရာ မရသေးဘူးလို့ ဆိုပါတယ်။ အခုလိုမျိုး ထရမ့်အနေနဲ့ သူတို့ရဲ့သီချင်းအသုံးပြုမှု ရပ်တန့်ရေးအတွက် တောင်းဆိုခံရတာ ဒါပထမဆုံး အကြိမ်တော့ မဟုတ်ပါဘူး။
အခုလ အစောပိုင်းတုန်းကလည်း ရော့ခ်ဂီတပညာရှင် Tom Petty ရဲ့ မိသားစုက ပြီးခဲ့တဲ့ ဇွန်လ၂၀ ရက်နေ့၊ Tulsa မြို့မှာ ပြုလုပ်ခဲ့တဲ့ လူထုစုဝေးပွဲတခုမှာ သမ္မတထရန့်က “I Won’t Back Down” သီချင်း အသုံးပြုခဲ့မှု ကိစ္စနဲ့ ဆက်စပ်ပြီး အသုံးပြုမှုရပ်တန့်ရေး စာတစောင်ကို ထုတ်ပြန်ခဲ့ပါတယ်။
ကွယ်လွန်သူ အဆိုတော် Petty က သူ့ရဲ့ သီချင်းကို အမုန်းတရား ကမ်ပိန်းမှာ အသုံးပြုတဲ့ သီချင်း ဘယ်တုန်းကမှ မဖြစ်စေချင်ခဲ့ဘူးလို့ Twitter မှာ တင်ခဲ့တဲ့ မိသားစုရဲ့ အိတ်ဖွင့်ပေးစာထဲမှာ ဖော်ပြထားပါတယ်။
ထရမ့်ဟာ ပြီးခဲ့တဲ့ ၂၀၁၆ ခုနှစ် သမ္မတ ရွေးကောက်ပွဲ ယှဉ်ပြိုင်ခဲ့စဉ် ကာလတုန်းက အိုဟိုင်းယိုးပြည်နယ်၊ Cleveland မြို့မှာ ပြုလုပ်ခဲ့တဲ့ ရီပါဘလစ်ကန်ပါတီရဲ့ ပွဲတခုမှာ “We Are The Champions” သီချင်းကို အသုံးပြုခဲ့လို့ အဲ့ဒီသီချင်းသီဆိုသူ Queen အဖွဲ့က စောဒကတက်ခဲ့ပါတယ်။
သမ္မတက သူတို့ရဲ့ သီချင်းတွေကို အသုံးပြုမှုကို ဆန့်ကျင်ကြတဲ့သူတွေထဲမှာ Pharrell Williams, Rihanna, Aerosmith, Adele, Neil Young နဲ့ ကွယ်လွန်သူအဆိုတော်ကြီး Prince ရဲ့ ပိုင်ဆိုင်မှုအကျိုးဆောင် အဖွဲ့တို့ ပါဝင်ကြပါတယ်။
သမ္မတရဲ့ ကမ်ပိန်းလူထုစုဝေးမှုတွေမှာ “Memory” သီချင်းကို အသုံးပြုမှုရပ်တန့်ပေးရေးအတွက် တေးရေးဆရာ Andrew Lloyd Webber ကို အဆိုတော် Betty Buckley ကလည်း တိုက်တွန်းထားပါတယ်။ Rolling Stones အဖွဲ့ရဲ့ “You Can’t Always Get What You Want” သီချင်းဟာ ၁၉၆၉ ခုနှစ်မှာ ထွက်ရှိခဲ့တဲ့ “Let It Bleed” အယ်လ်ဘမ်ထဲက သီချင်းတပုဒ်ဖြစ်ပါတယ်။
အဖွဲ့ခေါင်းဆောင် Mick Jagger နဲ့ ဂီတာသမား Keith Richards တို့ရေးသားခဲ့ကြတဲ့ အဲ့ဒီသီချင်းဟာ သမိုင်းမှာအကြီးကျယ်ဆုံး သီချင်း ၅၀၀ ထဲက တပုဒ် ဖြစ်တယ်လို့ Rolling Stone မဂ္ဂဇင်းရဲ့ စစ်တမ်းတခုမှာဖော်ပြထားပါတယ်။
Ref: cnalifestyle
You may also like these stories:
သားဖြစ်သူကို သီချင်းခွေသစ် ထုတ်ပေးမယ့် တွံတေးစိုးအောင်
ကိုဗစ်ကာလမှာ စိတ်မလေအောင် အစားအသောက်တွေ ချက်ရောင်းတဲ့ ပွင့်
သမီးတွေ ကျောင်းပြန်တက်ရမှာ စိုးရိမ်နေတဲ့ အဆိုတော် နီတာ
The post သမ္မတ ထရမ့်ကို တရားစွဲမယ်လို့ Rolling Stones သတိပေး appeared first on ဧရာဝတီ.